Mo Vakabauta ena Yalodina, Kua ni Vakatitiqa
Sa dodonu me da nakita me da taura na gauna e veisiga me da tagutuvi vuravura mai vei keda ka sema ki lomalagi.
Ena dua na gauna sa oti au yadra mai ka vakarau meu vuli ivolanikalou. Au tara mai noqu talevoni vuku ka dabe ena idabedabe yasa ni noqu imocemoce ka nakita meu dolava na Gospel Library app. Au dolava noqu talevoni ka vakarau sara ga meu tekivu vuli au qai raica e rauta ni ono na teks kei na imeli ka yaco mai ena bogi Au nanuma, “au na raica ga vakatotolo na itukutuku oya, kau lesu tale ki na ivolanikalou.” Io, ni oti e rua na auwa au se wili teks, imeli, vakaleka ni itukutuku, kei na posi ena itukutuku veimaliwai raraba. Niu qai raica na gauna, au kusa yani meu vakarautaki au me baleta na siga oya. Ena mataka oya au calata na noqu vuli ivolanikalou, kena isau au sega ni kania na kakana vakayalo au a vakaninui kina.
Kakana Vakayalo
Au kila ni levu vei kemuni e rawa ni semata. Sa vakalougatataki keda vakalevu na tekinolaji ni gauna oqo. E rawa ni semati keda vei ira na itokani kei na matavuvale, ena itukutuku, kei na itukutuku raraba ni veika e yaco tiko e veiyasai vuravura. Ia, e rawa talega ni vagolei keda tani mai na isema bibi duadua: na keda isema ki lomalagi.
Au taleva tale na veika a tukuna na noda parofita o Peresitedi Russell M. Nelson: “Eda bula tiko qo ena dua na vuravura levu na ka edau yaco kina ka levu na ka e veileti taki kina. Na kena rawa ni yacovi e veigauna na kau itukutuku ni veimaliwai kei na itukutuku 24 na auwa ka bololaki keda tu ga ena itukutuku tawa cegu. Kevaka me da nuitaka me rawa ni da tauvulona na vuqa na domo kei na vuku vakatamata ka valuta tiko na dina, sa dodonu me da vulica me da ciqoma na ivakatakila.”
A vakavulica o Peresitedi Russell M. Nelson, “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.”1
Ena vica na yabaki sa oti a tukuna o Peresitedi Boyd K. Packer baleta e dua na yavuni dia, ena vuku ni vavaku ni ucacevata, sa tasogo kina vei ira na sala ki na nodra itikotiko ka rawa kina ni ra waloloi ena viakana. Eso na tamata yalovinaka, ena nodra sasaga me ra vakabulai ira na dia, era a sova co madu ena yasanivanua ko ya—e sega ni ka era dau kania na dia, ia era nuitaka ni na bau rawa mada ga ni ra lako sivita kina na vulaibatabata. Ka ni rarawa, ni dua na iwase levu e qai kunei ni ra sa mate. Era kania na co madu, ia a sega ni vakabulabulataki ira, ka ra mani mate kina ena waloloi ni sinai tu na ketedra.2
E levu na itukutuku eda bololaki kina ena itabagauna vakaitukutuku oqo e ivakatautauvata vakayalo ni vakana dia ena co madu—e rawa ni da kania tiko ena siga taucoko ia ena sega ni vakabulabulataki keda.
Evei eda na kunea kina na veivakabulabulataki dina vakayalo? Ena vuqa na gauna, e sega ena noda tiko voli ena tabana vakaitukutuku raraba. Eda na kunea ni da sa “sasaga tikoga [me da] toso ki liu” ena sala ni veiyalayalati, “ka taura matua tikoga na itautauri kaukamea,” ka kania na vuanikau ni bula.3 E kena ibalebale ni dodonu me da taura na gauna e veisiga me da tagutuvi vuravura mai vei keda ka sema ki lomalagi.
Ena nona tadra, a raica o Liai o ira na tamata era sa kania na vuanikau ka ra qai vakanadakuya ena veivakayarayarataki ni vale cecere rabailevu, na viavialevu ni vuravura.4 E rawa vei ira na itabagone me ra susugi cake mai ena vuvale Yalododonu Edaidai, dau lakova na veisoqoni kei na kalasi dodonu kece sara ni Lotu, ka vakaitavi sara mada ga ena veicakacaka vakalotu ni valetabu, ka ra qai vakanadaku ki na “veisala vakatabui ka yali yani.”5 Na cava e yaco kina qo? Ena vuqa na gauna e baleta, na gauna era lakocuruma tiko kina na iwalewale vakayalo eso, era se bera ni saumaki dina. Era a vakani ia era a sega ni vakabulabulataki.
Kena veibasai, au sa sotava e vuqa vei kemuni na itabagone Yalododonu Edaidai kaukauwa, uluvinaka, ka yalodina. O ni kila ni o kemuni na luvena tagane kei na yalewa na Kalou ka tu Vua e dua na cakacaka mo ni cakava. O ni lomana na Kalou ena “yalomudou taucoko, igu,vakasama kei na kaukauwa.”6 O ni rokova na nomuni veiyalayalati ka qaravi ira na tani, tekivu mai vale. O ni dau cakacakataka na vakabauta, veivutuni, ka vinaka cake e veisiga, oqori ena kauta mai na reki tudei. O ni sa vakavakarau tiko ki na veivakalougatataki ni valetabu kei na madigi tale eso ena yaco mai ni ko ni sa dau muria dina tiko na iVakabula. Ko ni sa veivuke tiko ena vakarautaki ni vuravura ki na iKarua ni Lako Mai, sureti ira na tamata me ra lako mai vei Karisito ka rawata na veivakalougatataki ni Nona Veisorovaki. O sa semati tu ki lomalagi.
Io, o na dau sotava na ibolebole. Era vakakina na veitabatamata kecega. Oqo na noda gauna, e dodonu me da vakabauta ena yalodina, ka sega ni vakatitiqa. Au vakadinadinataka ni kila tu na Turaga na noda bolebole, ka sa vakarautaki keda tiko o Koya mai na veiliutaki nei Peresitedi Nelson me da sotava. Au vakabauta na nona kaciva na parofita na lotu yavutaki e vale, tokoni ena veika e caka mai na noda valenilotu,7 e caka me vukea noda bula tiko—gumatua sara mada ga—ena gauna oqo ni waloloi.
Yavutaki e Vale
Na cava na kena ibalebale na lotu yavutaki mai vale? Na vuvale e rawa ni duidui sara na kena irairai e vuravura raraba. O lewena beka e dua na matavuvale sa tu mai na Lotu e vica vata na kena itabatamata. Se o iko duadua beka ga na lewe ni Lotu ena nomu matavuvale. O na vakawati tiko beka se sega, tiko beka se sega na gone mai vale.
Se cava ga na kemu ituvaki, e rawa ni o kitaka na nomu itikotiko me vanua ni vuli kei na bulataki kosipeli. E kena ibalebale ga me nomu itavi na nomu saumaki mai kei na tubu vakayalo. E kena ibalebale me muri na ivakasala nei Peresitedi Nelson “me [vakavoutaki kina nodra] itikotiko me vanuatabu ni vakabauta.”8
Ena rawa ni vakauqeti iko na vunica ni sega ni yaga na veivakabulabulataki vakayalo se, toso cake tale vakalailai, ni rawa ni wawa mada. O koya na dauniveivagolei tani ka ivakatekivu ni lokuyara. Ena kauta mai ki na nomu vakasama eso na ka e kena irairau ni ra ka bibi ia na ka dina, ni ra sega soti. Ena vinakata o koya mo “veinanuyaka na ka e vuqa” mo vakawalena na “duabau ga na ka [e] yaga.”9
Au sa vakavinavinaka vakalevu ena vukudrau na noqu “itubutubu yalovinaka,”10 ka rau a susuga cake na nodrau matavuvale ena dua na itikotiko ni veivakabulabulataki vakayalo, isema ni veilomani kei na itaviqaravi e taucoko veivakaukauwataki. Na ivakavuvuli erau a solia niu se itabagone sa biuti au toka ena dua na vanua vinaka. Kemuni na itubutubu, yalovinaka ni tara cake na isema qaqaco vinaka kei ira na luvemuni. Era gadreva e levu cake na nomuni gauna, sega ni lailai.
Tokona na Lotu
Ni o kitaka vakakina, sa tu na Lotu me tokoni iko. Na veika eda sotava ena lotu e rawa ni vaqaqacotaka na veivakabulabulataki vakayalo mai vale. Me yacova mai qo, eda sa raica na mataqali veitokoni ni Lotu vaqo ena Wilivola ni Sigatabu kei na Lalai. Eda na raica vakalevu cake ena veisoqoni ni Matabete i Eroni kei na Goneyalewa. Me tekivu ena Janueri oqo, sa na veisau vakalailai na lewenivuli ena soqoni oqo. Ena vakanamata tikoga ena veiulutaga vakosipeli, ia ena vakasotari na veiulutaga oqori ki na Lako Mai, Mo Muri Au—Baleta na Tamata Yadua kei na Matavuvale. E veisau lailai wale oqo, ia e rawa ni vakaitamera na kena revurevu ena nodra vakabulabulataki vakayalo na itabagone.
Na mataqali veitokoni cava tale ena vakarautaka na Lotu? Ena Lotu eda na vakaivotavota ena sakaramede, ka na vukei keda me da vakavouya noda yalayala vua na Turaga e veimacawa. Ia ena Lotu eda sota vata kei ira na lewe ni vakabauta ka ra sa vakayacora talega na yalayala vata oya. Na isema ni veilomani eda tara cake vata kei ira na itokani tisaipeli i Jisu Karisito e rawa ni veitokoni mana sara ki na noda bula vakatisaipeli yavutaki mai vale.
Niu yabaki 14 a toki na neitou matavuvale ki na dua na itikotiko vou. Ena sega beka ni vaka e dua na leqa levu vei kemuni, ia ena noqu vakasama ena gauna oya, sa dua na ka veivakaleqai. E kena ibalebale niu na wavoliti mai vei ira na tamata au sega ni kila. E kena ibalebale o ira kece na cauravou ena noqu tabanalevu era na vuli ena duatani na koronivuli. Ena noqu vakasama yabaki 14, au vakasamataka, “Na cava mada erau cakava kina vaqo vei au noqu itubutubu?” Au nanuma ni sa rusa na noqu bula.
Ia, ena neitou itaviqaravi ni Cauravou, sa rawa niu semata eso na veiwekani kei ira na lewe ni noqu kuoramu, sa yaco me ra noqu itokani. Kena ikuri, sa tekivu me ra kauwaitaka mai noqu bula o iratou na matabisopi kei iratou na dauvakasala ni Matabete i Eroni. Eratou mai sarava noqu qito. Eratou vola mai vei au eso na ivola veivakayaloqaqataki au se maroroya tu ga me yacova mai nikua. Era a veitaratara tikoga kei au ena noqu sa lako i vuli torocake kei na noqu lako i kaulotu. E dua vei ira a tu e rara ni waqavuka ena noqu sa lesu mai vale. Au na dau vakavinavinaka tu ga me tawamudu vei ira na taciqu vinaka oqo kei na loloma cokovata kei na nanamaki cecere. Era dusia vei au na lomalagi, ka yaco na bula me serau, mamarau, ka rekitaki.
Me vaka ni da itubutubu ka iliuliu, me da vukei ira vakacava na itabagone me ra kila ni ra sega ni lakova duadua voli na salatu ni veiyalayalati? Me ikuri ni tara isema ni veiwekani yadua, eda sureti ira mai ki na veisoqoni lelevu kei na ka lalai—mai na koniferedi ni MST kei na keba ni itabagone ki na itaviqaravi vakamacawa ni kuoramu kei na kalasi. Kakua ni beca na kaukauwa e yaco mai ena noda soqoni vata kei ira tale eso era tovolea tale tikoga me ra kaukauwa. Kemuni na bisopi kei na iliuliu tale eso, yalovinaka ni vakanamata ena nodra vakabulabulataki na gonelalai kei na itabagone ena nomuni tabanalevu. Era gadreva e levu cake na nomuni gauna, sega ni lailai.
Se o iliuliu, veitikivi nomudrau vale, lewe ni kuoramu, se dua ga na itokani Yalododonu, kevaka e donumaki iko na madigi mo tara na nona bula e dua na gone, vukea me sema ki lomalagi. Na nomu veivakayarayarataki e rawa ni o koya sara ga na “veitokoni ni Lotu” e gadreva na itabagone oqori.
Kemuni na taciqu kei na ganequ, au vakadinadinataka ni tu ena ulu ni Lotu oqo o Jisu Karisito. Sa vakauqeti ira tiko na iliuliu o Koya ka dusimaki keda ki na veivakabulabulataki vakayalo eda gadreva me da bula ka gumatua kina ena gauna e muri oqo. Na veivakabulabulataki vakayalo oqori ena vukei keda me da vakabauta ena yalodina, ka sega ni vakatitiqa. Ena yacai Jisu Karisito, emeni.