Junjunq Raqal Sik’b’il chaq Ru sa’ lix Jaltesinkil Ru li Santil Hu xb’aan laj Jose Smith

A’an a’in junjunq raqal sik’b’il chaq ru sa’ li Santil Hu (King James Version, sa’ ingles) li jaltesinb’il ru xb’aan laj Jose Smith (JJS). Li Qaawa’ kixmusiq’a xna’leb’ li Profeet aj Jose Smith chixk’eeb’al wi’chik sa’ li Santil Hu King James li jar raqal chi yaalil na’leb’ li ki’isiman chaq malaj kijalman chaq chalen chaq naq kitz’iib’aman li aatin a’an. Eb’ li na’leb’ a’in neke’xk’ut xyaalal li tzol’leb’, ut neke’tenq’an chixtawb’al ru li loq’laj hu.

Rik’in naq li Qaawa’ kixk’utb’esi chiru laj Jose junjunq li yaalil na’leb’ li tz’iib’anb’il chaq xb’aaneb’ li ke’tz’iib’ank chaq re li hu xb’een wa, li Santil Hu jaltesinb’il ru xb’aan laj Jose Smith moko chanchan ta li jar paay chik chi jaltesinb’il ru Santil Hu sa’ li ruchich’och’. Naru nayeeman naq na’oksiman li aatin jaltesink ru chi jalan wi’ xyaalalil, xb’aan naq li Jaltesinb’il ru xb’aan laj Jose Smith a’an tz’aqal k’utb’esinb’il na’leb’, moko jaltesinb’il ta chaq ru sa’ jalan chik aatinob’aal.

Li Santil Hu re King James li jaltesinb’il ru xb’aan laj Jose Smith naxk’am rib’ rik’in malaj yeeb’il resil sa’ junjunq tasal re li Tzol’leb’ ut Sumwank (chi’ilmanq li tasal 37, 45, 73, 76, 77, 86, 91, ut 132). Chi jo’kan ajwi’, lix hu laj Moises ut Jose Smith—Mateo a’aneb’ wiib’ xraqalil lix Jaltesinkil ru li Santil Hu xb’aan laj Jose Smith.

Re taanawmanq chik li na’leb’ chirix lix Jaltesinkil ru li Santil Hu xb’aan laj Jose Smith, chi’ilmanq “Jaltesinb’il ru xb’aan laj Jose Smith (JJS)” sa’ li tusleb’aal aatin sa’ li K’utul Raqal reheb’ li Loq’laj Hu.

Arin wan jun raqal re xk’utb’al chan ru lix Jaltesinkil ru li Santil Hu xb’aan laj Jose Smith:

Jalam-uuch

re k’utuk

JJS, Mateo 4:1, 5–6, 8–9. Chi’ilmanq sa’ Mateo 4:1, 5–6, 8–9; kijalman ajwi’ chi jo’ka’in li aatin sa’ Lukas 4:2, 5–11

Li Jesus nab’eresiik xb’aan li Musiq’ej, moko xb’aan ta laj Satanas.

1 Toja’ naq kib’eresiik li Jesus xb’aan li Musiq’ej toj sa’ li yamyookil ch’och’, re taawanq rik’in li Dios.

5 Toja’ naq kik’ame’ li Jesus sa’ li santil tenamit, ut li Musiq’ej kixk’ojob’ sa’ ru’uj li santil ochoch.

6 Toja’ naq kichal laj tza rik’in ut kixye, Wi laa’at li Ralal li Dios, kut aawib’ taq’a, xb’aan naq tz’iib’anb’il, Tixk’e xchaq’rab’inkileb’ lix anjel chawix: ut tate’xk’am sa’ ruq’eb’, maare anchal taaten laa woq chiru junaq pek.

8 Ut jo’kan wi’chik, kiwan li Jesus sa’ li Musiq’ej, ut a’an kixk’am sa’ jun li tzuul q’axal najt xteram, ut kixk’ut chiru chixjunil li awa’b’ejihom re li ruchich’och’, ut lix loq’aleb’ a’an.

9 Ut laj tza kichal wi’chik rik’in, ut kixye, Chixjunil li k’a’aq re ru a’in tink’e aawe, wi taakut aawib’ chi woq ut tinaaloq’oni.

Li tz’iib’anb’il chi q’eq a’an li jun raqal chi aatin sa’ li Santil Hu (King James Bible) li jaltesinb’il ru xb’aan laj Jose Smith. Rik’in naq wan li aatin li kitiqe’ wi’chik sa’ li Santil Hu naq kixjaltesi ru, wan naq jalan wi’ li ajl rik’in li ajl sa’ li Santil Hu li wan aawik’in.

A’in naxye b’ar wan li aatin sa’ li Santil Hu li tento raj taawil rochb’een li jaltesinb’il ru xb’aan laj Jose Smith.

Arin naxye k’a’ru li tzol’leb’ kixtuqub’ laj Jose Smith rik’in xjaltesinkil ru.

A’in li aatin jo’ kixjaltesi ru laj Jose Smith. (Xk’eeman li salsookil tz’iib’ chiruheb’ li aatin li xe’jala rik’in li aatin sa’ li Santil Hu re King James.)