1 Iei non ewe fansoun non ewe inikken ierin muun ekkewe sou apung won ekkewe aramasen Nifai, mwirin an Moronai a angei me anneani noun Ilaman we toropwe, a fokkun pwapwa pokiten ewe tufich, ewer, ewe fokkun fetanoch minne Ilaman a fen ani, ne angei ekkewe fonu minne ir mi ono.

2 Ewer, iwe a affatano ngeni noun kewe aramas meinisin, non unusen ewe fonu mi rokopwanino non ena kinikin ikewe a nom ie, pwe repwe pwan pwapwa.

3 Iwe non ewe fansoun pwe a mwitir tinano echo toropwe ngeni Paoran, a mochen pwe i epwe annuku mwan pwe repwe ionfengen pwe repwe apochokuna Ilaman, are ekkewe sounfiu noun Ilaman, ren ewe popun pwe epwe mecheres ne tongeni amwochu ena kinikinin ewe fonu minne a fen amwarar an fetanoch ne angei sefani.

4 Iwe non ewe fansoun nupwen Moronai a tinano ei toropwe ngeni ewe fonuen Saraemla, a poputa sefan ne fori ew kokkot pwe i epwe tongeni angei nussun ekkena fonu me teninimw minne ekkewe chon Leiman ra fen angei seni ir.

5 Iwe non ewe fansoun pwe nupwen Moronai a fori amonnetan an epwe no ungeni ekkewe chon Leiman ne maun, nengeni ekkewe aramasen Nifaia, ekkewe ra fen ionfengen seni ewe teninimwen Moronai me ewe teninimwen Liai me ewe teninimwen Morianton, ra chu ren maun me ren ekkewe chon Leiman.

6 Ewer, pwan mwo ekkewe ra fen echimw pwe repwe suno seni ewe fonuen Mantai, me seni ewe fonu mi rokopwani, ra feito me choni ekkewe chon Leiman non ei kinikinin ewe fonu.

7 Iwe iei pokiten ra fokkun chommong, ewer, me ra angei chochon sounfiu seni ran ngeni ran, me ren annuk an Ammoron ra feito ungeni ekkewe aramasen Nifaia, iwe ra poputa ne nireno ren ew fokkun watten wachemuken ninnino.

8 Iwe nour kewe sounfiu ra fokkun chommong ina pwata ekkewe nussun aramasen Nifaia ra echimw ar repwe su me mwer; iwe ra mwo pwan feito me choni ekkewe sounfiun Moronai.

9 Iwe iei pokiten Moronai a ekieki pwe epwe wor mwan repwe titino ngeni ewe teninimwen Nifaia, ren aninisin ekkewe aramas pwe repwe amwochu ena teninimw, me pokiten mi sinei pwe mi mecheres an epwe eppeti ewe teninimw seni an epwe turunong ne poun ekkewe chon Leiman nap seni ar repwe angei sefani seni ir, a ekieki pwe epwe mecheres ar amwochu ena teninimw.

10 Iei minne a annomu noun kewe mwichen sounfiu meinisin pwe repwe amwochu ekkena neni minne a fen angei sefani ir.

11 Iwe iei, nupwen Moronai a kuna pwe ewe teninimwen Nifaia a ono a fokkun uren netipechou, me poputa ne tipemwaramwar, pokiten fofforungawen ekkewe aramas, ika pwe resap turunong ne poun pwir kewe.

12 Iei met a fis ren noun kewe kaptin mi nap meinisin. Ra tipemwaramwar me pwan ingeno pokiten fofforungawen ekkewe aramas, iwe ei pokiten fetanochun ekkewe chon Leiman me wor.

13 Iwe non ewe fansoun pwe Moronai a song ren ewe government, pokiten ar rese afani usun ngasenon muur we.