Kune Marau ena Wasei ni Kosipeli
E tiko e dua na Tamada dauloloma mai Lomalagi ka waraki keda tiko meda vuki vei Koya me vakalougatataka noda bula kei na nodra bula era wavokiti keda.
E dua vei ira noqu sere taleitaki ni Lalai e vakaoqo na qaqana:
Au lewena na Lotu i Jisu Karisito ni Yalododonu Edaidai.
Au kilai au tiko.
Au kila na ituvatuva ni Kalou.
Au na muri koya ena vakabauta
Au sa vakabauta na iVakabula, ko Jisu Karisito.1
Sa dua na itukutuku matata ka totoka sara ni dina eda vakabauta oya!
Ni da lewena Na Lotu i Jisu Karisito ni Yalododonu Edaidai, eda kila ko cei koi keda. Eda kila ni “Kalou e Tama ni yaloda. Eda Luvena, ka lomani keda o Koya. Eda bula [vata kei] Koya mai lomalagi ni bera noda lako mai ki vuravura.”
Eda kila na ituvatuva ni Kalou. Eda a tu mai kea kei Koya ni a vakaraitaka o Koya. Sa nei Tamada mai Lomalagi na “inaki taucoko—Nona cakacaka kei na Nona lagilagi—me vakaukauwataki keda yadudua meda marautaka na Nona veivakalougatataki kece. Sa vakarautaka tu o Koya e dua na ituvatuva uasivi me vakavotukana kina na Nona inaki. Eda kila vakavinaka ka ciqoma na ituvatuva ni marau, veivueti, kei na veivakabulai” bera ni da gole mai ki vuravura.
“Ko Jisu Karisito e uto ni nona ituvatuva na Kalou. Mai na Nona Veisorovaki e sa vakayacora kina ko Jisu Karisito na inaki Nei Tamana ka cakava vei keda yadua me rawa ni da marautaka na bula tawavuca kei na bula vakalou. Ko Setani, se na tevoro, e dua na meca ni ituvatuva ni Kalou” ka vaka tu mai oya mai na ivakatekivu.
“Na galala, se kaukauwa me digidigi, sa dua na isolisoli levu duadua ni Kalou vei ira na Luvena. Sa dodonu meda digia se meda muri Jisu Karisito se muri Setani.”2
Oqo eso na dina rawarawa ka da rawa ni wasea vei ira eso.
Meu wasea mada e dua na gauna e wasea kina na tinaqu na dina rawarawa ena nona loma dola me veivosaki ka vakayagataka na madigi.
Ena vuqa na yabaki sa oti, ea lesu tale tiko ko tinaqu ki Argentina me sikova na ganequ. Baleta ni sega ni dau taleitaka na vuka ko tinaqu, ea kerea kina e dua na luvequ tagane me solia vua e dua na veivakalougatataki ni veivakacegui kei na veitaqomaki. Ea vakauqeti o koya me vakalougatataki nona bu me tuberi ka dusimaki vakabibi mai na Yalo Tabu me vaqaqacotaki ka tara na lomadra e lewe vuqa ka gadreva mera vulica na kosipeli.
Ena raraniwaqavuka e Salt Lake, erau a sotava ko tinaqu kei na ganequ e dua na goneyalewa yabaki vitu ea suka tiko ki vale mai na dua na gade ni vakatasisi kei nona matavuvale. E rau raica nona itubutubu ni sa dede nona vosa tiko vei tinaqu kei ganequ, erau nanuma me rau mai tomani kei luvedrau. Erau vakatakilai ratou kei na luvedrau ni ko Eduardo kei Maria Susana kei Giada Pol. Ea dua na isema bula ka katakata ki na matavuvale talei oqo.
Na matavuvale ruarua ea matalau me lako vata tiko ena waqavuka vata ki Buenos Aires, Argentina. Ni toso tiko nodratou veitalanoa, e raica ko tinaqu ni yacova mai na gauna oya eratou se bera ni rogoca na Lotu vakalesui mai i Jisu Karisito.
E dua na taro taumada nei Susana oya, “E rawa mo tukuna mada vei au me baleta na vale ni iyaya makawa ka tu ecake na ivakatakarakara koula?”
Ea vakamacalataka o nau ni vale totoka oya e sega ni vale ni iyaya makawa ia e vale ni Turaga ka keimami dau cakava kina na veiyalayalati kei na Kalou ka me rawa ni keimami lesu ka laki bula kei Koya ena dua na siga. Ea vakatusa vei tinaqu o Susana ni se bera nodratou gade ki Salt Lake ea masulaka e dua na ka me vaqaqacotaka na yalona.
Ni sa vuka tiko, ea tauca nona ivakadinadina rawarawa ka kaukauwa ko nau baleta na kosipeli ka sureti Susana me vakasaqarai ira na daukaulotu e nona tauni. Ea tarogi nau o Susana, “Au na kunei ira vakacava?”
Ea sauma ko tinaqu, “Ena sega ni rawa ni ko calati rau; erau na rua na cauravou vakasote vulavula kei na tae se rua na goneyalewa vakaliku, ka ra na dara tiko ga na beji ka tukuna na yacadra kei ‘Na Lotu i Jisu Karisito ni Yalododonu Edaidai.’”
Eratou veisau naba ni talevoni na matavuvale e rua ka vakamoce ena raraniwaqavuka e Buenos Aires. Sa yaco me noqu itokani vinaka o Susana, e sa tukuna vakavuqa vei au ni a vakila na rarawa ni a biuti tinaqu tu mai raraniwaqavuka. Kaya o lewa, “Ea serau o nomu nau. Au sega ni kaya rawa, ia e dua na rarama e wavoliti koya tu kau sega ni via biuta tu mai.”
E sega ni bera ena nona yaco ki na nona tauni ko Susana kei na luvena yalewa, ko Giada, ea laki wasea na ka sotavi vei tinai Susana, ka tiko ena vica na buloko mai nodratou vale. Ni ratou draiva tiko, ea raica sara o Susana ni rua na cauravou ni rau taubale tiko ena sala ka vakaisulu me vaka a tukuna ko nau. Ea kelea na motoka e lomadonu ni gaunisala, sobu, ka tarogi rau na cauravou,“Drau lako beka mai na Lotu i Jisu Karisito.?”
Erau a kaya, “Io.”
“Daukaulotu?” ea taroga.
Rau sauma ruarua, “Io o keirau qori.”
E qai kaya o lewa, “Vodo ki na noqu motoka; drau sa na laki vale mo drau laki vakavulici au.”
Ea papitaiso ko Maria Susana ena vula rua emuri. Na luvena goneyalewa, ko Giada, ea papitaiso talega ni sa yabaki 9. Keitou se cakacaka tikoga ena vukui Eduardo, ka keitou lomana veitalia na cava.
Mai kea, sa yaco ko Susana me dua na daukaulotu levu duadua au se bau sotava. Sa vakai iratou na luvei Mosaia tagane o lewa, ni ratou kauta e levu na yalo vei Karisito.
Ena dua neirau veitalanoa, au a tarogi koya, “Na cava nomu ivunivuni? Ko wasea vakacava na kosipeli vei ira na tani?”
E kaya o koya, “E rawarawa sara. E veisiga ni bera niu biuta noqu vale, au dau masu vua na Tamada mai Lomalagi ka kerei Koya me dusimaki au vua e dua ka gadreva na kosipeli e nona bula. Au dau kauta ena so na gauna na iVola i Momani me wasea kei ira se kadi dausoli mai na daukaulotu—ia niu dau tekivu vosa vua e dua, au dau taroga sara ga ke sa bau rogoca baleta na Lotu.”
Ea tukuna talega o Susana,“Ena gauna tale eso au dau matadredre ga niu waraka tiko na sitima. E dua na siga ea raici au e dua na tamata ka kaya mai, ‘Na cava ko sigegetaka tiko?’ Ea vaka me vakidacalataki au.
“Au sauma, ‘Au sigege baleta niu marau!’
“Qai kaya o koya, ‘Ia na cava o rui marau kina?’
“Au sauma ‘Au lewe ni Lotu i Jisu Karisito ni Yalododonu Edaidai, oya na ka e cakava meu marau. Ko sa bau rogoca li?’”
Ni kaya mai ni se sega, ea solia o lewa e dua na kadi dausoli ka sureti koya me lako mai ena Sigatabu ka tarava. Ena sigatabu ka tarava, ea tavaki koya e katuba.
E vakavulica o Elder Dallin H. Oaks:
“E tiko e tolu na ka e rawa ni ra cakava na lewenilotu me ra veivuke ena kena wasei na kosipeli.
“iMatai, sa rawa ni da masuta taucoko na gagadre me veivuke ena tiki ni cakacaka bibi oqo ni veivakabulai.
“iKarua, sa rawa ni da muria vakai keda na ivunau. … Ena dau tiko ga vata kei ira na lewenilotu yalodina na Nona Yalotabu me tuberi ira ni ra qara mera vakaitavi ena cakacaka levu ni kena wasei na kosipeli vakalesui mai i Jisu Karisito.
“iKatolu e rawa ni da masuta na veivakauqeti ni cava eda rawa ni cakava … meda wasea na kosipeli kei ira na tani … [ka] masu ena yalayala me cakacaka ena veivakauqeti o ciqoma.”3
Ganequ, taciqu, gonelalai, kei na itabagone, e rawa li ni da vakataka noqu itokani o Susana ka wasea na kosipeli vei ira na tani? E rawa li ni da sureta e dua na itokani ka sega ni da vakabauta vata me lako mai lotu kei keda ena Sigatabu? Se rawa beka li ni da solia e dua na iVola i Momani vua e dua na veiwekani se dua na itokani? E rawa beka ni da vukei ira eso mera kunei ira nodra qase ena FamilySearch se wasea vei ira eso na ka eda sa vulica e loma ni macawa ni da vulica tiko na Lako mai, Mo Muri Au? Ena rawa beka me vakataka vakalevu cake na noda iVakabula o Jisu Karisito ka wasea kei ira na tani na veika e kauta mai na reki ki na noda bula? Na isau matata ki na veitaro kece oqori na io! E rawa ni da cakava!
Eda wilika ena ivolanikalou ni ra sa talai yani na lewe ni Lotu i Jisu Karisito “meda cakacaka ena nona were ni vaini me ra vakabulai kina na tamata’ (Doctrine and Covenants 138:56). Na cakacaka ni veivakabulai oqo e wili kina na cakacaka vakadaukaulotu ni lewenilotu, nodra maroroi na saumaki mai, vakabulabulataki ni lewenilotu luluqa, cakacaka ni vola kawa kei na valetabu, kei na vakavulici ni kosipeli.’”4
Kemuni na noqu itokani lomani, e gadrevi keda na Turaga meda vakasoqoni Isireli. Ena Vunau kei na Veiyalayalati e kaya kina o Koya, “Dou kakua ni lomaocaocataka na ka mo dou kaya; ia mo dou kumuna cake ena nomudou vakasama e veigauna na vosa ni bula, ka na qai soli vei kemudou ena kena auwa na veika me tukuni me ganita na tamata yadua.”5
Kena ikuri, ni sa yalataka vei keda:
“Ia kevaka drau sa vunau tiko ena nomudrau bula taucoko ka sa saumaki mai kina e dua na tamata, sa na vuabale sara na nomudrau marau e na matanitu i Tamaqu!
“Ia kevaka sa vuabale na nomudrau marau ni drau sa vakabula mai e dua ki na matanitu i Tamaqu, sa na uasivi sara na nomudrau marau kevaka drau sa vakabula rawa e lewevuqa!”6
Na sere ni Lalai kau tekivu kina e tini ena itukutuku titobu oqo:
Au vakabauta na iVakabula, ko Jisu Karisito.
Au na doka na yacana.
Au na cakava na ka dodonu;
Au na muria na nona rarama.
Nona dina au na kacivaka.7
Au laveta na ivakadinadina ni veivosa dina oqo ka noda e dua na Tamada dauloloma mai Lomalagi ka waraki keda tiko meda vuki vei Koya me vakalougatataka noda bula kei na nodra bula era wavokiti keda. Me noda mada na gagadre meda kauti ira mai na tacida kei na ganeda vei Karisito sa noqu masu ena yaca i Jisu Karisito, emeni.