Ol Voes blong Ol Yut

Stap Jusum Tempol

Iris R., ej 18, Sal, Cape Verde

Hem i laekem blong raetem leta, stap krietem ol art, mo stap kuk.

Tempol we i moa kolosap long mi i stap long wan narafala aelan. Blong kasem aelan ia, mifala i mas flae long plen blong 45 minit o tekem wan bot i go kros blong 12 aoa. Mi neva go long tempol bifo, mo long las yia blong skul blong mi, mama blong mi i bin mekem ol plan blong mifala i go. Hem i bin sevem mane blong wan yia blong mekem se famli blong mi i save go tugeta.

Be afta, bae mifala i kambak hom afta we skul i stat finis, we mi mekem mi wari. Oltaem hem i impoten long mi blong gat wan gudfala mak (GPA) long skul blong mekem se mi save kasem wan skolasip blong go long Kolej. Mi tingting blong no go long tempol, from se absen blong mi long skul bae save spolem faenol GPA blong mi. Afta mama blong mi i talem se, “Yu prea mo askem long Lod blong Hem i helpem yu?”

Mi no wantem blong mekem from mi fraet, be mi disaed blong prea. Papa long Heven i gaedem mi, mo mi bin jusum blong go long tempol. Blong ful wik, mifala i bin stap longwe, mifala i go long tempol evri dei. !Hem i bin naes tumas! Blong mekem ol baptaes hem i wan gudfala eksperiens tumas; mi bin save filim Spirit i strong long taem ia.

Long en, mi bin save finisim skul blong mi wetem wan gudfala GPA. Blong gat wan gudfala rilesensip wetem Sevya i bin helpem mi blong gat hop long taem ia Mi save se Hem i bin stap wetem mi, i stap givim paoa long mi. Lod i save ol efot blong yumi, mo taem yumi putum ol samting long han blong Hem, yumi save trastem se evri samting bae i oraet.

Mi talem tangkyu we sista blong mi i bin gat strong tingting blong invaetem ol misinari oli kam long hom blong mifala. Mi mo hem, mitufala ol faswan blong baptaes long famli blong mifala—Mi mi bin gat 13 yia mo hem i gat 15 yia. Mi save se mi mi wan pikinini gel blong Papa long Heven we Hem i lavem tumas. Papa mo mama blong mi long wol ia oli neva stap wetem mi long laef blong mi, be blong save tingting ia se yumi gat wan Papa long Heven, mo we Hem i krietem mi semmak long hem, i bin helpem mi. Mi filim lav blong Hem long mi; Mi save se long ol bigfala hadtaem blong laef, Hem i stap long saed blong mi.