Pukfel
Alma 41


Sopun 41

Non ewe Manausefan aramas repwe feito ngeni ew nikinikin pwapwa esemuch are riaffou esemuch—Fofforungaw esap tongeni pwapwa—Aramas ra ekiekin mochenin fonufan rese apinukunuk non Kot me non ewe fonufan—Emon me emon aramas a angei sefan non ewe Niwinsefan ekkewe napanap me nikinik ra fen angei non ar manau won ei fonufan. Arap ngeni 74 Ier Mwen Kraist.

1 Iwe iei, nei anuon, a wor ekis met upwe apasa usun ewe niwinsefan usun minne ua fen apasa; pun nengeni, ekkoch ra fen angawano ekkewe pukefel, me ra fen unusen muan pokiten ei mettoch. Iwe ua weweiti pwe om ekiek a fen pwan aurek usun ei mettoch. Nge nengeni, upwe awewei ngonuk.

2 Ua apasa ngonuk, nei anuon, pwe ewe kokkotun niwinsefan mi auchea ngeni ewe pungochun Kot; pun mi auchea pwe mettoch meinisin repwe niwin ngeni pwisin wesewesen tettenir. Nengeni, mi auchea me pung, anongonong won ewe manaman me manausefan an Kraist, pwe ewe ngunun aramas epwe niwin ngeni inisin, me pwe ew me ew kinikinin ewe inis epwe niwin ngeni inisin we.

3 Iwe mi auchea ngeni ewe pungochun Kot pwe aramas repwe kapung anongonong won ar kewe angang; iwe ika ar kewe angang repwe öch non ei manau, me mochenin netiper mi öch, iwe repwe pwan, atun ewe ranin soponon, niwin ngeni met minne mi öch.

4 Iwe ika ar kewe angang mi ngaw repwe niwin ngeni ir pwe repwe ngaw. Iei minne, mettoch meinisin repwe niwin ngeni wesewesen tettenir, mettoch meinisin ngeni wesewesen napanaper—manauach iei epwe manausefan ngeni inis ese tongeni mano, kiteter ngeni esap kiteter—manausefan ngeni pwapwa esemuch pwe repwe muuni ewe muun Kot, are ngeni riaffou esemuch pwe repwe muuni ewe muun ewe tefin, ewe ew won efoch pau, ewe pwan ew won ewe efoch—

5 Ewe emon a manausefan ngeni pwapwa anongonong won an mochenin pwapwa, are öch anongonong won an mochenin öch; iwe ewe pwan emon ngeni ngaw anongonong won an mochenin ngaw; pun usun a fen mochen epwe fori ngaw unusen ewe ran iwe epwe pwan angei niwinin mi ngaw nupwen ewe pwinin epwe wareto.

6 Iwe epwe pwan ina me won ewe efoch pau. Ika a fen aier seni an kewe tipis, me mochen wenechar tori nesoponon ranin kewe, iwe epwe pwan angei niwinin ngeni wenechar.

7 Ikkei ir ekkewe ra ngaseno me ren ewe Samon; ewer, ikkei ir ekkewe ra fen katou, pwe ra fen ngaseno seni ena pwinin rochopwak esemuch; iwe iei ra uta are turuno; pun nengeni, ir pwisin nour sou apung, ika repwe fori mi öch are fori mi ngaw.

8 Iei, ekkewe annukun Kot rese tongeni siwin; iei minne, ewe aan mi monneta pwe ion chok epwe fetan won iwe epwe manau.

9 Iwe iei nengeni, nei anuon, kosap sotuni pwan fan ew ne tipis ngeni om Kot usun ekkena kinikinin nongonong mi ennet, minne ka fen sotuni ne fori tipisin.

10 Kosap ekieki, pokiten a fen affateno usun niwinsefan, pwe kopwe tongeni niwin seni tipis ngeni pwapwa. Nengeni, ua apasa ngonuk, fofforungaw esap tongeni pwapwa.

11 Iwe iei, nei anuon, aramas meinisin ekkewe ra nom non ew nikinikin inis, are upwe apasa, non ew nikinikin mochenin fonufan are non ewe kipwinin riaffou me non ekkewe fofon angangangaw; ir rese apinukunuk non Kot me non ewe fonufan, me ra fen ungeni napanapen Kot; iei minne, ra nom non ew nikinik mi ungeni napanapen pwapwa.

12 Iwe iei nengeni, iei wewen ewe kapas niwinsefan pwe sipwe angei ew mettoch non ew wesewesen nikinikin me wanong non ew esap wesewesen nikinikin, are wanong non ew nikinik mi sossor seni napanapan we?

13 O, nei anuon, esap iei usun; nge wewen ewe kapas niwinsefan pwe sipwe aniwini sefani ngaw ngeni ngaw, are mochenin fonufan ngeni mochenin fonufan, are mettoch usun ewe tefin ngeni mettoch usun ewe tefin—öch ngeni met minne mi öch; tupwon ngeni met minne mi tupwon; pung ngeni met minne mi pung; umoumoch ngeni met minne mi umoumoch.

14 Iei minne, nei anuon, tumunu pwe kopwe umoumoch ngeni pwium kewe; aninis non pung, kopwe kapung non wenechar, me soposopono ne fori mi öch; iwe ika kopwe fori ekkei mettoch meinisin kopwe angei niwinum; ewer, kopwe angei umoumoch epwe niwin sefan ngonuk; kopwe angei pungoch epwe niwin sefan ngonuk; kopwe angei ewe kapung mi wenechar epwe niwin sefan ngonuk; me kopwe angei öch epwe niwin sefan ngonuk.

15 Pun met minne ka tinau epwe niwin ngonuk, me epwe niwinsefan; iei minne, ewe kapas niwinsefan a unusen apungu ekkewe mi tipis, me esap epichano i non och napanap.