Rokova na Yacana
Ena ivakatakilakila veiyalayalatitaki ka veivakaitaukeitaki, eda sa kacivi kina ena yaca i Jisu Karisito.
Ni rau waraka na itubutubu na nona sucu mai e dua na gone, sa nodrau itavi me rau digitaka e dua na yaca ni nodrau gone vou. E rairai beka ni gauna o a sucu mai kina, o vakayacani ena dua na yaca a veisolitaki mai ena nomu matavuvale ena veitabatamata. Se dau kilai levu beka ena yabaki se ena vanua o tiko kina na yaca a soli vei iko.
Na parofita o Ilamani kei na watina erau a solia na yaca vakaibalebale ena nodrau matavuvale vei rau na luvedrau lalai o Nifai kei Liai. A kaya o Ilamani vei rau nona gonetagane:
“Au sa solia oqo vei kemudrau na yacadrau na nodatou itubutubu taumada … ena gauna drau dau nanuma kina na yacamudrau mo drau dau nanumi rau; ia ena gauna drau nanumi rau kina drau nanuma na nodrau cakacaka; … na kena dau tukuni, ka volai talega, ni rau sa tamata vinaka.
“O koya gona oi kemudrau na luvequ, au gadreva mo drau kitaka na ka vinaka.”1
A vukei rau o Nifai kei Liai na yacadrau me rau nanuma na nodra cakacaka vinaka na tubudrau ka vakayaloqaqataki rau me rau cakava talega na ka vinaka.
Kemuni na marama, se evei ga na vanua eda tiko kina, na noda ivosavosa, se da yabaki 8 se 108, eda wasea vata e dua na yaca digitaki ka duavata na kena inaki.
“Ni sai Karisito dou sa vakasulumi kemudou kina, oi kemudou yadua sa papitaisotaki vei Karisito … ni dou sa duabau ga koi kemudou kecega ena vukui Karisito Jisu.”2
Ni da lewena na Lotu i Jisu Karisito ni Yalododonu Edaidai, “eda sa yalataka na noda sa tuvakarau me da taura na yaca i Karisito ena cakacaka vakalotu ni papitaiso.”3 Ena veiyalayalati oqo, eda sa yalataka me da dau nanumi Koya tikoga, talairawarawa ki na Nona ivunau, ka qaravi ira na tani. Na noda tuvakarau me da rokova na veiyalayalati oqo e dau vakavoui ena vei-Sigatabu yadua ni da vakaivotavota ena sakaramede ka rekitaka na veivakalougatataki ni “lako voli ena bula vakavoui.”4
Na yaca a soli vei keda ena noda sucu mai e tukuna na keda ivakatakilakila yadua ka vakaitaukeitaki keda ena noda matavuvale vakavuravura. Ia, ni da sa “sucu vou tale” ena noda papitaiso, sa vakalevutaki na noda kilai keda. “Ena vuku ni veiyalayalati dou sa vakayacora dou sa vakatokai kina mo dou luvei Karisito; raica sa vakasucumi kemudou vakayalo ko Koya ena siga oqo, ni dou sa kaya dou sa vakabauta na yacana ka veivutuni; a sa vakasucumi kemudou kina mo dou luvena.”5
O koya, ena ivakatakilakila veiyalayalatitaki ka veivakaitaukeitaki, eda sa kacivi kina ena yaca i Jisu Karisito. “Sa sega tale ni dua na yaca se na sala me ra bula rawa kina na luve ni tamata, na yaca duadua ga i Karisito na Turaga Kaukauwa.”6
Na Bula i Karisito sa Yalataki tu ni se Bera Sara ni Sucu Mai A yalataka vei Tui Penijamini e dua na agilosi, “Ia ena vakatokai na yacana ko Jisu Karisito, na Luve ni Kalou, … ka na yaca i tinana ko Meri.”7 Na Nona cakacaka ni “veisereki loloma”8 sa vakatakilai talega vei ira na luve ni Kalou ena veigauna kece sa tiko kina e vuravura na kosipeli, mai na gauna i Atama kei Ivi me yacova mai noda gauna oqo, me rawa ni ra kila kina “na ivurevure me ra rai kina me bokoci kina na nodra ivalavala ca.”9
Ena yabaki sa oti, a vakatakekere vakaparofita o Peresitedi Russell M. Nelson vei ira na marama me ra “bulia na veisiga ni mataka ena nodra veivuke me vakasokumuni vata ko Isireli sa veiseyaki tu.” A sureti keda o koya me da wilika na iVola i Momani ka “vakatakilakilataka na tikina yadua e tukuna se dusia na iVakabula.” E kerea o koya “me sa qai yalomu dina mo tukuni Karisito, reki vei Karisito, ka vunautaki Karisito ki na nomu vuvale kei na itokani.” De raira sa tekivu mo raica na vua ni nona yalayala “O iko kei ira o ni sa vakavolekataki vua na iVakabula … ka tekivu me yaco na veisau, io na cakamana sara mada ga. Na veisau, vakakina na cakamana, ena tekivu me yaco.”10
Noda yalayala me da dau nanuma tikoga na iVakabula ena vakaukauwataki keda me da tutaka na dina kei na buladodonu—se ni da tu vata kei ira na lewevuqa se ena noda veivanua yadua, ka sega ni dua tale e kila na veika eda cakava, na Kalou duadua ga. Ni da nanumi Koya kei na Yacana eda taura tu, sa na sega na veivakatauvatani dau veivakayalolailaitaki se na vakalelewa veivakalolovirataki. Ni coba dei na matada vua na iVakabula, eda na raici keda ena keda ituvaki dina—e dua na luvena vakamareqeti na Kalou.
Ni da nanuma tiko noda veiyalayalati ena vagaluya na lomaleqa vakavuravura, vukica na lomalomarua me yaloqaqa, ka solia na inuinui ena gauna ni veivakatovolei.
Ia ni da tarabe ka lutu ena noda itosotoso ena sala ni veiyalayalati, me da nanuma walega na Yacana kei na Nona loloma yalovinaka vei keda. “Ni sa tu vua na kaukauwa kece, kei na yalomatua, kei na kila ka; ka sa kila na ka kecega, ka sa yalololoma sara ko Koya … sa vakabulai ira kecega sa veivutuni ka vakabauta na yacana.”11 E dina sara, e sega tale ni dua na ka e rogo kamica cake mai na yaca i Jisu vei ira era, ena yalo raramusumusu ka bibivoro, segata “me ra caka vinaka ka vinaka cake.”12
E vakavuvulitaka o Peresitedi Nelson: “Sa oti na gauna mo logavinaka ka galuvaka toka ga nomu vakabauta Vakarisito. Na nomu lotu e sega ni baleta na qai lako ga i Lotu ena Sigatabu. E baleta na nomu vakaraitaka ni o tisaipeli dina mai na mataka ni Sigatabu ki na bogi ni Vakarauwai. … E sega ni dua na ka e vakatokai me tisaipeli ‘vagauna’ ni Turaga o Jisu Karisito.”13
Na noda tuvakarau me da taura na yaca i Karisito e sega ni ka ni veivosaki walega. E sega ni dua na yalayala walega vakavosa se dua na cakacakaniliga lasutaki. E sega ni ivakananumi ga ni veika e yaco ena bula se itokaniyaca eda dau tokara. E sega ni dua ga na ivosavosa eda biuta toka ena dua na vata se liliga e lalaga. Na yacana eda “vakasulumi [keda] kina,”14 vola e yaloda, ka “ceuti tu e [matada].”15
Me dau nanumi tikoga na isoro ni veivakaduavatataki ni iVakabula, ena noda vakanananu, ivalavala, kei na noda veimaliwai kei ira na tani. E sega walega ni nanuma tiko na yacada, ia e dau nanumi keda tikoga o Koya . E a vakavulica na iVakabula:
“E dua li na yalewa me na guilecava na luvena sa sucu, me kakua ni lomana na luve ni ketena? Io, era na guilecava beka, ia, koi au, ka’u na sega ni guilecavi iko, na mataqali i Isireli.
“Raica, kau sa ceuti iko ena qeteqete ni ligaqu.”16
E vakavuvulitaka o Peresitedi George Albert Smith, “Rokova na yaca o taura tu, baleta ena dua na gauna ena nomu itavi dokai mo tukunikataka … vei Tamamu mai lomalagi … na veika o sa cakava ena yaca oqori.”17
Me vaka na yacadrau digitaki vakamatau o Nifai kei Liai, e rawa beka ni cavuti ka volai me baleti keda ni da sa tisaipeli dina ni Turaga o Jisu Karisito? Eda sa rokova beka na yaca i Jisu Karisito eda sa taura vakataki keda ena lomasoli? Eda sa “italatala ka dautukutuku”18 beka ni Nona loloma yalovinnaka kei na Nona mana veivueti?
Ena dua na gauna lekaleka sa oti, au a vakarorogo tiko ki na iVola i Momani. Ena iotioti ni iwase ni 2 Nifai, au rogoca ni cavuta o Nifai e dua na ka au se bera vakadua ni bau wilika vakakina e liu. Ena loma taucoko ni nona itukutuku, a vakavulica ka vakadinadinataka na “Dauveivueti,” na “Yalosavasava ni Isireli,” na “Lami ni Kalou,” kei na “Mesaia.” Ia ni tinia na nona itukutuku, au rogoca ni kaya na veimalanivosa oqo: “Au dau rekitaka na ka e matata; au dau rekitaka na dina; au dau rekitaki noqu Jisu, ni sa vueta na yaloqu mai eli.”19 Niu rogoca na veimalanivosa oqo, e reki na yaloqu kau vakarogoca vakavica tale. Au kila ka bokaca na tikina oya me vaka ga na noqu kila ka bokaca na yacaqu.
E kaya na Turaga, “Io, era sa kalougata ko ira na tamata oqo ni sa lomadra me ra taura na yacaqu; ia era na kacivi ena yacaqu; ka ra sa noqu.”20
Ni da lewena na Lotu i Jisu Karisito ni Yalododonu Edaidai me da “taura ena yalomarau na yaca i Karisito”21 ena noda rokova na Yacana ena loloma, yalodina, kei na caka vinaka. Au vakadinadinataka ni o Koya “na Lami ni Kalou, io, na Luvena na Tamada Tawamudu.”22 Ena yaca ni Luvena savasava, ko Jisu Karisito, emeni.