នៅពេលដែលការសាកល្បងហាក់ដូចជា ធំធេងពេក
ឧបសគ្គគឺជាផ្នែកមួយនៃជីវិត ។ ប៉ុន្តែដោយមានជំនួយ យើងអាចមើលទៅឧបសគ្គទាំងនោះតាមរយៈទស្សនរបស់ព្រះ ។
ភ្នំធិមផាណូហ្គូស គឺជាភ្នំមួយនៅរដ្ឋយូថាហ៍ សហរដ្ឋអាមេរិក ដែលមានកម្ពស់ ១១,០០០ ហ្វីត ( ៣,៣៥៣ ម៉ែត្រ ) និងពោរពេញដោយទឹកធ្លាក់ ជញ្ជាំងថ្ម វាលស្មៅ និងសត្វព្រៃ ។ ការឈរនៅជើងភ្នំបែបនេះអាចធ្វើឲ្យយើងមានអារម្មណ៍ថាតូច ។ យើងមិនអាចមើលឃើញអ្វីដែលនៅម្ខាងទៀត ឬជុំវិញវាទេ ។ វាអាចមើលទៅធំពេក និងមិនអាចឆ្លងកាត់បានឡើយ ។
ទោះជាយ៉ាងណាក៏ដោយ បើយើងបើកបរឆ្ងាយពីភ្នំធិមផាណូហ្គូសតែ ១០ នាទី នោះយើងមើលឃើញវាខុសពីនោះ ។ មើលពីខាងនេះ ប្អូនៗអាចកត់សម្គាល់ឃើញផ្លូវលំ និងផ្លូវដែលកាត់ឆ្លងភ្នំ ។ ទាំងនេះបង្ហាញថា ធ្លាប់មានអ្នកដទៃនៅទីនោះពីមុនមក ហើយមានផ្លូវដែលមានសុវត្ថិភាពឡើងកាត់ភ្នំ និងជុំវិញភ្នំនោះ ។
ការសាកល្បងនៅក្នុងជីវិតរបស់ប្អូនៗឥឡូវនេះអាចមានអារម្មណ៍បែបនោះដែរ ។ ការប្រឈមមុខនឹងឧបសគ្គពិបាកៗខ្លាំងអាចមានអារម្មណ៍ដូចជាសម្លឹងមើលទៅភ្នំដ៏ធំធេងដែលប្អូនៗមិនអាចមើលឃើញពីលើ ឬសូម្បីតែនៅជុំវិញវានោះទេ ។ ឧបសគ្គទាំងនោះអាចហាក់ដូចជាធំធេងពេក ហើយប្រហែលជាមិនអាចឆ្លងកាត់បាន ។ ការសាកល្បងទាំងនោះអាចធ្វើឲ្យប្អូនៗមានអារម្មណ៍ថាខ្លួនតូចទាប តានតឹង ភ័យខ្លាច ឬឯកោ ។
ប៉ុន្តែនេះជាអ្វីផ្សេងទៀតដើម្បីសាកល្បង ។ ថយក្រោយមួយជំហាន ហើយសាកមើលទៅការសាកល្បងរបស់ប្អូនៗពីទស្សនផ្សេងវិញ—ទស្សនរបស់ព្រះ ។
ជាមួយនឹងទស្សនវិស័យនេះ ប្អូនៗក៏អាចដឹងថា ប្អូនៗមិនត្រូវបានទុកឲ្យនៅម្នាក់ឯងដើម្បីដោះស្រាយបញ្ហារបស់ប្អូនៗនោះទេ ។ ប្អូនៗមានព្រះវរបិតានៅស្ថានសួគ៌ដែលស្រឡាញ់ប្អូនៗ ហើយនឹងជួយប្អូនៗ ។ អ្នកដទៃទៀត ជាពិសេសព្រះអង្គសង្គ្រោះ បានឆ្លងកាត់ពេលវេលាដ៏លំបាកផងដែរ ។ ពួកគេ និងទ្រង់ចង់ផ្តល់ដល់ប្អូនៗនូវការណែនាំដែលប្អូនៗត្រូវការដើម្បីយកឈ្នះការសាកល្បងរបស់ប្អូនៗ សូម្បីតែការសាកល្បងដ៏ធំធេងក្ដី ។
តើយើងអាចផ្លាស់ប្តូរទស្សនរបស់យើងដោយរបៀបណា ?
១ ធ្វើតាមផែនការរបស់ព្រះវរបិតាសួគ៌ ។
ព្រះយេស៊ូវគ្រីស្ទគឺជាគំរូដ៏ឥតខ្ចោះរបស់យើង ។ គោលការណ៍ដែលទ្រង់បានបង្រៀនគឺសាមញ្ញ មានអំណាច និងងាយស្រួលយល់ ។ តើនោះមានន័យថា វាតែងតែងាយស្រួលក្នុងការធ្វើតាមឬ ? ច្បាស់ណាស់គឺអត់ទេ ។ មិនមែនជានិច្ចនោះទេ ។ ប៉ុន្តែរាល់ពេលដែលយើង ពិតជា ធ្វើតាមទ្រង់ដោយសេចក្តីជំនឿ នោះទស្សនរបស់យើងចាប់ផ្តើមផ្លាស់ប្តូរ ។ យើងចាប់ផ្ដើមមើលទៅឧបសគ្គទាំងឡាយថាជាឱកាសដើម្បីឈោងទៅព្រះអង្គសង្គ្រោះ ជាជាងការមើលទៅវាថាជាការផ្ដន្ទាទោស ជាអន្លង់ ឬឧបសគ្គដែលធ្វើឲ្យយើងឃ្លាតឆ្ងាយ ។
២ សូមទូលសូមជំនួយពីព្រះ ។
ព្រះគឺជាព្រះវរបិតាសួគ៌របស់ប្អូនៗ ។ ទ្រង់ស្គាល់ប្អូនៗ ស្រឡាញ់ប្អូនៗ ហើយត្រៀមព្រះកាយជាស្រេចដើម្បីជួយប្អូនៗពេលណាដែលប្អូនៗទូលសូមទ្រង់ ។ ប្រធាន រ័សុល អិម ណិលសុន បានបង្រៀនថា « ទស្សនៈរបស់ព្រះអម្ចាស់លើសលប់ពីប្រាជ្ញារមែងស្លាប់របស់បងប្អូន ។ ការឆ្លើយតបរបស់ទ្រង់ចំពោះការអធិស្ឋានបងប្អូនអាចធ្វើឲ្យបងប្អូនភ្ញាក់ផ្អើល ហើយនឹងជួយបងប្អូនឲ្យគិតដល់សេឡេស្ទាល » ។
នៅពេលដែលប្អូនៗអធិស្ឋាន ព្រះអាចជួយប្អូនៗឲ្យឃើញអ្វីៗដែលប្អូនៗមិនអាចមើលឃើញឥឡូវនេះ ។ ទ្រង់អាចណែនាំប្អូនៗឲ្យឆ្លងកាត់ការសាកល្បងរបស់ប្អូនៗ ហើយថែមទាំងប្រទានសេចក្ដីសុខសាន្ត និងកម្លាំងដល់ប្អូនៗទៀតផង កាលដែលប្អូនៗធ្វើតាមទ្រង់ ។
៣ សុំជំនួយពីអ្នកដទៃ ។
ព្រះវរបិតាសួគ៌បានដាក់មនុស្សល្អៗនៅក្នុងជីវិតរបស់ប្អូនៗដែលអាចជួយប្អូនៗបាន ។ នៅពេលដែលប្អូនៗកំពុងជួបការលំបាកជាមួយនឹងឧបសគ្គដែលហាក់ដូចជាកំពុងលេចឡើងនៅចំពោះមុខប្អូនៗ សូមពិចារណានិយាយជាមួយសមាជិកគ្រួសារដែលទុកចិត្ត មិត្តភក្តិ អ្នកដឹកនាំសាសនាចក្រ ឬប៊ីស្សពរបស់ប្អូនៗ ។
ការសូមដល់អ្នកកាន់បព្វជិតភាពដែលស័ក្តិសមដើម្បីផ្ដល់ពរជ័យនៃការលួងលោម និងការណែនាំគឺជាវិធីដ៏ល្អមួយទៀតដើម្បីមើលទៅខ្លួនឯង និងជីវិតតាមរយៈទស្សនរបស់ព្រះ ។
ការមើលឃើញច្បាស់
ដូចជាភ្នំយក្សដែលឈរនៅខាងស្ដាំផ្លូវរបស់ប្អូនៗដែរ ពេលខ្លះការសាកល្បងរបស់ប្អូនៗអាចមានអារម្មណ៍ថាធំធេងពេក ។ ប៉ុន្តែពេលដែលប្អូនៗរស់នៅតាមផែនការរបស់ព្រះ ហើយអនុញ្ញាតឲ្យទ្រង់ និងអ្នកដទៃទៀតជួយប្អូនៗ នោះប្អូនៗ អាច មើលឃើញឧបសគ្គរបស់ប្អូនៗមួយបែបផ្សេងទៀត ។
ប្អូនៗអាចឈានថយក្រោយមួយជំហាន ហើយមើលឃើញថា មាន របៀបមួយដើម្បីយកឈ្នះការសាកល្បងរបស់ប្អូនៗ ។ ព្រះយេស៊ូវគ្រីស្ទប្រទានផ្លូវមួយដែលប្អូនៗអាចដើរបាន ។ មិនថាការសាកល្បងរបស់ប្អូនៗធំធេងប៉ុនណាទេ ព្រះគឺខ្លាំងជាង ។