Rua na iVunau Levu
Sa dodonu meda saga meda muria na ivunau levu ruarua. Me caka vakakina, eda sa muria na sala matata ni lawa kei na loloma.
Kemuni na ganequ lomani ena kosipeli i Jisu Karisito, au kidavaki kemuni vaka mata digitaki tabu ena matavuvale tawamudu. Sa vakatavulici keda o Peresitedi Russell M. Nelson, “Na Lotu oqo a vakalesui mai me rawa ni ra buli, vauci, ka vakacerecerei tawamudu na matavuvale.”1 E tiko na veika bibi ena ivakavuvuli oya kivei ira ka kilai tu me veidomoni vayalewa, vatagane, ruarua, se duimoimoi, ka kilai deivaki tu me LGBT.2 A vakananumi keda talega o Peresitedi Nelson ni sega ni dodonu meda “veivakadonui [tu ga] me rawa ni da veilomani kina.”3 Sa ka bibi na ivakavuvuli vakaparofita oqo me veivosaki ni matavuvale ena saumi ni nodra vakatataro na gonelalai kei na itabagone. Au sa masulaka tu na veivakauqeti me’u vosa vei kemuni na tiko oqo beleta ni ko ni sa umani vakaidina ena veitaro oqo, ka ra-wa vakadodonu se vakativitivi tu na matavuvale taucoko ena Lotu.
I.
Au tekivu ena ka a vakatavulica o Jisu me rua na ivunau levu.
“Mo lomani Jiova na nomu Kalou ena lomamu taucoko, ena yalomu taucoko, kei na nomu nanuma kecega.
“Ai matai ni ivunau oqo ka levu.
“A sa tautauvata na kena ikarua, Mo lomana na kai nomu me vaka ko lomani iko.”4
Sa kena ibalebale oqo ni sa vakaroti meda lomana na tamata kecega, me vaka sa vakavuvulitaka na vosa vakatautauvata i Jisu ni sa wekada na tamata kecega.5 Ia na noda maqusa me muria na ikarua ni vunau oqo e sega ni dodonu me vakavuna noda guilecava na imatai, meda lomana na Kalou ena lomada, yaloda, kei na noda nanuma kecega. Eda vakaraitaka na loloma oya ena “muri ni [Nona] ivunau.”6 Sa gadreva na Kalou meda talairawarawa ki na Nona ivunau baleta mai na talairawarawa ga oya, oka kina na veivutuni, eda na rawa ni laki bula vata kei Koya ka yaco meda uasivi me vakataki Koya.
Ena nona vosa walega oqo vei ira na itabagone qase cake ena Lotu, a tukuna o Peresitedi Russell M. Nelson na ka e vakatoka me “isema qaqaco ni loloma ni Kalou kei na Nona lawa.”7 Na veilawa vakadreti bibi ena veika me baleti ira ka kilai tu mera LGBT oya na lawa ni vakamau ni Kalou kei na kena lawa veitokani ni tiko savasava. Rau sa veiganiti ena yavu ni veivakabulai ni Tamada Vakalomalagi me baleti ira na Luvena. Me vaka e vakatavulica o Peresitedi Nelson, “Era sa vakavurei vakataucoko na lawa ni Kalou ena Nona loloma tawayalani kivei keda kei na Nona gagadre meda yacova vakakina na veika taucoko eda rawa ni vakataka.”8
A vakatavulica o Peresitedi Nelson: “Vuqa na matanitu … sa vakadonuya na vakalawataki ni vakamau vakamataqali vata. Vaka lewe ni Lotu, eda rokova na lawa ni vanua eso … , oka kina na vakamau vakamatanitu. Na kena dina oya, ni mai na ivakatekivvu … na vakamau a vakatabui mai vua na Kalou! Me yacova mai na siga nikua e sa vakatakila tikoga o Koya ni sa baleta e dua na yalewa kei na tagane. Na Kalou e sega ni se veisautaka na Nona ivakatakilakila ni vakamau.”
E kuria o Peresitedi Nelson: “Na Kalou e sega talega ni se veisautaka na Nona lawa ni tiko savasava. Na veika e gadrevi me curumi kina na valetabu e sega ni se veisau.”9
A vakananuma vei keda kece o Perersitedi Nelson ni “sa nodra ilesilesi vaka iApositolo me vakatavulica na dina duadua ga. Na ilesilesi oya e sega ni solia vei [ira na iApositolo] na dodonu ni lewa mera veisautaka na lawa vakatabui.”10 Ia, kemuni na ganequ, sa dodonu mera vakatavulica tu ga na iliuliu ni Lotu na bibi ni kena vakasakiti na vakamau ni dua na tagane kei na yalewa kei na lawa veisemati ni tiko savasava.
II.
Na cakacaka ni Lotu i Jisu Karisito ni Yalododonu Edaidai sa kauwai vakalevu tu ena nodra vakarautaki na luve ni Kalou ki na matanitu vakasilesitieli, ka vakauasivi tu ki na kena lagilagi taucoko, cecere sara se bula tawamudu. Na icavacava cecere sara sa rawa duadua ga ena vakamau tawamudu.11 Sa okati ena bula tawamudu na kaukauwa ni veibuli e umani tu ena vakasotari ni tagane kei na yalewa12—na ka e vakatoka na ivakatakila vou me “tomani ni sorenikau ena gauna ni veigauna.”13
Ena nona vosa vei ira na itabagone qasecake, a vakatavulica o Peresitedi Nelson, “Ena taqomaki kemuni na muri ni lawa ni Kalou ena nomuni sudra yani ki na veika cecere”14—oya, mo ni vakataka na Kalou, ena bula vakacerecerei kei na sasaga tabu ni noda iTubutubu Vakalomalagi. Oya na icavacava eda gadreva kivei ira kece eda lomana. Mai na loloma oya, e sega ni dodonu meda vakatara na noda loloma me ulabaleta na ivunau kei na ituvatuva kei na cakacaka ni Kalou, eda kila tu ni na kauta mai vei ira eda lomana na nodra bula marau levu duadua.
Ia sa vuqa sara eda lomana, oka kina eso ka tiko vei ira na kosipeli vakalesui mai, ka sega ni vakadinata se digitaka me muria na ivunau ni Kalou me baleta na vakamau kei na lawa ni tiko bulabula. E vakacava o ira?
Sa vakaraitaka na ivunau ni Kalou ni da sa Luvena taucoko ka sa buli keda o Koya meda bula marau.15 E vakatavulica na ivakatakila ni gauna oqo ni sa vakarautaka na Kalou e dua na ituvatuva ni ka me sotavi ena bula oqo ka rawa meda digitaka kece na talairawarawa ena qarai ni Nona veivakalougatataki levu duadua se caka digidigi eso e muataki ki na dua vei ira na matanitu lagilagi lailai.16 Ena loloma levu ni Kalou kivei ira kece na Luvena, na matanitu lailai eso oya e se totoka tu ga mai na ka era kila rawa na tamata.17 Sa vakavuna na ka kece oqo na Veisorovaki i Jisu Karisito, ena Nona “vakalagilagia na Tamana, ka vakabula taucoko na cakacaka ni ligana.”18
III
Au sa vosa oti ena imatai ni vunau, ia vakacava na ikarua? Eda na muria vakacava na ivunau meda lomani ira na wekada? Keitou gadreva me vakadreti vei ira na lewenilotu ni o ira ka muria na ivakavuvuli kei na iwalewale ni veidomoni vayalewa, vatagane, ruarua, se duimoimoi sa dodonu mera karoni ena loloma sa vakaroti keda kina na noda iVakabula kivei ira taucoko na wekada. Ia, ni sa vakatarai vakalawa e Amerika na vakamau vakamataqali vata, a cauraka na Mataveiliutaki Taumada kei na Kuoramu ni Le Tinikarua: “Sa vakatavulica na kosipeli i Jisu Karisito meda veilomani ka kauwaitaka ka doka na tamata kecega—ni tiko mada ga ni noda duidui. Keitou vakadeitaka ni o ira ka soli ira ki na lawa se lewa ni mataveilewai eso ena vakadonui ni vakamau vakamataqali vata sa sega ni dodonu mera qaravi ena veibeci.”19
Me ikuri, meda kakua sara ni vakacacani ira ka sega ni duavata kei na noda vakabauta kei na veidinadinati.20 E kani rarawa, ni eso na tamata e sotava tiko na veika oqo e se vakawaleni ka sevaki tu ga mai na so na lewenilotu kei na iliuliu ena noda matavuvale, tabanalevu, kei na iteki. Sa dodonu meda sasagataka kece na lomavinaka kei na yalomatua.
IV.
Ena vuna eso e sega ni matata tu vei keda, e tiko na bolebole duidui ena veika eda dui sotava ena bula oqo. Ia eda kila tu ni na vukei keda yadua na Kalou ni ulabaleta na veibolebole oqo kevaka eda qara vakaidina na Nona veivuke. Ni oti na sotavi dredre kei na veivutunitaki ni voroki ni lawa eso eda sa vakatavulici kina, eda sa vakanamata taucoko ki na dua na matanitu lagilagi. Na iusutu kei na icavacava ni veilewai sai koya na Turaga, ka sa tu duadua ga Vua na kilaka sa gadrevi, yalomatua, kei na loloma soliwale me lewai keda vakayadua.
Ena gauna oqo, sa dodonu meda saga ma vakamuri na ivunau levu ruarua. Me caka vakakina eda sa muria na sala matailalai ni lawa kei na loloma—ena muri ni vunau kei na lakovi ni salatu ni veiyalayalati, ni ra lomani tu na wekada ena ilakolako. Eda sa gadreva ena ilakolako oqo na veivakauqeti tabu ena ka me tutaki kei na ka me saqati kei na sala meda loloma ka vakarorogo kina ena veidokai ka veivakavulici ena kena iwalewale. Sa vakabibitaki ena noda ilakolako meda kakua ni vakatanitaka na ivunau eso ia meda vakaraitaka tu na ivakarau taucoko ni kilaka kei na loloma. Sa dodonu mera dau nanumi na gone ena noda ilakolako ka veilecayaki tu na kedra ituvaki vakamataqali vata, ia e tarova na veivakacacani taumada baleta, e levu vei ira na gone, na veilecayaki vakaoya sa dau seavu sara yani ena toso ni gauna.21 Na noda ilakolako e saqata na veivakatanitaki mai na salatu ni veiyalayalati, ka sega ni veitokoni vua e dua e veimuataki tani mai vua na Turaga. Ena veika kece oqo eda nanuma ni sa yalataka na Kalou na inuinui kei na reki kei na veivakalougatataki vakaoti kivei ira kece ka muria na Nona ivunau.
V.
Sa vakacolati na tina kei na tama kei keda taucoko meda vakatavulica vata na rua na ivunau levu. Kivei ira na marama ena Lotu, a vakamacalataka o Peresitedi Spencer W. Kimball na itavi oya ena parofisai levu oqo: “E levu na tubu bibi e sa basika tiko mai ki na Lotu ena iotioti ni gauna ena yaco mai baleta ni vuqa na marama vinaka ena vuravura oqo … ena lako vakalewelevu mai ki na Lotu. Oqo ena yaco ki na ivakatagedegede era vakaraitaka kina na marama ena Lotu na ivalavala dodonu kei na matata ni nodra bula kei na ivakaraitaki era raici kina na marama ena Lotu mera duatani ka duidui … mai vei ira na marama e vuravura. … Ia ena yaco me qaqaco dina sara na nodra ivakaraitaki na marama ena Lotu ena tubu vakayalo kei na iwiliwili ni Lotu ena iotioti ni gauna.”22
Ni vosa tiko ena parofisai oya, a cauraka o Peresitedi Russell M. Nelson ni “siga a raica taumada o Peresitedi Kimball oya nikua. Sai kemuni na marama a raica taumada o koya!”23 E lailai tu na ka keimami vakila na rogoca na parofisai oya ena 40 na yabaki sa oti ni ra na rairai vakabula o ira na marama ka lewena tu na Lotu oqo na nodra itokani kei na matavuvale lomani ka ra sa vakayarayarataki tu oqo ena veika vakavuravura kei na veivakacalai ni tevoro. Sa noqu masu kei na veivakalougatataki ni ko ni na vakatavulica ka cakacakataka me vakataucokotaki na parofisai oya, ena yaca i Jisu Karisito, emeni.