သက်သေသုံးဦး၏သက်သေခံချက်

ကျွန်ုပ်တို့သည် ဤမှတ်တမ်းများပါဝင်သည့် ပုရပိုက်ပြားတို့ကို ခမည်းတော်ဘုရားသခင်နှင့် ကိုယ်တော်ရှင်ယေရှုခရစ်တော်၏ ကျေးဇူးတော်အားဖြင့် မြင်ရကြကြောင်း ဤကျမ်းရောက်ရှိလာမည့် ခပ်သိမ်းသောပြည်သား၊ အမျိုးစု၊ အသီးသီးဘာသာစကားကိုပြောသူနှင့် လူမျိုးတို့သိမှတ်ကြလော့။ ထိုမှတ်တမ်းမှာ၊ နီဖိုင်းလူမျိုးများ၊ ထို့အတူ လာမန်အမျိုးသားများနှင့် သူတို့၏ညီအစ်ကိုများ၊ ထို့အတူ ပြောလေပြီးဖြစ်သည့်ရဲတိုက်မှလာကြသူ ယာရက်လူမျိုးတို့အကြောင်း မှတ်တမ်းဖြစ်ပေသည်။ ထိုပုရပိုက်ပြားများကို ဘုရားသခင်၏ဆုကျေးဇူးနှင့်တန်ခိုးတော်တို့အားဖြင့် ဘာသာပြန်ထားကြောင်းကိုလည်း ကျွန်ုပ်တို့သိကြ၏။ အကြောင်းမူကား၊ သူ၏အသံက ကျွန်ုပ်တို့ကို ဟောကြားခဲ့ပေပြီ။ သို့ဖြစ်၍၊ ဤကျမ်းမှန်ကန်ကြောင်းကို ကျွန်ုပ်တို့ ဧကန်အမှန်သိကြပါ၏။ ကျွန်ုပ်တို့သည် ပုရပိုက်ပြားများပေါ်ရှိ ရေးထွင်းထားခြင်းများအား မြင်ရလေသည်ကိုလည်းကောင်း၊ ထိုအရာတို့ကို လူသားအားဖြင့်မဟုတ်ဘဲ ဘုရားသခင်၏တန်ခိုးတော်အားဖြင့် ကျွန်ုပ်တို့အား ပြတော်မူလေသည်ကိုလည်းကောင်း သက်သေခံကြပါ၏။ ဘုရားသခင်၏ ကောင်းကင်တမန်တစ်ပါးသည် ကောင်းကင်ဘုံမှ ဆင်းလာပြီး၊ ယူဆောင်လာ၍၊ ကျွန်ုပ်တို့မျက်စိရှေ့မှာထားသဖြင့်၊ ထိုပုရပိုက်ပြားများကိုလည်းကောင်း၊ ၎င်းတို့အပေါ်ရှိ ရေးထွင်းထားခြင်းများကိုလည်းကောင်း ကျွန်ုပ်တို့ကြည့်ရှု၍၊ မြင်ရကြောင်းကို တည်ကြည်လေးနက်သောစကားများဖြင့် ပြောကြားပါ၏။ ကျွန်ုပ်တို့သည် ခမည်းတော်ဘုရားသခင်နှင့် ကျွန်ုပ်တို့၏ကိုယ်တော်ရှင်ယေရှုခရစ်တော်၏ ကျေးဇူးတော်အားဖြင့်၊ ဤအရာများမှန်ကန်သည်ကို ကြည့်မြင်၍သက်သေခံကြောင်းကိုလည်း သိကြပါ၏။ ထိုအရာသည် ကျွန်ုပ်တို့၏အမြင်၌ အံ့ဩဖွယ်ကောင်း၏။ အဘယ်သို့ပင်ဖြစ်စေ၊ ထိုအကြောင်းကို ကျွန်ုပ်တို့ သက်သေခံရမည့်အကြောင်း ကိုယ်တော်ရှင်၏အသံက ကျွန်ုပ်တို့ကို မိန့်မှာခဲ့ပါသည်။ သို့ဖြစ်၍၊ ကျွန်ုပ်တို့သည် ဘုရားသခင်၏ပညတ်တော်များကို နာခံဖို့ရာ ဤအရာတို့အကြောင်းကို သက်သေခံကြပါ၏။ ကျွန်ုပ်တို့သည် ခရစ်တော်ကို သစ္စာရှိကြလျှင်၊ ကျွန်ုပ်တို့၏အဝတ်တန်ဆာများကို လူသားခပ်သိမ်းတို့၏အသွေးဖြင့်ကင်းစင်စေကြပါမည်၊ ခရစ်တော်၏တရားပလ္လင်ရှေ့ ၌လည်း အပြစ်ကင်းစင်လျက်တွေ့ရမည်ဖြစ်၍၊ ကောင်းကင်ဘုံ၌ သူနှင့်အတူ အစဉ်ထာဝရနေထိုင်ရမည်ကို သိကြပါသည်။ ဘုရားသခင်တစ်ပါးတည်းဖြစ်သည့် ခမည်းတော်၊ သားတော်နှင့် သန့်ရှင်းသောဝိညာဉ်တော်သည် ဘုန်းကြီးတော်မူပါစေ။ အာမင်။

အော်လီဗာ ကောင်ဒရီ

ဒေးဗစ်ဝှစ်တမာ

မာတင်ဟဲရစ်