« ត្រូវគេលើកឡើងលើឈើឆ្កាង—សេចក្តីដកស្រង់ » ដើម្បីកម្លាំងនៃយុវជន ខែ វិច្ឆិកា ឆ្នាំ ២០២២ ។
ត្រូវគេលើកឡើងលើឈើឆ្កាង
សេចក្តីដកស្រង់
មូលហេតុមួយដែលយើងមិនសង្កត់ធ្ងន់លើឈើឆ្កាងថាជានិមិត្តសញ្ញានោះគឺមកពីឫសគល់ក្នុងព្រះគម្ពីរប៊ីប ។ ដោយសារការឆ្កាងគឺជាទម្រង់កាត់ទោសមួយដ៏សាហាវបំផុតរបស់ចក្រភពរ៉ូម នោះអ្នកដើរតាមព្រះយេស៊ូវពីបុរាណជាច្រើនបានជ្រើសរើសមិនសង្កត់ធ្ងន់លើឧបករណ៍ដ៏ព្រៃផ្សៃដែលនាំឲ្យមានការរងទុក្ខនេះទេ ។ អត្ថន័យនៃការសុគតរបស់ព្រះគ្រីស្ទគឺពិតជាផ្នែកដ៏សំខាន់នៃសេចក្ដីជំនឿរបស់ពួកគេហើយ ប៉ុន្ដែជាទូទៅ ក្នុងរយៈពេលប្រហែលជា ៣០០ ឆ្នាំ ពួកគេខ្នះខ្នែងប្រាប់ពីអត្តសញ្ញាណដំណឹងល្អរបស់ពួកគេតាមវិធីសាស្ដ្រផ្សេងទៀត ។ …
មូលហេតុមួយទៀតសម្រាប់ការមិនប្រើឈើឆ្កាងជារូបតំណាង គឺយើងសង្កត់ធ្ងន់ទៅលើអព្ភូតហេតុដ៏ពេញលេញនៃបេសកកម្មរបស់ព្រះគ្រីស្ទ—ការមានព្រះជន្មរស់ឡើងវិញដ៏ រុងរឿងរបស់ទ្រង់ ក៏ដូចជាការរងទុក្ខ និងការពលិកម្មសុគតរបស់ទ្រង់ផងដែរ ។ …
… ទ្រង់់បានមានបន្ទូលមកកាន់យើងទាំងអស់គ្នានៅគ្រប់ដែនដី និងគ្រប់សម័យកាលទាំងអស់ថា « បើអ្នកណា ទាំងប្រុស [ ឬទាំងស្រី ] ចង់មកតាមខ្ញុំ នោះត្រូវឲ្យលះកាត់ចិត្តខ្លួនឯងចោលចេញ ហើយផ្ទុកឈើឆ្កាងខ្លួនមកតាមខ្ញុំចុះ » [ ម៉ាថាយ ១៦:២៤ ] ។
ការណ៍នេះថ្លែងពីឈើឆ្កាងនានាដែលយើងរែកបន្ទុក ជាជាងរូបឈើឆ្កាងដែលយើងពាក់នៅលើខ្លួន ។ ដើម្បីធ្វើជាអ្នកដើរតាមព្រះយេស៊ូវគ្រីស្ទ ពេលខ្លះមនុស្សម្នាក់ត្រូវតែរែកបន្ទុកមួយ—បន្ទុករបស់ខ្លួនឯង ឬរបស់អ្នកផ្សេងទៀត—ហើយទៅកាន់កន្លែងដែលតម្រូវឲ្យមានការលះបង់ និងការរងទុក្ខដែលចៀសមិនរួច ។ គ្រិស្តសាសនិកដ៏ពិតម្នាក់មិនអាចធ្វើតាមលោកចៅហ្វាយតែក្នុងរឿងដែលគាត់យល់ស្របតាមនោះទេ ។ ពុំមែនទេ ។ យើងធ្វើតាមទ្រង់នៅគ្រប់កន្លែង រួមទាំងនៅកន្លែងដែលពោរពេញដោយទុក្ខលំបាក និងបញ្ហាផងដែរ ដែលពេលខ្លះយើងអាចឈរតែឯងយ៉ាងឯកោ ។
… សូមឲ្យយើងនឹងដើរតាមទ្រង់—ដោយឥតឈប់ឈរ ទាំងមិនរអាក់រអួល ក៏មិនរត់គេច ហើយមិនស្ទាក់ស្ទើរ ធ្វើអ្វីដែលយើងដឹងថាគួរតែធ្វើ ទាំងនៅគ្រាដែលឈើឆ្កាងយើងធ្ងន់ ហើយផ្លូវកាន់តែងងឹត ។