Solia ki Yaloda me Lewa na Yagoda
E dua na ka bibi duadua e rawa ni da vulica ena bula oqo sai koya me da vakabibitaka na veika ni yaloda tawamudu ka lewa vinaka na noda gagadre ca.
Kemuni na taciqu kei na ganequ, ni roro mai na koniferedi raraba ni Okotova ena yabaki sa oti, au vakarautaka na noqu vosa ni koniferedi me nanumi kina na ika 100 ni yabaki ni raivotu baleta na vuravura ni yalo ka a soli vei Peresitedi Joseph F. Smith ena 3 ni Okotova, 1918.
Ni oti e vica na siga na noqu solia na noqu vosa me vakadewataki, sa mai vakacavara na noqu itokani tawamudu, o Barbara, na nona vakavakarau ena bula oqo ka takali yani ki na vuravura ni yalo.
Ni toso na veisiga me macawa, ka vula yani, sa dua kina na yabaki oqo na nona takali o Barbara, au kunea niu sa qai taleitaka tikoga vakalevu na ivolanikalou oqo: “Mo dou qai bula vata ena veilomani, mo dou tagicaki ira vata kina era sa mate.”1 Keirau a vakalougatataki kei Barbara me “keirau bula vata ena veilomani” ena 67 na yabaki. Ia au sa vulica vakataki au na kena ibalebale “mo dou tagicaki ira vata” o ira eda lomana. Isa, sa dua na ka na noqu lomani koya ka nanumi koya!
Au nanuma ni levu eda sega ni dau marautaka sara na veika era dau cakava vei keda na tani me yacova sara ni ra sa takali. Au kila ni dau osooso tu ga o Barbara, ia au sega ni kila vakavinaka sara na nona dau vakaosoosotaki ena ogaoga vakamatavuvale, Lotu, kei na itikotiko. Era tu na veisasaga bibi e veisiga ka dau caka vakavica vata na udolu ena loma ni veiyabaki me toso tiko kina na neitou matavuvale. Ia ena veigauna kece oqori, e sega ni dua ena neitou matavuvale me bau rogoca me rogolevu na domona se cavuta e dua na vosa rogoca.
Sa dau luvuci au ena yabaki sa oti oqo e vuqa vakavuqa na vakanananu. Au vakasamataka na digidigi vakatubuoca a vakayacora me tinadratou e vitu na gone. Me dau qaravi vuvale sai koya na cakacaka a vinakata, ka kenadau ena veitikina kece sara.
E vakavuqa, niu dau vakataroga se vakamuri au kei ira na luvei keirau rawa tiko vakacava. Na vakarau kakana duadua e dua na cakacaka dredre, sega ni wili kina na ibinibini sulu levu ni matavuvale me sava e veimacawa, na maroroi tiko ni vava kei na sulu me rauti ira na gone. Keitou dau gole ga vua ena veika bibi kece sara keitou leqa kina. Baleta ni ra bibi vei keitou, sa bibi talega vakakina vua. O koya, ena dua ga na vosa, e vakasakiti—vakaradini ni vale, vakatina, vakaitokani, veiwekani, vakaluvena yalewa na Kalou.
Oqo ni sa takali yani, au marau niu digitaka meu dabe e yasana niu dau lesu mai ki vale ena iotioti ni vica na vula ni nona bula, meu taura toka na ligana ni keirau sarava na nona ivakatagi taleitaki—vakavica vata baleta ni sega ni vakatara na Alzheimer me nanuma ni se qai sarava oti ga ena yakavi ena noa. Na vakanananu ni gauna ni veitauriliga oya sa vakamareqeti dina vei au ena gauna oqo.
Kemuni na taciqu kei na ganequ, yalovinaka ni kakua ni dau calata e dua na madigi mo raica na matadra na lewe ni nomu matavuvale ena loloma. Kemuni na gone kei na itubutubu, ni dau veitaratara vakataki kemuni ka vakaraitaka na nomuni loloma kei na vakavinavinaka. Me vakataki au, eso vei kemuni ena qai yadra mai ena dua na siga ka qai kila ni sa tasivi na gauna ni veitalanoa bibi vakaoya. Ni bula vata e veisiga yadua ena yalo ni vakavinavinaka, ni vakanananu vinaka, veiqaravi, kei na veilomani vakalevu.
Ena loma ni yabaki sa oti qo, au vakasamataka vakatitobu sara na nona ituvatuva na Tamada Vakalomalagi me vaka ni se bera vakadua ni yaco. Ena nona vakavulica na luvena o Korianitoni, a vakatoka o Alama me “ituvatuva cecere ni marau.”2
Na vosa e basika tikoga mai noqu vakasama niu vakasamataka na ituvatuva na “vakaduavatataki tale.” Sai koya na ituvatuva, e cakava na Tamada Vakalomalagi, ka kena itakele me rawati na vakaduavatataki tale lagilagi ni matavuvale—me vakaduavatataki tale me tawamudu na veiwatini tagane kei na yalewa, itubutubu kei na luvena, na itabatamata ki na itabatamata ena vuvale ni Kalou.
Na vakanananu oqori e kauta mai vei au na logavinaka kei na yalodei niu na tiko tale vata kei Barbara. E dina ni a rarawa na yagona ni voleka me cava nona bula, a dei, vakamarama, ka savavuka tu na yalona. Sa vakarautaki koya tu ena veika kece sara me rawa, ni yaco mai na kena gauna, sa rawa ni tu ena “mata ni itikotiko talei ni veilewai ni Kalou,”3 ka sinai tu ena yalodei kei na vakacegu. Ia au tu qo koi au, ena rua na siga sa yabaki 91, kau se taroga tikoga, “Au sa vakarau beka? Au sa cakava tiko beka na veika e dodonu meu cakava me rawa kina niu taura tale na ligana?”
Na ka tudei taumada ka matata duadua ni bula sai koya: Eda na mate kece. Se da mate ni da sa qase se gone, rawarawa se dredre, vutuniyau se dravudravua, daulomani se galili, sega ni dua ena drotaka na mate.
Ena vica na yabaki sa oti a cavuta o Peresitedi Gordon B. Hinckley e dua na ka vakaibalebale me baleta na vakasama oqo: Sa ka kamikamica na veivakadeitaki, sa veivakalomavinakataki na vakacegu e lako mai na kilaka ni kevaka eda vakawati donu ka bula dodonu, ena tomani na noda veimaliwai, sega ni vakuwai kina na yaco deivaki ni mate kei na itosotoso ni gauna.”4
Au a vakawati donu. Sega ni rawa ni vakabekataki oya. Ia e sega ni sa rauta oqori; me vaka e tukuna o Peresitedii Hinckley. E dodonu talega meu bula dodonu.5
Nikua, na “bula dodonu” e rawa ni dua na vakasama velecayaki, vakabibi kevaka e levu na gauna o vakayagataka ena tabana vakaitukutuku raraba, na vanua e rawa ni tukuna kina e dua ga na domo e rawa na dina se na vakasama lasu baleta na Kalou kei na Nona ituvatuva vei ira na Luvena. E vakavinavinakataki, ni tu vei keda na lewe ni Lotu na veivakavuvuli ni kosipeli dina tawamudu me da kila na ivakarau ni bula me da vakarau kina vakavinaka ki na mate.
Ni vo e vica na vula meu sucu, a tauca kina na tukaqu iApositolo, o Elder Melvin J. Ballard, e dua na vosa ka, vei ira e vuqa na tamata, umani kina na ibalebale ni bula dodonu. Kena ulutaga “Na Sasaga Dredre ni Yalo,” a vakatabakidua na nona vosa ena ivalu sega ni mudu ni yago kei na yalo tawamudu.
E kaya o koya, “Na veivorati levu duadua ena sotava e dua na tagane se yalewa … na ivalu erau na vala kina kei koya ga,” ka vakamacalataka ni o Setani, “na meca ni yalo,” e dau valuti keda mai na “gagano ca, na viakana, kei na gagadre ni yago.”6 “O koya gona kina na ivalu taumada erau valu kina na yaloda vakalou kei na tamata vakayago.” Kemuni na taciqu kei na ganequ, nanuma tiko ni rawa ni da rawata na veivuke vakayalo ena veivakayarayarataki ni Yalo Tabu ka rawa ni “vakavulici kemudou ena ka kecega.”7 E rawa talega na veivuke mai na veivakalougatataki kei na kaukauwa ni matabete.
Ia au na taroga, sa vakacava tiko na ivalu oqo vei iko?
E kaya o Peresitedi David O. McKay: “Na bula ni tamata e vuravura e dua na veivakatovolei vua se na vakatabakiduataka nona sasaga, nona vakasama, na yalona, ki na veika me tiko vinaka ka vinaka kina vakayago, se ena kitaka me inaki ni nona bula na rawati ni veika talei vakayalo.”8
Na ivalu oqo ni ituvaki ni yagoda kei na yaloda e sega ni ka vou. Ena itini ni nona vunau vei ira na nona tamata, a vakavuvulitaka kina o Tui Penijamini ni “sa meca ni Kalou na tamata vakavuravura, ka sa vaka tu mai kina me tekivu sara mai na lutu i Atama, ka na vaka tu kina me sega ni mudu ka sega ni mudu, ka vakavo ke sa talairawarawa ki na veivakayarayarataki ni Yalo Tabu, ka biuta tani na tamata vakavuravura ka yaco me yalododonu ena vuku ni veisorovaki i Karisito na Turaga.”9
E vakavuvulitaka na iApositolo o Paula ni “ra sa gadreva na veika vakayago ko ira era sa itovo vakayago; ia na veika vaka-Yalo ko ira era sa itovo vaka-Yalo.
“Ni sa vu ni mate na gadreva na itovo vakayago; ia sa vu ni bula kei na vakacegu na gadreva na itovo vakayalo.”10
E vaka me matata vei au ni dua na ka bibi duadua e rawa ni da vulica ena bula oqo sai koya me da vakabibitaka na veika ni yaloda tawamudu ka lewa vinaka na noda gagadre ca. Oqo me kakua ni lesi tale kina e dua me cakava. Na yaloda, o koya sa balavu cake na nona tiko voli mai na yagoda, sa qaqa oti tu ena kena digitaki na dodonu mai na ca ena bula taumada. Ni se bera ni buli na vuravura oqo, eda sa bula voli ena nodrau iserau na noda iTubutubu Vakalomalagi, erau dau lomani keda ka se lomani keda tikoga ena gauna oqo.
Io, a dodonu me da vakatauca na lewa kei na digidigi vakayaco veisau ki na bula ena iyalava taumada oya. Na tamata kece sara sa mai bula oti se era na qai mai bula ena vuravura oqo era a sa vakatauca e dua na lewa bibi ena nodra digitaka me ra ciqoma na ituvatuva nei Tamada Vakalomalagi me baleta na noda vakabulai. Eda lako kece mai kina ki vuravura ni sa vakadinadinataki na noda qaqa vakayalo kei na icavacava tawamudu.
Vakasamataka mada oya. Sai iko dina oqo, ko a dau vaka tu ga kina: e dua na luvena tagane se yalewa na Kalou, e tu na wakamu ena tawamudu ka vuabale tu ena veika e rawa ni yaco na nomu veisiga ni mataka. O iko—taumada, se bera na veika kece, e veigauna—e dua na tamata vakayalo. O koya gona ni dua e digitaka me vakaliuca na yagona mai na yalona, sa digitaka tiko e dua na ka e veisaqasaqa kei keda dina vakayalo.
E sega ni vakabekataki ni uqe ni yago vakavuravura e dau vakadredretaka kina na vakatau lewa. Ni sa dumu tu na ilati ni guiguileca e wasei rau na vuravura taumada kei na vuravura oqo, sa rawa kina ni guilecava e dua na kena isema vua na Kalou kei koya vakayalo, sa na rawa kina ni vakaliuci na yagoda ena veika eda vinakata ena gauna oqo. Na kena vulici me digitaki na veika ni Yalo mai na veika ni yago e dua na vuna taumada e tiki kina ni Nona ituvatuva na Tamada Vakalomalagi na bula vakavuravura oqo. Oqori talega na vuna e tarai kina na ituvatuva ena yavu dei ni Veisorovaki ni Turaga ka iVakabula, ko Jisu Karisito, me rawa kina ni uabaleti na noda ivalavala ca, oka kina na cala eda cakava ena noda soli keda ki na yago, ena veivutuni e veigauna me rawa ni da tudei tu vakayalo. Oqo na gauna me da lewa vinaka kina na gagadre ni yagoda me duavata kei na ivunau vakayalo i Karisito. Qori na vuna me da kakua kina ni lokuyarataka na siga ni noda veivutuni.11
O koya sa yaco kina me iyaragi sega ni vakaisosomitaki rawa ni noda valuti keda na veivutuni. Ena koniferedi raraba ga sa oti, a goleva kina o Peresitedi Russell M. Nelson na ivalu oqo ka kaya “gauna eda digitaka kina me da veivutuni, eda sa digitaka me da veisau! Eda sa vakatara na iVakabula me vakavoutaki keda ki na keda ituvaki vinaka duadua. Eda sa digitaka meda tubu vakayalo ka ciqoma na reki—na reki ni noda vueti mai Vua! Ni da sa digitaka meda veivutuni, eda sa digitaka meda vakataki Jisu Karisito vakalevu cake!”12
E veibogi niu railesuva na siga oya ena masu vei Tamaqu mai Lomalagi, au kerea meu vosoti kevaka au cala kau yalataka niu na tovolea meu vinaka cake ni mataka. Au vakabauta ni veivutuni e veisiga oqo e vukea me vakananuma ki yagoqu na yaloqu se o cei e vakatulewa tiko vei au.
E dua tale na sala sai koya na madigi vakamacawa vei keda kece me da vakavoui keda ena noda vakayagataka na sakaramede me vakananumi kina na Veisorovaki kei na loloma ni noda Turaga ka iVakabula, ko Jisu Karisito ena vukuda.
Kemuni na taciqu kei na ganequ, au vakauqeti kemuni mo ni vakamalua mada vakalailai ka vakasamataka na vanua o ni sa tu kina ena gauna oqo ena nomuni valuta ka lewa tiko na yagomuni kei na nomuni solia na kaukauwa ki na yalomuni vakalou, ni na yaco mai na kena gauna, mo ni curu yani ki na vuravura ni yalo ki na dua na veivakaduavatataki rekitaki kei ira na nomuni daulomani—na ka oqo au vakadinadinataka ka masiuta ena yalomalumalumu ena yaca i Jisu Karisito, emeni.