2025 Stamba Toktok blong Ol Yut
7 Wei blong Lukluk long Kraes
Traem ol fasin ia blong mekem se lukluk blong yu i stap long Sevya.
Blong stap yusum stamba toktok blong ol yut blong yia ia—“Lukluk long Kraes.”—i kam wetem wan smol jalenj. ?Olsem wanem nao yu yu lukluk long wan manwe hem i no stap? Statem wetem olgeta seven fasin ia.
1. Tingbaot Se Hem I No Stap Haed
Yes, yu yu mas lukaotem Hem. Be, Hem i wantem man i faenem Hem! Hem i no wan pleplei blong haed mo faenem. Lod i wantem tumas blong blesem yu—trutok se samting ia i mekem Hem i glad bigwan (luk long Doktrin mo Ol Kavenan 41:1). Hem i no stap lukaot ol risen blong putumaot yu. Hem i oposit: Hem i oltaem stap lukaotem blong blesem yu. Olsem we Elda Patrick Kearon blong Kworom blong Olgeta Twelef Aposol i bin tijim, “No, [Sevya] i no putum samting blong blokem rod o samting blong stopem yu; Hem i tekemaot olgeta samting ia. Hem i no kipim yu stap aotsaed, Hem i welkamem yu kam insaed. Ful ministri blong Hem i wan laef testemoni blong tingting ia.”
2. Talem Tangkyu from Paoa blong Hem long Laef blong Yu
Lod i glad long yumi taem yumi “luk save …han blong God long evri samting ” (Doktrin mo Ol Kavenan 59:21). !Mekem sua blong talem tangkyu oltaem from paoa blong Hem long laef blong yu! Talem tangkyu long Hem taem ol samting oli go gud mo lukaotem pis mo andastaning taem oli no go gud.
3. Talem Tangkyu from Wanem We Yu Gat
Wetem fasin blong talem tangkyu long Lod from paoa blong Hem long laef blong yu, hem i impoten tu blong filim—mo soem—fasin blong stap talem tangkyu. Yu no save “luk” Sevya long bodi wetem mit mo bun, be yu save luk ol blesing blong Hem long laef blong yu! Elda Gary B. Sabin blong Olgeta Seventi i talem se, “Yu kam moa hapi taem yu gat fasin blong stap talem tangkyu.” Talem tangkyu long Lod evri dei from ol blesing blong yu. Taem yu filim se tingting i foldaon, folem ol advaes blong olfala hym ia: “Yu gat blesing kaontem evriwan, mo bae yu sapraes long wanem we Lod i bin mekem.”
4. Prea Evri Dei
Bae yu save “luk” gud Sevya long fuldei sapos yu statem blong stap toktok long Papa long Heven. Askem Hem blong helpem yu tingbaot Sevya mo luksave paoa blong Hem long laef blong yu. Yu save prea plante taem long wan dei olsem we yu wantem. Mo bifo yu go long bed, prea bakegen blong talem long Papa long Heven ol samting we yu bin mekem long dei ia. !Hem i neva taet blong harem yu!
5. Savebaehat Ol Skripja mo Ol Hym
Wan wei blong kipim ol tingting blong yu i stap long Jisas Kraes, i blong gat ol toktok blong wan fevret skripja o ol toktok blong wan singsing blong leftemap tingting we yu tingbaot i stap long memori blong yu. Praktisim blong tingbaot olgeta taem yu filim se ol rabis tingting oli stat fulumap hed blong yu. Oltaem traem blong tingbaot (mo singsing kwaet) taetel blong wan hym, maet hem i inaf blong pulumbak ol tingting blong yu: “Mi mi wan pikinini blong God.” “Mi nidim Yu oltaem.” “Sol blong Mi, Stap Kwaet.”
6. Lukluk long Ol Pikja blong Sevya
Faenem sam art droing blong Sevya we yu laekem, mo afta putum olgeta long ples we yu save luk olgeta oltaem. Sam long ol ples ia i gat, bedrum wol, batrum mira, loka blong yu long skul, o putum olsem wan pikja long skrin blong kompiuta blong yu o long skrin blong fon blong yu.
7. Lukluk long Wol raon long Yu
Hem i naes! Mo Sevya i bin mekem blong yu (luk long Doktrin mo Ol Kavenan 14:9)! I nogat wan risen we yumi save long hemia se wol ia i mas naes. Sapos i no wol ia, ating bae yumi stap long wan wol we i flat, skwea, mo i kala grei. Be Sevya i bin krietem wan wol “blong helpem man, mo blong man i yusum, tugeta blong naes long ae blong hem mo blong i mekem hat blong hem i glad” (Doktrin mo Ol Kavenan 59:18). Long narafala toktok, wol ia i naes from ol naesfala samting oli mekem yumi filim gud. Sapos yu wantem blong tingbaot Sevya, lukluk raon long yu.