សំណេរដោយអ្នក
ខ្ញុំ នឹង ជួបប្អូនប្រុសរបស់ខ្ញុំម្តងទៀត
ដោយ អ៊ីសាបេឡា អេស. អាយុ ១១ ឆ្នាំ រស់នៅរដ្ឋយូថាហ៍ ស.រ.អា.
នៅមួយសប្តាហ៍ទៀតគឺជាថ្ងៃកំណើតរបស់ប្អូនប្រុសខ្ញុំ កាប្រីយ៉ែល ។ គាត់នឹងមានអាយុប្រាំពីរឆ្នាំ ប៉ុន្តែ គាត់មានជំងឺពិការខួរក្បាល ហើយគាត់បានស្លាប់កាលពី ពីរឆ្នាំមុន ។ នៅក្នុងថ្នាក់អង្គការបឋមសិក្សាយើងបានច្រៀងបទ « គែតសេម៉ានី » ។ ពាក្យពេចន៍គឺច្បាស់លាស់ និងមានអត្ថន័យ ។ បទនេះបានធ្វើឲ្យថ្នាក់រៀនពោរពេញដោយព្រះវិញ្ញាណ ។
ក្រោយពីច្រៀងបទនេះ ស៊ិស្ទើរ វេបស្ទើរ បានថ្លែងទីបន្ទាល់របស់គាត់ពីដង្វាយធួនរបស់ព្រះយេស៊ូវ គ្រីស្ទ ។ ទីបន្ទាល់នេះបានធ្វើឲ្យបន្ទប់ពោរពេញទៅដោយព្រះវិញ្ញាណកាន់តែខ្លាំងឡើង ។ បន្ទាប់មក គាត់បានប្រាប់រឿងដែលប្អូនប្រុសរបស់គាត់បានស្លាប់ជាច្រើនឆ្នាំកន្លងទៅហើយ ។ វាបានធ្វើឲ្យខ្ញុំគិតពី កាព្រីយ៉ែល ហើយខ្ញុំស្ទើរតែស្រក់ទឹកភ្នែក ។ ខ្ញុំបានគិតពីពេលខ្ញុំបី កាព្រី ជាលើកចុងក្រោយ ។ ខ្ញុំសោកសៅ ប៉ុន្តែខ្ញុំក៏មានអារម្មណ៍សុខសាន្តផងដែរ ។
ស៊ិស្ទើរ វេបស្ទើរ បានមានប្រសាសន៍អំពីរឿងដែលគាត់ត្រេកអរខ្លាំងដោយដឹងថា គាត់នឹងបានជួបប្អូនប្រុសរបស់គាត់ម្តងទៀត ។ គាត់បានប្រាប់ថា គាត់បានដឹងថា យើងទាំងអស់គ្នានឹងបានជួបមនុស្សជាទីស្រឡាញ់ដែលបានស្លាប់ទៅរបស់យើងម្តងទៀត ។
ក្រោយពីចប់ថ្នាក់អង្គការបឋមសិក្សា ខ្ញុំបានឱប ស៊ិស្ទើរ វេបស្ទើរ ។ យើងបានយំជាមួយគ្នាពីរបីនាទី ។ ដែលពោរពេញដោយព្រះវិញ្ញាណយ៉ាងខ្លាំង ។ គាត់បានប្រាប់ខ្ញុំថា ខ្ញុំនឹងបានជួបប្អូនប្រុសរបស់ខ្ញុំម្តងទៀត ។ គាត់បានមានប្រសាសន៍ថា ដង្វាយធួននៃព្រះយេស៊ូវ គ្រីស្ទ មិនមែនគ្រាន់តែសម្រាប់មនុស្សទុច្ចរិតប៉ុណ្ណោះទេ ប៉ុន្តែក៏សម្រាប់មនុស្សដែលមានការឈឺចាប់ផងដែរ ។ គាត់បានសួរខ្ញុំពីអ្វីដែលខ្ញុំនឹកជាងគេអំពី កាព្រី ហើយខ្ញុំបាននិយាយថា ខ្ញុំនឹកដល់សំណើចរបស់គាត់ខ្លាំងណាស់ ។
ខ្ញុំបានប្រាប់ ស៊ិស្ទើរ វេបស្ទើរ ថា ខ្ញុំមិនសប្បាយចិត្តទេ ពីព្រោះវាគឺជាថ្ងៃខួបកំណើតរបស់ កាព្រីយ៉ែល នៅសប្តាហ៍នេះហើយខ្ញុំពិតជាត្រូវការដឹងថា ខ្ញុំនឹងបានជួបប្អូនប្រុសរបស់ខ្ញុំម្តងទៀត ។ គាត់បានប្រាប់ខ្ញុំថា ទឹកភ្នែកដែលយើងស្រក់មក គឺជាទឹកភ្នែកនៃអំណរ ។ ខ្ញុំអាចទទួលអារម្មណ៍នៃព្រះវិញ្ញាណ ហើយខ្ញុំបានដឹងថា អ្វីដែលគាត់បានប្រាប់គឺជាការពិត ។ ខ្ញុំជឿជាក់ថា ខ្ញុំនឹងជួប កាព្រីយ៉ែល ម្តងទៀត ហើយការណ៍នោះធ្វើឲ្យខ្ញុំសប្បាយចិត្តខ្លាំងណាស់ ។ ខ្ញុំស្រឡាញ់គាត់ ។ ខ្ញុំដឹងការណ៍នោះ ពីព្រោះព្រះយេស៊ូវ គ្រីស្ទ សព្វព្រះទ័យចំពោះខ្ញុំ ទ្រង់បានលះបង់ព្រះជន្មរបស់ទ្រង់ ដើម្បីខ្ញុំអាចជួប កាព្រីយ៉ែល ម្តងទៀត ។