Nomu iLakolako Cerecere ni Vuli
E sureti iko ena veisiga na iVakabula, mo biuta na nomu vanua logaloga vinaka kei na veika e taqomaki iko ka muri Koya ena ilakolako ni bula vakatisaipeli.
Ira na Leka
E dua na nodra ivola talei na gone ka volai ena vica vata na yabaki sa oti e tekivu ena yatu vosa “E loma ni dua na qara vatu sa toka kina e dua na leka.”1
Na italanoa kei Bilbo Baggins e baleta e dua na leka sega ni maleleti ka soli vua e dua na madigi vakasakiti—me gole ena ilakolako talei, ka yalataki vua e dua na icocovi levu sara.
Na leqa e tiko ni vuqa vei ira na leka oqo era sega ni dau vinakata me ra vakaitavi ena ilakolako vakavuli. Na nodra bula e baleta tu ga na logaloga vinaka. Era marautaka na kana vakaono ena dua na siga ena gauna e rawa kina ka ra dau vakayagataka na loma ni siga ena nodra veiwere, ra veitalanoa kei na nodra vulagi, laga sere, qiri ivakatagi, ka marautaka tu na veika rawarawa sara ena nodra bula.
Ia, ena gauna e vakaraitaki kina vei Bilbo ni rawa ni gole ena dua na ilakolako talei ni vuli, e dua na ka e lauta na yalona mai loma. E kila vinaka sara o koya mai na ivakatekivu ni na veibolei sara na ilakolako. Rawa ni vakarerevaki talega. E rawa talega ni na sega ni lesu tale mai.
Ia, na veikacivi ni ilakolako ni vuli oqo e malele sara kina vakatitobu na yalona. Sa mani lako yani na leka oqo ka biuta tu na logaloga vinaka ni bula ka vakarau ena ilakolako ni vuli cecere ka na kauti koya ki “kea ka lesu mai.”2
Nomu iLakolako ni Vuli
E dua beka na vuna e voqa voleka ki na vuqa vei keda na italanoa oqo e baleta ni keda italanoa talega.
E dua na gauna makawa sara, se bera ni da sucu, e gauna ka sega ni matata ka buwawa mai na noda vakanananu, eda a sureti meda lako ena dua na ilakolako ni vuli. E a vakatututaki mai vua na Tamada Vakalomalagi. Na ciqomi ni ilakolako oqo e kena ibalebale ni da biuta na logaloga vinaka kei na veitaqomaki ni Nona iserau. E kena ibalebale ni da lako mai ki vuravura e na ilakolako e vakasinaiti tu ena veika vakarerevaki e tawakilai kei na veivakatovolei.
Eda kila ni na sega ni rawarawa.
Ia eda kila talega ni da na rawata na iyau vakamareqeti, oka kina na yago kei na vakilai ni reki titobu kei na rarawa ni bula vakayago. Eda na vulica meda na sasaga vagumatua, vakasaqaqara ka sasaga. Eda na kunea na dina me baleta na Kalou kei na veika baleti keda.
E dina sara, ni da kila ni na levu na cala eda na vakayacora ena sala oqo. Ia oi keda talega e a dua na noda vosa ni yalayala: oya ena vuku ni veisorovaki cerecere i Jisu Karisito, e rawa ni da savai mai na noda ivalavala ca, vakavinakataki na yaloda, ena dua na siga, eda na vakaturicake tale mai na mate ka lako vata tale kei ira na noda daulomani.
Eda vulica na levu ni nona lomani keda na Kalou. E solia o Koya vei keda na bula ka vinakata meda rawa ka. O koya gona, sa vakarautaka kina vei keda o Koya e dua na iVakabula. “Ia,” sa kaya na Tamada Vakalomalagi, “sa soli tu vei iko mo lewa na ka mo kitaka.”3
Eso beka na tiki ni ilakolako ena vuravura vakayago oqo era lomaleqa kina ka vakarerevaki vei ira na luve ni Kalou, ni dua tiko na iwiliwili levu vei ira na tacida kei na ganeda vakayalo era a sega ni digidigi vakakina.4
Ena isolisoli kei na kaukauwa ni digidigi, eda sa kila kina ni veika eda na rawa ni kila ka vulica ka yaco me vakakina me tawamudu sa yaga sara vakalevu.5
Sa vakakina, ni da sa nuitaka na yalayala kei na kaukauwa ni Kalou kei na Luvena Dua Bau, eda sa ciqoma na bolebole.
Au a cakava.
Oi kemuni talega!
Eda duavata kina meda biuta na veitaqomaki ni noda itikotiko taumada ka gole ena ilakolako ni vuli vakataki keda ni “lako yani ka lesu mai.”
Na Kaci ni iLakolako ni Vuli
Ia, e tu ena sala ni bula vakayago na veika me vakacalai keda, se vakacava? E vaka raicalata na noda sasaga levu duadua, na noda taleitaka tikoga na logaloga vinaka kei na veika rawarawa mai na tubu kei na toso ki liu.
E tikoga, e tiko vakatitobu e dua na ka e sega ni vakacalai rawa, e yaloda, sa walokaitaka dina tu e dua na inaki e cecere ka vakatui cake sara. Na walokai oqo e dua na vuna era sa malele tiko kina na tamata ki na Lotu i Jisu Karisito. Ena dua na vakasama, na kosipeli vakalesui mai e dua na kaci vakavoui ki na ilakolako ni vuli eda a ciqoma ena dua na gauna makawa sara. E sureti iko ena veisiga na iVakabula, mo biuta na nomu vanua logaloga vinaka kei na veika e taqomaki iko ka muri Koya ena ilakolako ni bula vakatisaipeli.
E vuqa sara na veigoleyaki ena sala oqo. E tiko kina na veiulunivanua, vanua bucabuca, kei na gaunisala tale eso. E rawa talega ni tiko kina na vakatautauvata ni sipaida, manumanu dau kana tamata, ka dua se rua na drekoni. Ia, kevaka o muria tikoga na salatu ka vakararavi vua na Kalou, o na rawa ni kunea na sala ki na vanua lagilagi e cava kina na nomu ilakolako ki na nomu itikotiko vakalomalagi.
Mo sa na tekivu vakacava?
E rawarawa sara.
Vagolea na yalomu vua na Kalou.
iMatai, e gadrevi mo digitaka me vagolei na yalomu vua na Kalou. Tovolea e veisiga mo kunei Koya. Vulica mo lomani Koya. Me qai vakauqeti iko na loloma mo vuli, kila vakavinaka, ka vulica me vakamuria na Nona ivakavuvuli. Na kosipeli vakalesui mai i Jisu Karisito e soli vei keda ena sala e macala ka rawarawa sara ka rawa ni kila vinaka talega na gone. Ia, na kosipeli i Jisu Karisito e rawa ni sauma na veitaro vereverea ni bula, na kena titobu kei na kena matailalai, kevaka mada ga meda taura e dua na gauna ni bula taucoko meda vulica ka vakasamataka vakatitobu, eda na sega ni kila vinaka sara e dua mada ga na tikina lailai.
Kevaka o lomalomarua ena ilakolako ni vuli oqo baleta ni o vakatitiqataka na veika o rawa ni cakava, nanuma sara tiko na bula vakatisaipeli e sega ni baleta na kena caka me uasivi na veika kece; e baleta na noda via cakava dina na ka. Na nomu digidigi ena vakaraitaka se o cei dina mada o iko, vakalevu cake sara mai na veika o rawa ni cakava.6
Ena gauna mada ga ni druka, e rawa ni o digitaka mo kua ni guce se soro, ia o vinakata mo kila se vakacava na nomu yaloqaqa, mo toso tikoga ki liu ka lamata cake mai. Sai koya oqori na veitarogi levu ni lakolako oqo.
E kila na Kalou ni sega ni o uasivi, ka na yaco talega na druka. E sega ni lomani iko vakalailai na Kalou ena nomu gauna ni veivakatovolei mai na gauna ni qaqa.
Me vaka ga e dua na itubutubu dauloloma, e vinakata dina o Koya mo tovolea tikoga. Na bula vakatisaipeli e vaka na kena vulici me tabaki na piano. Ena imatai beka ni gauna ni nomu taba piano ena sega sara ni rogo vinaka na nomu vakatagitaka na “Chopsticks.” Ia, kevaka o na vakatovotovo tiko ga, na rogorogo rawarawa o a sega ni dau vakatagitaka rawa vakavinaka e sa na yaco me dua na irogorogo ni vakatagi vakasakiti sara dau nanamaki kina na tamata me mai vakarorogo.
Ena sega beka ni yaco mai na siga oya, ena bula oqo ia, ena yaco mai. E kerea walega na Kalou mo sasaga tikoga vagumatua.
Dolele yani ena Loloma vei ira na Tani
E dua na ka veivakurabuitaki, e vaka tale me sega ni vakabauti, me baleta na salatu o sa digitaka: sai koya, na sala duaduaga mo tubu kina ena nomu ilakolako ni vuli, o ya mo na vukei ira na tani me ra tubu talega.
Na nomu vukei ira na tani sai koya na salatu ni bula vakatisaipeli. Na vakabauta, nuinui, loloma, yalololoma , kei na veiqaravi e vakavinakataki keda me da tisaipeli.
Ena nomu sasaga mo vukei ira kina na dravudravua kei na vakaloloma, sai koya mo dolele yani vei ira sa vakaocai tu, sa vakataucokotaki ka savai na nomu itovo ni bula, vakarabai levu taki na yalomu, ka sa dodonu mai vakalailai na nomu ilakolako.
Ia, na loloma oqo e sega ni rawa ni yaco mai kei na ivakanuinui me na saumi lesu tale. Au sega ni rawa ni namaka ena veiqaravi na rogo, veivakacaucautaki, kei na veivakadonui mai vei ira na tani.
Na tisaipeli dina i Jisu Karisito era lomana na Kalou kei ira na Luvena ka sega ni namaka e dua na ka. Eda lomani ira talega era vakacudrui keda, ka sega ni taleitaki keda. Vakakina, o ira era vakalialiai keda, vakalolomataki keda, ka dau saga me vakamavoataki keda.
Ni ko vakasinata na yalomu ena loloma uasivi i Karisito, e sega ni dua na rumu e lomamu mo yaloca, vakalelewa, se veivakamaduataki. Sa o vakamuria na ivunau ni Kalou baleta ni o lomani Koya. Ena iwalewale oqori, sa yaco mai me va-Karisito vakalevu cake na nomu vakanananu kei na nomu ivalavala.7 Na ilakolako ni vuli cava ena rawa ni cecere cake mai na kena oqo?
Wasea Nomu iTalanoa
Na ikalotu ni ka eda rawa ni da sasaga kina ena ilakolako oqo sai koya meda taura vei keda na yacai Jisu Karisito ka sega ni maduataka.
Eda sega ni vunitaka na noda vakabauta.
Eda sega ni buluta.
Kena veibasai, eda veitalanoataka kei ira na tani na noda ilakolako ena sala e veiganiti ka matau. Oqori na veika era vakayacora na itokani—era veitalanoataka na veika e bibi vei ira. Na veika e vakamareqeti ki yalodra ka vakabetena vei ira.
Oqori na veika o cakava. Ko talanoataka ka wasea na veika o sotava vakalewe ni Lotu i Jisu Karisito ni Yalododonu Edaidai.
Ena so na gauna era dredrevaka na nomu italanoa na tamata. Ena so na gauna era na tagi. Ena so na gauna era na vukea na tamata me ra toso tikoga ena yalovosota, sega ni guce, kei na yaloqaqa me ra nanamaki tiko ena dua tale na auwa, kei na dua tale na siga me voleka cake tiko vua na Kalou.
Wasea na veika o sotava e matavotu, ena tabana ni veimaliwai raraba, vakailawalawa, kei na veivanua kecega.
Na iotioti ni ka me tukuna vei ira na Nona tisaipeli o Jisu me ra lako yani ki vuravura taucoko ka wasea na italanoa kei Karisito sa vakaturicake.8 Nikua eda sa ciqoma e dua na ilesilesi cecere.
Sa dua dina na itukutuku lagilagi meda wasea: ena vuku i Jisu Karisito, na tagane, yalewa, kei na gone kece sara sa rawa ni lesu bula tale ki na nodra itikotiko vakalomalagi ka, mai kea, tiko ena lagilagi kei na yalododonu!
Sa levu sara na itukutuku vinaka e rawa ni veiwaseitaki.
Sa rairai mai na Kalou vei ira na tamata ena noda gauna! E tiko na noda parofita bula.
Meu vakananuma tale mada vei iko e sega ni gadrevi iko na Kalou mo “volitaka” na kosipeli vakalesui mai kei na Lotu i Jisu Karisito.
E vinakata ga o Koya mo kakua ni vunitaka e ruku ni teveli.
Kevaka era sa nanuma na tamata ni sega ni ganiti ira na Lotu, oqori e nodra digidigi.
E sega ni kena ibalebale ni ko sa druka. Mo caka vinaka tikoga vei ira. E sega talega ni vakuwai kina na nomu rawa ni sureti ira tale.
Na duidui ni veitaratara ni veimaliwai kei na bula vakatisaipeli yaloqaqa dauloloma sai koya na—veisureti!
Eda lomani ira ka rokovi ira kece na luvena na Kalou, se itutu cava ga era tu kina, kawatamata se vakabauta cava, se vakatulewa cava ga era vakatulewa kina.
E noda itavi, meda kaya, “Lako mai ka raica! Mai raica vakataki iko na veika o na rawata na nomu muria na salatu ni bula vakatisaipeli kei na kena vakaturaga.”
Keimami sa sureti ira na tamata “me ra lako mai ka veivukei, ena kena sagai me vanua vinaka cake na vuravura.”
Ka keimami kaya, “Lako mai ka mai tiko! Eda veitacini ka veiganeni kece sara. Eda sega ni uasivi tu. Eda nuitaka na Kalou ka da saga tikoga meda muria na Nona ivunau.
“Mai veitomani kei keimami, ka mo ni vakavinakati keimami cake. Ni na yaco oqo, o na vinaka cake talega kina o iko. Meda mai lako vata ena ilakolako ni vuli oqo.”
Meu Tekivu ena Gauna Cava?
Ena gauna e yavalati koya kina na kaci ni ilakolako ni vuli e lomana, na noda itokani o Bilbo Baggins, sa vakatulewataka sara o koya me cegu sara vakavinaka ena bogi, marautaka na kena ikatalau totoka, ka tekivu ena mataka caca.
Ni yadra mai o Bilbo, e raica o koya ni tuvaka ca tu na nona vale, voleka sara ni vagolei koya tani mai na nona ituvatuva.
Qai gole yani na nona itokani o Gandalf ka taroga, “Ena gauna cava beka o na gole mai kina?”9 Me rawa ni yaco yani kivei ira nona itokani, sa gadrevi me kila o Bilbo na veika me cakava.
Ka sa yaco kina, na leka sega soti ni vakasakiti oqo e vakusakusa yani ki na salatu ni ilakolako ni vuli ka guilecava tu na nona isala, titoko, kei na itavoi. E sega madaga ni vakaotia na ikarua ni kena katalau.
E tiko beka eke e dua na lesoni vei keda.
Kevaka e daru sa vakila nai dre me daru tomana na ilakolako cecere ni vuli me bulataki ka wasei na veika e vakarautaka makawa tu na Tamada Vakalomalagi, au vakadeitaka vei iko, oqo na siga meda vakamuria kina na Luve ni Kalou kei na noda iVakabula ena Nona salatu ni veiqaravi kei na bula vakatisaipeli.
Eda rawa ni vakayagataka edua na gauna taucoko ni bula ni wawa, kina gauna me sa tuvai kina vakamatau na veika kecega. Sai koya oqo na gauna mo yalayala kina vakataucoko ena nomu vakasaqara na Kalou, veiqaravi vei ira na tani, ka wasea na veika o vakila vei ira na tani.
Biuta tu na nomu isala, titoko, itavoi, vale tu vakaca.10
Kivei keda eda sa taubaletaka tiko na salatu oqori, yaloqaqa tiko, dau yaloloma, nuidei tiko, ka toso tikoga!
Vei kemuni o ni sa biuta na salatu, ni yalovinaka lesu mai, meda veitomani tale, meda rawa ni kaukauwa vata.
Vei kemuni o ni se bera ni tekivu, na cava e vakaberai iko tiko? Kevaka o vinakata mo vakila na talei kei na cecere ni ilakolako vakayalo, taubale taka mai na nomu ilakolako vakasakiti ni vuli! Veiwasei kei ira na daukaulotu. Veiwasei kei ira na nomu itokani Yalododonu Edaidai. Veiwasei kei ira me baleta na cakacaka levu ka veivakurabuitaki oqo.11
Sa gauna meda tekivu!
Mai, Tomani Keimami!
Kevaka o vakila ni rawa ni vakaibalebale cake na nomu bula, cecere cake na kena inaki, kaukauwa cake na isema ni vuvale, ka vakavolekata na nomu isema kei na Kalou; yalovinaka, lako mai ka tomani keimami.
Kevaka o vakasaqara tiko e dua na itikotiko raraba ni tamata era cakacaka tiko vakaukauwa me ra tamata vinaka cake duadua era rawa ni yacova, vukei ira era gadreva na veivuke, ka sasagataka tiko me vanua vinaka cake na vuravura oqo, lako mai ka veitomani kei keimami!
Lako mai ka raica na totoka, talei, kei na vakasakiti ni ilakolako oqo.
Ena nomu sala oqori o na kilai iko vinaka sara kina.
O na kunea ni vakaibalebale vakalevu cake.
O na kunea na Kalou.
Ko na kunea na ilakolako vakavuli vakasakiti ka lagilagi duadua ena ilakolako ni nomu bula.
Au vakadinadinataka na veika oqori ena yaca i Jisu Karisito, emeni.