အပိုဒ်ငယ် ၁၂၈
သေသူတို့အတွက်ဗတ္တိဇံနှင့်စပ်လျဉ်း၍၊ နောက်ထပ်လမ်းညွှန်ချက်များပါဝင်လျက်၊ နော်ဗူး၊ အီလီနွိုက်၌ ၁၈၄၂ ခု၊ စက်တင်ဘာလ ၆ ရက်၊ ရက်စွဲဖြင့် ယေရှုခရစ်တော်၏ နောက်ပိုင်းကာလ သန့်ရှင်းသူများ အသင်းတော်သို့ ပရောဖက်ဂျိုးဇက်စမစ် ထံမှ အမှာစာ။
၁–၅၊ ဒေသခံနှင့် အထွေထွေ မှတ်တမ်းတင်သူတို့သည် သေသူတို့အတွက် ဗတ္တိဇံများ၏ အချက်အလက်ကို သက်သေပြုရမည်။ ၆–၉၊ သူတို့၏မှတ်တမ်းများကို မြေကြီးပေါ်နှင့် ကောင်းကင်ဘုံ၌ စည်းနှောင်ထားပြီးလျှင် မှတ်တမ်းတင်ထား၏။ ၁၀–၁၄၊ ဗတ္တိဇံရေကန်သည် သင်္ချိုင်း၏ ပုံဆောင်ခြင်းဖြစ်၏။ ၁၅–၁၇၊ ဧလိယသည် သေသူတို့အတွက် ဗတ္တိဇံနှင့် စပ်လျဉ်းသည့်တန်ခိုးကို ပြန်လည်ဆောင်ယူခဲ့၏။ ၁၈–၂၁၊ လွန်ခဲ့သောသာသနာတို့၏ ခပ်သိမ်းသော သော့များ၊ တန်ခိုးများနှင့် အခွင့်အာဏာများကို ပြန်လည်ဆောင်ယူထား၏။ ၂၂–၂၅၊ အသက်ရှင်သူနှင့် သေသူတို့အတွက် ဝမ်းသာစရာနှင့် အသရေ ထင်ရှားသော သတင်းတို့ကို ကြေညာထား၏။
၁ ကျွန်ုပ်သည် သင်တို့ထံသို့ အချိန်နှင့်အမျှရေး၍၊ များစွာသောအကြောင်းအရာတို့နှင့် စပ်လျဉ်းသည့် သတင်းအချက်အလက်ကို ပေးမည်ဟု ကျွန်ုပ်နေရာကို မစွန့်ခွာမီက ကျွန်ုပ်၏စာ၌ သင်တို့ကို ကျွန်ုပ် ဖော်ပြခဲ့သည့်အတိုင်း၊ ကျွန်ုပ်သည် သေသူတို့ အတွက်ဗတ္တိဇံအကြောင်းအရာကို ယခုပြန်၍စ၏၊ ကျွန်ုပ်ရန်သူတို့အားဖြင့် အလိုက်ခံရလေပြီးကတည်းက၊ ထိုအကြောင်းအရာက ကျွန်ုပ်၏ စိတ်၌ ရောက်နေပြီးလျှင်၊ ကျွန်ုပ်၏ ခံစားချက်တို့အပေါ် ၎င်းကိုယ်တိုင် ခွန်အားအကြီးဆုံး စွဲထင်စေဟန်ရှိစေသောကြောင့်ပေတည်း။
၂ ကျွန်ုပ်သည် မှတ်တမ်းတင်သူနှင့်စပ်လျဉ်း၍ ဗျာဒိတ်တော် စကားအနည်းငယ်ကို သင်တို့ထံသို့ ရေးခဲ့၏။ ဤအမှုနှင့်စပ်လျဉ်း၍ ကျွန်ုပ်ယခုသက်သေပြုသည့် နောက်ထပ် အတွေးအမြင် အနည်းငယ် ကျွန်ုပ်၌ ရှိလေ၏။ မျက်မြင်သက်သေဖြစ်ရမည့်၊ ထို့အတူ ကိုယ်တော်ရှင်ရှေ့၌ မှန်သောမှတ်တမ်းကို ပြုစုနိုင်ခြင်းငှာ၊ မိမိနားဖြင့်ကြားသည့် မှတ်တမ်းတင်သူတစ်ဦးရှိရမည့်အကြောင်း ကျွန်ုပ်၏ယခင်စာ၌ ကြေညာထား၏။
၃ ယခုတွင်၊ ဤအမှုနှင့်စပ်လျဉ်း၍၊ မှတ်တမ်းတင်သူတစ်ဦးအနေဖြင့်၊ ခပ်သိမ်းသောအချိန်တို့၌ ရှိနေရန်၊ ထို့အတူ ခပ်သိမ်းသောအမှုအရေးတို့ကို လုပ်ဆောင်ရန်မှာ အလွန်ခက်ခဲပေလိမ့်မည်။ ဤအခက်အခဲကို ရှောင်ရှားရန်၊ မြို့တစ်မြို့ရှိ အသင်းတော်စုတစ်ခုချင်း၌ တိကျသော အစည်းအဝေးမှတ်တမ်းရေးမှတ်ခြင်း အတွက် အရည်အချင်းပြည့်မီသော မှတ်တမ်းတင်သူတစ်ဦးကို ခန့်အပ်ထားနိုင်ပေ၏။ ထိုသူအား၊ လုပ်ဆောင်မှုတစ်ခုလုံးကို ရေးမှတ်ခြင်း၌ အလွန်အသေးစိတ်၍ တိကျမှန်ကန်စေလော့၊ မိမိမျက်စိဖြင့်မြင်၍၊ မိမိနားဖြင့်ကြားကြောင်း သက်သေပြုလျက်၊ ရက်စွဲ၊ အမည်များနှင့် စသည့်အရာများ၊ ထို့အတူ လုပ်ဆောင်မှုတစ်ခုလုံး၏ သမိုင်းကို ဖော်ပြလျက်၊ သက်သေပြုရန် အဘယ်အချိန်၌မဆို တောင်းဆိုသောအခါ ရောက်နိုင်သူများရှိလျှင် အချို့သောသူသုံးဦး၏ အမည်ကိုလည်း ပေးစေလော့၊ သက်သေနှစ်ဦး သို့မဟုတ် သုံးဦး၏နှုတ်အားဖြင့် စကားမှန်သမျှကို တည်စေခြင်းငှာပေတည်း။
၄ ထို့နောက်တွင်၊ သူတို့ပြုစုထားသော မှတ်တမ်းများမှန်ကန်ကြောင်း၊ သက်သေပြုလျက်ရှိသည့် သူတို့ကိုယ်တိုင်၏ လက်မှတ်များပါသည့် သက်သေပြုလက်မှတ်များနှင့် အတူပါရှိသည့် ဤအခြားသော မှတ်တမ်းများကို ပေးအပ်နိုင်ရာ အထွေထွေမှတ်တမ်းတင်သူတစ်ဦး ရှိစေလော့။ ထို့နောက်တွင် အသင်းတော် အထွေထွေမှတ်တမ်းတင်သူသည် မှတ်တမ်းကို အသင်းတော်၏ အထွေထွေ စာစောင်၌ သက်သေပြုလက်မှတ်များနှင့် ခပ်သိမ်းသော တက်ရောက်သူများနှင့်အတူ၊ အသင်းတော်မှ လူတို့၏ အကြွင်းမဲ့ဂုဏ်သိက္ခာနှင့် ရာထူးအကြောင်း သူ၏အသိပညာကြောင့် အထက်ပါဖော်ပြချက်နှင့် မှတ်တမ်းများမှန်ကန်သည်ကို သူအမှန်ယုံကြည်ကြောင်း သူကိုယ်တိုင်၏ ဖော်ပြချက်နှင့်အတူ၊ ထည့်သွင်းနိုင်၏။ ဤအမှုကို အသင်းတော်စာစောင်၌ လုပ်ဆောင်ပြီးသောအခါ၊ သူသည် မိမိမျက်စိဖြင့်မြင်ပြီးလျှင်၊ မိမိနားဖြင့်ကြား၍၊ အသင်းတော်အထွေထွေစာစောင်၌ အလားတူမှတ်တမ်းကို ပြုစုပြီးလေသကဲ့သို့ပင် မှတ်တမ်းသည် သန့်ရှင်း၍၊ ဘိသိက်မင်္ဂလာတို့ သည်လည်း အလားတူပြည့်စုံလိမ့်မည်။
၅ သင်တို့သည် ဤအရာတို့၏အစီအစဉ်မှာ အလွန်အသေးစိတ်သည်ဟု ထင်နိုင်ကြပေ၏။ သို့ရာတွင် ဧဝံဂေလိတရားတော် အကြောင်း အသိပညာမရှိဘဲသေသွားရသော သေသူတို့၏ ကယ်တင်ခြင်း အတွက် ကမ္ဘာမတည်မီကတည်းက ကိုယ်တော်ရှင်ခန့်ထား၍ ပြင်ဆင်ခဲ့သည့် ဘိသိက်မင်္ဂလာနှင့် ပြင်ဆင်ခြင်းကို လိုက်နာခြင်းအားဖြင့်၊ ဘုရားသခင်၏ အလိုတော်ကို ပြည့်စုံစေရန်သာဖြစ်ကြောင်း သင်တို့ကို ကျွန်ုပ်ပြောပြပါရစေ။
၆ ထို့အတူ နောက်ထပ်၍၊ ဗျာဒိတ်ဟောသူယောဟန်သည် သေသူတို့နှင့် စပ်လျဉ်းသည့်၊ ဤအကြောင်းအရာ အမှန်ကို ဗျာဒိတ်ကျမ်း ၂၀း၁၂ ၌ မှတ်တမ်းတင်ထားသည်ကို သင်တို့တွေ့ရမည့်အတိုင်း ဆင်ခြင်လျက်ရှိခဲ့ကြောင်း သင်တို့ သတိရကြစေရန် ကျွန်ုပ်အလိုရှိ၏—ငါသည်သေသူအကြီးအငယ်တို့သည် ဘုရားသခင်ရှေ့၌ ရပ်ကြသည်ကို မြင်၏။ စာစောင်တို့ကို ဖွင့်ထား၏။ အသက်စာစောင်တည်းဟူသော တခြားသောစာစောင်ကိုလည်း ဖွင့်လေ၏။ သေသူတို့သည် မိမိတို့အကျင့်များအတိုင်း၊ စာစောင်တို့၌ ရေးထားချက်တို့နှင့်အညီ တရားစီရင်ခံကြရ၏။
၇ စာစောင်တို့ကို ဖွင့်ထားလေကြောင်း ဤကိုးကားချက်၌ သင်တို့တွေ့ရှိကြလိမ့်မည်။ အသက်စာစောင်တည်းဟူသော တခြားသောစာစောင်ကိုလည်း ဖွင့်လေ၏။ သို့ရာတွင်၊ သေသူတို့သည် မိမိတို့အကျင့်များအတိုင်း၊ စာစောင်တို့၌ ရေးထားချက်တို့နှင့်အညီ တရားစီရင်ခံကြရ၏။ အကျိုးဆက်အဖြစ်၊ ဆိုလေသည့် စာစောင်တို့သည် သူတို့၏ အကျင့်တို့အကြောင်း မှတ်တမ်းပါဝင်သည့် စာစောင်များဖြစ်ရမည်၊ ထို့အတူ မြေကြီးပေါ်၌ သိမ်းထားသည့် မှတ်တမ်းတို့ကို ရည်ညွှန်း၏။ အသက်စာစောင်တည်းဟူသော စာစောင်သည် ကောင်းကင်ဘုံ၌ သိမ်းထားသည့်စာစောင်ဖြစ်၏။ ကျွန်ုပ်နေရာကို ကျွန်ုပ်မစွန့်ခွာမီ သင်တို့ထံ ကျွန်ုပ်ရေးသည့်စာ၌ ပါဝင်သည့် ဗျာဒိတ်တော်၌ သင်တို့ကို မိန့်တော်မူခဲ့သည့် ဩဝါဒနှင့် အတိအကျ ကိုက်ညီသည့် အခြေခံဩဝါဒဖြစ်၏—သင်တို့၏ ခပ်သိမ်းသော မှတ်တမ်းတင်ခြင်းများနှင့် စပ်လျဉ်း၍ ကောင်းကင်ဘုံ၌ မှတ်တမ်းတင် ထားနိုင်စေကြောင်းပေတည်း။
၈ ယခုတွင်၊ ဤဘိသိက်မင်္ဂလာ၏ ပကတိသဘောမှာ ယေရှုခရစ်တော်၏ ဗျာဒိတ်တော်အားဖြင့်၊ မြေကြီးပေါ်၌ သင်စည်းနှောင်သမျှသည် ကောင်းကင်ဘုံ၌ စည်းနှောင်လျက်ရှိလိမ့်မည်။ မြေကြီးပေါ်၌ သင်ဖြေလွှတ်သမျှသည် ကောင်းကင်ဘုံ၌ ဖြေလွှတ်လျက်ရှိလိမ့်မည်ဟု အခွင့်ပေးသည့် ယဇ်ပုရောဟိတ် အခွင့် တန်ခိုး၌ ပါဝင်၏။ သို့မဟုတ်၊ တစ်နည်းအားဖြင့်၊ ဘာသာပြန်ခြင်းကို တခြား နည်းဖြင့် စဉ်းစားလျှင်၊ မြေကြီးပေါ်၌ သင်မှတ်တမ်းတင်သမျှသည် ကောင်းကင်ဘုံ၌ မှတ်တမ်းတင်လျက်ရှိလိမ့်မည်၊ မြေကြီးပေါ်၌ သင်မှတ်တမ်းမတင်သမျှသည် ကောင်းကင်ဘုံ၌ မှတ်တမ်းမတင်ဘဲရှိလိမ့်မည်။ အကြောင်းမူကား၊ သင်တို့၏သေသူတို့သည် ဘိသိက်မင်္ဂလာတို့ကို သူတို့ကိုယ်၌ propria persona (ကိုယ်တိုင်) ဆောင်ရွက်လေသည်ဖြစ်စေ၊ သို့မဟုတ် သူတို့၏ ကယ်တင်ခြင်းအတွက် ကမ္ဘာမတည်မီကတည်းက ဘုရားသခင် ပြင်ဆင်ထားလေသည့် ဘိသိက်မင်္ဂလာအတိုင်း၊ သူတို့၏သေသူတို့နှင့် စပ်လျဉ်း၍ သူတို့ရေးထားသည့်မှတ်တမ်းတို့အတိုင်း၊ သူတို့ကိုယ်တိုင်၏ ကိုယ်စားလှယ်တို့အားဖြင့်ဖြစ်စေ၊ မိမိတို့အကျင့်များအတိုင်းတရားစီရင်ခံကြရ၏။
၉ ကျွန်ုပ်တို့ဟောပြောသည့် မြေကြီးပေါ်၌ မှတ်တမ်းတင် သို့မဟုတ် စည်းနှောင်သည့်၊ ကောင်းကင်ဘုံ၌ စည်းနှောင်သည့်တန်ခိုးသည်—အချို့သောသူတို့အဖို့ အလွန်ရဲရင့်သော ဩဝါဒတစ်ခုဖြစ်နိုင်ပေ၏။ သို့သော်လည်း၊ လောကကာလတစ်ခုလုံး၌၊ ကိုယ်တော်ရှင်သည် ယဇ်ပုရောဟိတ်အခွင့်သာသနာကို အစစ်အမှန်ဗျာဒိတ်တော်အားဖြင့်၊ အဘယ်သူ့ထံသို့ဖြစ်စေ၊ အဘယ်လူစုထံသို့ဖြစ်စေ ပေးသည့်အခါတိုင်း ဤတန်ခိုးကို အစဉ်အမြဲပေးတော်မူလေ၏။ သို့ဖြစ်၍၊ ထိုလူတို့က အခွင့်အာဏာဖြင့်၊ ကိုယ်တော်ရှင်၏ နာမတော်အားဖြင့်၊ ထို့အတူ မှန်ကန်စွာနှင့် သစ္စာရှိစွာဖြင့်၊ သင့်လျော်၍ ယုံလောက်သော မှတ်တမ်းကို ထိုသူတို့ရေး၍ လုပ်ဆောင်သည့် အရာမှန်သမျှသည် ကြီးမြတ်သော ယေဟောဝါ၏စီရင်ခြင်းတို့အတိုင်း မြေကြီးပေါ်နှင့် ကောင်းကင်၌ ဥပဒေတစ်ခုဖြစ်လာခဲ့၏၊ ပယ်ဖျက်၍လည်းမရနိုင်။ ဤအရာသည် ယုံလောက်သောစကားဖြစ်၏။ အဘယ်သူကြားနိုင်မည်နည်း။
၁၀ ထိုမှတစ်ဖန်၊ သာဓကအဖြစ်၊ မဿဲ ၁၆း၁၈၊ ၁၉ ကို ဆင်ခြင်ပါ။ သင့်ကို ငါဆိုသည်ကား သင်သည် ပေတရုဖြစ်၏၊ ဤကျောက်ပေါ်မှာ ငါ့အသင်းတော်ကို ငါတည်ဆောက်မည်။ ထိုအသင်းကို ငရဲ၏တံခါးတို့သည် မနိုင်ရာ။ ကောင်းကင်နိုင်ငံတော်၏ သော့များကိုလည်း သင့်ကို ငါပေးမည်။ သင်သည် မြေကြီးပေါ်မှာ စည်းနှောင်သမျှသည် ကောင်းကင်ဘုံ၌ စည်းနှောင်လျက်ရှိလိမ့်မည်။ ထို့အတူ မြေကြီးပေါ်၌ ဖြေလွှတ်သမျှသည် ကောင်းကင်ဘုံ၌ ဖြေလွှတ်လျက် ရှိလိမ့်မည်။
၁၁ ယခုတွင်၊ အမှုတစ်ခုလုံး၏ ကြီးမြတ်၍ ခမ်းနားသောလျှို့ဝှက်ချက်၊ ထို့အတူ ကျွန်ုပ်တို့ရှေ့၌ တည်လျက်ရှိသည့် အကြောင်းအရာတစ်ခုလုံး၏ summum bonum၌ (ဆူမမ်ဘိုနမ်) သန့်ရှင်းသော ယဇ်ပုရောဟိတ် အခွင့်၏ တန်ခိုးများ ရရှိခြင်း ပါဝင်၏။ ဤသော့များကို ပေးရမည့်သူအတွက် လူသားတို့၏ ကယ်တင်ခြင်းနှင့် စပ်လျဉ်းသည့် အချက်များအကြောင်း အသိပညာကို ရရှိခြင်း၌ အသက် ရှင်သူတို့ အတွက် ကဲ့သို့ပင် သေသူတို့ အတွက် နှစ်မျိုးစလုံး၌ အခက်အခဲမရှိ။
၁၂ ဤအရာ၌ ဘုန်းနှင့် ဂုဏ်အသရေ၊ ထို့အတူ သေခြင်းမရှိရာနှင့် ထာဝရအသက်ရှိ၏—ရေဖြင့် ဗတ္တိဇံပေးခြင်း ဘိသိက်မင်္ဂလာ၊ သေခြင်း၏ ပုံသဏ္ဌာန်နှင့် တူညီစေခြင်းငှာ ထိုရေထဲ၌ နစ်မြှုပ်ရမည်၊ အခြေခံဩဝါဒ တစ်ခုကို အခြားတစ်ခုနှင့် ကိုက်ညီနိုင်စေခြင်းငှာ၊ ထိုရေထဲ၌ နှစ်မြှုပ်ပြီးလျှင် ရေမှ ထွက်လာခြင်းသည် သေသူတို့ သူတို့၏ သင်္ချိုင်းတွင်းများမှ ထွက်လာ၍ ရှင်ပြန်ထမြောက်ခြင်း၏ ပုံသဏ္ဌာန်ဖြစ်၏။ ထို့ကြောင့်၊ သေခြင်း၏ ပုံသဏ္ဌာန်ဖြစ်၍၊ ဤဘိသိက်မင်္ဂလာကို သေသူတို့ အတွက်ဗတ္တိဇံ ဘိသိက်မင်္ဂလာနှင့် ဆက်သွယ်မှုတစ်ခုပြုရန် တည်ထောင်ထားလေ၏။
၁၃ အကျိုးဆက်မှာ၊ သင်္ချိုင်းတွင်း၏ ပုံဆောင်ခြင်းအဖြစ် ဗတ္တိဇံရေကန်ကို တည်ထောင်ထား၏၊ အသက်ရှင်သူတို့ စုဝေးလေ့ရှိရာ အောက်ရှိ နေရာတစ်နေရာ၌ ထားရန်မိန့်မှာ ခံရ၏၊ အသက်ရှင်သူတို့နှင့် သေသူတို့ကို ခွဲခြားရန်၊ ထို့အတူ ခပ်သိမ်းသောအရာများ မိမိတို့၏ ပုံသဏ္ဌာန်ကို ဆောင်နိုင်စေခြင်းငှာ၊ ထို့အတူ ၎င်းတို့ အချင်းချင်း ကိုက်ညီကြစေခြင်းငှာပေတည်း—ကောရိန္သုဩဝါဒစာ ပထမစောင် ၁၅း၄၆၊ ၄၇ နှင့် ၄၈ ၌ ပေါလု ကြေညာခဲ့ လေသကဲ့သို့ပင် မြေကြီးနှင့် ဆိုင်သောအရာသည် ကောင်းကင်နှင့် ဆိုင်သောအရာနှင့် ကိုက်ညီသင့်၏။
၁၄ သို့သော်လည်း ဝိညာဉ်ပကတိသည် ရှေးဦးစွာ ဖြစ်သည်မဟုတ်၊ ဇာတိပကတိသည် ရှေးဦးစွာ ဖြစ်၏။ နောက်မှဝိညာဉ်ပကတိ ဖြစ်၏။ ရှေးဦးစွာသောလူသည် မြေကြီးက ဖြစ်သောကြောင့် မြေသားဖြစ်၏။ ဒုတိယလူမူကား၊ ကောင်းကင်ဘုံကဖြစ်သော ကိုယ်တော်ရှင်ပေတည်း။ မြေသားတို့သည် ထိုမြေသားကဲ့သို့ ဖြစ်ကြ၏။ ကောင်းကင်သားတို့သည် ထိုကောင်းကင်သားကဲ့သို့ ဖြစ်ကြလိမ့်မည်။ ထိုကဲ့သို့ပင် သင်တို့၏သေသူတို့နှင့်စပ်လျဉ်းသည့် မြေကြီးပေါ်ရှိ မှန်ကန်စွာပြုလုပ်ထားသည့် မှတ်တမ်းများသည်၊ ကောင်းကင်ဘုံ၌ ရှိသောမှတ်တမ်းများကဲ့သို့ ဖြစ်၏။ ထို့ကြောင့်၊ ဤအရာသည် တံဆိပ်ခတ်ခြင်းနှင့် စည်းနှောင်ခြင်းတန်ခိုးဖြစ်၏၊ ထို့အတူ၊ နိုင်ငံတော်၏ သော့များဟူသော စကားလုံး၏ အဓိပ္ပာယ်မှာ အသိပညာသော့၌ ပါဝင်၏။
၁၅ ယခုမူကား၊ ကျွန်ုပ်၏အလွန် ချစ်လှစွာသော ညီအစ်ကို မောင်နှမများခင်ဗျာ၊ ဤအရာတို့သည်ကား သေသူ၊ အသက်ရှင်သူတို့နှင့် စပ်လျဉ်းသည့်၊ ကျွန်ုပ်တို့၏ ကယ်တင်ခြင်းနှင့် စပ်ဆိုင်သည့် မထီမဲ့မြင်ပြု၍ မရနိုင်သည့် အခြေခံဩဝါဒများဖြစ်ကြောင်း သင်တို့ကို ကျွန်ုပ်အခိုင်အမာ ပြောပါရစေ။ အကြောင်းမူကား၊ သူတို့၏ကယ်တင်ခြင်း ကျွန်ုပ်တို့၏ ကယ်တင်ခြင်း အတွက်မရှိမဖြစ်လိုအပ်၏၊ ဘိုးဘေးတို့နှင့်စပ်လျဉ်း၍—သူတို့သည် ငါတို့ မပါဘဲနှင့် စုံလင်းခြင်းသို့မရောက်နိုင်—ဟု ပေါလုဆိုသည့်အတိုင်းပင် ကျွန်ုပ်တို့သည်လည်း သူတို့မပါဘဲနှင့် စုံလင်ခြင်းသို့ မရောက်နိုင်။
၁၆ ယခုမူကား၊ သေသူတို့အတွက် ဗတ္တိဇံနှင့် စပ်လျဉ်း၍၊ ကျွန်ုပ်သည် ပေါလု၏ တခြားသော ကိုးကားချက် ကောရိန္သုဩဝါဒစာ ပထမစောင် ၁၅း၂၉ ကို သင်တို့အား ကိုးကားဖော်ပြမည်။ သေသူတို့သည် ထမြောက်ခြင်း အလျှင်းမရှိလျှင်၊ သေသူတို့၏ ကိုယ်စား ဗတ္တိဇံကို ခံသောသူတို့သည် အဘယ်သို့ ပြုရမည်နည်း။ ထိုသူတို့သည် သေသူတို့၏ ကိုယ်စား အဘယ်ကြောင့် ဗတ္တိဇံကို ခံရကြသနည်း။
၁၇ ထိုမှတစ်ဖန်၊ ဤကိုးကားချက်နှင့် အတူ၊ ကျွန်ုပ်သည် သင်တို့အား ယဇ်ပုရောဟိတ်အခွင့်ကို ပြန်လည် ဆောင်ယူခြင်း၊ နောက်ဆုံးသောကာလ၌ ဖော်ပြမည့် ဘုန်းအသရေတော်၊ အထူးအားဖြင့်၊ ထာဝရတည်မြဲသော ဧဝံဂေလိတရားတော်ရှိ ဤခပ်သိမ်းသော အကြောင်းအရာတို့၏ အသရေအထင်ရှားဆုံးဖြစ်သည့်၊ အမည်အားဖြင့် သေသူတို့အတွက်ဗတ္တိဇံကို မိမိမျက်စိ၌ အာရုံစိုက်လေသည့် သူတည်းဟူသော၊ ပရောဖက်တို့အထဲမှ တစ်ပါး၏ ကိုးကားချက်ကို ဖော်ပြမည်။ မာလခိက နောက်ဆုံးအခန်းကြီး၊ အခန်းငယ် ၅ နှင့် ၆ ၌ ဆိုလေသည်ကား၊ ရှုလော့၊ ကိုယ်တော်ရှင်၏ ကြီးစွာသော ကြောက်မက်ဖွယ်နေ့ မကျရောက်လာမီ၊ ပရောဖက်ဧလိယကို သင်တို့ရှိရာသို့ ငါစေလွှတ်မည်။ ငါလာ၍မြေကြီးကို ကျိန်ခြင်းဖြင့် ဒဏ်မခတ်မည့်အကြောင်း၊ သူသည် ဘိုးဘေးတို့၏စိတ်နှလုံးကို သားသမီးများဆီသို့လည်းကောင်း၊ သားသမီးတို့၏စိတ်နှလုံးကို ဘိုးဘေးတို့ဆီသို့လည်းကောင်း လှည့်စေလိမ့်မည်။
၁၈ ကျွန်ုပ်သည် ဤအမှုနှင့် စပ်လျဉ်းပြီး၊ ပို၍ရှင်းလင်းသည့် ဘာသာပြန်ကို ပေးနိုင်ခဲ့ပေ၏၊ သို့ရာတွင် ကျွန်ုပ်၏ ရည်ရွယ်ချက်နှင့် ကိုက်ညီစေရန်မှာ ရှိနေသည့် အတိုင်းနှင့်ပင် လုံလောက်စွာ ရှင်းလင်းပေ၏။ ဤအမှု၌၊ ဘိုးဘေးတို့နှင့် သားသမီးတို့ကြား၌၊ တစ်စုံတစ်ခုသော အကြောင်းအရာနှင့် စပ်လျဉ်း၍၊ တစ်စုံတစ်ခုသော ဂဟေဆက်မရှိလျှင်၊မြေကြီးသည် ကျိန်ခြင်းဖြင့် ဒဏ်ခတ်ခံရလိမ့်မည်— ရှုဦးလော့၊ ထိုအကြောင်းအရာမှာ အဘယ်အရာဖြစ်သနည်း။ သေသူတို့ အတွက် ဗတ္တိဇံဖြစ်၏။ အကြောင်းမူကား၊ ကျွန်ုပ်တို့သည် သူတို့မပါဘဲနှင့် စုံလင်ခြင်းသို့ မရောက်နိုင်။ သူတို့သည်လည်း ကျွန်ုပ်တို့မပါဘဲနှင့် စုံလင်ခြင်းသို့မရောက်နိုင်။ သူတို့သည်လည်းကောင်း၊ ကျွန်ုပ်တို့သည်လည်းကောင်း ဧဝံဂေလိတရားတော်၌ သေသွားလေသောသူတို့ မပါဘဲနှင့်လည်း မဖြစ်နိုင်။ အကြောင်းမူကား၊ ဝင်ရောက်ရန် ယခုအစပြုနေပြီဖြစ်သည့် သာသနာတည်းဟူသော၊ အချိန်ကာလပြည့်စုံခြင်း သာသနာသို့ ဝင်ရောက်ရာ၌ သာသနာများ၊ ထို့အတူ သော့များ၊ ထို့အတူ တန်ခိုးများနှင့် ဘုန်းတော်များကို တစ်ခုလုံး၊ ပြည့်စုံ၍ စုံလင်သည့် စည်းလုံးခြင်းနှင့် အတူတကွ ဂဟေဆက်ခြင်း ဖြစ်ပွားရမည့်အကြောင်း၊ ထို့အတူ အာဒံ၏ လက်ထက်မှစ၍ မျက်မှောက်ကာလ အထိပင် ဖော်ပြရမည့် အကြောင်းမှာ လိုအပ်ပေ၏။ ဤအမှုသည်သာမက၊ ကမ္ဘာတည်ကတည်းက ဖော်ပြဖူးခြင်းမရှိလေဘဲ၊ ဥာဏ်ပညာရှိသူများနှင့် ပညာတတ်သောသူများထံမှ ကွယ်ဝှက်ထားလေသော အရာတို့ကိုလည်း ဤအချိန်ကာလပြည့်စုံခြင်း သာသနာ၌ ကလေးငယ်များနှင့် နို့စို့သူငယ်များသို့ ဖော်ပြလိမ့်မည်။
၁၉ ယခုတွင်၊ ကျွန်ုပ်တို့လက်ခံရရှိလေသည့် ဧဝံဂေလိတရားတော်၌ အဘယ်အရာကို ကျွန်ုပ်တို့ကြားရသနည်း။ ကြားရသည်ကား၊ ဝမ်းသာခြင်းအသံ၊ ကောင်းကင်ဘုံမှကရုဏာအသံ၊ ထို့အတူ မြေကြီးမှ ထွက်သည့် သမ္မာတရားအသံ၊ သေသူတို့ အတွက် ဝမ်းသာစရာသတင်း၊ အသက်ရှင်သူတို့နှင့် သေသူတို့အတွက် ဝမ်းသာစရာအသံ၊ ကြီးစွာသောဝမ်းမြောက်ခြင်း၏ ဝမ်းသာစရာ သတင်းပေတည်း။ ကောင်းမြတ်သော အရာတို့ အကြောင်း ဝမ်းသာစရာသတင်းကို ဆောင်ယူသောသူတို့၏၊ ထို့အတူ ရှုလော့၊ သင်၏ ဘုရားသခင်စိုးစံတော်မူ၏ဟု ဇိအုန်မြို့ကို ပြောကြားသောသူ၏ ခြေတို့သည်ကား၊ တောင်ပေါ်မှာ အလွန်တင့်တယ်လှပေစွတကား။ ကရမေလမှ နှင်းကဲ့သို့ပင် ဘုရားသခင်အကြောင်း အသိပညာသည် သူတို့အပေါ် ဆင်းသက်တော်မူလိမ့်မည်။
၂၀ ထိုမှတစ်ဖန်၊ အဘယ်အရာကို ကျွန်ုပ်တို့ကြားရသနည်း။ ကြားရသည်ကား၊ ကူမော်ရပြည်မှ ဝမ်းသာစရာသတင်း၊ မော်ရော်နိုင်း၊ ကောင်းကင်ဘုံမှ တမန်တော်က ပရောဖက်တို့၏ ပြီးပြည့်စုံစေခြင်းကို ဖော်ပြမည့်ကျမ်းကို ဟောကြားလျက်ရှိခြင်း။ ဆင်နီကာခရိုင်၊ ဖရေးတီးတောရိုင်း ထဲ၌ သက်သေသုံးဦးတို့အား ထိုကျမ်းအကြောင်းကို သက်သေခံရန် ဟောကြားလျက်ရှိသည့် ကိုယ်တော်ရှင်၏ အသံ။ ဆပ်စကွပ်ဟန်နာမြစ်ကမ်း၌၊ နတ်ဆိုးကို အလင်း၏ ကောင်းကင်တမန် ကဲ့သို့ သူပေါ်လာသော အချိန်၌ စုံစမ်းဖော်ထုတ်လျက် ရှိသည့် မိက္ခေလ၏ အသံ။ ဆပ်စကွပ်ဟန်နာခရိုင်၊ ဟာမိုနီနှင့် ဘာရူးမီးခရိုင်၊ ကိုးလ်စဗီလ်ကြားရှိ တောရိုင်းထဲ၌၊ နိုင်ငံတော်နှင့် အချိန်ကာလပြည့်စုံခြင်း သာသနာတို့၏ သော့များကို ပိုင်ဆိုင်ကြောင်း မိမိတို့ကိုယ်တိုင်ဟောကြားလျက်ရှိသည့် ပေတရု၊ ယာကုပ်နှင့် ယောဟန်တို့၏အသံ။
၂၁ ထိုမှတစ်ဖန်၊ ဆင်နီကာခရိုင်၊ ဖရေးတီးရှိ၊ အသက်ကြီးသောအဘ ဝှစ်တမာ၏အခန်းထဲ၌၊ ထို့အတူ ဤယေရှုခရစ်တော်၏ နောက်ပိုင်းကာလသန့်ရှင်းသူများ အသင်းတော်၏ ခပ်သိမ်းသော ခရီးသွားခြင်းများနှင့် အတိဒုက္ခများတစ်လျှောက်၊ အမျိုးမျိုးသောအချိန်များနှင့် အထူးထူးအပြားပြားသောနေရာတို့၌ ဘုရားသခင်၏အသံ။ ကောင်းကင်တမန်မင်းမိက္ခေလ၏အသံ။ ဂါဗြေလ၏၊ ထို့အတူ ရာဖေလ၏၊ မိက္ခေလ သို့မဟုတ် အာဒံမှ မျက်မှောက်ကာလ အထိတိုင်အောင်ရှိသည့် အထူးထူးအပြားပြားသောကောင်းကင်တမန်များတည်းဟူသော၊ အားလုံး မိမိတို့ သာသနာ၊ မိမိတို့အခွင့်အရေးများ၊ မိမိတို့သော့များ၊ မိမိတို့ဂုဏ်အသရေများ၊ မိမိတို့ အာနုဘော်နှင့် ဘုန်း၊ ထို့အတူ မိမိတို့ယဇ်ပုရောဟိတ်အခွင့်၏တန်ခိုးကို ဟောကြားလျက်ရှိသည့်၊ ပညတ်တစ်ခုပြီးတစ်ခု၊ နည်းတစ်ခုပြီးတစ်ခု၊ သည်ဘက်မှာအနည်းငယ်၊ ဟိုဘက်မှာ အနည်းငယ်ပေးလျက်ရှိသည့်၊ ဖြစ်လာမည့်အရာတို့ကို ဟောပြောခြင်းအားဖြင့် ကျွန်ုပ်တို့အား သက်သာခြင်းကို ပေးလျက်ရှိသည့်၊ ကျွန်ုပ်တို့၏ မျှော်လင့်ခြင်းကို ခိုင်ခံ့မြဲမြံစေလျက်ရှိသည့်သူတို့၏ အသံပေတည်း။
၂၂ ညီအစ်ကိုတို့၊ ကျွန်ုပ်တို့သည် ထိုမျှကြီးမြတ်သော အကြောင်းရင်းကို ဆက်၍မပြုကြသလော။ ရှေ့သို့သွားကြလော့၊ နောက်သို့မသွားကြနှင့်။ ရဲရင့်ကြလော့၊ ညီအစ်ကိုတို့။ ထို့အတူ အောင်နိုင်ခြင်းသို့ ဆက်၍၊ ဆက်၍ သွားကြကုန်အံ့။ သင်တို့၏စိတ်နှလုံးကိုရွှင်လန်းဝမ်းမြောက်စေကြလော့၊ ထို့အတူ အလွန်ဝမ်းသာ ကြလော့။ မြေကြီးကို သီချင်းဆိုသံနှင့် ကြွေးကြော်စေလော့။ ကျွန်ုပ်တို့အား သေသူတို့ကို သူတို့၏ထောင်မှ ရွေးနုတ်ရန် စွမ်းဆောင်နိုင်စေသည့်သူတည်းဟူသော ကမ္ဘာမတည်ရှိမီက၊ ခန့်ထားလေသူ ဘုရင်ဧမာနွေလသို့ ထာဝရချီးမွမ်းခြင်းဓမ္မသီချင်းတို့ကို သူတို့ဆိုကြစေလော့။ အကြောင်းမူကား၊ အကျဉ်းသားတို့သည် လွတ်လိမ့်မည်။
၂၃ တောင်တို့ကို ဝမ်းမြောက်ခြင်းအတွက် အော်ဟစ်စေလော့၊ အသင်ခပ်သိမ်းသော ချိုင့်ဝှမ်းတို့သည်လည်း ကျယ်လောင်စွာအော်ဟစ်ကြလော့။ အသင်ခပ်သိမ်းသော ပင်လယ်များနှင့် ကုန်းမြေတို့သည်လည်း သင်တို့ထာဝရဘုရင်၏ အံ့မခန်းချီးမွမ်းဖွယ်အမှုတို့ကို ပြောပြကြလော့။ ထို့အတူ အသင်မြစ်များ၊ ထို့အတူ ချောင်းများ၊ ထို့အတူ စမ်းချောင်းများတို့ ဝမ်းသာခြင်းနှင့် စီးကျကြလော့။ သစ်တောများကိုလည်းကောင်း၊ ကွင်းထဲမှ ခပ်သိမ်းသောသစ်ပင်တို့ကိုလည်းကောင်း ကိုယ်တော်ရှင်ကို ချီးမွမ်းကြစေလော့။ အသင်ကျောက်ခဲတို့ ဝမ်းမြောက်ခြင်းအတွက် ငိုကြွေးကြလော့။ နေ၊ လနှင့် နံနက်ကြယ်တို့ကိုလည်း အတူတကွသီချင်းဆိုစေလော့၊ ဘုရားသခင်၏ ခပ်သိမ်းသောသားတို့ကိုလည်း ဝမ်းမြောက်ခြင်းအတွက် အော်ဟစ်စေလော့။ ထာဝရ ဖန်ဆင်းထားသော အရာတို့ကိုလည်း သူ၏နာမတော်ကို ကာလအစဉ်အဆက် အမြဲဟောပြောစေလော့။ ထိုမှတစ်ဖန်၊ ငါဆိုသည်ကား၊ ကျွန်ုပ်တို့နား၌ ဘုန်းတော်၊ ထို့အတူ ကယ်တင်ခြင်း၊ ထို့အတူ ဂုဏ်အသရေ၊ ထို့အတူ သေခြင်းမရှိရာ၊ ထို့အတူ ထာဝရအသက်၊ နိုင်ငံများ၊ မင်းသား အုပ်ချုပ်ခံရာများနှင့် တန်ခိုးများကို ကြေညာသည့် ကောင်းကင်ဘုံမှ အသံသည် အသရေ ထင်ရှားလှ ပေစွတကား။
၂၄ ရှုလော့၊ ကိုယ်တော်ရှင်၏ ကြီးစွာသောနေ့သည် နီးပေပြီ။ သူ၏ ကြွလာတော်မူရာနေ့၌ အဘယ်သူသည် တည်တံ့နိုင်သနည်း၊ သူပေါ်ထွန်းတော်မူသောအခါ အဘယ်သူသည် ခံရပ်နိုင်မည်နည်း။ အကြောင်းမူကား၊ သူသည် သန့်စင်အောင်ပြုသောသူ၏မီးကဲ့သို့ ဖြစ်တော်မူ၍၊ ခဝါသည်၏ ဆပ်ပြာ ကဲ့သို့ ဖြစ်တော်မူ၏။ သူသည် ငွေကိုသန့်စင်အောင်ပြုသောသူ၊ စင်ကြယ်စေသောသူကဲ့သို့ ထိုင်လျက်၊ လေဝိ၏သားတို့အား၊ ကိုယ်တော်ရှင်ထံသို့ ဖြောင့်မတ်ခြင်းပူဇော်သက္ကာကို သူတို့ ပူဇော် နိုင်ကြ စေခြင်းငှာ၊ သူတို့ကို စင်ကြယ်စေတော်မူလိမ့်မည်၊ ရွှေနှင့် ငွေကို ကဲ့သို့လည်း သူတို့ကို သန့်ရှင်း စေတော်မူလိမ့်မည်။ ထို့ကြောင့်၊ ကျွန်ုပ်တို့သည် အသင်းတော်တစ်ခု၊ လူမျိုးတစ်မျိုးအနေဖြင့်၊ ထို့အတူ နောက်ပိုင်းကာလ သန့်ရှင်းသူများအနေဖြင့်၊ ကိုယ်တော်ရှင်ထံသို့ ဖြောင့်မတ်ခြင်း ပူဇော်သက္ကာကို ပူဇော်ကြကုန်အံ့။ ထို့အတူ ကျွန်ုပ်တို့သည် ကျွန်ုပ်တို့၏ သေသူတို့ အကြောင်း မှတ်တမ်းများ ပါဝင်သည့်၊ လက်ခံရာမှန်သမျှအတွက် ထိုက်တန်မည့် စာစောင် ပြီးဆုံးသောအခါ၊ သူ၏ သန့်ရှင်းသော ဗိမာန်တော်၌ ဆက်ကပ်ကြကုန်အံ့။
၂၅ ညီအစ်ကိုတို့၊ ကျွန်ုပ်၌ ထိုအကြောင်းအရာနှင့်စပ်လျဉ်း၍ သင်တို့ကို ပြောစရာများစွာရှိ၏။ သို့ရာတွင် ယခုမျက်မှောက်အချိန်၌ ပိတ်၍၊ ထိုအကြောင်းအရာကို တခြားသောအချိန်၌ ဆက်ဦးမည်။ ကျွန်ုပ်သည်၊ သင်တို့၏နှိမ့်ချသော ကျွန်တစ်ဦးအစဉ်ဖြစ်လေသည့်နည်းတူ အဘယ်တော့မျှ မသွေဖည်မည့် အဆွေခင်ပွန်းတစ်ဦးလည်းဖြစ်၏။
ဂျိုးဇက်စမစ်။