Kraist A Manaueta; Nuku non I Epwe Emowkutu Chuk
Nuku non Jises Krait ina ewe watten manaman mi kawor fan itach non ei manau. Mettoch meinisin mi tufich ngeni ir ekkewe mi nuku.
Pwi me fefinei achengicheng, ua kinisou ren ewe tufichin ne fos ngenikemi non ei Raninfelin Paska.1 Ewe asoren achasefan me Manausefanitan Jises Kraist a fen siwini manawan emon me emon kich fenfeino chok. Sia tongei Ii me fen ngeni Ii non kinisou me ngeni Semach won Nang.
Fansoun ekkewe wonu maram ra no, sia soposopono ne weires ren ew pandemic won fonufan. Ua ingeiti ami maamaaw me pochokunen ngun non ami weri semwen, mano, keimuno. Ua iotek iteitan pwe, non meinisin, oupwe mefi an ewe Samon tong ngeni kemi ese tongeni kauk. Ika oua ponuweni ami sossot ren pochokunen fofforun chon kuno, ewe ier a ano esap namotmuan.
Non ei soran, sia fen rong seni sou emwenin Mwichefen ekkewe ra fen feito seni meinisin fonuen fonufan mi masou. Ennetin, feiochun ewe kapas allim a fan itan meinisin sokkun mwicheich, kapas, me aramas. Ewe Mwichefenin Jises Kraist a ew an unusen fonufan mwichefen. Jises Kraist i nouch sou emwen.
Kinisoun, pwe pwan mwo ew pandemic ese tufichin amangano maritan An ennet. Ewe kapas allimen Jises Kraist ina met mi auchea non ei fonufan mi aosukosuk, tipekoum, me apwangapwang.
Emon me emon noun Kot a fich ngeni ewe tufichin rong me etiwa ewe chikaren, ngasenon porous an Jises Kraist. Ese pwan wor ew porous mi kon auchea ngeni ach pwapwa —iei me feinfeino chok.2 Ese pwan wor ew porous mi kon ur ren epinukunuk. Ese pwan wor ew porous a tongeni awesano tipengaw non ach mwicheich.
Nuku non Jises Krait ina ewe nongonongen nuku meinisin me ewe aanen manaman seni nang. Anongonong me ren ewe Aposen Paul, “Ese wor emon mi tongeni apwapwai Kot ika ese wor an nuku pwe ika emon a mochen epwe feito ren God, epwe fakkun nuku pwe mi wor Kot o epwe ngeni niwinin ir ekkewe mi kutta i.”3
Mettoch meinisin mi och non manau—meinisin tufichin feiochun met mi auchea esemuch—a poputa ren nuku. Mut ngeni Kot epwe nemenem non manauach a poputa ren nuku pwe I mi mochen epwe emweni kich. Ennetin aier a poputa ren nuku pwe Jises Kraist a wor an manaman ne nimeti, echikara, me apochokuna kich.4
“Ousap amam ewe manamanen Kot,” ewe soufos Moronai a apasa, “pun a angang non manaman, anongonong won ewe nuku an ekkewe noun aramas.”5 Ina ach nuku ewe a suki ewe manamanen Kot non ach manau.
Nge iwe, anganga nuku a togeni pwe ew mettoch mi weires. Fan ekkoch sipwe aureki ika kich mi tufichin awora nuku epwe naf ne angei ekkewe feioch mi ennetin auchea ngeni kich. Nge, ewe Samon a awesano ekkena nuokus seni kapasen ewe soufosun Puken Mormon Alma.
Alma a chok tingor sipwe mwan sosot won ewe kapas me “aea ew kukkunun kinikinin nuku, ewer, pwan mwo ika [sise] tongeni fori met epwe nap seni ach mochen sipwe nuku.”6 Ewe kapas “kukkunun kinikinin nuku” a achema ngeniei an ewe Samon pwon non paipen pwe ika mi wor ach “nuku epwe chok ussun nonnon efou foun ira mi fokkun kukkun,” sipwe tufichin “ereni ei chuk, Mwokutuno ikenan; iwe epwe chok mwokut; me esap or met epwe epetikich ach sipwe tongeni fori ren mettoch meinisin fan [itach].” 7
Ewe Samon mi weweiti ach apwangapwang. Kich meinisin sia turuno fan ekkoch. Nge I mi pwan sinei ach tufichin feifeita. Ewe foun ira mustard a poputa an foukukkun nge a marita ngeni efoch ira watte mi naf an machang repwe fas non panan kewe. Ewe foun ira mustard a esisinata ew kukkunun nuku nge mi mamarita nuku.8
Ewe Samon ese anamwota unusochun nuku senikich an epwe wor ach mumuta ngeni An unusochun manaman. Nge I a erenikich sipwe nuku.
Pwi me fefinei kana, ai sio ngeni kemi non ei nesosoran Easter pwe oupwe poputa ikenai ne anapano ami nuku. Ren ami nuku, Jises Kraist epwe anapano ami tufichin amwokutu ekkewe chuk non manauemi,9 inamo ami pwisin osukosuk repwe watte usun Mount Everest.
Meni ami chuk epwe ami anamon, samaw, ika pwan ekkoch ami osukosuk. Ami chuk repwe sokofesen, nge ponuwan ew me ew ami weires ina oupwe anapano ami nuku. Ena mi fiti angang. Chon kaeo mi chipwang me chon kuno mi tumunungaw repwe weires ar repwe awora ekis chok kinikinin nuku.
Ach sipwe forochu mettoch mi auchea sipwe achocho. Ach winiti ennetin chon kuno noun Jises Kraist ese pwan tiweno. Anapano ami nuku me apinukunuk non I mi auchea epwe wor achocho. Upwe awora nimu ekiek epwe anisikemi ne awatteno ena nuku me apinukunuk.
Aewin, kaeo Winiti emon mi chon kakaeo. Sineochu ekkewe pukefel me weweochuti an Kraist misin me angang. Sinei ewe nongonongen Kraist pwe oupwe weweiti manamanan ren manauemi. Etiwanong ewe ennet pwe ewe Achasefanin Jises Kraist mi fich ngeni kemi. A pwisin wata won I ami riaffou, ami mwan, ami apwangapwang, me ami tipis. A moni ewe niwinin me awora ewe manaman ren ami oupwe amwokutu meinisin chuk oupwe weri. Oua angei ena manaman ren ami nuku, me mochen tapweno mwirin I.
Amwokutu ami chuk mi auchea epwe wor manaman. Kaeo usun manaman. Manaman ra fis anongonong won ami nuku non ewe Samon. Nukanapen ena nuku wewen apinukunuku An mochen me fansoun—ifa usun me inet I epwe efeiochu kemi ren manamanen aninis oua mochen. Epwe chok ren ami ousapnuku epwe omwochu Kot seni an epwe efiochu kemi ren manaman ne amwokutu chuk non ami manau.10
Wattenon ami kaeo usun ewe Chon Amanau, epwe emecheresi ami apinukunuk non An umoumoch, An tong esemuch, me An apochokuna, echikara, me ngasenon manaman. Ewe Chon Amanau ese kon arap ngeni kemi nap seni nupwen oua weri me toki ew chuk ren nuku
Oruwan, finata ne nuku non Jises Kraist. Ika mi wor ami tipemwaramwar usun Kot ewe Sam me Noun Anamon, are usun pungun ewe Niwinsefanito ika ennetin an Joseph Smith kokko seni nang pwe emon soufos, finata ne nuku11 me sopweno ne nikitu. Wano ami kapaseis ngeni ewe Samon me ngeni ekkoch nenien kaeo mi ennet. Kaeo ren ewe mochenin nuku nge esap ren ewe apinukunuk pwe ka tongeni kuna och muan non manauen emon soufos ika tipefesen non ekkewe pukefel. Kouno ne anapano ami tipemwaramar ren ami aporouser ngeni ekkoch chon tipemwaramwar. Mut ngeni ewe Samon epwe emweni kemi won ami sai ne kutta pekin ngun.
Eunugatin, foffor non Nuku. Met oupwe fori ika mi wor ami watten nuku? Ekieki ussun. Makkei usun. Mwirin angei pwan och nuku ren ami fori och mettoch mi aucheani pwan och nuku.
Aruwanin, angei ekkewe angangepin non nimenimoch. Angangepin ra suki ewe manamanen Kot fan iten manauemi.12
Me enimuwan, tingorei Sememi non Nang, non iten Jises Kraist, ren aninis.
Nuku mi fiti angang. Angei pwarata mi fiti angang. Nge “io mi tingor epwe angei o are emon epwe kutta epwe kuna o ewe asam epwe suk ngeni emon mi fichifich.”13 Kot mi sinei met epwe anisi ami nuku epwe mar. Tingor, me mwirin pwan tingor sefan.
Emon ese nuku epwe apasa pwe nuku fan iten ewe mi apwangapwang. Nge ei sokkun ekiek ese fiich ngeni ewe manaman en nuku. Met noun ewe Chon Amanau kewe Aposel repwe fen sopweno ne afanafana An nongonong mwirin An mano, ren ar annomu manauer non osukosuk, ika ra fen tipemwaramwarei I?14 Met Joseph me Hyrum Smith repwe fen mano ren ninnino ar tumunu ewe Niwinsefaniton an ewe Samon Mwichefen tiwenon chok ika mi wor ar ennetin pwarata pwe mi ennet? Met arap ngeni 2,000 Souneng repwe fen mano won ewe aan15ika mi wor ar tipemwaramwar pwe we kapas allimen Jises Kraist a fen niwinsefan? Ennetin, nuku ina ewe manaman a atufichi ekkewe nipwakengaw repwe fori met ese tufich.
Kosap ekisano ewe nuku a fen wor reom. Mi fiti nuku ne choni ewe Mwichefen me nonnom non nikitu. Mi fiti nuku ne tapweno mwirin ekkewe soufos nap seni mi sinenap me ekiek mi itefouno. Mi fiti nuku ne anganga ew misin fansoun ew pandemic. Mi fiti nuku ne manaueni ew manau mi nimenimoch nupwen ewe fonufan a pesei pwe an Kot annukun nimenimoch a minen nom. Mi fiti nuku ne afanafana ewe kapas allim ngeni semirit non eu fonufan mi sani mettochun inis. Mi fiti nuku ne sio fan iten manauan emon atongeach, me fen watten nuku ne etiwa ponuwan ese och.
Ruu ier ano, Sister Nelson me ngang aua feinno won eu sai ngeni Samoa, Tonga, Fiji, me Tahiti. Ew me ew ekkei muu a fen weri pungu choun ran ren fitu ran. Chon mwichefen ra echikipin me iotek pwe kewe mwich nukun epwe eppet seni ewe pungun ran.
Non Samoa, Fiji, me Tahiti, nupwen chok ekkewe mwich ra poputa, ewe pungun ran a kouno. Nge non Tonga, ewe pungun ran ese kouno. Nge, 13,000 Souneng mi tupwen ra feito fitu awa me mwan an epwe wor ar sea, ra tipepos ne witiwit non ewe punguchoun ran, me mwirin ra mwot ru awa non ew mwich mi chechen.
Aua kuna nuku mi pochokun mi mamarita nein ekkei chon won fonu—nuku mi naf an epwe akounoi ewe pungun ran me nuku mi tiniken nupwen ewe pungun ran ese kouno.
Ekkewe chuk non manauach rese kan soun mwokut usun me nupwen sia mochen. Nge ach nuku fansoun meinisin epwe chok amwokutu kichino mwan. Nuku fansoun meinisin mi anapano ach angei manamanen kot.
Oupwe sinei: ika mettoch me aramas meinisin non ewe fonufan en mi nuku repwe apwangapwangeno, Jises Kraist me An Mwichefen resap tongeni apwangapwang senuk. Ewe Samon ese tongeni asoso nge I ese pwan annut.16 I “ewe chok nanew, ikenai, me [nesor].”17 I esapw tongeni poutano An pwon,18 An kewe pwon ika An Tong ren Noun aramas. A anganga manaman ikenai me epwe anganga manaman nesor.19
Nuku non Jises Krait ina ewe watten manaman mi kawor fan itach non ei manau. Mettoch meinisin mi tufich ngeni ir mi nuku.20
Ami nuku mi marita non I epwe amwokutu chuk—esap ewe chukun fau mi enninga ewe fonufan nge ekkewe chukun riaffou non manauemi. Ami nuku mi napeno epwe anisi kemi ne siwini weires ngeni ami marita me tufich ese wor nonnon.
Non ei Raninifelin Easter, fiti anonnonun memefin tong me kinisou, ua apasata ai pwarata sefan pwe Jises Kraist a ennetin manausefan. I a manaueta pwe epwe emweni An Mwichefen. I a manaueta pwe epwe efeiochu manauen noun Kot meinisin, ian chok repwe nom ia. Ren nuku non I, sia tongeni amwokutu ekkewe chuk non manauach. Ua wesen pwarata non itan Jises Kraist mi pin, amen.