Intrivista di Rikumendason pa Ténplu

Ténplu é kaza di Sinhor. Entra na ténplu y partisipa na ordenansas la ê un priviléjiu sagradu. Es priviléjiu li ê rizervadu pa kenha ki sta priparadu spiritualmenti y ki ta isforsa pa vivi padrons di Sinhor, konformi ditirminadu pa líderis autorizadu di saserdósiu.

Pa toma es disizon li, líderis di saserdósiu ta intrivista ménbrus uzandu purguntas ki sta a sigir.

Purguntas di Intrivista di Rikumendason pa Ténplu

Bu ten fé y testimunhu di Deus Pai Iternu, Si Fidju Jezus Kristu, y na Spíritu Santu?
Bu ten un tistimunhu di Spiason di Jezus Kristu y di Sê papél komu Salvador y Ridentor?
Bu ten un tistimunhu di Ristorason di ivanjélhu di Jezus Kristu?
Bu ta apoia Prizidenti di Igreja di Jezus Kristu di Santus di Últimus Dias komu prufeta, videnti, y rivelador y komu úniku psoa na téra autorizadu pa izérsi tudu xávis di saserdósiu?

Bu ta apoia ménbrus di Prumeru Prizidénsia y Kórun di Dozi Apóstlus komu prufetas, videntes, y riveladoris?

Bu ta apoia kês otu Autoridadis Jeral y líderis lokal di Igreja?
Sinhor fla ma tudu kuza debi ser “fetu ku pureza” dianti d’El (djobi Dotrina y Konvénius 42:41).

Bu ta isforsa pa manti pureza mural na bus pensamentus y na bu konportamentu?

Bu ta obidesi lei di kastidadi?
Bu ta sigi insinamentus di Igreja di Jezus Kristu na bu konportamentu privadu y públiku ku ménbrus di bu família y ku otus psoas?
Bu ta apoia ô promovi algun insinamentu, prátika, ô dotrina kontráriu a kês di Igreja di Jezus Kristu di Santus di Últimus Dia?
Bu ta isforsa pa santifika dia sagradu di Sinhor, tantu na kaza komu na Igreja; sisti bus runions; pripara pa partisipa dignamenti di sakramentu y vivi bu vida na armonia ku leis y mandamentus di ivanjélhu?
Bu ta isforsa pa bu ser onestu na tudu kuza ki bu ta fazi?
Bô ê un pagador integral di dízimu?

Pa novus ménbrus ki sta buska un rikumendason pa fazi batismu y konfirmason vikáriu: Bu sta dispostu a obidesi mandamentu di paga dízimu?
Bu ta intendi y bu ta obidesi Palavra di Sabedoria?
(Kel pergunta li ta omitidu óras ki ta intrivistadu un kriansa ô un joven.) Bu ten algun obrigason finanseru ô otu obrigason ku un ex-kônjuji ô fidjus?

Si sin, bu sta en dia ku kunprimentu di kês obrigasons?
(Kel pugunta li ta omitidu óras ki ta intrivistadu un ménbru ki ka é batizadu.) Bu ta kunpri konvénius ki bu fazi na ténplu?
(Kel pugunta li ta omitidu óras ki ta intrivistadu un ménbru ki ka é batizadu.) Bu ta onra bu priviléjiu sagradu di uza garment sima instruídu na ordenansas inisiatória. (Lê diklarason “Uza Garment di Ténplu” ki sta inkluidu a sigir, pa kada ménbru.)
Ta izisti pekadus grávis na bu vida ki mesti ser rizolvidu ku autoridadis di saserdósiu komu parti di bu aripendimentu?
Bu ta konsidera bu psoa dignu di entra na Kaza di Sinhor y partisipa na ordenansas di ténplu?

Uza Garment di Ténplu

Prumeru Prizidênsia fornesi siginti orientason sobri uzu di garments:

“Garment di santu saserdósiu ta lenbra-nu di véu na ténplu, y es véu ta sinboliza Jezus Kristu. Oras ki bu ta bisti bu garment, bu ta bisti un sínbulu sagradu di Jezus Kristu. Uza-l é un spreson stérnu di bu konprumisu internu di sigi-L. Garment é tanbé un lenbreti di bus konvénius na ténplu. Bu debi uza garment dia y noti duranti tudu bu vida. Óra kê ten ki tradu pa fazi atividadis ki ka ta da pa fazi dretu ku garment bistidu, prukura torna bisti-l mas rapidamenti pusível. Óra ki bu ta guarda bu konvénius, inkluindu sagradu priviléjiu di uza garments sima instruídu na ordenansas di inisiatória, bu ta ten asésu maior a mizerikórdia, pruteson, forsa, y puder di Salvador.”

Orientason Adisional

Líder di saserdósiu ta enfatiza pa ménbrus nisisidadi di proteji sê rikumendason. Nunka é ka debi ser inprestadu y ê debi ser kumunikadu di imidiatu a sê imisor na kazu di perda ô robu.