5 Vim thaum peb ua neej muaj cev nqaij daim tawv, txoj kev ntshaw ua txhaum, uas tsis raws li txoj kev cai, pheej tshoov peb lub cev kom txi txiv mus rau txoj kev tuag.

6 Tiam sis nim no peb twb dim ntawm txoj kev cai uas khi peb, tsis raug txoj kev cai, kom peb yuav ua hauj lwm nrog tus ntsuj plig tshiab, thiab tsis ua raws li tej kev cai qub.

7 Yog li ntawd peb yuav hais li cas? Txoj kev cai yog kev txhaum los? Thov Vajtswv kom txhob yog li ntawd. Tsis yog li ntawd, kuv yeej tsis paub kev txhaum, yog hais tias tsis muaj txoj kev cai; kuv yeej tsis paub kev ntshaw, yog hais tias tsis muaj txoj kev cai uas hais tias, Koj tsis txhob ntshaw luag tug.

8 Tiam sis kev txhaum, siv sij hawm ntawm txoj kev txib ntawd, ua rau kuv muaj txhua yam kev ntshaw. Yog tsis muaj txoj kev cai ces kev txhaum yeej tuag lawm.

9 Yog thawj zaug uas kuv muaj sia es tsis muaj kev ua txhaum txoj kev cai, tiam sis thaum muaj Khetos lo lus txib, ces rov qab muaj kev txhaum, thiab kuv tuag.

10 Thiab thaum kuv tsis ntseeg Khetos lo lus txib uas muaj los, uas tau tsa kom neeg muaj sia, ces kuv pom tias txoj kev cai no rau txim tuag rau kuv.

11 Vim kev txhaum, tau siv sij hawm no, xyeej lo lus txib, thiab ntxias kuv; thiab los ntawm kev txhaum kuv thiaj raug tua tuag.

12 Txawm li ntawd los, kuv pom tias txoj kev cai yeej dawb huv, thiab lo lus txib yeej dawb huv, thiab ncaj, thiab yeej zoo.

13 Yog li ntawd puas yog tias qhov uas zoo tau ua kom kuv muaj kev tuag? Thov Vajtswv kom txhob yog li ntawd. Tiam sis yog kev txhaum, yog tej kev txhaum uas muab tej kev zoo ua rau kuv muaj kev tuag; kom los ntawm lo lus txib, nws yuav ua kom tej kev txhaum phem heev.

14 Vim peb paub hais tias lo lus txib yog los ntawm sab ntsuj plig; tiam sis thaum txoj kev cai tseem kav kuv, kuv tseem yog los ntawm sab cev nqaij daim tawv, raug kev txhaum muag ua qhev.

15 Tiam sis nim no kuv yog neeg ntawm sab ntsuj plig; vim qhov uas Vajtswv txib kuv ua, kuv yeej ua; thiab qhov uas Vajtswv txib kuv kom txhob pub muaj, kuv yeej tsis pub muaj.

16 Vim qhov uas kuv paub tias tsis yog, kuv yeej tsis kam ua; vim qhov uas yog kev txhaum, kuv yeej ntxub.

17 Yog li ntawd kuv thiaj tsis ua qhov uas kuv tsis pub muaj, kuv pom yeem rau txoj kev cai, hais tias txoj kev cai yeej zoo; thiab kuv tsis raug txim.

18 Yog li ntawd nim no, kuv tsis yog tus ua txhaum lawm; tiam sis kuv nrhiav kev muab txoj kev txhaum uas nyob hauv kuv ntawd tsuj nthi.

19 Vim kuv paub hais tias ntawm kuv, uas yog, ntawm kuv sab nqaij daim tawv, tsis muaj ib yam zoo; vim kuv lub siab xav ua zoo, kuv yeej muaj, tiam sis yuav kom ua qhov uas zoo kuv ua tsis tau, tsuas yog los ntawm Khetos xwb.

20 Vim qhov zoo uas tsim nyog kom kuv ua thaum txoj kev cai kav kuv, kuv tsis pom hais tias zoo; yog li ntawd, kuv thiaj tsis ua.

21 Tiam sis qhov phem uas kuv tsis kam ua thaum txoj kev cai kav, kuv ho pom hais tias zoo; qhov ntawd, kuv ho ua.

22 Nim no yog kuv ua li ntawd, los ntawm Khetos txoj kev pab, kuv yuav tsis ua thaum txoj kev cai kav, txoj kev cai twb tsis kav kuv; thiab kuv twb tsis xav ua txhaum ntxiv, tiam sis xav muab txoj kev txhaum uas nyob hauv kuv tsuj nthi.

23 Yog li ntawd kuv pom hais tias thaum txoj kev cai kav, thaum kuv xav ua zoo ho muaj qhov phem nyob rau ntawm kuv; vim kuv muaj lub siab xav ua raws li Vajtswv txoj kev cai raws li nyob puag hauv nruab siab.

24 Thiab nim no kuv pom dua ib txoj kev cai, uas twb yog Khetos lo lus txib, thiab twb muab txoj kev cai no sau cia rau hauv kuv lub siab.

25 Tiam sis kuv lub cev pheej tawm tsam txoj kev cai hauv kuv lub siab, thiab coj kuv mus poob cev qhev rau tej kev cai ntawm kev txhaum uas nyob hauv kuv lub cev.

26 Thiab yog kuv tsis muab txoj kev txhaum uas nyob hauv kuv tsuj nthi, es los ntawm sab nqaij daim tawv ho ua raws txoj kev cai ntawm kev txhaum; Auj tus neeg phem zoo li kuv es! leej twg yuav tso kuv dim ntawm lub cev uas txawj tuag no?

27 Kuv ua Vajtswv tsaug los ntawm Yexus Khetos peb tus Tswv, vim li ntawd, nrog kuv lub siab kuv thiaj ua raws li Vajtswv txoj kev cai.