1 Karon ang Ginuong Dios nagpahanabo nga ang tiggulutom maglubha sa duta sang Ur, sa bagay nga si Haran, nga akon utod nga lalaki napatay; apang si Tera nga akon amay, nagpuyo pa sa gihapon sa duta sang Ur, sang Caldeanhon.

2 Kag natabo ini nga ako, si Abraham, nagpangasawa kay Sarai, kag si Nahor nga akon utod nga lalaki nagpangasawa kay Milca nga anak nga babayi ni Haran.

3 Karon ang Ginuo nagsiling sa akon: Abraham, maghalin ka sa imo pungsod, kag sa imo mga paryente, kag sa puluy-an sang imo amay, pakadto sa duta nga ipakita ko sa imo.

4 Gani ginbayaan ko ang duta sang Ur, sang Caldeanhon, agud magkadto sa duta sang Canaan; kag gindala ko si Lot, nga anak sang akon utod nga lalaki, kag ang iya asawa, kag si Sarai, nga akon asawa; kag nagsunod man sa akon ang akon amay, sa duta nga amon gintawag nga Haran.

5 Kag ang tiggulutom naghagan-hagan; kag ang akon amay nagpabilin sa Haran kag nagpuyo didto, kay madamo sang mga panong sa Haran; kag ang akon amay nagbalik sa iya pagsimba sa mga dios-dios, gani nagpabilin sia sa Haran.

6 Apang ako, si Abraham, kag si Lot nga anak sang akon utod nga lalaki, nagpangamuyo sa Ginuo, kag ang Ginuo nagpakita sa akon kag nagsiling sa akon: Magbangon, kag dal-a si Lot upod sa imo; kay gintuyo ko nga dal-on ka pagwa sa Haran, kag himuon ka nga alagad sa pagdala sang akon ngalan sa iban nga duta nga ihatag ko sa imo kaliwatan pagkatapos nimo bilang ila kaugalingon sa wala’y katubtuban, kon magpamati sila sa akon tingug.

7 Kay ako ang Ginuo nga imo Dios; nagapuyo ako sa langit; ang duta ang akon palatungan sang tiil; ginauntay ko ang akon kamot sa ibabaw sang dagat, kag nagatuman ini sa akon tingug; ginapahamtang ko ang hangin kag ang kalayo nga mangin akon karwahe; nagasiling ako sa mga bukid—Palayo diri—kag tan-awa, ginakuha sila sang buhawi, sa gilayon, sa hinali.

8 Jehova ang akon ngalan, kag nakahibalo ako sang katapusan halin sa ginsuguran; gani ang akon kamot magatatap sa imo.

9 Kag himuon ko halin sa imo ang isa ka nasyon nga dako, kag pakamaayohon ko ikaw sing nagapalanglapaw, kag himuon ang imo ngalan nga bantug sa tanan nga nasyon, kag mangin bugay ka sa imo kaliwatan pagkatapos nimo, nga sa ila mga kamot dal-on nila ining pag-alagad kag Pagkapari sa tanan nga nasyon;

10 Kag pakamaayohon ko sila paagi sa imo ngalan; kay ang tanan nga magbaton sining Ebanghelyo pagatawgon sunod sa imo ngalan, kag pagakabigon nga imo kaliwatan kag magatindog kag magapakamaayo sa imo bilang ila amay;

11 Kag pakamaayohon ko sila nga nagapakamaayo sa imo, kag sumpaon sila nga nagasumpa sa imo; kag sa imo (buot silingon, sa imo Pagkapari), kag sa imo kaliwatan (buot silingon, ang imo Pagkapari), kay ginahatag ko sa imo ang promisa nga ining kinamatarong magapadayon sa imo, kag sa imo kaliwatan pagkatapos nimo (buot silingon, ang matuod-tuod nga kaliwatan, ukon ang kaliwatan sang lawas) ang tanan nga mga panimalay sang duta pakamaayohon, bisan pa sang mga bugay sang Ebanghelyo, nga amo ang mga bugay sang kaluwasan, nga amo ang kabuhi nga wala’y katapusan.

12 Karon, pagkatapos nga ang Ginuo nag-untat sa paghambal sa akon, kag nag-untat sa pagpakita sang iya nawong sa akon, nagsiling ako sa akon tagipusuon: Ang imo alagad matutum nga nagpangita sa imo; karon nakita ko ikaw;

13 Ginpadala mo ang imo anghel agud luwason ako sa mga dios-dios ni Elkena, kag makapaayo sa akon nga magpamati sa imo tingug, gani tugoti ang imo alagad nga magbangon kag maglakat sa paghidaet.

14 Gani ako, si Abraham, naglakat suno sa ginhambal sang Ginuo sa akon, kag si Lot upod sa akon; kag ako, si Abraham sisenta’y dos ka tuig sang naghalin ako sa Haran.

15 Kag gindala ko si Sarai, nga akon ginpangasawa sang yara ako sa duta sang Ur, sa Caldea, kag si Lot, nga anak nga lalaki sang akon utod nga lalaki, kag tanan namon nga pagkabutang nga natipon, kag tanan nga kalag nga nadaug namon sa Haran, kag nag-agi sa alagyan pakadto sa duta sang Canaan, kag nagpuyo sa mga tolda sa amon pagpanglakaton;

16 Gani, ang wala’y katapusan amo ang amon palalipdan kag amon bato kag amon kaluwasan, samtang nagapanglakaton kami halin sa Haran paagi sa Jerson, pakadto sa duta sang Canaan.

17 Karon ako, si Abraham, nagtukod sang altar sa duta sang Jerson, kag naghatag sang halad sa Ginuo, kag nagpangamuyo nga ang tiggulutom ilikaw sa panimalay sang akon amay, agud indi sila mapatay.

18 Kag dayon nag-agi kami sa duta sang Jerson pakadto sa lugar sang Sequem; nahamtang ini sa kapatagan sang More, kag nakalab-ot na kami sa mga dulonan sang duta sang mga Canaanhon, kag naghalad ako sang sakripisyo didto sa kapatagan sang More, kag hugot ako nga nagtawag sa Ginuo, bangod nakalab-ot na kami sa duta sining idolatroso nga nasyon.

19 Kag ang Ginuo nagpakita sa akon bilang sabat sa akon mga pangamuyo, kag nagsiling sa akon: Sa imo kaliwatan ihatag ko ining duta.

20 Kag ako, si Abraham, nagbangon halin sa lugar sang altar nga akon gintukod sa Ginuo, kag nagbiya didto pakadto sa isa ka bukid sa este sang Bet-el, kag nagpatindog sang akon tolda didto, ang Bet-el sa weste, kag ang Ai sa este kag didto nagtukod ako sang isa pa gid ka altar sa Ginuo, kag nagtawag liwat sa ngalan sang Ginuo.

21 Kag ako, si Abraham, nagpanglakaton padulong sa gihapon sa sur; kag ang tiggulutom nagapadayon sa duta; kag ako, si Abraham, nagdesisyon nga magdulhog sa Egipto, agud magpuyo didto kay ang tiggulutom nangin tuman kalubha.

22 Kag natabo ini nga sang malapit na lang ako magsulod sa Egipto, ang Ginuo nagsiling sa akon: Tan-awa, si Sarai nga imo asawa, matahum kaayo tulukon;

23 Gani matabo ini nga kon makita sia sang mga Egiptohanon, masiling sila—Asawa sia niya; kag patyon ka nila, apang amligan nila nga mabuhi sia; gani pat-ura nga ini ang himuon ninyo:

24 Pahambala sia sa mga Egiptohanon nga utod mo sia, kag ang imo kalag magakabuhi.

25 Kag natabo ini nga ako, si Abraham, nagsugid kay Sarai nga akon asawa, sang tanan nga ginhambal sang Ginuo sa akon—Gani hambala sila, pangabay ko sa imo, nga utod ko ikaw, agud nga bangod sa imo mangin maayo para sa akon, kag ang akon kalag magakabuhi bangod sa imo.