Kunei ena Kaukauwa ni iVola i Momani.

Mai vei Elder Rubén V. Alliaud

Ena Vitusagavulu

Eda na sotava kece ka kunei ena kaukauwa ni dina era tiko ena iVola i Momani.

Niu sikovi ira na saumaki vou ena nodra itikotiko, dua na taro au dau via taroga wasoma vei ira o ya na sala era a kila kina kei ira nodra vuvale na Lotu kei na sala era a papitaiso kina. E sega ni dua na ka ke na tamata o ya e lotu vagumatua tiko se sega tu ni bau lotu ena vuqa na yabaki. Sa tautauvata tu ga na isau ni taro: ena matadredredre ka ramase na kedra irairai, era sa tekivu talanoataka na sala era a kunei kina. E ka dina, ni italanoa ni saumaki e vaka me dau italanoa ni noda a kunei.

O Jisu Karisito Vakai Koya na Turaga ni veika sa yali. E kauwaitaka na veika sa yali. Oqori na vuna dina a vakavulica kina na italanoa vakaibalebale e tolu eda raica ena wase 15 ni Luke: na italanoa vakaibalebale ni sipi sa yali, na ilavo a yali, ka kena iotioti, na gone cidroi. O iratou na italanoa kece oqo e tautauvata na kedratou usutu: E sega ni dua na ka na vuna e ratou a yali kina. E sega ni dua na ka ke ratou kila mada ga ni ratou sa yali tiko. Sa cecere cake kina e kea na yalo ni marau ka kacivaka, “Tou mai rekivata; niu sa kunea na [ka] sa yali.”¹ Kena itinitini, e sega dina na ka e yali Vua.²

Kerea meu wasea vei kemuni ena yakavi nikua e dua na ka mareqeti duadua vei au—na kequ italanoa ni noqu a kunei.

Niu sa vakarau yabaki 15, a sureti au o noqu momo, o Manuel Bustos meu laki tiko mada vata kei koya kei na nona vuvale eke e Amerika. A madigi cecere oqo vei au meu na vulica kina eso na vosa Vakavalagi. A saumaki o noqu momo ki na Lotu ena vuqa na yabaki yani e liu, ka tu vua na yalo cecere ni kaulotu. A rairai vuna beka oqo vei tinaqu, kau a sega ni kila, me vosa kina vei momo ka kaya ni na vakadonuya ga na veisureti ena dua na veidinadinati: me kakua ni saga me vakauqeti au meu lewe ni nona Lotu. Keitou a lotu Katolika tiko, ka sa vica mai na itabatamata, ka sega na vuna me keitou veisau. Sa duavata sara kina o noqu momo ka dei toka ena nona vosa ka sega ni via sauma mada ga na taro rawarawa sara baleta na Lotu.

E dina, na ka e rau sega ni tarova rawa o momo kei na watina lomani, o Marjorie, o ya o rau o cei.³

A soli vei au e dua na rumu era tu kina na iwiliwili levu ni veimataqali ivola. Au raica rawa ni veiivola oqo a voleka ni 200 na iVola i Momani ena kena veimataqali vosa, ka 20 ena vosa Vakasipeni.

Dua na siga, niu via vakadikeva, au a taura mai e dua na iVola i Momani ena vosa Vakasipeni.

iVakatakilakila

Na iVola i Momani ena vosa Vaka-Sipeni

Oqo na kena ilavelave e waqana mamare karakarawa, ka toka na ivakatakilakila ni agilosi o Moronai e waqana e liu. Niu sa dolava, sa volai tu ena draunipepa e liu na yalayala oqo: “Ia ni dou sa ciqoma na veika oqo, au gadreva me’u vakamasuti kemudou, mo dou kerea vua na Kalou, na Tamada Tawamudu, ena yaca i Karisito, kevaka era sega ni dina na veika oqo; ia kevaka dou sa kerea ena yalodina, ena lomamudou taucoko, ka vakabauta na Karisito, ena vakatakila vei kemudou ko koya ena kaukauwa ni Yalo Tabu ni sa dina.”

E a kuri tale: “Ia na kaukauwa ni Yalo Tabu dou na kila kina na dina ni veika kecega.”⁴

E sega ni vakamacalataki rawa na kaukauwa ni ivolanikalou oqo ki na noqu vakasama kei na yaloqu. Meu kaya vakaidina sara, au a sega ni vakasaqara tiko “na dina.” Au a se cauravou lailai, marautaka tiko na bula, ka rekitaka na ivakarau vou oqo.

Ia, niu sa vakasamataka tu na yalayala o ya, au sa qai wilika vuni tiko na ivola. Ni toso na noqu wilika, au sa kila kina keu gadreva dina meu rawata mai kina e dua na ka, meu sa tekivu masu. Eda sa kila kece na ka ena yaco ni sa lomamu me sega walega ni wilika ia mo masulaka talega na iVola i Momani. Ia, oqori na ka a yaco sara ga vei au. Sa dua na ka vakasakiti ka talei duadua—io, sa tautauvata na ka sa yaco kivei ira e milioni na tamata e veiyasai vuravura. Au sa kila kina ena kaukauwa ni Yalo Tabu ni iVola Momani sa dina sara.

Au a qai gole vei momo meu vakamacalataka vua na ka sa yaco kau sa tu vakarau meu papitaiso. A sega ni vunia rawa o momo na nona kurabui vakalevu. A vodo yani ena nona motoka, ka gole ki na iroro ni waqavuka, ka kauta mai na noqu tikite ni waqavuka ni lesu i vale, kei na dua na itukutuku lailai vei tinaqu e vakaoqo, “Au sega ni cakava kina e dua na ka!”

Dua na sala a dina o koya. Au a kunei vakadodonu ena kaukauwa ni iVola i Momani.

E rairai e vuqa era a kunei maivei ira na daukaulotu totoka e vuravura raraba, ena sala yadua kecega e a veivakurabuitaki Se era a kunei beka maivei ira na nodra itokani sa biuti ira mai kina vakadodonu ena nodra sala na Kalou. E rairai talega era a kunei mai vua e dua mai na itabatamata oqo se mai vua e dua na nodra qase e liu.⁵ Se cava ga e yaco, ni gadrevi me mua yani ki na nona saumaki dina e dua, nikua ka sega ni mataka, mera na sotava taucoko ka kunei ena kaukauwa ni veika dina era tiko ena iVola i Momani. Ena gauna vata oqo, mera na lewa ga vakai ira yadua mera cakava nodra yalayala dina vua na Kalou ni ra na saga mera maroroya na Nona ivakaro.

Niu sa lesu ki Buenos Aires, sa kila kina o tinaqu niu sa vinakata dina meu papitaiso. Me vaka niu dau yalo dauvakadrecike voli, a sega ni saqati au, ka sa totaki au sara kina vakayalomatua. A sega tu mada ga ni kila, ni sa vakayacora tiko o tinaqu na noqu veivakatarogi ni papitaiso. E ka dina, au vakadinata ni nona veivakatarogi a titobu cake sara mai na kena era dau cakava neimami daukaulotu. A kaya vei au: “Ke o vinakata mo papitaiso, au na tokoni iko. Ia au na taroga mada e liu vei iko eso na taro, kau gadreva mo vakasamataka sara vakavinaka ka sauma mai vakadodonu. O sa yalataka mo laki lotu ena vei Sigatabu yadua sara?”

Au a kaya vua, “Io, dina, au na cakava qori.”

“O kila tiko beka na balavu ni gauna ni lotu?”

“Io au kila,” au a kaya.

A sauma mai, “Ia, kevaka o sa na papitaiso, au na raica mo na laki tiko ena lotu.” A qai tarogi sara o koya kevaka sa lomaqu dina meu kakua ni gunu alikaolo se kana tavako.

Au a sauma vua, “Io, dina, au na vakamuria talega qori.”

A qai tomana kina o koya, “Kevaka o sa na papitaiso, au na raica sara ni na vakayacori oqo.” A sa cakava tiko vakaoqori ena voleka ni veivakaro kece sara.

A qiriti tinaqu o noqu momo me kaya vua me kakua ni lomaleqa, niu na guilecava na veika kece oqo. Ni oti e va na yabaki, niu sa taura na noqu veikacivi meu laki kaulotu ki na Tabana ni Kaulotu e Uruguay Montevideo, a qiriti noqu momo o tinaqu me taroga na gauna cava sara au sa na guilecava kina na veika oqo. Na ka dina o ya mai na gauna au a papitaiso kina, sa marau tu ga vakalevu o tinaqu.

Au a kila kina ni iVola i Momani sa ka bibi ki na sala ni saumaki ena kena sotavi e matanavotu na yalayala ni “na toro voleka cake vua na Kalou e dua na tamata ena nona muria na kena ivakavuvuli.”⁶

A vakamacalataka o Nifai na usutu ni inaki ni iVola i Momani ena sala oqo:

“Ni da sa cakacaka vagumatua me da volavola, me da vakauqeti ira kina na noda kawa, kei ira talega na wekada, me ra vakabauti Karisito, ka vakaduavatataki tale kei na Kalou. …

“Io [o koya gona] eda sa veivosakitaki Karisito, eda reki ena vukui Karisito, eda vunautaki Karisito, [ka] parofisaitaki Karisito, … me rawa ni ra kila kina na noda kawa na ivurevure me ra rai kina me bokoci kina na nodra ivalavala ca.”⁷

Na iVola i Momani taucoko sa umanaki tu ena inaki tabu vata oqo.

Ena vuku ni ka oqo, vei koya ena yalodina me vulica vagumatua, ena yalo ni masumasu, ena sega walega ni kila na veika baleti Karisito ia ena vuli maivei Karisito—vakabibi ke sa lomadra mera “vakatovolea na kena mana na vosa”⁸ ka sega ni cakitaka vakatotolo ena vuku ni tawavakabauta taumada⁹ ena veika era kaya eso baleta na veika era se bera mada ni wilika.

E nanuma kina o Peresitedi Russell M. Nelson: “Niu vakasamataka na iVola i Momani, au vakasamataka na vosa mana. Na dina ena iVola i Momani sa tu kina na mana me veivakabulai, veivakacegui, veivakalesui, veivakaukauwataki, veivaqaqacotaki, veikaroni, ka vakamarautaka na yaloda.”¹⁰

Sa noqu veisureti ena yakavi nikua kivei keda yadua, se cava ga na balavu ni gauna eda sa lewena tu kina na Lotu, meda vakatara na kaukauwa ni dina ni iVola i Momani me kunei keda ka karoni keda tale kei na veisiga yadua ni noda vakasaqara vagumatua na ivakatakila vei keda yadua. Ena yaco vakaidina ke da vakatara.

Sa noqu ivakadinadina vakalou ni sa tu ena iVola i Momani na taucoko ni kosipeli i Jisu Karisito kei na Yalo Tabu ena vakatakila na dina oqo ena veigauna kece kivua e dua, ena yalodina me vakasaqara na kila-ka me vakabulai na yalodra.¹¹ Ena yacai Jisu Karisito, emeni.