Ua Silasila Atu Iesu ia te Ia, ua Alofa Atu ia te Ia

Saunia e Elder S. Mark Palmer

O Le Fitugafulu

O soo se taimi lava e te lagona ai ua talosagaina oe e faia se mea faigata, mafaufau i le Alii o loo silasila mai ia te oe, alofa atu ia te oe, ma valaaulia oe e tuu ese [na mea] ma mulimuli atu ia te Ia.

Sa valaauina au i nai tausaga ua mavae, faatasi ai ma lo’u toalua, o Jacqui, e pule faamalumalu i le Misiona a Uosigitone Spokane.Sa ma taunuu i le misiona ma ni lagona fefe ma le fiafia i le tiutetauave o le galulue ma le toatele naua o faifeautalai talavou ofoofogia. Sa latou o mai mai ni talaaga eseese ma vave ona pei o ni a maua atalii ma afafine.

E ui sa sologa lelei le toatele, e toaitiiti sa tauivi ma faamoemoega maualuluga o o latou valaauga. Ou te manatuaina le ta’u mai ia te a’u e se tasi o faifeautalai, “Peresitene, ou te lē fiafia i tagata.” Na ta’u mai e nisi sa leai se naunau ia i latou e mulimuli ai i tulafono faamalosia a faifeautalai. Sa ou popole ma mafaufau i mea e mafai ona ma faia e suia ai loto o na faifeautalai toalaiti o e na le’i aoaoina lava le olioli o le usiusitai.

I se tasi o aso a o aveina atu le taavale i fanua o saito matagofie i le tausiusiuga o Idaho, Uosigitone, sa ou faalogologo i le pueina o le Feagaiga Fou. A o ou faalogo i le tala masani o le alii talavou mauoa o sau i le Faaola e fesili i le mea e mafai ona ia faia e maua ai le ola e faavavau, sa ou maua se faaaliga patino ae loloto e le’i faamoemoeina ua avea nei o se manatuaga paia.

I le maea ai o le faalogo atu o toe ta’ua e Iesu poloaiga ma le tali a le alii talavou sa ia tausia mea uma nei talu mai lona laitiiti, sa ou faalogo mo le faasa’oga agamalu a le Faaola: “E tasi le mea e le o ia te oe: … faatau atu au mea uma, ma …. sau, … mulimuli mai ia te a’u.”¹ Ae i lo’u maofa, sa ou faalogoina ni upu se ono i luma o na fuaiupu e foliga mai ou te le’i faalogo lava i ai pe faitau i ai. Sa pei sa faaopoopoina na upu i tusitusiga paia. Sa ou manatunatu i le malamalamaaga musuia lea na tatala mai.

O a nei upu e ono na i ai lea aafiaga loloto? Faalogo ina ia vaai pe mafai ona e iloa upu masani nei, e le o maua i isi tala faaletalalelei ae ua na o le Talalelei o Mareko e maua ai:

“Ona momo’e mai ai lea o le tasi … ma fesili mai ia te ia, Le A’oa’o Lelei e, se a se mea ou te faia ina ia ou maua ai le ola e faavavau?

“A ua fetalai atu Iesu ia te ia:

“Ua e iloa tulafono, Aua e te mulilua, Aua e te fasioti tagata, Aua e te gaoi, Aua e te molimau pepelo, Aua e te agaleaga, Ia e ava i lou tamā ma lou tina.

“Ona tali mai lea o ia … , Le a’oa’o e, ua ou tausia na mea uma talu ina ou itiiti.

“Ua silasila atu Iesu ia te ia, ua alofa atu ia te ia, ua fetalai atu foi ia te ia, E tasi le mea e le o ia te oe: Ina alu ia, faatau atu au mea uma, ma avatu i e ua matitiva, ona e maua lea o le oa i le lagi: i le ē sau ai, ma ave le satauro, a e mulimuli mai ia te au.”²

“Ua silasila atu Iesu ia te ia, ua alofa atu ia te ia.”

A o ou faalogo i upu nei, sa faatumulia lo’u mafaufau i se ata manino o le Alii o loo tu ma silasila atu i lenei alii talavou. Silasila atu—e pei o le vaai totoa ma le mamana i totonu o lona agaga, silafiaina o lona agalelei ma lona gafatia foi, faapena foi le silafiaina o lona manaoga silisili.

Sosoo ai ma upu faigofie—ua alofa atu Iesu ia te ia. Sa ia lagona le alofa faagaeetia ma le agalelei mo lenei alii talavou lelei, ma ona o lenei alofa, ma faatasi ai ma lenei alofa, sa talosagaina e Iesu nisi mea mai ia te ia. Sa ou vaai faalemafaufau pe na faapei mo lenei alii talavou le lagonaina o lea ituaiga o alofa a o talosaga foi e faia se mea sa faigata tele e pei o le faatauina atu o mea uma na ia te ia ma tuuina atu i e matitiva.

I lena taimi, sa ou iloaina sa le na o loto o nisi o a matou faifeautalai sa manaomia le suiga. O lou loto fo’i. O le fesili sa le o le “E faapefea e se peresitene lē fiafia o le misiona ona faia ia lelei atu le amio o se faifeautalai o loo tauivi. I lo lena, o le fesili “E mafai faapefea ona faatumulia au i le alofa faaKeriso, ina ia mafai e se faifeautalai ona lagona le alofa o le Atua e ala ia te au ma manao ia sui?” E mafai faapefea ona ou vaai atu ia te ia i le ala e tasi na silasila atu ai le Alii i le alii talavou mauoa, vaai ia i latou i le tagata moni o i ai i latou ma le tagata e mafai ona avea ai, nai lo na o mea o loo latou faia pe le o faia? E mafai faapefea ona avea atili a’u e pei o le Faaola?

“Ua silasila atu Iesu ia te ia, ua alofa atu ia te ia.”

Mai i lena taimi seia oo mai i le taimi nei, a ou saofai faafesagai ma se faifeautalai talavou o loo tauivi ma ni vaega o le usiusitai, i totonu o lou loto ua ou vaaia se alii talavou po o se tamaitai faamaoni sa galulue i le manao ia sau i se misiona. Ona mafai lea ona ou faapea atu ma lagona uma e pei o se matua alofa:³ “Elder po o le Sister, ana ou le alofa ia te oe, ou te le popole po o le a le mea e tupu i lau misiona. Ae ou te alofa ia te oe, ma ona ou te alofa ia te oe, ou te popole po o ai e te avea ai. O lea ou te valaaulia oe e suia na mea lea e faigata mo oe ma ia avea ma se tagata e finagalo le Atua e te avea ai.”

O taimi taitasi ou te alu ai e faatalanoa faifeautalai, ou te tatalo muamua mo le meaalofa o le alofa mama ma ia mafai ona ou vaai i alii ma tamaitai taitoatasi e pei ona silasila mai ai le Alii ia te ia.

A o lei faia konafesi faalesone, a o ma faafeiloaia ma Sister Palmer faifeautalai taitasi taitoatasi, ou te tu ma tilotilo totoa i o latou mata, tilotilo atu ia i latou—o se faatalanoaga e aunoa ma ni upu—ma e aunoa ma le toilalo, sa faatumulia au i le alofa naua mo nei atalii ma afafine faapelepele o le Atua.

Sa ou aoaoina le tele o lesona e suia ai le olaga mai lenei aafiaga patino ma le mataupu e 10 o Mareko. O lesona nei e fa ou te talitonu o le a fesoasoani ia i tatou taitoatasi:

A o tatou aoao e vaai atu i isi e pei ona silasila le Alii ia i latou nai lo ō tatou lava mata, o le a tuputupu ae lo tatou alolofa mo i latou ma faapena lo tatou mananao e fesoasoani ia i latou. O le a tatou vaaia le gafatia i totonu o isi masalo latou te le vaaia ia i latou lava. Faatasi ai ma le alofa FaaKeriso o le a tatou lē fefe e tautatala atu ma le totoa, mo le “alofa atoatoa e faateaeseina ai le fefe.”⁴ Ma o le a tatou le fiu lava, i le manatuaina o i latou e sili ona faigata le alolofa i ai e sili atu ona manaomiaina le alofa.
E leai se aoao atu po o se aoaoina mai moni o le a tupu pe a faia i le lē fiafia po o le ita, ma e le suia loto pe a lē i ai le alofa. Pe o tatou galulue i o tatou matafaioi o ni matua, faiaoga, po o taitai, e na o le siosiomaga o le faatuatuaina nai lo le faasalaina e mafai ona tupu ai le aoao atu moni. E ao ona avea o tatou aiga ma malutaga saogalemu i taimi uma mo a tatou fanau—ae lē o ni siosiomaga matamataita.
E le tatau lava ona aveesea le alofa pe a toilalo se tamaitiiti, uo, po o se tagata o le aiga e ola i ou talitonuga. Tatou te le iloa le mea na tupu i le alii talavou mauoa i le mavae ai ona alu ese atu ma le faanoanoa, ae ou te talitonu sa atoatoa pea le alofa o Iesu ia te ia e tusa pe na ia filifilia le auala e sili ona faigofie. Atonu i le taimi mulimuli ane i le olaga, a o ia iloaina o ana meatotino maoae e lē aoga, na te manatua ai ma galue i aafiaga ofoofogia o le silasila mai o Lona Alii ia te ia, alofa ia te ia, ma valaaulia o ia e mulimuli atu ia te Ia.
Aua e alofa o Ia ia i tatou, e tele mea e faamoemoe mai ai le Alii ia i tatou. A tatou lotomaualalo, tatou te talia le valaaulia a le Alii ia salamo, ia ositaulaga, ma ia auauna atu o se faamaoniga o Lona alofa atoatoa mo i tatou. Aua, o se valaaulia e salamo o se valaaulia foi ia maua le meaalofa sili o le faamagaloga ma le filemu. O le mea lea, “aua le faatauvaa … le aoaiga a le Alii, aua foi le faavaivai pe a aoaiina oe e Ia: aua o le ua alofagia e le Alii, ua aoai atu o ia ia te ia.”⁵

Ou uso ma tuafafine, ia soo se taimi lava tou te lagona ai ua talosagaina outou e faia se mea faigata—tuu ese lena mausa po o se vaisu lē lelei, tuu ese fiafiaga faalelalolagi, ositaulaga se gaoioiga e sili ona fiafia i ai ona o le Sapati, faamagalo se tasi na leaga ia te oe—mafaufau i le Alii o loo silasila atu ia te outou, alofa ia te outou, ma valaaulia outou e tuu ese [na mea] ma mulimuli atu ia te Ia. Ma faafetai atu ia te Ia mo le lava o le alofa ia te outou e valaaulia ai outou e faia nisi mea.

Ou te molimau atu i lo tatou Faaola, o Iesu Keriso, ma taulai atu i le aso o le a Ia tuu mai ai Ona aao e opoina i tatou taitoatasi, silasila mai ia i tatou ma siomia i tatou i Lona alofa atoatoa. I le suafa, o Iesu Keriso, amene.