1 Kag gani humanon naton ang mga langit kag ang duta, kag tanan nga yara sa mga ini.

2 Kag ang mga Dios nagsiling sa ila mga kaugalingon: Sa ika-pito nga higayon tapuson naton ang aton buluhaton, nga aton ginkasugtan; kag mapahuway kita sa ika-pito nga higayon halin sa aton tanan nga pagpangabudlay nga aton ginkasugtan.

3 Kag ang mga Dios nagtapos sang ila buluhaton sa ika-pito nga higayon, bangod nga sa ika-pito nga higayon magapahuway sila sa tanan nila nga pagpangabudlay nga ila (ang mga Dios) ginkasugtan sa ila mga kaugalingon nga himuon; kag ginpakabalaan ini. Kag ini ang ila mga desisyon sa tion nga ginkasugtan nila sa ila mga kaugalingon nga himuon ang mga langit kag ang duta.

4 Kag ang mga Dios nagpanaog kag naghimo sining kasaysayan sa pagtuga sang mga langit kag sang duta, sang ginhimo ang mga ini sa adlaw nga ang mga Dios naghimo sang duta kag sang mga langit,

5 Suno sa tanan sinang ila ginhambal parte sa tagsa ka tanom sang kapatagan antes ini nahamtang sa duta, kag sang tagsa ka tanom nga nagadala sang binhi sa kapatagan antes ini nagtubo; kay ang mga Dios wala makapaulan sa duta sang nagpamat-od sila nga himuon ang mga ini, kag wala pa nakahimo sang lalaki nga magpanguma sang duta.

6 Apang may nag-usbong nga gal-um halin sa duta, kag nagbunyag sang bug-os nga ibabaw sang duta.

7 Kag ang mga Dios naghimo sang lalaki halin sa yab-ok sang duta, kag nagdala sang iya espiritu (nga amo ang espiritu sang lalaki), kag ginbutang ini sa iya; kag naghuyop sa iya ilong sang ginhawa sang kabuhi, kag ang tawo nangin buhi nga kalag.

8 Kag ang mga Dios nagtanom sang hardin, sa este nayon sa Eden, kag didto ginbutang nila ang lalaki, nga ang espiritu sini ginbutang nila sa lawas nga ila ginhimo.

9 Kag halin sa duta ginpatubo sang mga Dios ang tagsa ka kahoy nga manami sa panulok kag maayo nga kalan-on; ang kahoy sang kabuhi, man, sa tunga sang hardin, kag ang kahoy sang ihibalo sang maayo kag malain.

10 May suba nga nagailig halin sa Eden, sa pagbunyag sang hardin, kag halin didto nagsipak ini kag nangin apat ka sanga.

11 Kag ang mga Dios nagkuha sang lalaki kag ginbutang sia sa Hardin sang Eden, sa pag-uma kag sa pagtatap sini.

12 Kag ang mga Dios nagsugo sa lalaki nga nagasiling: Sa tagsa ka kahoy sang hardin makakaon ka sing hilway,

13 Apang sa kahoy sang ihibalo sang maayo kag malain, indi ka magkaon; kay sa tion nga magkaon ka sini, sigurado nga mapatay ka. Karon ako, si Abraham, nakita ko nga suno ini sa tinion sang Ginuo, nga amo ang tinion sang Kolob; kay sadto wala pa ang mga Dios nakahatag kay Adan sang iya pag-isip sang tinion.

14 Kag ang mga Dios nagsiling: Mahimo kita sang kabulig nga para sa lalaki, kay indi maayo para sa lalaki nga mag-isahanon, gani mahimo kita sang kabulig nga para sa iya.

15 Kag ang mga Dios naghatag sing hamuok nga katulogon kay Adan; kag nagtulog sia, kag ginkuhaan nila sia sing isa ka gusok, kag ginpapali ang unod sa lugar sini;

16 Kag halin sa gusok nga ginkuha sang mga Dios sa lalaki, naghimo sila sang babayi, kag gindala sia sa lalaki.

17 Kag nagsiling si Adan: Ini tul-an sang akon tul-an, kag unod sang akon unod; karon pagatawgon sia nga Babayi, kay ginkuha sia halin sa lalaki;

18 Gani bayaan sang lalaki ang iya amay kag iya iloy, kag magpabilin nga tampad sa iya asawa, kag mangin isa sila ka unod.

19 Kag pareho sila nga hublas, ang lalaki kag iya asawa, kag wala sila nahuya.

20 Kag halin sa duta ang mga Dios naghimo sang tagsa ka sapat sang kapatagan, kag tagsa ka pispis sang kahanginan, kag gindala sila kay Adan agud tan-awon kon ano ang itawag niya sa ila; kag kon ano ang itawag ni Adan sa tagsa ka buhi nga tinuga, amo sina ang iya mangin ngalan.

21 Kag naghatag si Adan sang ngalan sa tanan nga kahayupan, sa mga kapispisan sang kahanginan, sa tagsa ka sapat sang kapatagan; kag sa kay Adan, may yara sang kabulig para sa iya.