Me Yacova ni sa Vakatovolei Oti na Noda Vakabauta
Ni da muria tiko na domo ni Kalou kei na Nona salatu ni veiyalayalati, ena vakaukauwataki keda o Koya ena noda vakatovolei.
Niu a se gone lailai, ea dolele e dua na lewe ni Lotu yalovinaka me vukea na vuka ni noqu matavuvale mai Puerto Rico ki Salt Lake City me rawa ni keitou mai vauci ena valetabu, ia e totolo sara na kena basika na vakatatao. Sa mai tauvimate e dua na ganequ, o Marivid. Ni rau vakayavalati, erau masulaka na noqu itubutubu na cava me caka ia erau vakauqeti tiko ga me rau lako ena ilakolako oqo. Erau nuidei ni rau na muria ena yalodina na vakayarayara ni Turaga me rau lako ki na valetabu, ena wanonovi ka vakalougatataki na neitou matavuvale—ia ea yacovi keitou.
Se vakacava ga na ivakatao eda sotava ena bula, e rawa ni da vakararavi ni na vakarautaka ko Jisu Karisito e dua na sala ki liu ni da lako ena vakabauta me vakayacora tiko na Nona lewa. E sa yalataka oti na Kalou ni ko ira na bula lomadina me vaka na veiyalayalati era a cakava kei Koya era na ciqoma, ena Nona gauna, na Nona veivakalougatataki kece ka sa yalataki. A kaya o Elder Holland, “Eso na veivakalougatataki e lako totolo mai, eso e lako bera mai, ka so e sega ni lako mai me yacovi lomalagi; ia vei ira ka ciqoma na kosipeli i Jisu Karisito, era lako mai.”1
E vakamacalataka o Moronai ni “vakabauta sa ikoya na vakanuinuitaki ni veika sa sega ni rairai, ia mo dou kakua ni vakatitiqataka ni dou sa sega ni raica, ni dou na sega ni rawata e dua na ivakadinadina me yacova ni sa vakatovolei oti na nomudou vakabauta.”2
E dodonu me noda taro oqo, Na cava e dodonu meda cakava me sotava vinaka duadua na veivakatovolei e lako mai vei keda?
Ena imatai ni nona itukutuku raraba vaka Peresitedi ni Lotu, ea vakatavulica o Peresitedi Russell M. Nelson: “Oi keitou na Mataveiliutaki Taumada vou, keitou na via tekivu ka nanuma tiko na iotioti. Ena vuku ni ka oqo, keitou na vosa tiko vei kemuni nikua mai valetabu. Na icavacava eda sa sasaga yadua tiko kina meda laki edaumeni ena kaukauwa ena dua na vale ni Turaga, vauci vakamatavuvale, dinata na veiyalayalati vakayacori e valetabu meda rawata kina na isolisoli cecere duadua ni Kalou—sai koya na bula tawamudu. Na cakacaka tabu vakalotu ni valetabu kei na veiyalayalati o cakava kina sa idola ni vaqaqacotaki na nomu bula, nomu vakamau kei na matavuvale, ka gugumatua rawa mo vorata rawa na ravuravu ni meca. Na nomu sokalou e valetabu kei na kena veiqaravi baleti ira nomuni qase e liu ena vakalougatataki kemuni ena levu ni nomu ivakatakila kei na vakacegu ka na vaqaqacotaka na nomu dinata mo tiko ena salatu ni veiyalayalati.”3
Ni da muria tiko na domo ni Kalou kei na Nona salatu ni veiyalayalati, ena vakaukauwataki keda o Koya ena noda vakatovolei.
Ena neitou lako ki na valetabu ena vuqa na yabaki sa oti e dredre, ia ena gauna keitou sa voleka yani ki na Valetabu e Salt Lake, Utah, e kaya o tinaqu, ni vakasinaitu tu ena vakabauta, “Ena taqomaki kedatou na Turaga, sa na daumaka o kedatou.” Keitou a vauci vakavuvale, ka bula vinaka mai na kena mate o ganequ. Ea yaco walega oqo ni sa oti na vakatovolei ni nodrau vakabauta na noqu itubutubu ka ni rau sa muria na noqu itubutubu na veivakauqeti ni Turaga.
Na nodrau ivakaraitaki oqo na noqu itubutubu e veivakayarayarataki tiko ga ena neitou matavuvale me yacova mai nikua. Na nodrau ivakaraitaki e tubu tiko na kena bibi ka vakaibalebale ni rau vakatavulici keirau ena vu ni ivakavuvuli ni kosipeli ka vukei keirau me keirau kila matata na ibalebale, inaki, kei na veivakalougatataki ka kauta mai vei keirau na kosipeli. Na kilamatata na vu ni kosipeli i Jisu Karisito e rawa ni vukei keda talega meda sotava na noda veivakatovolei ena vakabauta.
Ena yaco ga, ni veika kece e sureti keda ka vakarota meda kitaka na Kalou e tukuna na Nona loloma vei keda kei na Nona gagadre me solia vei keda kece na veivakalougatataki ka vakavo me nodra na Luvena yalodina. E sega ni rawa ni da nanuma cala ni ra na vulica mera taleitaka vakataki ira na noda gone na kosipeli; sa noda itavi vakaitubutubu meda vakavulici ira. Ni da vukei ira na luveda mera vulica me taura vakavuku na nodra galala ni digidigi, na noda ivakaraitaki yalododonu e rawa ni vakayarayarataki ira mera vakayaco digidigi dodonu vakai ira. Na nodra bula lomadina ena yaco me vukei ira na luvedra mera kila na dina ni kosipeli baleti ira vakai ira.
Mo ni rogoca na cauravou kei na goneyalewa ena siga nikua, ni sa vosa tiko vei kemuni na parofita. Vakasaqara mo kila na dina vakalou ena vakabauta ka kilamatata na kosipeli vakai kemuni. Ea vakasalataka walega oqo o Peresitedi Nelson: “A vuku cava e lailai vei iko?… Muria na ivakaraitaki ni Parofita ko Josefa. Kunea e dua na vanua vakanomodi. … Vakamalumalumutaki iko e mata ni Kalou. Talaucaka na lomamu vua na Tamamu Vakalomalagi. Vuki vei Koya ena isau ni vakatataro kei na vakacegu.”4 Ni ko vakasaqara na veituberi mai vua na Tamamu Vakalomalagi dauloloma ena masu, vakarorogo tiko ki na nodra ivakasala na parofita bula, ka vakaraica na nodra ivakaraitaki na itubutubu yalododonu, ko na rawa tale ga ni isema qaqa ni vakabauta ena nomu vuvale.
Kivei ira na itubutubu era sa biuta tu na salatu ni veiyalayalati na luvedra, ni lesu tale vakamalua. Vukei ira me ra kila tale mai na dina ni kosipeli. Tekivu nikua; e sega saraga ni bera.
Na noda ivakaraitaki ni bula dodonu e rawa ni vu ni veisau levu. Ea tukuna o Peresitedi Russell M. Nelson: “Vei keda na Yalododonu Edaidai, sa matau meda nanuma ni ‘lotu’ sai koya na ka e yaco e noda valenilotu, ka tokoni ena ka e yaco ena noda itikotiko. Sa dodonu me veisautaki na ivakarau oqo. Sa kena gauna oqo na Lotu me kena usutu na vuvale, tokoni ena veika e yaco ena loma ni noda tabana, tabanalevu, kei na iteki.”5
E vakatavulica na ivolanikalou, “Vakatavulica na gone ena sala e dodonu me lako kina: ia ni sa qase mai, ena sega ni lako tani mai kina.”6
Ia oqo, “Me vaka ni dau vakayarayarataki ira na tamata me ra vakayacora na ka e dodonu na vunautaki ni vosa ni Kalou—io, raica sa kaukauwa sara na vosa ni Kalou ki na nodra vakanananu na tamata ka mucu na iseleiwau, se dua tale na ka e sa yaco vei ira—o koya e sa nanuma kina ko Alama ni sa kilikili me ra na vakatovolea na kena mana na vosa ni Kalou.”7
E tukuni na italanoa ni dua na marama mai Idia ka rarawa ni kania vakasivia tiko na ka kamikamica o luvena tagane. Veitalia nona vosataki luvena tiko, e kuria tiko ga nona vakaceguya nona bati kamica. Ni sa rarawa vakaoti, e sa lewa me kauti luvena me laki raica e dua ka rokova ko koya.
E kaya vua, “Isaka, na luvequ e sa rui kana ka kamicakamica tiko vakasivia. E rawa beka ni o yalovinaka ka vakasalataki koya me muduka nona kania tiko?
Ni oti nona vakarorogo matua vua na marama na tamata vuku, ea vuki, ka kaya vua na gonetagane, “Laki vale ka lesu tale mai ena rua na macawa.”
E kauti luvena lesu ki vale ena veilecayaki ka vakananuma se cava e sega ni kerea kina na gone me muduka na kana ka kamikamica.
Rau lesu yani ni oti e rua na macawa. E rai vakadodonu yani vua na gonetagane na tamata vuka ka kaya, “Gonetagane, e dodonu mo muduka na kana ka kamikamica. E sega ni vinaka ki na nomu tiko bulabula.”
E kuria na uluna ena veivakadonui o tagane ka yalataka ni na vakakina.
Ea vuki yani o tinai gone ka taroga, “Na cava ko sega ni tukuna kina vua oya ena rua na macawa sa oti?”
Ea sige mai na tamata vuku. “Ena rua na macawa sa oti au se kana ka kamikamica tiko mada ga oi au.”
Na tamata oqo e bulataka tu e dua na dinaeloma ka sega ni vakatarai koya me solia e dua na ivakasala vakavo ga ke sa bulataka tiko mada ga okoya.
Na vakayarayara eda kauta vei ira na luveda ena qaqa sara vakalevu kevaka era raici keda ni da lako lomadina tu ena salatu ni veiyalayalati. O Jekope na parofita ni iVola i Momani e dua na ivakaraitaki ni yalododonu vakaoya. Na luvena o Inosi ea vola baleta na vakayacoka ni ivakavuvuli i tamana:
“Raica, a sa yaco ni’u sa kila tu, koi au, ko Inosi, ni a tamata yalododonu ko tamaqu—ni a vakavulici au ena nona vosa, kei na veisusugi kei na veivunauci ni Turaga—ka me vakalougatataki ga na yaca ni noqu Kalou ena ka oqo—
“… Ka a lutu vakavinaka sara ki lomaqu na veivosa ka’u a dau rogoca vakawasoma ni dau vosataka ko tamaqu me baleta na bula tawamudu, kei na nodra reki na yalododonu.”8
Ko ira na tinadra na gonetagane sotia era a bulataka na kosipeli ena dua na kena sala ka ra kailavaka kina na luvedra nodra yalodei. Na nodra iliuliu ea ripotetaka:
“Era sa vakavulici vakavinaka mai vei ira na tinadra, ni kevaka era sega ni vakatitiqa, ena vakabulai ira na Kalou.
“Ia era sa tukuna lesu mai vei au na nodra vosa na tinadra, ka kaya: Keimami sa sega ni vakatitiqataka ni ra kila tu na tinai keimami.”9
Ko Inosi kei ira na gonetagane sotia Leimanaiti era vakaukauwataki mai na nodra vakabauta na nodra itubutubu, ka vueki ira mera sotava na nodra dui veivakatovolei ni vakabauta.
Eda vakalougatataki ena kosipeli vakalesui mai i Jisu Karisito ena noda gauna, ka dau laveti keda ni da vakila na yalolailai kei na lomaleqa. E vakadeitaka ni noda igu ena vakavuana ena gauna taudonu ni Turaga kevaka eda tataba yani ki liu ni sa vakatovolei tiko na noda vakabauta.
Keirau a tomani Elder David A. Bednar kei na watiqu kei na Mataveiliutaki ni Wasewase ki na vakatabui ni Valetabu mai Haiti Port-au-Prince. Na luvei keirau tagane o Jorge e lako mai kei keirau, ka kaya me baleta na ka e sotava: “Maleka, Ta! Ni qai tekivuna ga o Elder Bednar na masu ni veivakatabui, au sa vakila ni curu mai ki na rumu e dua na katakata kei na rarama. Na masu ea vakuria vakalevu na noqu kilamatata na inaki ni valetabu. Oqo sa vale dina ni Turaga.”
Ena iVola i Momani, e vakatavulica o Nifai ni da gadreva meda kila na lewa ni Kalou, ena vakaukauwataki keda oKoya. Ea vola, “Ka sa yaco, ni koi au, ko Nifai, au sa rui gone sara, ia au tubu levu, ka’u sa dau gadreva vakalevu sara me’u kila na veika vuni ni Kalou, o koya, au sa tagi kina vua na Turaga; ka raica sa sikovi au mai ko koya, ka vakamalumalumutaka na lomaqu, ka’u sa vakabauta kina na vosa kecega a vosataka ko tamaqu; o koya, au sa sega kina ni vorati koya me vakataki rau na tuakaqu.”10
Kemuni na taciqu kei na ganequ, meda vukei ira na luveda kei ira ka wavoliti keda mera muria na salatu ni veiyalayalati ka me rawa ni vakatavulici ira na Yalotabu ka vakamalumutaka na yalodra me gadreva na muri Koya ena nodra bula taucoko.
Niu vakananuma na nodrau ivakaraitaki na noqu itubutubu, au kidava ni neirau vakararavi vua na Turaga ko Jisu Karisito ena vakaraitaka vei keirau na sala lesu kina neirau vale vakalomalagi. Au kila ni dau lako mai na cakamana ni sa oti na vakatovolei ni noda vakabauta.
Au cola ivakadinadina kei Jisu Karisito kei na Nona veisorovaki solibula. Au kila ni oKoya na noda iVakabula ka Dauveivueti. Erau a lako mai oKoya kei na Tamada Vakalomalagi ena mataka ni vulaitubutubu ni 1820 vei Josefa Simici, na Parofita ni Veivakalesui mai. Sa parofita o Peresitedi Russell M. Nelson ni noda gauna oqo. Ena yacai Jisu Karisito, emeni.