Үүлтэйд ч, нартайд ч, Их Эзэн надтай хамт үлдээч!
Их Эзэн “үүлтэйд ч, нартайд ч” бидний дэргэд үлдэнэ мөн бидний “зовлонгуудыг маань … Христийн баясалд авт[уулна]” гэдгийг би гэрчилж байна.
Бидний хамгийн дуртай нэг дуулалд “Үүлтэйд ч, нартайд ч, Их Эзэн надтай хамт үлдээч!”1 хэмээх гуйлт гарсан байдаг. Хүчтэй салхи айсуй үед би нэг удаа онгоцонд явж байв. Бидний доор битүү үүлс хуралдсан байгаа нь цонхоор харагдаж байлаа. Жаргаж буй нарны туяа ойсон үүлс хурц тод гялалзаж байв. Тун удалгүй онгоц доошилсоор битүү үүлэн дундуур ороход гэнэт бид тас харанхуйгаар хүрээлэгдэж, хэдхэн мөчийн өмнө харагдаж байсан хурц гэрэл бүхэлдээ халхлагдаж билээ.2
Хар үүлс бидний амьдралд ч үүсэж, Бурханы гэрлээс биднийг халхалж, бүр тийм гэрэл байдаг эсэхэд эргэлзэхэд ч хүргэж болно. Тэдгээр үүлсийн зарим нь сэтгэл гутрах ба түгших эмгэг болон бусад төрлийн сэтгэл санааны болон сэтгэцийн өвчин зовлон юм. Тэдгээр нь бидний өөрсдийгөө болон бусдыг, бүр Бурханыг харах өнцгийг гуйвуулдаг. Тэдгээр нь дэлхийн өнцөг булан бүрд байх бүхий л насны эрэгтэй, эмэгтэйчүүдэд нөлөөлдөг.
Ийм саад бэрхшээлтэй тулгарч байгаагүй хүмүүс үүнийг үл тоомсорлон ханддаг бөгөөд ингэх нь мөн адил хор нөлөөтэй. Тархи нь хүний биеийн ямар ч эрхтэнтэй адил өвдөж, гэмтэж мөн химийн найрлагын тэнцвэртэй байдал нь алдагддаг. Оюун ухаан маань зовж шаналж байхад бид Бурханаас болон эргэн тойрныхоо хүмүүсээс мөн эмч болон сэтгэцийн эрүүл мэндийн мэргэжилтнээс тусламж авах нь зүйтэй.
“Бурхан бүх хүн төрөлхтөн, эрэгтэй, эмэгтэй хүмүүсийг өөрийн дүр төрхөөр бүтээсэн. Хүн бүр Тэнгэрлэг Эцэг Эхийн хайртай сүнслэг охин, хүү нь бөгөөд хүн бүр бурханлиг шинж чанар, хувь тавилантай юм.”3 Бид өөрсдийн Тэнгэрлэг Эцэг Эх, Аврагчийн адил бие махбодтой4 бөгөөд сэтгэл хөдлөлийг мэдэрдэг.5
Хайрт эгч нар аа, хааяа нэг гуниглах, санаа зовох нь ердийн зүйл. Гуниглах, сэтгэл түгших зэрэг нь хүний төрөлхийн сэтгэл хөдлөл юм.6 Гэхдээ хэрэв бид үргэлж гуниглаж, өвчин зовлон маань Тэнгэрлэг Эцэгийнхээ болон Түүний Хүүгийн хайрыг мөн Ариун Сүнсний нөлөөг мэдрэх чадварыг маань хааж байгаа бол бид гутрал, сэтгэлийн түгшүүр юм уу өөр бусад сэтгэл санааны өвчинд нэрвэгдсэн байж магад.
Охин маань нэг удаа: “Надад үргэлж … дэндүү гунигтай байсан [үе] бий. Гуниглах нь ичгүүртэй зүйл бөгөөд сул дорой байдлын илрэл гэж би үргэлж боддог байсан. Тиймээс би гуниглаж байгаагаа хэнд ч хэлдэггүй, … өөрийгөө хэнд ч хэрэггүй гэж боддог байлаа”7 гэж бичсэн байсан.
Нэг найз маань энэ талаар: “Бага байхаас минь л надаас мухардмал байдал, харанхуй, ганцаардал, айдас болон гэмтэл согогтой гэсэн мэдрэмж салдаггүй байв. Би зовлонгоо нууж, амжилттай, хүчтэй гэсэн сэтгэгдэл төрүүлэхийн тулд бүхнийг хийдэг байсан”8 гэж дүрслэн ярьж билээ.
Хайрт найзууд аа, ийм зүйл бидний хэнд ч тохиолдож болно. Ялангуяа аз жаргалын төлөвлөгөөнд итгэгч бид яг одоо төгс болох ёстой хэмээн бодож, өөрсөд дээрээ хэрэггүй ачаа дарамт авчрах үед энэ нь хэнд ч тохиолдож болно. Ийм бодол дааж давшгүй хүнд байдаг. Төгс болох нь мөнх бус амьдралын туршид болон дараа мөнхөд, зөвхөн Есүс Христийн ач ивээлээр дамжин үргэлжлэх үйл явц юм.9
Харин бид сэтгэл санааны асуудлынхаа талаар нээлттэй ярьж, төгс биш гэдгээ хүлээн зөвшөөрснөөр бусдад асуудлаа хуваалцах зөвшөөрөл өгдөг. Найдвар байгаа юм байна, ганцаараа зовж шаналах хэрэггүй гэдгээ бид хамтдаа ухааран ойлгодог.10
Есүс Христийн шавийн хувьд бид Бурхантай “нэг нэгнийхээ ачааг үүрэлцэхэд,” “гашуудах тэдний хамт гашуудахад бэлэн”11 байх гэрээ байгуулдаг. Үүнд сэтгэл санааны өвчний талаар илүү ихийг олж мэдэх, тэдгээр асуудлыг шийдвэрлэхэд туслах эх сурвалж олох, эцэст нь өөрсдийгөө болон бусдыг Эдгээгч Эзэн болох Христэд авчрах зэрэг нь орж болох юм.12 Хэдийгээр бид бусдын туулж буй зовлонг хэрхэн ойлгохоо мэдэхгүй байж болох ч тэдний зовлон шаналал бодит гэдгийг хүлээн зөвшөөрөх нь ойлголцох, эдгэрэх явцад хийгдэх анхны чухал алхам байж ч магадгүй.13
Зарим тохиолдолд сэтгэл гутрах,түгших эмгэгийн шалтгааныг тодорхойлж болдог байхад заримдаа тодорхойлоход хэцүү байх үе бий.14 Бидний тархи стресс15 эсвэл архаг ядаргаа16 зэргээс болж өвдөж болох ба тэдгээрийг заримдаа хоол унд, нойр, дасгал хөдөлгөөнөөр сайжруулж болдог. Өөр үед туршлагатай мэргэжлийн хүмүүсийн хяналтан доор эмчилгээ хийлгэж, эм уух хэрэгтэй байж болно.
Сэтгэцийн юм уу сэтгэл санааны өвчинг эмчлүүлэхгүй явах нь бусдаас хөндийрөх, үл ойлголцох, харилцааны асуудал гарах, өөрийгөө гэмтээх, бүр амиа хорлоход ч хүргэж болно. Аавыгаа олон жилийн өмнө амиа хорлох үед би үүнийг өөрийн биеэр үзэж туулсан. Түүний үхэл манай гэр бүлийнхнийг болон намайг цочирдуулж, бидэнд сэтгэлийн гүн зовлон авчирсан билээ. Уй гашуугаа даван туулахад минь олон жил шаардагдсан бөгөөд амиа хорлолтын талаар зөв зохистой арга замаар ярих нь амиа хорлолтыг хөхиүлэн дэмжихийн оронд урьдчилан сэргийлэхэд үнэхээр тусалдаг талаар би саяхан олж мэдлээ.17 Харин одоо би аавынхаа амиа хорлосон талаар хүүхдүүдтэйгээ илэн далангүй ярилцсан бөгөөд хөшигний хоёр талд Аврагч эдгээдгийг биеэрээ мэдэрсэн.18
Харамсалтай нь, гүн сэтгэл гутралд орсон хүмүүс өөрсдийн төсөөлсөн тэрхүү хэвэнд өөрийгөө таарахгүй байна гэж боддог тул бусад гэгээнтнээс зайгаа барьдаг. Тэднийг бидний нэг гэдгээ мэдэж, мэдрэхэд бид тусалж чадна. Сэтгэл гутрал бол сул дорой байдал биш төдийгүй, тэр болгон нүгэл үйлдсэнээс болдоггүй гэдгийг ойлгох нь чухал.19 Энэ нь “нууж хаахад томорч, зовлонг нь ойлгоход багасдаг.”20 Бид хамтдаа ганцаардал, ичгүүрийн үүлсийг нэвтэлснээр ичгүүрийн ачаанаас салж, эдгэрэлтийн гайхамшгийг авчирч болно.
Мөнх бус амьдрал дахь тохинууллынхаа үеэр Есүс Христ өвдөж, зовсон хүмүүсийг эдгээж байсан ч хүн бүр эдгэрэхийн тулд Түүнд итгэх итгэлээ хөгжүүлэн, үйлдсэн байх ёстой байсан. Эдгэрэхийн тулд зарим нь алс холоос алхан ирсэн байхад зарим нь гараа сунган хувцсанд нь хүрч, зарим нь бусдаар өргүүлэн Түүн дээр ирж байсан.21 Эдгэрэхэд маань Тэр бидэнд юунаас ч илүү хэрэгтэй биш гэж үү? “Бид бүгд гуйлгачид бус уу?”22
Бүгдээрээ Аврагчийн замыг дагаж, бусдын зовлонг ойлгох чадвараа хөгжүүлж, бусдыг шүүмжлэх хүслээ даран, бусдын сүнслэг байдлыг шалгагч байхаа больцгооё. Хайраар сонсох нь бидний өгч чадах хамгийн агуу бэлэг бөгөөд хайртай хүмүүс, найз нөхдийг маань боомилж буй хүнд үүлсийг өргөлцөх эсвэл сарниулахад нь тусалж болох юм.23 Ингэснээр бидний хайраар дамжуулан тэд Ариун Сүнсийг ахин мэдэрч, Есүс Христээс цацрах гэрлийг харж чадах болно.
Хэрэв та “харанхуй мананд”24 байнга хүрээлэгдэж байгаа бол Тэнгэрлэг Эцэгт ханд. Танд тохиолдсон ямар ч зүйл та Түүний хүүхэд бөгөөд Тэрээр таныг хайрладаг хэмээх мөнхийн үнэнийг өөрчлөхгүй.25 Христ бол таны Аврагч, Гэтэлгэгч бөгөөд Бурхан таны Эцэг гэдгийг бүү март. Тэд таныг ойлгодог. Тэд танд ойрхон байж, таныг сонсож мөн дэмжлэг үзүүлж байгаагаар төсөөл.26 “[Тэд] та нарыг зовлонд чинь тайтгаруулна.”27 Та чадах бүхнээ хийж, Их Эзэний цагаатгагч ач ивээлд итгэ.
Зовлон бэрхшээл тань таны хэн болохыг тодорхойлохгүй, харин таныг цэвэршүүлж чадна.28 “Маханбод [дахь] өргөс[нөөсөө]”29 болж та бусдын зовлонг илүү сайн ойлгох чадвартай болсон байж болох юм. Ариун Сүнсээр удирдуулан, “сул доройчуудад тус[лан], доош унжсан гарнуудыг өргө[ж], мөн сул дорой өвдөгнүүдийг хүчирхэг болго[хын]”30 тулд өөрийнхөө түүхийг хуваалц.
Яг одоо зовж байгаа эсвэл зовж байгаа хэн нэгнийг харж хандаж байгаа хүмүүст хандан бүгдээрээ Бурханы Сүнстэй хамт байхын тулд Түүний зарлигийг дагахад бэлэн байцгаая хэмээн хэлье.31 Бидэнд сүнслэг хүч өгөх “өчүүхэн мөн энгийн зүйлүүд[ийг]”32 хийцгээе. Ерөнхийлөгч Рассэлл М.Нэлсон, “Өсөн нэмэгдсэн цэвэр ариун байдал болон ягштал дуулгавартай дагах, үнэн сэтгэлээсээ эрэлхийлэх, Мормоны Номд байгаа Христийн үгэн дээр өдөр бүр найрлах, ариун сүм, гэр бүлийн түүхийн ажилд тогтмол цаг гаргаж байх зэрэгтэй адил тэнгэрийг нээх өөр юу ч байдаггүй”33 хэмээн хэлсэн билээ.
Бүгдээрээ бидний Аврагч Есүс Христ “зүрх сэтгэл бие махбодийн дагуу нигүүлслээр дүүргэгдэж болохын тулд, тэрээр … [биднийг] сул байдлууд[ын маань] дагуу хэрхэн халамжлахыг мэдэж болохын тулд, тэрээр өөр дээрээ бидний сул дорой чанаруудыг [авсан]”34 гэдгийг санацгаая. Тэрээр “шаналсан зүрхтэйг нь эдгээн, … бүх гашуудагчийг тайвшруулан, … үнсний оронд цэцгийн хэлхээг өгч, гашуудлын оронд баяр хөөрийн тос, гаслант сүнсний оронд магтаалын хувцас соёрхохын тулд”35 ирсэн.
Их Эзэн “үүлтэйд ч, нартайд ч” бидний дэргэд үлдэж, бидэнд “зовлонгуудыг маань … Христийн баясалд авт[уулж]”36 мөн “ач ивээлээр л бид аврагдана …, бидний хийж чадах бүхний дараа буюу”37 гэдгийг би гэрчилж байна. Есүс Христ энэ дэлхий рүү “жигүүртээ эдгээх чадлыг эзэмд[сээр]”38 эргэж ирнэ гэдгийг би гэрчилж байна. Эцэст нь Тэрээр “[бидний] нүднээс нулимс бүрийг нь арчина. Тэнд цаашид гашуудах … гэж үгүй болно.”39 “Христэд ир[ж], мөн түүгээр төгөлдөрж[их]”40 бүх хүний хувьд “хойшид нар [нь] шингэхгүй … Учир нь Их Эзэн [бидний] үүрдийн гэрэл болж, гашуудлын [маань] өдрүүд төгсөнө.”41 Есүс Христийн нэрээр, амен.