Stap Biltim Ol Hom mo Ol Testemoni
Konstraksen bisnis blong Sarah i stap gro bigwan. Be hem i gat wan desisen blong mekem.
Ol foto i kam long Christina Smith, be nomo sapos oli talem se i blong wan narawan
Blong Noa, hem i wan ak. King Benjamin i bin go wetem wan taoa. Brata blong Jared i liv long ol smol flat bot. Mo blong Sarah Christensen blong Montana, YSA? Hem i disaed se hem i wantem blong bildim ol haos.
Hermana Christensen, naoia i wan fultaem misinari we i stap givim seves long Minnesota Misin, hem i bin kros smol from se wan misin i stap blokem hem long ol gol blong hem long saed blong konstrasen—mo hemia i no iven misin blong hemwan!
Letem yumi stat long stat.
Mi bin stap helpem papa long mi blong bildim ol samting blong ful laef blong mi,” hem i talem. “Mi mekem gogo mi save yusum gud ol tul we oli yusum lektrik, mo mi kam blong laekem tumas. Mekem se taem mi kasem 16 yia, mi disaed se mi wantem blong statem wan konstraksen bisnis blong miwan.”
“Papa blong mi i bin tijim mi blong putum ol samting tugeta, stat long tu wud kasem wan ful haos” Sarah i talem.
Stap bildim wan Bisnis
Sarah i wok long wan haos blong mekem bigfala jenis long hem blong wan yia long sama taem. Hem i laekem tumas mekem hem i tekem wan narafala projek blong jenisim wan narafala haos bakegen long nekis yia. Taem i pas mo hem i disaed blong jalenjem hemwan wetem wan bigfala projek—wan “spek” haos, o wan haos we hem mo tim blong hem we oli saenem kontrak wetem hem bae oli bildim stat long fandesen i go kasem i finis, hemia wetem tingting ia blong salem from wan profit.
!Dei blong Brebrekem Daon Haos! Sarah i tekem wan hama i go long wan bat rum long wan long ol projek blong hem.
Blong statem wan bisinis i no wan isi projek, from we Sarah hem i stap bisi yet wetem hae skul blong hem mo wetem ronron blong kros kantri resis.
Sarah i statem konstraksen kampani blong hemwan taem hem i bin gat 16 yia.
“Mi bin lanem plante samting,” hem i talem. “Mi mas yusum wan jekbuk blong pem ol pipol, we mi neva bin mekem bifo. Mi no mas fraet taem mi toktok wetem ol defdefren man we oli saenem kontrak wetem mi. Mi bin lanem tu olsem wanem blong kontrolem wari blong ranem wan kampani, we i no oltaem wan gudfala taem. Oltaem i gat wari se bae yu no save mekem mane we yu nidim blong brekem iven taem yu salem wan haos.”
Yu Neva Stap Yuwan
Be nomata long ol wari we i kam wetem fasin blong ranem wan bisnis, Sarah i neva fesem ol bigfala drim blong hem hemwan.
“Oltaem ol tingting ia oli go gud, mo mi save se hemia i from Lod,” hem i talem. “Bisnis ia bae i no posibol sapos we Hem i no bin stap. Hem i helpem mi tru long ol nogud dei, ol had wok, mo evri samting.”
Strong rilesensip we Sarah i gat wetem famli blong hem i kam taem oli stap wok tugeta.
Famli blong Sarah oli sapotem hem tu long evri saed—we i lidim yumi i go bak long misin ia we yumi bin tokbaot we i bin spolem ol plan blong hem.
Bigfala brata blong hem Tyler i mekem plan blong helpem Sarah blong bildim wan haos taem hem i kambak long haos long wan misin blong hem. Be wan dei, hem i ringim Sarah wetem wan nius ia se bae oli muv taem blong misinari seves blong hem i go bitim taem we hem i sapos blong finis.
“Mi bin kros bigwan long hem” hem i talemaot. “Mi talem se, ‘Tyler, yu no save akseptem hemia. Mi save wanem bae yumi mekem.’ Mo hem i talem se, ‘Wok blong Lod i moa impoten bitim wok blong yu.’ Toktok ia i tajem mi bigwan. Mi save se hem i raet mo se mi nidim blong trastem plan blong God.”
Famli blong Sarah i welkamem brata blong hem Tyler long hom afta long longfala misin blong hem.
Sarah Christensen we i raet i glad blong givim pikja ia
Nomata se hem i stap kasem help long papa blong hem o help long Papa long Heven, Sarah i save se hem i no stap hemwan.
Wan Misin blong Hemwan
Eksampol blong Tyler i givim insperesen long Sarah blong stat blong stap tingting abaot blong go givim seves long misin blong hemwan. “Mi luksave hamas pipol brata blong mi i bin helpem olgeta blong kam long Kraes, mo mi bin luksave hamas hem i bin kam long Kraes hemwan. Mi wantem blong gat wan eksperiens we i semmak olsem ia blong miwan,” Hermana Christensen i talem. “Mi stat blong mekem series stadi long gospel mo faenem se moa testemoni blong mi mo rilesensip blong mi wetem Sevya blong mi i gro, moa mi wantem blong serem wanem we mi gat.”
Sarah i mekem joes blong hem blong putum konstraksen bisnis blong hem long saed blong wan sot taem mo givim seves long Lod. Desisen ia i givim hem plante tingting we i gat paoa wetem ol niu lukluk.
“Nambawan samting we misin blong mi i bin tijim mi long hem i we gospel i jenisim ol laef fulwan,” Hermana Christensen i talem. “From we mi groap long Jos, i mekem i had blong mi luksave olsem wanem gospel ia i impoten long laef blong mi.
“Long ples ia long misin blong mi, mi stap raon long ol pipol we oli no save abaot Papa long Heven mo Jisas Kraes. Taem oli lanem se olgeta oli ol pikinini blong God mo Hem i gat wan plan from olgeta, hem i jenisim ol laef blong olgeta. Hem i wan gudfala samting blong witnesem mo stap pat long hem. Mi gat wan andastaning abaot hemia bifo long misin blong mi, be naoia mi save se gospel blong Jisas Kraes i moa impoten from i givim glad long wol ia mo long wol we bae kam.”
Hermana Christensen (long raet) mo kompanion blong hem Hermana Taylor (long lef) tufala i glad blong givim seves long eni wei we tufala i save mekem.
Sarah Christensen we i raet i glad blong givim pikja ia
Fet i Winim Fraet
Long ol narafala yut we oli stap tingting blong go long wan misin, Hermana Christensen i talem se, “Gat fet mo no fraet. Ol misin oli no isi be oli blong gud blong yu. God bae i blesem yu long ol wei we yumi no save pikjarem taem yu mekem wan desisen blong stap olsem wan wokman blong Hem.”
Nomata se hem i mestem blong stap bildim ol haos taem hem i stap long misin, Hermana Christensen i no kros long hemwan from joes we hem i bin mekem. “I tru se bisnis blong mi i save gro bigwan sapos mi no bin stap long wan fultaem misinari wok.” hem i talem. “Be mi save se Lod bae i blesem sakrifaes blong mi blong livim biaen bisnis ia blong smoltaem. Wok blong mi i save wet, be wok blong Lod i no save yet!”