1 Dɛm na ɔsor nye asaase ^awowiee yɛ, nye hɔn mu ^bdɔm nyinara.

2 Na da a otsĩa esuon no, Emi, Nyankopɔn, wiee m’edwuma yɛ, nye ndzɛmba nyinara a mayɛ no; na ^amegyee m’ahom ^bda a otsĩa esuon no wɔ m’edwuma a mayɛ nyinara mu, na muwiee ndzɛmba nyinara a mayɛ no, na Emi, Nyankopɔn, hun dɛ oye;

3 Na Emi, Nyankopɔn, ^ahyiraa da a otsĩa esuon no, na metseew ho; osiandɛ ɔno mu na megyee m’ahom wɔ ^bm’edwuma nyinara a Emi, Nyankopɔn mabɔ na mayɛ no.

4 Na afei, hwɛ, mese wo dɛ, iyinom nye ɔsor nye asaase hɔn santsen ber a wɔbɔɔ hɔn, wɔ da a Emi, Nyankopɔn, yɛɛ ɔsor na asaase no,

5 Na hamu dua biara ^aansaana ɔreba asaase do no, na hamu ahaban biara ansaana oribefifir. Osiandɛ Emi, Ewuradze Nyankopɔn, na ^bmobɔɔ ndzɛmba nyinara, dza makã ho asɛm no, ^csunsum mu ansaana wɔreda no su no edzi wɔ asaase enyi do. Osiandɛ Emi, Ewuradze Nyankopɔn, memmaa nsu nntɔree nnguu asaase enyi do. Na Emi, Ewuradze Nyankopɔn, ^dmabɔ adasamba nyinara; na nyimpa nnyaa mmbaa a ɔbɔdɔw ^easaase no; osiandɛ ^fmobɔɔ hɔn wɔ ^gɔsor; nna honam nnyaa mmbaa asaase do, nye nsu mu, nye wimu so;

6 Mbom Emi, Ewuradze Nyankopɔn, kasae, na ^ansuwusiw fii asaase do bɔfɔɔw famu nyinara.

7 Na Emi, Ewuradze Nyankopɔn, dze asaase do ^ahuntuma bɔɔ nyimpa, na mohoom nkwahom guu n’ahwentokura mu, na ^bnyimpa bɛyɛɛ ^cɔkra tseasefo, ^dhonam a odzi kan wɔ asaase do, nyimpa a odzi kan so; eso ansaana wɔrobɔ ndzɛmba nyinara; mbom wɔbɔɔ hɔn yɛɛ hɔn sunsum dɛ mbrɛ m’asɛm se.

8 Na Emi, Ewuradze Nyankopɔn, yɛɛ ture wɔ ^aEden, wɔ boka afamu, na hɔ na medze ɔbarimba a meyɛɛ no no toe.

9 Na famu na Emi, Ewuradze Nyankopɔn, maa ndua biara fii mu fifirii, dza ɔyɛ fɛw wɔ nyimpa enyi do; na nyimpa etum ahwɛ. Na ɔbɛyɛɛ ɔkra tseasefo so. Osiandɛ nna ɔyɛ sunsum wɔ da a mobɔɔ no no mu; osiandɛ nna ɔhyɛ bea a Emi, Nyankopɔn, mobɔɔ no no mu, nyew, ndzɛmba nyinara mpo a misiesie dze maa nyimpa; na nyimpa hun dɛ oye dɛ wodzi. Na Emi, Ewuradze Nyankopɔn, duaa ^ankwadua so wɔ ture no ne finimfin, nye papa na bɔn ho ^bnyimdzee dua no so.

10 Na Emi, Ewuradze Nyankopɔn, maa esutsen bi fi Eden kɔfɔɔw ture no; na ofi hɔ no na no mu paapaae, na ɔbɛyɛɛ ^aesutsir anan.

11 Na Emi, Ewuradze Nyankopɔn, dza odzi kan no motoo no dzin Pison, na otwa Havilah asaase nyinara ho hyia, bea a Emi, Ewuradze bɔɔ sika pii guu hɔ no;

12 Na sika a ɔwɔ dɛm asaase no do no ye; na bdellium nye onyx ɔbo wɔ hɔ.

13 Na esutsen a otsĩa ebien no ne dzin dze Gihon; ɔno na otwa Ethiopia asaase nyinara ho hyia no.

14 Na esutsen a otsĩa ebiasa no ne dzin dze Hiddekel; ɔno na otwa mu dze kɔ Assyria boka afamu no. Na esutsen a otsĩa anan no nye Euphrates no.

15 Na Emi, Ewuradze Nyankopɔn, faa ɔbarimba no, na medze no kɔtoo Eden Ture no mu dɛ onsiesie hɔ, na ɔnhwɛ do.

16 Na Emi, Ewuradze Nyankopɔn, hyɛɛ nyimpa no mbra, dɛ: Ndua a ɔwɔ ture no mu no, ibotum edzi bi.

17 Mbom papa na bɔn ho nyimdzee dua no dze mma nndzi bi, eso, ibotum afa dza ɔwoara ^aepɛ ama woho, osiandɛ medze wo pɛ ama wo; mbom kaa dɛ mabra, na ^bda a ibedzi bi no ampaara dɛ ^cibowu.

18 Na Emi, Ewuradze Nyankopɔn, see nyia me ^aWoo no Kortoo no no dɛ onnye dɛ ɔbarimba no nko tsena hɔ; dɛm ntsi mebɛyɛ ^bboafo a ɔfata no mama no.

19 Na Emi, Ewuradze Nyankopɔn, medze dɛtse yɛɛ hamu mbowadoma nyinara, nye wimu ntumbowa nyinara; na mehyɛɛ hɔn dɛ wɔmbra Adam hɔ, ma ɔnhwɛ mbrɛ ɔbɛfrɛ hɔn; na hɔn so wɔyɛ akra atseasefo; osiandɛ Emi, Nyankopɔn, guu nkwa ahom guu hɔn mu, na mehyɛɛ dɛ dzin biara a Adam dze bɛfrɛ abɔdze biara a nkwa wɔ no mu no, ɔnoara nye ne dzin.

20 Na Adam totoo anantwi, nyinara, nye wimu ntumbowa, nye hamu mbowadoma nyinara edzin; mbom Adam dze, woennhu ɔboafo a ɔfata no amma no.

21 Na Emi, Ewuradze Nyankopɔn, maa nda heii tɔɔ Adam no do, na ɔdae, na miyii ne mparba no mu kor na mesiiw honam no hyɛɛ n’ananmu;

22 Na aparba no a Emi, Ewuradze Nyankopɔn, yii fii ɔbarimba no mu no, medze yɛɛ ^aɔbaa, na medze no brɛɛ ɔbarimba no.

23 Na Adam see dɛ: Afei minyim dɛ oyi nye me mbiew mu biew, na mo ^ahonam mu nam; wɔbɛfrɛ no Ɔbaa, osiandɛ woyii no fii ɔbarimba mu,

24 Dɛm ntsi na ɔbarimba begya n’egya na ne nã wɔ hɔ, na ɔdze noho ^aakɛfam ne yer ho; na wɔayɛ ^bhonankor.

25 Na hɔn beenu no nyinara dzi adagyaw, ɔbarimba no nye ne yer, na hɔn enyi nntõ.