Moses Nwoma
no mu Nyiyimu

1 Nyankopɔn ne nsɛm a ɔkãa kyerɛɛ Moses wɔ ber a wohwiim Moses kɔr bepɔw tsentsenntsen bi do no,

2 Na ohun Nyame enyim na enyim, na ɔnye no kasae, na Nyame n’enyimnyam baa Moses do; dɛm ntsi Moses tumii tsimii wɔ n’enyim.

3 Na Nyankopɔn see Moses dɛ: Hwɛ Emi nye Ewuradze Nyankopɔn Tumfo, Onnyi Ewiei nye me dzin; osiandɛ minnyi nda a ɔwɔ ahyɛse anaa mfe a ɔwɔ ewiei; ana iyi nnyɛ onnyi ewiei?

4 Na, hwɛ, eyɛ me babanyin; dɛm ntsi hwɛ, na mebɛkyerɛ wo me nsa ano edwindze; mbom nnyɛ ne nyinara, osiandɛ m’edwuma nnyi ewiei, nna me nsɛm so, osiandɛ onngyaa da.

5 Dɛm ntsi, nyimpa biara nnkotum ehu mo ndwuma nyinara, gyedɛ otum hu m’enyimnyam nyinara; na nyimpa biara nnkotum ehu m’enyimnyam nyinara, na ekyir no ɔatsena honam mu wɔ asaase do.

6 Na mowɔ edwuma ma wo, Moses, me babanyin, na ɔwo eyɛ nyia me Woo no Kortoo no no ne saso; na nyia me Woo no Kortoo no no na ɔbɛyɛ Agyenkwa no, osiandɛ adom na nokwar ahyɛ no mã; mbom Nyame bi nnyi hɔ kã moho, na ndzɛmba nyina gu m’enyim osiandɛ minyim ne nyinara.

7 Na afei, hwɛ, iyi nye adze kor a medze rekyerɛ wo, Moses, me babanyin, osiandɛ ewɔ wiadze mu, na afei medze rekyerɛ wo.

8 Na ɔbaa dɛ Moses hwɛe, na ohun wiadze a wɔbɔɔ no too do no; na Moses hun wiadze na n’ewiei nyinara nye adasamba nyinara a wɔtse ase, na wɔbɔɔ hɔn; dɛm ntsi ɔyɛɛ no ahobow na nwanwa kɛse.

9 Na Nyankopɔn n’enyim twee fii Moses nkyɛn, dɛm ntsi n’enyimnyam fii Moses do; na ɔkaa Moses no nko; na ber a ɔkaa no nko no, ɔhwee asaase no do.

10 Na ɔbaa dɛ mber pii guu mu ansaana Moses resan enya ne honam mu ahoɔdzen bio dɛ nyimpa; na ɔsee noho dɛ: Seseiara, osian dɛm adze yi ntsi meehu dɛ nyimpa nnsɛ hwee, adze a mennsusu da.

11 Mbom seseiara medze mankasa m’enyiwa ehu Nyame; mbom nnyɛ mo honam mu enyi, mbom mo sunsum enyi a, osiandɛ mo honam enyi nnkotum ehu, osiandɛ nkyɛ mekyenkyenee na muwui wɔ n’enyim; mbom nna n’enyimnyam wɔ mo do; na muhun n’enyim, osiandɛ mesakyeree wɔ n’enyim.

12 Na ɔbaa dɛ ber a Moses kãa dɛm nsɛm yinom wiei no, hwɛ Satan bae bɔsɔɔ no hwɛe see dɛ: Moses, nyimpa ba, som me.

13 Na ɔbaa dɛ Moses hwɛɛ Satan na ɔsee dɛ: Ɔwo nye woana? Na hwɛ, meyɛ Nyame ne ba, na mesɛ nyia Ɔwoo no Kortoo no no; na w’enyimnyam wɔ hen a ɔwɔ dɛ mosom wo?

14 Na hwɛ, munnkotum ahwɛ Nyame, gyedɛ n’enyimnyam aba mo do, na wɔsakyer me wɔ n’enyim. Mbom mutum hwɛ wo dɛ honammunyi. Ana nokwar dɛ ɔnntse dɛm?

15 Nhyira nkã me Nyankopɔn ne dzin, osiandɛ no Sunsum nntwee mmfi moho koraa, ɔnntse dɛm a nna w’enyimnyam wɔ hen, osiandɛ ɔyɛ sum dze ma me? Na mubotum akyerɛ soronko a ɔda ɔwo na Nyame ntamu; na Nyankopɔn see me dɛ: Som Nyame, na ɔno nko na som no.

16 Fi ha fi, Satan; mma ndaadaa me; osiandɛ Nyankopɔn see me dɛ: Ɔwo eyɛ nyia me Woo no Kortoo no no ne saso.

17 Na ɔmaa me mbrasɛm so ber a ɔfrɛɛ me fii haban a ɔredzɛw no mu no, see dɛ: Frɛ Nyame wɔ nyia me Woo no Kortoo no no ne dzin mu, na som me.

18 Na bio Moses see dɛ: Minnkegyaa dɛ mebɛfrɛ Nyame, mowɔ ndzɛmba binom a ɔsɛ dɛ mebisa fi no hɔ: osiandɛ n’enyimnyam aba mo do, dɛm ntsi mutum hu soronko a ɔda ɔno na ɔwo ntamu. Fi ha fi, Satan.

19 Na afei, ber a Moses kãa dɛm nsɛm yinom no, Satan dze ndze kɛse tseatseaa mu wɔ asaase no do, na ɔhyɛɛ dɛ: Emi nye nyia a Wɔwoo no Kortoo no no, som me.

20 Na ɔbaa dɛ Moses hyɛɛ ase suroo mbordo; na ber a ɔhyɛɛ ase dɛ orusuro no, ɔtsee hɛl no wen nkã. Eso, ɔfrɛɛ Nyankopɔn no, onyaa ahoɔdzen, na ɔtseaa mu see dɛ: Fi me nkyɛn fi, Satan, osiandɛ Nyame kor yi nko na mobɔsom no, nyia ɔyɛ enyimnyam Nyame no.

21 Na afei Satan noho hyɛɛ ase dɛ ɔropopo, na asaase wosowee; na Moses nyaa ahoɔdzen, na ɔfrɛɛ Nyankopɔn, see dɛ: Wɔ Wɔwoo no Kortoo no ne dzin mu, fi ha fi, Satan.

22 Na ɔbaa dɛ Satan dze ndze kɛse tseaa mu a orusu na orutwa ewuo, na ɔrotwɛr ne sẽ, na ofii hɔ kɔree, ofii Moses n’enyim kɔree mpo, na oennhu no.

23 Na afei Moses gyee dase a ɔfa dɛm adze yi ho no; mbom osian emumuyɛdze ntsi adasamba ennya wɔ hɔn mu.

24 Na ɔbaa dɛ ber a Satan fii Moses n’enyim kɔree no, nna Moses maa n’enyi do wɔ sor, nna Sunsum Krɔnkrɔn ahyɛ no mã, dza ɔgye dase wɔ Egya na Ɔba no hɔnho;

25 Na ɔbɔɔ Nyankopɔn ne dzin no, ohun n’enyimnyam no bio, osiandɛ ɔbaa no do; na ɔtsee ndze a ɔrekã dɛ: Nhyira akã wo, Moses, osiandɛ Emi, Otumfo no, asan mu eyi wo, na wɔbɛma woho ayɛ dzen asen esu pii; na wɔbɛyɛ setsie ama wo mbrasɛm tse dɛ eyɛ Nyame.

26 Na hwɛ, menye wo wɔ hɔ, kesi wo nkwa nda ewiei mpo; na ebɛgye mo nkorɔfo efi nkowaasom mu, Israel medze a masan mu eyi no mpo.

27 Na ɔbaa dɛ, ber a ndze no gu do rekasa no, Moses too n’enyi na ohun asaase no, nyew, ne nyinara mpo, na no mu ketseketse mpo nnyi hɔ a oennhu, ɔnam Nyankopɔn no Sunsum do nyaa mu nhunii.

28 Na ohun hɔn a wɔtse do no so, na ɔkra kor mpo nnyi hɔ a oennhu no; na ɔnam Nyankopɔn no Sunsum do hun hɔn, na hɔn dodow dɔɔ sõ, na wonntum nnkan hɔn tse dɛ anhwea a ogu mpoano mpo.

29 Na ohun nsaase pii, na asaase kor biara wɔfrɛ no asaase, na dɔm tsetse n’enyi do.

30 Na ɔbaa dɛ Moses frɛɛ Nyankopɔn see dɛ: Kã kyerɛ me, meserɛ wo, dɛn ntsi na dɛm ndzɛmba yinom tse dɛm, na enam ebɛnadze do yɛɛ hɔn?

31 Na hwɛ, Ewuradze n’enyimnyam baa Moses do, ntsi Moses gyinaa Nyankopɔn n’enyim, na ɔnye no kasaa enyim na enyim. Na Ewuradze Nyankopɔn see Moses dɛ: Osian mankasa me tsirmpɔw ntsi na mayɛ dɛm ndzɛmba yinom. Ha na nyansa wɔ na ɔwɔ mo mu.

32 Na ɔnam m’asɛm no tum do nna mobɔɔ hɔn, ɔno nye me Ba a Wɔwoo no Kortoo no no a adom na nokwar ahyɛ no mã no.

33 Na wiadze a wonntum nnkan na mobɔe; na mobɔɔ hɔn so wɔ mankasa me tsirmpɔw ho; na menam me Ba no do na mobɔɔ hɔn, nyia ɔyɛ mankasa nyia me Woo no Kortoo no no.

34 Na mbanyin nyinara mu banyin a odzi kan no mafrɛ no Adam, n’asekyerɛ nye ɔdodow.

35 Mbom asaase yi, na hɔn a wɔtse do no ho nsɛm nko, na medze ma wo. Na hwɛ, nsaase pii nna wɔnam m’asɛm no tum do etwa mu kɔ. Na pii so wɔ hɔ seseiara, na nyimpa nnkotum akan, mbom ndzɛmba nyinara minyim hɔn dodow, osiandɛ wɔyɛ medze na minyim hɔn.

36 Na ɔbaa dɛ Moses see Ewuradze dɛ: Hu w’akowaa mbɔbɔr, O Nyankopɔn, na kã dza ɔfa asaase yi, nye dɔm a wɔtse do no ho nsɛm kyerɛ me, nye ɔsorsor no so, na nkyii w’akowaa mo bo bɔdwe.

37 Na Ewuradze Nyankopɔn see Moses dɛ: Ɔsorsor no, dɔɔ sõ, na nyimpa nnkotum akan hɔn; na emidze minyim hɔn dodow, osiandɛ wɔyɛ medze.

38 Na sɛ asaase kor twa mu, na no sorsor no twa mu kɔ mpo a kor so bɛba; na mo ndwuma nnyi ewiei, nna me nsɛm so dɛmara.

39 Na hwɛ, iyi nye m’edwuma na m’enyimnyam—dɛ medze nyimpa ne bɛkyebo na onnyiewiei nkwa bɔbɔ adze.

40 Na afei, Moses, me babanyin, mebɛkã dza ɔfa asaase a igyina do yi ho asɛm akyerɛ wo; na kyerɛw nsɛm a mebɛkã akyerɛ wo no.

41 Na da a adasamba bɛfa me nsɛm dɛ ɔnnyɛ hwee na wobeyi nsɛm no mu pii efi nwoma a ebɛkyerɛw no mu no, hwɛ mibeyi obi so a ɔbɔsoɛr tse dɛ ɔwoara; na ɔbɛma adasamba hɔn nsa akã bio—hɔn mu dodowara a wɔbɛgye edzi no.

42 (Dɛm nsɛm yinom na wɔkãa kyerɛɛ Moses wɔ bepɔw no do, na dɛm dzin no adasamba runnhu da. Na seseiara wɔakã akyerɛ wo. Mma mmfa nnkyerɛ obiara gyedɛ hɔn a wɔgye dzi no. Ɔnyɛ hɔ dɛm. Amen.)