Faamautinoaina o se Faamasinoga Amiotonu
Ina ia mautinoa se faamasinoga amiotonu, o le a aveesea e le taulaga togiola a le Faaola le lavelave o le lē iloa o se mea ma le matuitui tiga o faatiga na faia e isi.
Ua Aoao Mai e le Tusi a Mamona le Aoaoga Faavae a Keriso
Ia Oketopa talu ai, sa luiina ai i tatou e Peresitene Russell M. Nelson e mafaufau pe faapefea ona ese o tatou olaga pe afai “e aveese faafuasei [lo tatou] malamalama na maua mai le Tusi a Mamona?”1 Sa ou mafaufau loloto i lana fesili, ou te mautinoa foi e faapena le toatele o outou. E tasi se manatu e oo mai pea lava—a aunoa ma le Tusi a Mamona ma lona manino e uiga i le mataupu faavae a Keriso ma Lana taulaga togiola, o fea ou te liliu i ai mo se filemu?
O le mataupu faavae a Keriso—lea e i ai mataupu faavae ma sauniga faaola o le faatuatua ia Keriso, salamo, papatisoga, le meaalofa o le Agaga Paia, ma le tumau e oo i le iuga—ua anoanoai taimi ua a’oa’o mai ai i tusitusiga paia uma o le Toefuataiga ae faatasi ma le mana faapitoa i totonu o le Tusi a Mamona.2 E amata le mataupu faavae i le faatuatua ia Keriso, ma o ona elemene uma taitasi e faalagolago i le faatuatuaina o Lana taulaga togiola.
E pei ona a’oa’o mai Peresitene Nelson, “Ua tuuina mai e le Tusi a Mamona le atoatoaga ma le malamalamaaga sili ona mausali o le Togiola a Iesu Keriso e maua i soo se mea.”3 O le tele lava o lo tatou malamalama i le meaalofa paia a le Faaola, o le tele foi lea o lo tatou iloa, i o tatou mafaufau ma i o tatou loto,4 o le moni o le faamautinoaga a Peresitene Nelson e faapea “o upumoni o le Tusi a Mamona ua i ai le mana e faamalolo ai, faamafanafana, toefuatai, fesoasoani, faamalosi, faatoafimalie, ma faafiafia o tatou agaga.”5
Ua Faamalieina e le Togiola a le Faaola Manaoga Uma o le Faamasinotonu
O se sao taua o le Tusi a Mamona e aumaia le filemu i lo tatou malamalamaaga o le Togiola a le Faaola, o ona aoaoga ia e faapea e faataunuu e le taulaga alofa mutimutivale a Keriso manaoga uma o le faamasinotonu. E pei ona faamatala mai e Alema: “Ua togiola ai e le Atua lava ia mo agasala a le lalolagi, e faataunuu ai le fuafuaga o le alofa mutimutivale, e faamalie ai manaoga o le faamasinotonu, ina ia mafai ona avea le Atua ma Atua ua atoatoa, faamasinotonu, ma se Atua alofa mutimutivale foi.”6 O le fuafuaga mutimutivale a le Tama7—ua ta’ua foi e tusitusiga paia o le fuafuaga tele o le fiafia8 po o le ata o le faaolataga9—sa le mafai ona faataunuuina se’i vagana ua faamalieina uma manaoga o le faamasinotonu.
Ae o a tonu lava “manaoga o le faamasinotonu”? Mafaufau i le aafiaga o Alema lava ia. Manatua, a o tama talavou, sa alu atu ma saili “e lepeti le ekalesia”10 O le mea moni, sa ta’u atu e Alema i lona atalii o Helamana e faapea sa ia “mafatia ai i tiga o seoli” ona sa ia mataalia i le “fasiotia o le toatele o fanau [a le Atua]” e ala i le taitai “ese atu i latou i le faafanoga.”11
Na faamatala e Alema ia Helamana e faapea na i’u ina oo mai le filemu ia te ia ina ua “tau ane [lona] mafaufau” i aoaoga a lona tama “e uiga i le afio mai o … Iesu Keriso … e togiola mo agasala a le lalolagi.”12 Sa augani atu Alema ua salamo mo le alofa mutimutivale o Keriso13 ona ia lagona lea o le olioli ma le toomaga ina ua ia iloa sa togiolaina e Keriso ana agasala ma totogi uma le faamasinotonu na manaomia. E toe fai atu, o le a le mea e manaomia e le faamasinotonu mai ia Alema? E pei ona a’oa’o mai mulimuli ane e Alema lava ia “E leai se mea le mama, e mafai ona mautofi i le malo o le Atua.”14 O lea, masalo o se vaega o le toomaga o Alema faapea, a na le ai’oia e le alofa mutimutivale, semanu e taofia o ia e le faamasinotonu mai le toe foi atu e mau faatasi ma le Tama Faalelagi.15
Ua Faamalolo e le Faaola Mamu’a e Lē Mafai ona Tatou Faamaloloina
Ae pe na taulai atu ea le olioli o Alema ia te ia lava—i lona aloese mai le faasalaga ma lona mafai ona toe foi atu i le Tama? Ua tatou iloa sa mafatia foi Alema ia i latou sa ia taitaieseina mai le upumoni.16 Ae sa le mafai e Alema ona faamalolo ma toefaafoi mai i latou uma sa ia taitaieseina. Sa le’i mafai e ia lava ona faamautinoa o le a tuuina atu ia i latou se avanoa talafeagai e aoao ai le mataupu faavae a Keriso ma ia faamanuiaina e ala i le ola ai i ona mataupu faavae faafiafiaina. Na te le’i mafai ona toe faafoi mai i latou atonu sa maliliu o tauaso pea ona o ana aoaoga sese.
E pei ona a’oa’o mai Peresitene Boyd K. Packer i se tasi taimi: “O le manatu na laveaiina Alema … o lenei: O le toefuataiina o le mea e le mafai ona e toefuata’i, o le faamaloloina o le manu’a e le mafai ona e faamaloloina, o le faaleleia o le mea na e lepetia ma e le mafai ona e faaleleia, o le faamoemoega tonu lea o le togiola a Keriso.”17 O upumoni faafiafiaina lea na “tau ane” i le mafaufau a Alema sa le gata na mafai ona toe faamamāina ai o ia ae o i latou foi sa ia faatiga i ai e mafai ona faamaloloina ma faaatoatoaina.
Ua Faamautinoaina e Le Taulaga a le Faaola se Faamasinoga Amiotonu
O le tele o tausaga a o le’i laveaiina Alema e lenei aoaoga faavae mautinoa, sa a’oa’o mai ai le Tupu o Peniamina e uiga i le lautele o le faamalologa ua ofoina mai e le taulaga togiola a le Faaola. Sa tautino mai e le Tupu o Peniamina e faapea o “tala fiafia o le olioli tele” na tuuina atu ia te ia e “se agelu mai le Atua.”18 Faatasi ma na tala fiafia o le upumoni o le a mafatia Keriso ma maliu mo a tatou agasala ma mea sese ina ia mautinoa “ia oo mai ai se faamasinoga tonu i luga o le fanauga a tagata.”19
O le a tonu le mea e manaomia e se “faamasinoga tonu”? I le fuaiupu e sosoo ai, sa faamatala e le Tupu o Peniamina faapea, ina ia mautinoa se faamasinotonu, sa togiola le toto o le Faaola “mo agasala a i latou o e na pauu i le solitulafono a Atamu” ma mo i latou “o e na maliliu e aunoa ma le iloa o le finagalo o le Atua e uiga ia te i latou, po o e na agasala i le lē iloa.”20 Sa ia aoao mai, o se faamasinotonu sa manaomia ai foi le “togiola o le toto o Keriso mo” agasala a fanau laiti.21
Ua a’oa’o mai e nei mau se aoaoga faavae mamalu: e faamaloloina e le taulaga togiola a le Faaola, i le avea ai ma se meaalofa foai fua, i latou o e agasala i le lē iloa o se mea—o i latou, e pei ona ta’ua e Iakopo e “leai se tulafono ua tuu mai.”22 O le tali atu a le tagata ia mo le agasala e faalagolago lea i le malamalama ua tuuina mai ia i tatou ma e faalagolago i lo tatou tomai e faaaoga ai lo tatou faitalia.23 Ua tatou iloaina lenei upumoni faamalolo ma mafanafana ona o le Tusi a Mamona ma isi tusitusiga paia o le Toefuataiga.24
E moni lava, afai ua i ai se tulafono ua tuu mai, lea tatou te iloa ai le finagalo o le Atua, tatou te tali atu la. E pei ona faamamafa mai e le Tupu o Peniamina: “Talofa i lē e iloa ua fouvale o ia e faasaga i le Atua! Ona e lē oo mai le olataga i se tasi faapena vagana ai e ala i le salamo ma le faatuatua i le Alii o Iesu Keriso.”25
O lenei foi mea o le tala fiafia o le mataupu faavae a Keriso. E le gata e faamalolo ma toefaaleleia e le Faaola i latou o ē agasala i le lē iloa o se mea, ae faapea foi, mo i latou o ē agasala e faasaga i le malamalama, ua ofo mai e le Faaola le faamalologa i luga o tuutuuga o le salamo ma le faatuatua ia te Ia.26
Masalo sa “tau ane” ai Alema i nei upumoni e lua. Pe mata na lagona moni ea e Alema le mea na ia faamatalaina o le “suamalie …[o le] olioli”27 pe ana ia manatu na faasaoina o ia e Keriso ae tuua pea e faavavau le tiga o i latou sa ia taitaieseina mai le upumoni? E mautinoa e leai. Mo Alema ina ia lagona le filemu atoatoa, sa manaomia foi e i latou sa ia faatiga i ai le avanoa ina ia faaatoatoaina ai.
Ae faapefea tonu la ona faaatoatoaina i latou—po o i latou atonu tatou te faatiga i ai? E ui tatou te le malamalama atoatoa i gasologa paia lea e faamaloloina ai e le taulaga togiola a le Faaola ma toefaaleleia, tatou te iloa lena mea e faamautinoa ai se faamasinoga amiotonu, o le a aveesea e le Faaola le lavelave o le lē iloa o se mea ma le matuitui tiga o faatiga na faia e isi.28 E ala i lenei mea ua Ia faamautinoa mai o le a tuuina mai i fanau uma a le Atua le avanoa, faatasi ma se vaaiga manino, e filifili ai e mulimuli ia te Ia ma talia le fuafuaga sili o le fiafia.29
O Le A Fusifusia e le Faaola Mea Uma sa Tatou Nutimomoiaina
O upumoni lava nei na aumaia ia Alema le filemu. Ma o nei lava upumoni e tatau foi ona aumaia ia i tatou le filemu tele. I le avea ai ma alii ma tamaitai natura, e taia uma ai i tatou, pe i nisi taimi e feto’ai ai, le tasi ma le isi ma mafua ai ona tiga. E pei ona molimau ai soo se matua, o le tiga e fesootai ma a tatou mea sese e lē ona o le fefe i lo tatou lava faasalaga ae o le fefe ne’i ono tatou faatapulaaina le fiafia o a tatou fanau pe i nisi ala e taofia ai i latou mai le vaaia ma le malamalama i le upumoni. O le folafolaga mamalu o le taulaga togiola a le Faaola e faapea, e tusa ai ma tatou mea sese o ni matua, Na te lē tuua’ia a tatou fanau ma folafola mai le faamalologa mo i latou.30 Ma e tusa pe latou te agasala e faasaga i le malamalama—e pei ona tatou agasala uma—e faaloaloa mai Lona aao o le alofa mutimutivale31 ma o le a Ia togiola i latou pe afai latou te vaai atu ia te Ia ma ola ai.32
E ui e i ai i le Faaola le mana e faaleleia ai mea e le mafai ona tatou faaleleia, ae ua Ia poloaiina i tatou ia faia mea uma tatou te mafaia e faia ai le toefaaleleiga o se vaega o la tatou salamo.33 E le gata e aveesea e a tatou agasala ma mea sese lo tatou sootaga ma le Atua ae faapena foi a tatou sootaga ma isi. Atonu o nisi taimi o a tatou taumafaiga e faamalolo ma faaleleia e faigofie e pei o se faatoesega, ae o isi taimi o le toefaaleleiga e ono manaomia ai le tele o tausaga o taumafaiga lotomaualalo.34 Ae, mo le tele o a tatou agasala ma mea sese, e le mafai ai ona tatou faamaloloina atoatoa i latou ua tatou faamanualiaina. O le folafolaga ofoofogia o le filemu e maua mai le Tusi a Mamona ma le talalelei toefuataiina e faapea, o le a fusifusia e le Faaola mea uma sa tatou nutimomoiaina.35 Ma o le a ia fusifusia foi i tatou pe a tatou liliu atu ia te Ia i le faatuatua ma salamo i faatiga na tatou faia.36 Ua Ia ofo uma mai nei meaalofa ona e alofa o Ia ia i tatou uma i se alofa atoatoa37 ma ona ua Ia tuuto e faamautinoa se faamasinoga amiotonu lea e faamamaluina uma le faamasinotonu ma alofa mutimutivale. Ou te molimau atu e moni nei mea i le suafa o Iesu Keriso, amene.