Qalbenin fit-Testimonjanza ta’ Ġesù
Ma naffordjawx li nħawdu u nikkumplikaw it-testimonjanza tagħna tal-Missier u tal-Iben minħabba l-ostakli li aħna niffaċċjaw.
Il-ħajja eterna hija l-akbar rigal li tana Alla u tingħata lil dawk li “jżommu l-kmandamenti ta’ Alla u jibqgħu sodi sat-tmiem.”1 Mill-banda l-oħra, il-ħajja eterna ma’ Missierna tas-Smewwiet tiġi miċħuda lil dawk “li mhumiex qalbenin fit-testimonjanza tagħhom ta’ Ġesù.”2 F’ ħajjitna se niffaċċjaw diversi ostakli li jistgħu jżommuna milli nilħqu l-għan tagħna tal-ħajja eterna.3 Dawn l-ostakli jafu jkunu mill-aktar kumplessi; ippermettuli nispjega ruħi.
Bosta snin ilu missieri bena kamra tal-injam żgħira fuq ir-ranċ fejn huwa kien trabba. Il-pajsaġġ tal-kampanja kien wieħed eċċezzjonali. Meta l-ħitan ta’ madwar il-kamra kienu tpoġġew, jiena mort inżur il-post. Kont sorpriż ħafna li t-tieqa li minnha stajt tara l-veduta kienet tiffoka direttament fuq arblu tad-dawl li kien jinsab biss ftit ‘il bogħod mid-dar. Għalija, dak kien ta’ distrazzjoni kbira għall-veduta mill-isbaħ.
Jiena staqsejt, “Pa, għalfejn ħallejthom ipoġġu l-arblu eżatt quddiem il-veduta li tista’ tara mit-tieqa?”
Missieri, raġel mill-aktar prattiku u kalm, iddikjara b’ ċerta emozzjoni, “Quentin, għalija dak l-arblu tad-dawl huwa l-aktar ħaġa sabiħa fir-ranċ kollu!” Imbagħad spjega lilu nnifsu: “Meta jiena nħares lejn dak l-arblu, nirrealizza li, b’differenza għaż-żmien li fih trabbejt jien, illum m’għandix għalfejn noqgħod inġorr l-ilma fil-ġarra mill-għajn tal-ilma sad-dar biex inkunu nistgħu nsajru, naħslu jdejna jew ninħaslu. M’hemmx għalfejn noqgħod nixgħel ix-xemgħa jew m’hemmx għalfejn li bil-lejl inpoġġi ż-żejt fil-lampa biex inkun nista’ noqgħod naqra. Irrid li mit-tieqa nkun nista’ nara dak l-arblu tad-dawl eżatt f’ nofs il-veduta.”
Missieri kellu perspettiva differenti dwar l-arblu tad-dawl milli kelli jiena. Għalih dak l-arblu kien jirrappreżenta progress fil-ħajja ta’ kuljum, iżda għalija kien qed jostakola pajsaġġ mill-isbaħ. Missieri kien japprezza l-enerġija elettrika, id-dawl u l-indafa aktar minn xi veduta. Jien immedjatament irrealizzajt li filwaqt li l-arblu kien għalija ta’ ostaklu, kellu tifsira mill-aktar prattika u simbolika għal missieri.
Ostaklu huwa “impediment għat-twemmin jew għall-għarfien” jew “għall-progress.”4 Ostaklu spiritwali hu meta “naqgħu fid-dnub jew ninħakmu mill-ebusija tar-ras.”5 Ostaklu jista’ jkun kull ħaġa li żżommna milli niksbu l-għanijiet tajba tagħna.
Ma naffordjawx li nħawdu u nikkumplikaw it-testimonjanza tagħna tal-Missier u tal-Iben minħabba l-ostakli li aħna niffaċċjaw. Ma nistgħux naqgħu f’ dik in-nasba. It-testimonjanza li aħna għandna Tagħhom teħtieġ li tibqa’ safja u sempliċi bħad-difiża sempliċi ta’ missieri tal-arblu tad-dawl li kien jinsab fuq ir-ranċ fejn huwa trabba.
X’inhuma wħud mill-ostakli li jistgħu jħawdu u jikkumplikaw it-testimonjanza safja u sempliċi tagħna tal-Missier u l-Iben u jżommuna milli nkunu qalbenin f’ dik it-testimonjanza?
Uħud Minn Dawn l-Ostakli Huwa l-Filosofiji tal-Bniedem
Aħna għandna nkunu dejjem lesti li nitgħallmu tagħlim divers u nemmnu li “l-glorja ta’ Alla hija l-intelliġenza.”6 Iżda aħna nafu wkoll li l-istrateġija ppreferita tal-avversarju hi li jbiegħed lin-nies minn Alla u jwassalhom biex jaqgħu billi jenfasizzaw il-filosofiji tal-bnedmin aktar mit-tagħlim tas-Salvatur.
L-Appostlu Pawlu kien xhud qalbieni ta’ Ġesù Kristu minħabba esperjenza mirakoluża li bidlitlu ħajtu li huwa kellu mas-Salvatur.7 Il-ħajja unika li kien ġej minnha Pawlu ħejjietu biex huwa jikun jista’ jifhem nies minn kulturi differenti. Huwa kien iħobb is-“sempliċità diretta u onesta” tat-Tessalonikin u s-“simpatija ħelwa” tal-Filippin.8 Għall-ewwel huwa sabha aktar diffiċli jirrelata ma’ dawk il-Griegi li kienu intellettwali u sofistikati. F’ Ateni, fuq l-Arjopagu, huwa pprova juża metodu aktar filosofiku u spiċċaw biex ma tawx kasu. Lill-Korintin, huwa kien determinat li jgħallimhom sempliċiment “id-duttrina ta’ Kristu msallab.”9 Biex nuża l-istess kliem tal-Appostlu Pawlu:
“Il-kelma u l-predikazzjoni tiegħi ma kinux imlibbsa bil-kliem qawwi tal-għerf tal-bniedem, imma bil-wiri tal-Ispirtu u l-qawwa:
“Sabiex il-fidi tagħkom tinbena mhux fuq l-għerf tal-bniedem, imma fuq il-qawwa ta’ Alla.”10
Uħud mill-isbaħ rakkonti li nsibu fl-iskrittura dwar is-Salvatur u l-missjoni Tiegħu naqrawhom fl- 1 Korintin. Kapitlu minnhom—15—sar magħruf sewwa madwar id-dinja permezz tal-preżentazzjonijiet tax-xogħol ta’ George Frideric Handel Messiah.11 Fih duttrina mill-aktar profonda dwar is-Salvatur. Fit-tielet parti ta’ Messiah, immedjatament wara l- “Kor tal-Hallelujah,” il-parti l-kbira mill-iskrittura wżata hija mill- 1 Korintin 15. F’ uħud minn dawn il-versi, Pawlu ddeskriva b’ mod mill-isbaħ xi ftit mill-ħwejjeġ li wettaq is-Salvatur:
“Għax Kristu kien imqajjem tassew mill-imwiet, … l-ewwel frott fost dawk li raqdu.
“… Jekk permezz ta’ bniedem feġġet il-mewt, bi bniedem ukoll iseħħ il-qawmien mill-imwiet.
“Għax bħalma l-bnedmin kollha jmutu f’Adam, hekk ilkoll jiksbu l-ħajja fi Kristu. …
“Ja Mewt, fejn hi r-rebħa tiegħek? Ja qabar, fejn hi l-qawwa tiegħek? …
“Iżda niżżu ħajr lil Alla li tana r-rebħa permezz ta’ Sidna Ġesù Kristu.”12
Aħna nafu li waħda mir-raġunijiet għalfejn seħħet l-Apostasija kienet peress li l-filosofiji tal-bnedmin bdew jiġu kkunsidrati li huma aktar importanti mid-duttrina bażika u essenzjali ta’ Kristu. Minflok ma ġiet mgħallma s-sempliċità tal-messaġġ tas-Salvatur, bosta veritajiet sempliċi u prezzjużi ġew mibdulin jew inkella ntilfu għal kollox. Fil-fatt, il-Kristjanità adottat xi wħud mit-tradizzjonijiet filosofiċi Griegi biex b’hekk tinkorpora t-twemmin tan-nies mal-kultura eżistenti li huma kellhom. L-istoriku Will Durant kiteb: “Il-Kristjanità ma qerditx il-paganiżmu; iżda adottatu. Il-moħħ Griegi, li kien qed imut, spiċċa ħa l-ħajja mill-ġdid.”13 Storikament, u anke fi żmienna, xi nies jiċħdu l-evanġelju ta’ Ġesù Kristu għaliex, fl-oppinjoni tagħhom, mhuwiex intelletwalment sofistikat biżżejjed.
Fi sbieħ ir-Restawrazzjoni, kienu ħafna li għallinqas iddikjaraw li lesti jimxu wara t-tagħlim tas-Salvatur. Bosta pajjiżi bdew jikkunsidraw lilhom infushom bħala ġnus Kristjani. Iżda anke f’ dak iż-żmien ġie mbassar li żmienna kien se jkun żmien diffiċli.
Heber C. Kimball kien wieħed mit-Tnax-il Appostlu oriġinali ta’ din id-dispensazzjoni u kien ukoll l-Ewwel Kunsillier tal-President Brigham Young. Huwa widdeb: “Ġej żmien meta … ikun diffiċli niddistingwu bejn min hu Qaddis u min hu għadu tal-poplu ta’ Alla. Mela … għarblu sew, u meta n-nies jgħaddu mill-għarbiel, se jkunu ħafna li jfallu.” Huwa kkonkluda li se “ngħaddu minn TEST.”14
Fi żmienna, l-influwenza tal-Kristjanità f’ bosta pajjiżi, fosthom l-Istati Uniti, qed tonqos b’ rata mill-aktar sinifikanti. Mingħajr ebda twemmin reliġjuż, il-bniedem ma jħossux li hu responsabbli lejn Alla. Minħabba f’ hekk, diffiċli tistabbilixxi l-valuri universali dwar kif wieħed għandu jgħix ħajtu. Il-filosofiji li wieħed jista’ jkollu għal qalbu ħafna drabi jispiċċaw jikkuntradixxu lil xulxin.
Sfortunatament, dan jiġri wkoll fost xi membri tal-Knisja li jitbiegħdu minn dak li jafu li hu tajjeb u jħallu lilhom infushom jiġu infuwenzati mill-kawża tal-mument—li ħafna drabi ma tkunx xi waħda ġusta.
Konsistenti mal-profezija ta’ Heber C. Kimball, hemm dak li qal il-Presbiteru Neal A. Maxwell fl-1982: “Ħafna se jkollhom jgħaddu mill-għarbiel minħabba ċerti mumenti ta’ mġieba ħażina li jkunu baqgħu ma nidmux minnha. Xi wħud jaqtgħu qalbhom minflok ma’ jibqgħu sodi sat-tmiem. Xi wħud jiġu mqarrqin minn nies li telqu minn ħdan il-Knisja. Bl-istess mod, oħrajn jispiċċaw joffendu ruħhom, għaliex hawn biżżejjed ostakli suffiċjenti għal kull dispensazzjoni!”15
Ostaklu Ieħor Hu li Nirrifjutaw li Nikkunsidraw id-Dnub għal Dak li fil-Fatt Hu
Wieħed mill-aspetti uniċi u nkwetanti ta’ żmienna hu li ħafna nies li jipparteċipaw f’ imġieba midinba jirrifjutaw li jikkunsidraw din l-istess imġieba bħala dnub. Huma ma għandhom l-ebda rimors jew rieda li jagħrfu l-kondotta tagħhom bħala waħda moralment ħażina. Anke xi wħud li jiddikjaraw li jemmnu fil-Missier u l-Iben jispiċċaw biex b’ mod żbaljat jieħdu l-pożizzjoni li Missierna tas-Smewwiet li tant iħobbna m’għandux iħalli li aħna jkollna npattu l-konsegwenzi għal imġieba li tmur kontra l-kmandamenti Tiegħu.
Apparentament din kienet il-pożizzjoni li kien ħa Kurjantun, iben Alma ż-Żgħir fil-Ktieb ta’ Mormon. Huwa pparteċipa fi ħwejjeġ mill-aktar immorali u Alma kien qed jikkunsilja miegħu. Aħna verament imberkin li l-kbir profeta Alma, li personalment kien esperjenza “l-aktar abiss mudlam u l-aktar dawl meraviljuż,”16 irreġistra l-istruzzjoni li huwa tah. Fid- 39 kapitlu ta’ Alma, naqraw kif huwa għallem lil dan ibnu permezz tal-proċess tal-indiema u mbagħad spjegalu kif Kristu kellu jiġi biex jeħlisna mid-dnub. Lil Kurjantun spjegalu b’ ċarezza l-bżonn tal-indiema għaliex “l-ebda ħaġa maħmuġa ma tista’ tiret is-saltna ta’ Alla.”17
F’Alma 42 insibu waħda mill-aktar duttrina meraviljuża fuq l-Att tal-Fidwa li hemm fl-iskrittura. Alma għen lil Kurjantun jifhem li mhijiex “inġustizzja li l-midneb ikollu jesperjenza stat ta’ miżerja.”18 Iżda huwa nnota li minn żmien Adam, il-ħanin Alla pprovdielna “spazju għall-indiema” għaliex mingħajr l-indiema, “il-pjan kbir tas-salvazzjoni ma jistax jiġi fis-seħħ.”19 Alma semma’ wkoll li l-pjan kbir tas-salvazzjoni huwa “pjan ta’ ferħ.”20
It-tagħlim ta’ Alma huwa verament istruttiv: “Għax araw, il-ġustizzja trid dak li hu tagħha, kif ukoll il-ħniena trid dak li hu tagħha; u b’hekk, ħadd ħlief dak li verament jindem ma jsalva.”21 Jekk aħna nħarsu lejhom mil-lenti xierqa, il-barkiet glorjużi tal-indiema u l-ubbidjenza tagħna lejn it-tagħlim tas-Salvatur huma mill-aktar importanti. Mhijiex ħaġa inġusta li tkun ċar, kif kien ċar Alma ma’ Kurjantun, dwar il-konsegwenzi tal-għażliet midinba u n-nuqqas ta’ ndiema. Ħafna drabi nisimgħu, “F’ xi ħin jew ieħor kulħadd se jkollu jpoġġi bilqiegħda madwar il-mejda tal-konsegwenzi.”22
Il-barka ċelestjali mill-aktar sinjifikanti tal-Att tal-Fidwa tas-Salvatur hi li permezz tal-indiema, l-imġieba midinba tagħna tintesa darba għal dejjem. Wara l-indiema ta’ Kurjantun, Alma temm jgħid, “Tħallix dawk il-ħwejjeġ jinkwetawk aktar, u ħalli biss id-dnub jinkwetak, b’liema nkwiet li jwasslek għall-indiema.”23
Jekk Inħarsu Lil Hinn mis-Sinjal Aħna Niffaċċjaw Ostaklu
Il-profeta Ġakobb irrefera għal-Lhud tal-qedem bħala “nies ta’ ras iebsa li kienu jistmerru … is-sempliċità, … qatlu l-profeti u kienu jfittxu ħwejjeġ li ma setgħux jifhmu. Għalhekk, minħabba li kienu għomja, u għomja saru għaliex ħarsu lil hinn mis-sinjal, huma se jfallu.”24
Filwaqt li hemm diversi eżempji kif nistgħu nħarsu lil hinn mis-sinjal,25 eżempju sinifikanti fi żmienna huwa l-estremiżmu. L-estremiżmu fl-evanġelju huwa meta wieħed jagħti importanza lil xi prinċipji tal-evanġelju aktar minn xi prinċipju ieħor daqstant importanti u jieħu pożizzjoni li mhux kompatibbli mat-tagħlim jew kontra t-tagħlim tal-mexxejja tal-Knisja. Eżempju partikolari hu meta wieħed jisħaq li għandu jżid, jibdel jew jenfasizza primarjament xi parti mill-Kelma tal-Għerf. Eżempju ieħor huwa t-tħejjija mill-aktar urġenti għax daqt jasal tmiem id-dinja. Fit-tnejn li huma, oħrajn huma mħeġġa jaċċettaw xi interpretazzjoni personali li wieħed jista’ jkollu. “Jekk aħna nispiċċaw naqbdu liġi tas-saħħa jew xi prinċipju ieħor u ndawruh f’ xi forma ta’ fanatiżmu reliġjuż, aħna nkunu qed inħarsu lil hinn mis-sinjal.”26
Meta kien qed jitkellem dwar duttrina importanti, il-Mulej iddikjara, “Min jiddikjara aktar jew anqas minn dan, dan ma jkunx ġej minni.”27 Meta aħna nagħtu importanza lil xi prinċipju b’ tali mod li jnaqqas l-impenn tagħna lejn prinċipji oħra daqstant importanti jew nieħdu pożizzjoni li tkun kontra jew li tmur lil hinn mit-tagħlim tal-mexxejja tal-Knisja, aħna nkunu qed inħarsu lil hinn mis-sinjal.
Barra minn hekk, xi membri jagħtu importanza lil ċerti kawżi, li ħafna minnhom huma tajbin, iżda jispiċċaw jagħmluhom aktar superjuri mid-duttrina bażika tal-evanġelju. Huma jissostitwixxu d-devozzjoni tagħhom lejn dik il-kawża u juru l-akbar impenn tagħhom lejha bil-konsegwenza li l-impenn tagħhom lejn is-Salvatur u lejn it-tagħlim Tiegħu jispiċċaw jagħtuh anqas importanza. Jekk xi ħaġa nagħtuha importanza akbar milli nagħtu lid-devozzjoni tagħna lejn is-Salvatur, jew jekk l-imġieba tagħna hi waħda li lilu tittrattah biss bħala sempliċiment għalliem ieħor u mhux bħala l-Iben divin ta’ Alla, mela aħna ninsabu nħarsu lil hinn mis-sinjal. Ġesù Kristu huwa s-sinjal!
Is- 76 sezzjoni tad-Duttrina u Patti tagħmilha ċara li tkun “qalbieni fit-testimonjanza ta’ Ġesù”28 hu t-test sempliċi u essenzjali bejn dawk li jirtu l-barkiet tas-saltna ċelestjali u dawk li jispiċċaw fis-saltna terrestjali. Biex inkunu qalbenin jeħtieġ li niffokaw fuq il-qawwa ta’ Ġesù Kristu u s-sagrifiċċju tal-att tal-fidwa Tiegħu biex negħlbu l-mewt u, permezz tal-indiema tagħna, biex inaddafna mid-dnub u jeħtieġ minna li nimxu wara d-duttrina ta’ Kristu.29 Aħna neħtieġu wkoll id-dawl u l-għarfien tal-ħajja u t-tagħlim tas-Salvatur biex jiggwidawna fit-triq tagħna tal-patt, li fiha tinkludi wkoll l-ordinanzi sagri tat-tempju. Jeħtieġ nuru fidi soda fi Kristu, niffesteġġjaw permezz ta’ kliemu u nibqgħu sodi sat-tmiem.30
Konklużjoni
Jekk aħna rridu nkunu qalbenin fit-testimonjanza tagħna ta’ Ġesù, jeħtieġ li nevitaw l-ostakli li qed iwaqqfu u jfixklu l-progress ta’ ħafna nies li, li kieku ma kienx għalhekk, huma nies mill-aktar onorabbli. Ejjew niddeterminaw li nkunu dejjem ta’ servizz għalih. Filwaqt li nfittxu l-għarfien, jeħtieġ li nevitaw il-filosofiji tal-bnedmin li jdgħajfu l-impenn tagħna lejn is-Salvatur. Għandna nħarsu lejn id-dnub kif fil-fatt hu u naċċettaw l-Att tal-Fidwa tas-Salvatur permezz tal-indiema. Jeħtieġ nevitaw li nħarsu lil hinn mis-sinjal u niffokaw fuq Ġesù Kristu, is-Salvatur u l-Feddej tagħna, u nimxu skont id-duttrina Tiegħu.
Missieri ħares lejn l-arblu bħala l-mezz li jipprovdilna l-enerġija, id-dawl u l-ilma abbundanti biex insajru u ninħaslu. Kien avvanz li wassal biex tejjeb il-ħajja tagħna ta’ kuljum.
Wieħed awtur jissuġġerixxi li l-ostakli nistgħu nibdluhom f’ “għajnuna li tassistina biex ikollna karattru aktar nobbli u twassalna sas-Smewwiet.”31
Għalina, li nkunu qalbenin fit-testimonjanza tagħna ta’ Ġesù tgħinna biex nikkwalifikaw għall-grazzja tas-Salvatur u għas-saltna ċelestjali. Ġesù Kristu huwa l-uniku isem mis-smewwiet ‘l isfel li permezz tiegħu nistgħu nsalvaw.32 Jiena naqsam b’ konvinzjoni x-xhieda tiegħi dwar id-divinità Tiegħu u l-irwol divin Tiegħu fil-pjan tal-Missier. F’ isem Ġesù Kristu, amen.