Savali a le Au Peresitene Sili
O Le Meaalofa o le Salamo
Saunia e Peresitene Thomas S. Monson
Auiliiliga mai le Beside Still Waters, saunia e Simon Dewey
“O lo tatou tiutetauave o le tulai ae lea mai le tulaga feoloolo i le tulaga silisili, mai le toilalo i le faamanuiaina,” na aoao mai ai Peresitene Thomas S. Monson. “O la tatou galuega o le avea ma tagata silisili. O se tasi o meaalofa silisili a le Atua ia i tatou o le olioli i le taumafai pea, aua e leai se toilalo popo e manaomia ona avea ma taunuuga.”1
E masani ona tatou faafesootaia le oo mai o se tausaga fou ma ni fofo ma sini. Tatou te filifili e faaleleia, suia, toe taumafai. Masalo o le auala sili ona taua tatou te toe taumafai ai o le taliaina o le mea ua ta’ua e Peresitene Monson “o le meaalofa o le salamo.”2
I fuaitau nei mai ana aoaoga talu ona avea o ia o Peresitene o le Ekalesia, na fautua mai ai Peresitene ia i tatou ina ia “faaaoga le toto togiola o Keriso ina ia mafai ai ona tatou maua le faamagaloga o a tatou agasala, ma mafai ona faamamaina o tatou loto.”3
O Le Vavega o le Faamagalo Atu
“Ua tatou faia uma lava ni filifiliga e le sa’o. Afai tatou te le’i faasa’oina lava na filifiliga, ou te faamautinoa atu ia te outou e i ai se auala e faia ai. Ua ta’ua lena auala o le salamo. Ou te aioi atu ia te outou ina ia faasa’o mea sese sa outou faia. Sa maliu lo tatou Faaola ina ia maua ai e oe ma a’u lena meaalofa. E ui e le faigofie le ala, ae moni le folafolaga: “E ui lava ina pei o ofu mumu a outou agasala, e sisina ia e pei o le kiona” [Isaia 1:18]. ‘Ma o A’u le Alii, e le toe manatuaina lava i latou’ [MF&F 58:42]. Aua e te tuuina lou ola faavavau i se tulaga e lamatia ai. Afai ua e agasala, o le vave ona amata o lou toe foi mai, o le vave foi lena o lou mauaina o le filemu matagofie ma le olioli lea e maua faatasi ma le vavega o le faamagaloga.”4
Toe Foi i le Ala
“E ui e matua taua lo tatou filifili ma le atamai, ae e i ai taimi o le a tatou faia ai ni filifiliga faavalevalea. O le meaalofa o le salamo, ua saunia e lo tatou Faaola, ua tatou mafai ai ona faasa’o o tatou olaga, ina ia mafai ona tatou toefoi atu i le ala lea o le a taitai atu ai i tatou i lena mamalu selesitila o loo tatou sailia.”5
O Le Auala e Toe Foi Mai Ai
“Afai e i ai se tasi o outou o tau pule ai le agasala i le olaga, ou te faamautinoa atu ia te oe o loo i ai se auala e toefoi mai ai. Ua ta’ua lena auala o le salamo. E ui e faigata le ala, ae o lou faaolataga e faavavau o loo faalagolago i ai. O a nisi mea e sili ona taua atu i lo au taumafaiga? Ou te aioi atu ia te oe ia fuafua loa iinei i le taimi nei lava e faia laasaga talafeagai e salamo atoatoa ai. O le vave o lou faia o lea mea, o le vave foi lena o le a mafai ai ona e lagonaina le manuia ma le filemu ma le saogalemu lea na tautala i ai Isaia [tagai Isaia 1:18].”6
E Mafai Ona Sui ia Tagata
“E manaomia ona tatou manatua pea e mafai ona sui ia tagata. E mafai ona latou lafoai ni mausa leaga. E mafai ona latou salamo mai solitulafono. E mafai ona latou umia ma le agavaa le perisitua. Ma e mafai ona latou auauna atu ma le filiga i le Alii.”7
Toe Faamamaina
“Afai o i ai se mea e le talafeagai i lou olaga, ua i ai se auala e faatoilaloina ai. Ia taofi soo se amioletonu. Talanoa i lou epikopo. Pe o le a lava le faafitauli, e mafai lava ona faaleleia e ala i le salamo tatau. E mafai ona toe faamamaina oe.”8
O Le Matafaioi Taua a le Faaola
“E taua i le fuafuaga [o le faaolataga] o lo tatou Faaola, o Iesu Keriso. Ana le aunoa ma Lana taulaga togiola, semanu e leiloloa tagata uma. Peitai, e le lava le tau na ona talitonu ia te Ia ma Lana misiona. E manaomia ona tatou galulue ma aoao, saili ma tatalo, salamo, ma faaleleia. E manaomia ona tatou iloa tulafono a le Atua ma ola ai. E manaomia ona tatou mauaina Ana sauniga faaola. E na o le faia lava o lena mea o le a tatou maua ai le fiafia moni e faavavau.”9