Papa a
Nou chak gen potansyèl pou nou vin tankou Papa a. Pou n fè sa, nou dwe adore Papa a nan non Pitit la.
Pandan tout lavi li, madanm mwen, Melinda, toujou eseye ak tout kè l pou l yon disip fidèl Jezikri. Men, depi lè l te jèn, li te toujou santi l pa t diy pou amou ak benediksyon Pè Selès la paske li pa t byen konprann nati Pè a. Erezman, Melinda te kontinye respekte kòmandman yo malgre tristès li te santi a. Sa gen kèk ane, li te viv yon seri eksperyans ki te ede l pi byen konprann nati Bondye, enkli amoun li pou pitit li yo ak gratitid li pou efò menm enpafè nou yo pou n fè travay li a.
Li eksplike ki enfliyans sa te gen sou li: “Kounyeya, m konvenki ke plan Papa a fonksyone, ke l pèsonèlman enplike nan siksè nou, epi li ba nou leson ak eksperyans nou bezwen pou n ka retounen nan prezans li. Mwen wè tèt mwen ak lòt moun jan Bondye wè nou an. M kapab ediks pitit mwen, anseye, ak sèvi avèk plis lanmou ak mwens laperèz. M santi lapè ak konfyans pase m santi anksyete ak ensekirite. Olye ke m santi yo jije m, m santi yo sipòte mwen. Lafwa m pi asire. M santi amou Papa mwen pi souvan e pi pwofondeman.”1
Genyen “yon ide kòrèk sou pèsonalite, pèfeksyon, ak kalite [Pè Selès la]” se yon bagay ki esansyèl pou n egzèse lafwa ki sifi pou n jwenn egzaltasyon an.2 Yon konpreyansyon kòrèk sou karaktè Pè Selès la ka chanje fason nou wè tèt nou ak lòt moun epi sa ka ede nou konprann amou imans Bondye genyen pou pitit li ak gwo dezi li pou ede nou vin menmjan avèk li. Yon vizyon enkòrèk sou nati li ka ba nou santiman ke nou pa p jamè kapab retounen nan prezans li.
Objektif mwen jodia se pou anseye kèk pwen doktrin kle sou Papa a ki ap pèmèt nou chak, men espesyalman moun k ap mande si Bondye renmen yo toutbon yo, pou yo pi byen konprann vrè karaktè li ak pou yo egzèse pi gwo lafwa nan li, nan Pitit Gason l lan, ak nan plan l pou nou.
Lavi Premòtèl la
Nan mond premòtèl la, nou te fèt kòm espri Paran Selès epi nou te viv avèk yo antanke yon fanmi. 3 Yo te konnen nou, yo te anseye nou, epi yo te renmen nou.4 Nou te gen gwo dezi pou n te menmjan ak Papa nou ki nan Syèl la. Men, pou n te fè sa, nou te rekonèt ke nou t apral oblije:
-
Jwenn yon kò fozik imòtèl ak glorifye;5
-
Marye epi fonde fwaye pa pouvwa sèlman prètriz la;6 epi
-
Akeri tout konesans, pouvwa ak kalite divin. 7
Konsa, Papa a te kreye yon plan ki t ap pèmèt nou, sou sèten kondisyon,8 jwenn kò fizik ki t ap vin imòtèl ak glorifye nan Rezirèksyon an; marye ak kreye fanmi nan mòtalite a oubyen, pou fidèl ki pa gen opòtinite sa a, apre mòtalite a;9 pwogrese al nan pèfeksyon; epi finalman retounen al jwenn Paran Selès nou yo pou n viv avèk yo ak fanmi nou nan yon eta egzaltasyon ak bonè etènèl.10
Ekriti yo rele plan sa a plan sali.11 Nou te sitèlman rekonesan pou plan sa a ke, lè yo te prezante nou li, nou te pouse kri lajwa.12 Nou chak te aksepte kondisyon plan an, enkli eksperyans ak difikilte mòtalite yo ki t ap ede nou devlope kalite divin.13
Lavi nan mòtalite a
Nan mòtalite a, Pè Selès la ba nou kondisyon nou bezwen pou n pwogrese andedan plan l lan. Papa a te anjandre Jezikri nan lachè14 epi l te ba l èd divin pou l te ka akonpli misyon li nan mòtalite a. Menmjan tou, Pè Selès la ap ede nou chak si nou efòse nou pou n kenbe kòmandman l yo.15 Papa a ba nou libabit.16 Lavi nou nan men li, epi li “konnen jou nou yo”, epi “ane nou yo p ap vin mwens”17 Epi li asire l ke, alafen, tout bagay travay pou byen moun ki renmen li.18
Se Pè Selès la ki ba nou pen kotidyen nou,19 ki enkli manje pou nou manje ak fòs nou bezwen pou n kenbe kòmandman l yo.20 Papa a bay bon don.21 Li tande priyè nou epi l reponn yo.22 Pè Selès la delivre nou anba mal lè nou kite l fè sa.23 Li kriye pou nou lè n ap soufri.24 An definitif, tout benediksyon nou soti nan Pè Selès la.25
Li gide nou epi l ba nou eksperyans nou bezwen yo baze sou fòs nou, feblès nou, ak chwa nou pou n ka pote bon fwi. 26 Papa a chatye nou lè sa nesesè paske l renmen nou.27 Li se “Lòm Konsèy,”28 ki ap konseye nou si nou mande.29
Se Pè Selès la ki voye enfliyans ak don Sentespri a nan lavi nou. 30 Atravè don Sentespri a, lagwa—oswa entèlijans, limyè ak pouvwa—Papa a ka demere nan nou.31 Si nou efòse n pou n pwogrese nan limyè ak laverite jiskaske je nou vin fikse sèlman sou glwa Bondye, Pè Selès la ap voye Sentespri Pwomès la pou sele nou al nan lavi etènèl epi l ap devwale figi l devan nou—oubyen nan lavi sa a oubyen nan lavi k ap vini an. 32
Lavi apre lanmò
Nan mond dèzespri a, Pè Selès la kontinye devèse Sentespri a epi l voye misyonè pou moun ki bezwen levanjil yo. Li reponn priyè yo epi l ede pitit li ki pa genyen yo resevwa òdonans sali yo pa pwokirasyon. 33
Papa a te elve Jezikri epi l ba l pouvwa pou reyalize Rezirèksyon an, 34 ki se mwayen pou nou jwenn kò imòtèl la. Redanmsyon ak Rezirèksyon Sovè a mennen nou retounen nan prezans Papa a, kote nou pral jije pa Jezikri. 35
Moun ki konte sou “merit, ak mizèrikòd, ak lagras Mesi ki Sen an”36 ap resevwa yon kò glorifye tankou Papa a37 epi y ap demere avèk li “nan yon eta bonè ki p ap janm fini.”38 Nan kote sa a, Papa a va siye tout dlo nan je nou39 epi ede nou kontinye vwayaj pou nou vin menmjan avèk li a.
Jan nou ka wè, Pè Selès la toujou la pou nou.40
Karaktè Papa a
Pou nou vin menmjan ak Papa a, nou dwe devlope trè karaktè li. Pèfeksyon ak kalite Pè Selès la gen bagay sa yo:
-
Papa a “San Finisman ak Etènèl.”41
-
Li pafètman jis, plen mizèrikòd, bon, pasyan, epi li vle sèlman sa k bon pou nou. 42
-
Pè Selès la se amou.43
-
Li kenbe alyans li.44
-
Li pa chanje.45
-
Li pa ka bay manti.46
-
Papa a pa rejte pèsonn.47
-
Li konn tout bagay—pase, prezan, ak fiti—depi nan kòmansman. 48
-
Papa a gen tout pouvwa51epi l akonpli tout sa kè l bezwen fè. 52
Frè m ak sè m yo, nou ka fè Papa a konfyans epi konte sou li. Paske l gen yon pèspektiv etènèl, Pè Selès la ka wè bagay nou pa ka wè. Jwa li, travay li, ak laglwa li se reyalize imòtalite nou ak egzaltasyon nou.53 Tout sa l fè se pou benefis nou. Li “vle bonè etènèl [nou] plis pase [nou] menm.”54 Epi li “pa p egzije [nou] travèse yon moman difikilte plis pase absoliman nesesè pou benefis nou oubyen pou benefis moun nou renmen.”55 Kòm rezilta, li konsantre sou ede nou pwogrese, non pa sou jije nou ak kondane nou.56
Vin tankou Papa nou
Antanke pitit gason ak pitit fi lespri Bondye, nou chak gen potansyèl pou n vin tankou Papa a. Pou n fè sa, nou dwe adore Papa a nan non Pitit la.57 Nou fè sa nan efòse n obeyi volonte Papa a, jan Sovè a te fè,58 epi nan repanti nou kontinyèlman. 59 Pandan n ap fè sa, n ap “resevwa gras sou gras” jiskaske nou resevwa plenitid Papa a60 epi nou dote avèk “karaktè li, pèfeksyon l ak atribi li.” 61
Etandone distans ant sa nou ye antanke moun mòtèl ak sa Pè Selès la devni, sa pa etonan ke kèk nan nou santi ke vin menmjan ak Papa a se yon bagay enposib. Sepandan, ekriti yo klè. Si nou atache nou ak lafwa nan Kris la, nou repanti, epi nou chèche gras Bondye atravè obeyisans, n ap finalman vin menmjan ak Papa a. M jwenn gwo rekonfò nan lefèt ke moun ki efòse yo pou yo obeysan yo ap “resevwa gras sou gras” epi alafen y ap “resevwa plenitid li.”62 Otremandi, nou pa p vin tankou Papa a pa pwòp mwayen nou. 63 Men, sa ap vini atravè don lagras li, pafwa gwo men piti pou pifò, ki ap ajoute youn sou lòt jiskaske nou vin gen yon totalite. Men, frè m ak sè m yo, l ap vini!
M envite nou pou nou kwè ke Papa nou ki nan syèl la konn kijan pou l egzalte nou; chèche soutyen li chak jou; epi avanse devan ak lafwa nan Kris la menm lè nou pa ka santi amou Bondye.
Gen anpil bagay nou pa konprann apwopo vin menmjan ak Papa a.64 Men, m ka temwaye avèk asirans ke, eseye vin menmjan ak Pap a a vo tout sakrifis.65 Sakrifis nou fè isit la nan mòtalite a, kèlkeswa jan yo gran, yo pa anyen konpare avèk lajwa, bonè, ak lanmou enkalkilab nou pral santi nan prezans Bondye a. 66 Si nou gen difikilte pou n kwè ke sa vo tout sakrifis yo mande nou pou n fè, Sovè a pale avèk nou, li di: “Nou poko ka konprann ki kalite gwo benediksyon Papa a gen … prepare pou nou; … nou pa kapab sipòte tout bagay kounyeya; sepandan, fè kè nou kontan, paske m ap dirije nou.”67
Mwen temwaye ke Papa nou ki nan Syèl la renmen nou epi li vle nou viv avèk li ankò. Nan non Jezikri, amèn.