Kopya sang Larawan halin sa Libro ni Abraham

Lar. 1. Kolob, nga nagasimbolo sang una nga gintuga, nga pinakamalapit sa selestiyal, ukon sa puluy-an sang Dios. Una sa pagdumala, ang katapusan parte sa pagtakos sang tinion. Ang pagtakos suno sa selestiyal nga tinion, nga inang selestiyal nga tinion nagarepresentar sang isa ka adlaw sa kalabaon sang isa ka maniko. Ang isa ka adlaw sa Kolob katumbas sang isa ka libo ka tuig suno sa pag-isip sa sining duta, nga ginatawag sang mga Egiptohanon nga Jah-oh-eh.

Lar. 2. Nahamtang madason sa Kolob, nga ginatawag sang mga Egiptohanon Oliblis, nga amo ang masunod nga mayor nga nagadumala nga gintuga malapit sa selestiyal ukon sa lugar nga ginapuy-an sang Dios; nga may yara man sang gahum, parte sa iban nga mga planeta; suno sa ginpahayag sang Dios kay Abraham, samtang nagahalad sia sang sakripisyo sa isa ka altar nga iya ginpatindog sa Ginuo.

Lar. 3. Ginhimo sa pagrepresentar sa Dios nga nagapungko sa iya trono nga may gahum kag awtoridad; nga may korona sang wala’y katapusan nga kasanag sa iya ulo; nga nagarepresentar man sang panguna nga Yabi-nga-mga-tinaga sang Balaan nga Pagkapari, pareho sang ginpahayag kay Adan sa Hardin sang Eden, kag amo man kay Set, Noe, Melquisedec, Abraham, kag sa tanan nga tawo nga ang Pagkapari ginpahayag.

Lar. 4. Katumbas sang Hebreo nga tinaga nga Raukiyang, nga nagakahulugan kalaparon, ukon ang kahawaan sang kalangitan; isa man ka numero nga Egiptohanon nga nagakahulugan isa ka libo; nga katumbas sa pagtakos sang tinion sang Oliblis nga pareho sa Kolob sa iya sini pagtiyog kag sa iya pagtakos sang tinion.

Lar. 5. Ginatawag sa Egiptohanon nga Enish-go-on-dos; isa man ini sang nagadumala nga mga planeta, kag ginakabig sang mga Egiptohanon nga amo ang Adlaw, kag nagabaton sang iya kasanag halin sa Kolob paagi sa Kae-e-vanras, nga amo ang panguna nga Yabi, ukon, sa iban nga pulong, ang nagadumala nga gahum, nga nagadumala sang kinse ka iban pa nga permanente nga mga planeta ukon mga bituon, kag amo man sang Floeese, ukon ang Bulan, sang Duta kag sang Adlaw sa ila tuigan nga pagtiyog. Ini nga planeta nagabaton sang iya gahum paagi sa Kli-flos-is-es, ukon Hah-ko-kau-beam, ang mga bituon nga ginarepresentar sang mga numbero 22 kag 23 nga nagabaton kasanag halin sa mga pagtiyog sang Kolob.

Lar. 6. Nagalarawan sini nga duta sa iya sini apat ka pamusod.

Lar. 7. Nagalarawan sang Dios nga nagapungko sa iya trono, nga nagapahayag sa tunga sang kalangitan sang panguna nga Yabi-nga-mga-tinaga sang Pagkapari, amo man, sang simbolo sang Balaan nga Espiritu sa kay Abraham, sa dagway sing isa ka pating.

Lar. 8. Nagalakip sang mga sinulatan nga indi mapahayag sa kalibutan; pero maangkon sa Balaan nga Templo sang Dios.

Lar. 9. Indi pa dapat ipahayag sa sini nga tinion.

Lar. 10. Pareho man sa ibabaw.

Lar. 11. Pareho man sa ibabaw. Kon mahibaloan sang kalibutan ining mga numero, tugoti ini. Amen.