Profet mo Sevya blong Hem
Long wan wei, stori blong Restoresen i stori blong Josef Smit we i stap kam kolosap long Jisas Kraes.
Evri Ni Bae Oli Ben i Go Daon, i kam long Dan Wilson
Stori blong laef blong Josef Smit i moa bitim stori blong laef blong Josef Smit.
Taem yumi talem stori blong Restoresen blong gospel blong Jisas Kraes, plante taem yumi stat wetem stori blong Josef Smit. Mo hemia i stret. Hem hemwan i talem stori blong laef blong hem stat long taem we hem i wan yang boe long plante defren taem blong helpem ol pipol oli andastanem olsem wanem Restoresen i stat. Be long wan wei, stori blong laef blong Josef Smit, hem i wan stori blong olsem wanem hem i kam kolosap long Jisas Kraes.
Wan Visen blong Fogivnes
Yangfala Josef Smit i bin konfius abaot relijin. Mo i bin gat wan filing bakegen we i bin muvum hem blong prea long bus blong ol tri ia, long ples ia we hem i gat Fas Visen blong hem: “Mi filim blong krae from ol sin blong mi.”
Taem Sevya i toktok long Josef, Hem i talem, “Josef, boe blong mi, mi fogivim ol sin blong yu.”
Josef i lanem faswan se Jisas Kraes Hem i laef. Hem i bin lanem tu se Jisas Kraes hem i gat bigfala sore mo i fogivim ol sin. Save ia blong hemwan i impoten long Josef. “Plan blong sevem sol blong mi hem i impoten tumas long mi [from] mi save wetem ful hat blong mi ol samting we oli no save finis” hem i bin talem wantaem.
Save ia abaot Jisas Kraes hem i impoten tu long impoten wok blong Josef we oli singaotem hem long mekem, olsem wan profet. Hem i serem testemoni we i gat paoa, abaot bigfala lav mo sore blong Jisas Kraes long ful laef blong hem. Eksampol, wantaem hem i bin tijim se, “Evri hat oli mas sakem sin mo kam klin, mo God bae lukim olgeta mo blesem olgeta long wan wei we olgeta oli no save kasem olsem .”
Ol Mistek mo Bigfala Sore
Wok we oli singaotem Josef Smit blong mekem, hem i impoten tumas. Mo Josef i bin lanem blong tekem ol komanmen mo kaonsel blong Lod i kam series, fasin ia i bin folem ol mistek we hem i bin mekem.
Eksampol, taem sam pej blong Buk blong Momon oli lus, Lod i tekemaot presen ia blong tanem ol lanwis long Josef mo afta long hemia i talem long hem: “Hamas taem nao yu bin brekem ol komanmen mo ol loa blong God. … Yu no sapos blong fraet long man bitim we yu fraet long God” (Doktrin mo Ol Kavenan 3:6–7).
Be Lod i gat mesej ia tu blong Josef: “Be tingbaot, God i gat fulap sore; from hemia, sakem sin” (Doktrin mo Ol Kavenan 3:10).
Josef i bin sakem sin mo afta oli givim presen ia blong tanem ol lanwis long hem. Ful eksperiens ia i bin soa bigwan long hem, be hem i lanem ol impoten lesen ia—we tekem tu, se yumi save sakem sin mo kasem blesing from we Lod i gat fulap sore.
Sevya mo Fren
Josef Smit i bin gat plante visen, plante visit, mo plante revelesen we hem i bin luk o harem Lod Jisas Kraes o lanem abaot huia Hem, fasin blong Hem, mo misin blong Hem (luk long, eksampol Doktrin mo Ol Kavenan 19; 76; 93; 110).
Wan trutok we hem i lanem hem i we wok ia blong pemaot man blong Sevya i blong evri pipol we oli laef mo bae oli laef long wol ia—ol pipol we oli stap long hem oli ol stret boe mo gel blong God (luk long Doktrin mo Ol Kavenan 76:24).
Long semmak taem hem i bin lanem olsem wanem wok blong Sevya i bigwan, Josef i bin lanem tu se Papa long Heven mo Jisas Kraes Tufala i save mo lavem wanwan long yumi. Tufala i wantem wan rilesensip we i kolosap wetem wanwan long yumi. Tufala i wantem blong yumi mekem kavenan, kipim olgeta, mo stap fetful blong strong kasem en. Rilesensip ia taem i kam strong, bae givim yumi glad mo strong tingting.
Rilesensip blong Josef wetem Papa long Heven mo Jisas Kraes i kam strong tumas we i mekem se long wan taem we hem i fesem bigfala had taem, taem oli lokem hem long Libeti Kalabus, hem i save talem se:
“Bae mi traem blong stap glad from ol samting we mi gat, taem mi save se God hem i fren blong mi. Long Hem mi save faenem kamfot. Mi bin givim laef blong mi long ol han blong hem. Mi mi rere blong folem singaot blong hem. Mi wantem blong stap wetem Kraes.”
Taem yu stadi laef mo tijing blong Josef Smit, yu save folem eksampol blong hem. Sakem sin, mekem mo kipim ol kavenan, mo gohed blong stap fetful. Afta yu tu bae yu save se Sevya Hem i Fren blong yu.