O Le Alofa Atoatoa e Faateaeseina ai le Fefe
Ia tatou faataatia ese lo tatou fefe ma ola i le olioli, lotomaualalo, faamoemoe, ma se talitonuga maumaututu tele o loo faatasi le Alii ma i tatou.
Ou uso e ma tuafafine pele, uo pele, e maeu le avanoa ma le olioli e feiloai ai o se Ekalesia i le lalolagi atoa ua lotogatasi i lo tatou faatuatua ma le alofa mo le Atua ma Lana fanau.
E sili lou faafetai mo le faatasi mai o lo tatou perofeta pele, Peresitene Thomas S. Monson. Peresitene, o le a matou taofia pea i o matou loto au upu o le taitaiga, fautuaga, ma le atamai.Matou te alolofa ia te oe, Peresitene Monson, ma e matou te tatalo e le aunoa mo oe.
I tausaga ua mavae, a o ou auauna atu o se peresitene o se siteki i Frankfurt, Siamani, sa sau ai se tuafafine pele ia te au sa le fiafia i le maea ai o se tasi o a matou sauniga faalesiteki.
“Oka se leaga?” sa ia fai mai ai. “Masalo e toafa pe toalima tagata na matua momoe lelei i le taimi o lau lauga!”
Sa ou mafaufau mo sina taimi ona tali atu lea, “ou te mautinoa lava o lena moe i le lotu o se moe sili ona maloloina i moe uma.”
Sa faalogo mai ai lo’u toalua lelei o Harriet i lenei talanoaga faasamasamanoa ma mulimuli fai mai o se tasi na o tali sili ona manaia na ou tuu atua.
O Le Fagua Tele
I ni faitau selau o ni tausaga talu ai i Amerika Tutotonu, o se mau na ta’ua o le “Fagua Tele” sa salalau atu i nuumaotua. O se tasi o ona faamoemoega autu o le fafagu lea o tagata sa foliga mai na momoe e tusa ma mataupu faaleagaga.
Sa tosina atu i ai le Taulealea o Iosefa Samita i mea na ia faalogo atu i ai mai failauga na avea ma se vaega o lenei fagua faalelotu. O se tasi lea o mafuaaga na tonu ai ia te ia ia saili naunautai atu i le finagalo o le Alii i se tatalo patino.
O nei failauga sa i ai se sitaili faafailauga malosi ma faalelagona, ma o lauga sa lauiloa mo lo latou faamamafaina tele o le matautia o le afi o seoli o loo faatali mai i le tagata agasala.1 O a latou lauga sa lei fiamomoe ai tagata—ae atonu sa mafua ai ni nai mea taufaafefe. O lo latou faamoemoega ma le mamanu sa foliga mai e taufaafefe ai tagata ia o mai i le lotu.
O le Fefe o se Taufaasese
I le talafaasolopito, e masani lava ona faaaogaina le fefe o se auala e fai ina ia faia ai e tagata se mea. Ua faaaoga e matua i a latou fanau, o pule i a latou tagata faigaluega, ma le au faiupufai i tagata palota.
O tagata tomai i fefaatauaiga e malamalama i le malosi o le fefe ma tele ai lava ina faaaogaina. O le mafuaaga lea e foliga mai ai nisi o faasalalauga faatosina e tauaveina se feau lemagagana e faapea afai tatou te le faatauina la latou sirio pe misia foi le taaloga vitio fou lava po o se telefoni feaveai, o le a lamatia i tatou i le ola i se olaga pagatia, o le oti toatasi ma le le fiafia.
Tatou te ataata i lenei mea ma mafaufau o le a tatou le lolo atu lava i ia taufaasese, ae o nisi taimi tatou te lolo ai lava. O le mea leaga, o nisi taimi tatou te faaaogaina ai ni auala faapena e uunaia ai isi e faia se mea tatou te mananao ai.
O la’u savali e lua ni ona faamoemoega i le asō: O le muamua o le uunaia lea o i tatou ia mafaufau loloto ma iloilo le tulaga lea tatou te faaaogaina ai le fefe e uunaia ai isi—e aofia ai i tatou lava. O le lona lua o le fautuaina atu lea o se auala lelei atu.
O le Faafitauli o le Fefe
Muamua, sei o tatou talanoaina le faafitauli o le fefe. I mea uma lava, o ai lava se isi o i tatou e lei faamalosia lava e le fefe ina ia tausami lelei, fai le fusipa’u o le nofoa, faamalositino atili, sefe se tupe, ia po o le salamo foi?
E moni lava e mafai e le fefe ona i ai sana faatosinaga malosi i o tatou uiga ma amioga. Ae o lena faatosinaga e foliga mai e le tumau ma papa’u. E seasea i ai i le fefe le mana e suia ai o tatou loto, ma o le a le suia ai lava i tatou i tagata e fiafia i le mea sao ma le e manao ia usiusitai i le Tama Faalelagi.
O tagata e fefefe e mafai ona tautatala ma faia ni mea sa’o, ae latou te le lagonaina ia mea sa’o. E tele ina latou lagonaina le leai o se faamoemoe ma le faatiga, po o le ita. I le aluga o taimi, o nei lagona e taitai atu ai i le le faatuatuaina, le usiusitai, ma le tetee.
Paga lea, o lenei auala taitaiseseina i le olaga ma le taitaiga e le o tapulaaina i le lalolagi faaletino. Ou te faanoanoa lava e faalogo atu i tagata o le Ekalesia e faaaogaina puleaga amioletonu—pe o totonu o o latou aiga, i o latou valaauga faale-Ekalesia, i le galuega, po o a latou fegalegaleaiga i aso taitasi ma isi.
E tele lava ina ta’usalaina e tagata le faatauemu o isi, ae latou te le o mafai ona vaaia lena mea ia i latou lava. Latou te faatonuina le tausisia o a latou lava tulafono faasamasamanoa, ae a le mulimulitaia e isi nei tulafono faasamasamanoa, latou te aoai i latou i faamatalaga, faalelagona, ma o nisi taimi e faaletino.
Na fetalai mai le Alii e faapea “ae a tatou … faaaoga ai le pule po o le puleaga po o le faamalosi i luga o agaga o le fanauga a tagata, i soo se tikeri o le amioletonu, … e aveese e le lagi i latou lava [ma] e faanoanoa le Agaga o le Alii.”2
Atonu e i ai taimi e faaosoosoina ai i tatou e faamaonia a tatou amioga e ala i le talitonu po o a lava auala e faaaoga ae ia faamaonia ai se taunuuga lelei. E oo lava foi ina tatou manatu o le pulepuletutu, taufaasese, ma le soonafai o le a faia mo le lelei o isi. E leai la, aua ua faamanino mai e le Alii, “o fua o le Agaga o le alofa, olioli, filemu, onosai, mataalofa, agalelei, faamaoni, agamalu, [ma le] le gaoia.”3
O Se Ala Sili Atu
O le faateleina o lo’u iloaina o lo’u Tama Faalelagi, o le faateleina foi lea o lo’u vaaia o le auala Na te musuia ma taitai ai Lana fanau. E le ita, e lotofaamagalo pe e le taui ma sui o Ia.4 O Lona lava faamoemoega—o Lana galuega ma Lona mamalu—o le faufautua o i tatou, faaeaina i tatou, ma taitai atu i tatou i Lona atoatoa.5
Sa faamatala atu e le Atua o Ia lava ia Mose o sē “alofa mutimutivale, ma le alofa fua, e telegese lona toasa, a e tele le alofa ma le faamaoni.”6
O le alofa o lo tatou Tama i le Lagi mo i tatou, o Lana fanau, e matua silisili ese lava mai lo tatou tomai e malamalama ai.7
O le uiga la o lenei mea e le amanaiaina pe faapasi e le Atua ia amioga e feteenai ma Ana poloaiga? Leai, leai lava!
Ae e finagalo o Ia ia suia e sili atu nai lo nao o a tatou amioga. E finagalo o Ia ia suia a tatou lava natura. E finagalo o Ia ia suia o tatou loto.
E finagalo o Ia ia tatou aapa atu ma pipiimau i le āi u’amea, faafetaia’ia o tatou popolega, ma laa i luma ma le lototoa ma agai i luga i le ala lauitiiti ma le vaapiapi. E finagalo o Ia i lenei mea mo i tatou ona e alofa o Ia ia i tatou ma ona o le ala lenei i le fiafia.
O lea la, e faapefea ona uunaia e le Atua Lana fanau ia mulimuli ia te Ia i o tatou aso?
Na Ia Auina Mai Lona Alo!
Na auina mai e le Atua Lona Alo Pele e Toatasi na Fanaua, o Iesu Keriso, e faaali mai ia i tatou le ala sa’o.
E uunaia e le Atua e ala i le faatauanau, tali-tiga, agamaualalo, agamalu, ma le alofa faamaoni.8 O loo i ai le Atua i lo tatou itu. E alofa o Ia ia i tatou, ma a tatou pa’u’u, e finagalo o Ia ia tatou tutula’i a’e, toe taumafai, ma ia malolosi atili.
O Ia o lo tatou Faufautua.
O Ia o lo tatou faamoemoega sili ma le faapelepele.
E finagalo o Ia ia faaosofia i tatou i le faatuatua.
E faatuatuaina e Ia i tatou ia aoao mai a tatou measese ma fai a tatou filifiliga sa’o.
O le ala sili lea ona lelei!9
O A Mea Leaga o le Lalolagi?
O se tasi o auala e manao Satani tatou te faaseseina ai isi o le nopia’i ai pea ma le soona faamamafaina o mea leaga i le lalolagi.
E mautinoa lava o loo i ai pea le lalolagi ma o le a faaauau pea ona i ai le le atoatoa. Ua anoanoai tele tagata ta’umamaina e mafatia ona o tulaga o le natura faapea ai foi mai uiga le mafaufau o tagata. O mea piopio ma le amioleaga i o tatou aso ua tulagaese ma taufaamata’u.
Ae e ui i nei mea uma, ou te le faafesuia’ia le ola ai i lenei taimi ma se isi lava taimi i le talafaasolopito o le lalolagi. Ua faamanuiaina i tatou ma le le mafuatiaina e ola i se taimi o le manuia, malamalama, ma avanoa lemafaatusalia. Ae o le mea sili o mea uma, ua faamanuiaina i tatou i le mauaina o le atoaga o le talalelei a Iesu Keriso, lea ua tatou maua ai se vaaiga tupito i tulaga lamatia o le lalolagi ma faaali mai ia i tatou le auala e aloese ai pe taulimaina ai foi.
A ou mafaufau i nei faamanuiaga, ou te fia faapa’u i o’u tulivae ma ofo atu viiga i lo tatou Tama Faalelagi mo Lona alofa le muta mo Ana fanau uma.
Ou te le talitonu e finagalo le Atua ia fefefe Ana fanau pe nopia’i ai lava i mea leaga o le lalolagi. “Aua ua le foaiina mai e le Atua ia te i tatou le Agaga e mata’u ai, a o le Agaga e faamalosi ai, ma alofa ai, ma mafaufau tonu ai.”10
Ua Ia tuuina mai ia i tatou le anoanoai o mafuaaga e olioli ai. Pau le mea tatou te manaomia o le saili ma ia vaai i ai. E tele ina faamanatu mai e le Alii ia i tatou “ia aua nei matata’u,” ae “ia lototetele”11 ma ia “aua le fefe, le lafu mamoe itiiti e.”12
O Le A Tau e le Alii a Tatou Taua
Uso e ma tuafafine, o i tatou o le “lafu mamoe itiiti.” O i tatou o le Au Paia o aso e gata ai. Ua i ai lava i lo tatou igoa le tautinoga e tepa taulai atu i le toe afio mai o le Faaola ma saunia i tatou lava ma le lalolagi e talia o Ia. O lea, ia tatou auauna atu i le Atua ma alolofa i o tatou uso a tagata. Tau ina ia tatou faia lenei mea ma se lototoa masani, ma le lotomaualalo, ia le vaai maualalo lava i soo se isi tapuaiga po o ni faalapotopotoga o tagata. Uso ma tuafafine, ua poloaiina i tatou e suesue le afioga a le Atua ma usitai i le siufofoga o le Agaga, ina ia mafai ona tatou “iloa faailoga o taimi, ma faailoga o le afio mai o le Atalii o le Tagata.”13
O le mea lea, e le faapea ua tatou le iloaina luitau o le lalolagi, pe ua tatou le iloa foi faigata o o tatou taimi. Ae e le faapea la e tatau ai ona tatou faamamafatuina i tatou lava po o isi i avega o le fefe faifai pea. Ae nai lo le nopiai ai lava i le loloto o o tatou luitau, e le sili ea le taulai atu i le mana lemafuatia sili, lelei ma atoatoa o lo tatou Atua, faalagolago ia te Ia, ma saunia faatasi ma se loto fiafia mo le toe afio mai o Iesu le Keriso?
I le avea ai ma Ona nuu o le feagaiga, e le manaomia ai ona faagaseina i tatou e le fefe ona o mea leaga e ono tutupu. Ae, e mafai ona tatou agai i luma i le faatuatua, lototele, naunautaiga, ma le faalagolago i le Atua a o tatou latalata atu i luitau ma avanoa o i luma atu.14.
Tatou te le savavali na o i tatou i le ala o le avea ma soo. “O Ieova lou Atua … lua te o faatasi ma ia; na te le tuuna oe, na te le lafoai ia te oe.”15
“O le a tau Ieova mo outou, a e faalologo outou.”16
I taimi o le fefe, tau ina ia tatou maua lo tatou lototele, ia āo faatasi lo tatou faatuatua, ma maua le talitonuga maumaututu i le folafolaga e faapea “o auupega uma e faia e tau ma oe e le manuia ia.”17
Ua tatou ola ea i se vaitaimi faigata ma faafitauli? Ioe o lea lava.
Ua fetalai mai le Atua lava Ia, “E maua foi outou e le puapuaga i le lalolagi a ia outou lototetele ua ou manumalo i le lalolagi.”18
E mafai ea ona tatou faatinoina le faatuatua e talitonu ai ma faatino e tusa ai? E mafai ea ona tatou ola e tusa ma a tatou tautinoga ma feagaiga paia? E mafai ea ona tatou tausia poloaiga a le Atua e oo lava i tulaga lu’itauina? Ioe e mafai ona tatou tausia!
E mafai ona tatou faia ona sa folafola mai e le Atua, “O le a galulue faatasi mea uma mo lo outou lelei, pe afai tou te savavali sao.”19O lea, Ia tatou faataatia ese lo tatou fefe ma ola i le olioli, lotomaualalo, faamoemoe, ma se talitonuga maumaututu tele o loo faatasi le Alii ma i tatou.
O Le Alofa Atoatoa e Faateaeseina ai le Fefe
Au uo pele, ou uso e ma tuafafine pele ia Keriso, afai tatou te oo ina ola i le fefe ma le po o le atuatuvale, pe afai foi tatou te iloa o a tatou upu, uiga po o amioga o loo mafua ai le fefe i isi, ona tatou mafaufau lea i lenei vaifofo na tofia mai le lagi mo le fefe: o le alofa le pona o Keriso, aua o le “alofa atoatoa e faateaeseina ai le fefe.”20
O le alofa atoatoa o Keriso e faatoilalo ai le faaosoosoga e faatiga, faifaamalosi, faatauemu, po o le saua.
O le alofa atoatoa o Keriso e faatagaina ai i tatou e savavali i le lotomaualalo, malualii, ma se talitonuga maumaututu malosi o ni soo o lo tatou Faaola pele. O le alofa atoatoa o Keriso tatou te maua ai le talitonuga maumaututu e agai ai pea i luma e ui i lo tatou fefe, ma tuu atu lo tatou faalagolago atoa i le mana ma le agalelei o lo tatou Tama Faalelagi ma Lona Alo, o Iesu Keriso.
I o tatou aiga, i o tatou nofoaga o pisinisi, i o tatou valaauga i le Ekalesia, i o tatou loto, ia tatou suitulagaina le fefe i le alofa atoatoa o Keriso. O le alofa o Keriso o le a suitulagaina le fefe i le faatuatua!
O Lona alofa o le a tatou mafai ai ona iloaina, faalagolago ma maua le faatuatua i le agalelei o lo tatou Tama Faalelagi, i Lana fuafuaga paia, Lana talalelei, ma Ana poloaiga.21 O le alofa i le Atua ma o tatou uso a tagata o le a liliu atu ai lo tatou usiusitai i poloaiga a le Atua i se faamanuiaga nai lo o se avega. O le alofa o Keriso o le a fesoasoani ia i tatou ia agalelei atili, lotofaamagalo atili, popole atili, ma tuuto atili atu i Lana galuega.
A faatumuliaina o tatou loto i le alofa o Keriso, o le a fagua i tatou i se faafouga faaleagaga ma o le a tatou savavali ma le olioli, toafimalie, ma le ola i le malamalama ma le mamalu o lo tatou Faaola pele, o Iesu Keriso.
Ou te molimau atu faatasi ma le Aposetolo o Ioane, “e leai se fefe i le alofa [o Keriso].”22 Uso e ma tuafafine, e silafia atoatoa outou e le Atua. E alofa atoatoa o Ia ia te outou. Ua Ia silafia lo outou lumanai. E finagalo o Ia e “aua e te mata’u; tau lava ina e faatuatua”23 ma “tumau i lona alofa [atoatoa].”24 O la’u tatalo ma le faamanuiaga lea, i le suafa o Iesu Keriso, amene.