ပရောဖက်ဂျိုးဇက်စမစ်၏ သက်သေခံချက်

မော်မုန်ကျမ်းပေါ်ထွက်လာခြင်းအကြောင်း၊ ပရောဖက်ဂျိုးဇက်စမစ်ကိုယ်တိုင်၏စကားများသည်ကား၊

စက်တင်ဘာလ နှစ်ဆယ့်တစ်ရက်နေ့၊ ၁၈၂၃၊ ၏ … ညဦးတွင် … ကျွန်ုပ်သည် အနန္တတန်ခိုးရှင် ဘုရားသခင်ထံသို့ ကျွန်ုပ်ကိုယ်တိုင် ဆုတောင်းခြင်းနှင့် ပဌနာပြုခြင်းဖြင့် ဆက်ကပ်၏။

ကျွန်ုပ်သည် ဘုရားသခင်အား ထိုကဲ့သို့ ပဌနာပြုလျက်ရှိစဉ်တွင်၊ ကျွန်ုပ်၏အခန်းအတွင်း၌ အလင်းရောင်တစ်ခု ထွက်ပေါ်လာသည်ကို တွေ့ရှိရ၏။ ထိုအလင်းရောင်သည် အခန်းကို မွန်းတည့်ချိန်မှာထက် သာ၍လင်းလေသည့်တိုင်အောင် ဆက်၍ဖြာထွက်၏။ ထို့နောက်တွင်၊ ကျွန်ုပ်၏အိပ်ရာဘေး၌ ပုဂ္ဂိုလ်တစ်ဦး ရုတ်တရက်ပေါ်ထွက်လာပြီး၊ လေထဲတွင်ရပ်နေ၏။ အကြောင်းမူကား၊ သူ၏ခြေထောက်များသည် ကြမ်းပြင်နှင့် မထိပေ။

သူသည် အထူးကဲဆုံးအဖြူရောင်ဝတ်ရုံပွပွကို ဝတ်ဆင်ထား၏။ ထိုအရာသည် မြေကြီးပေါ်တွင် ကျွန်ုပ်မြင်ဖူးသမျှသောအရာများထက် သာလွန်သော အဖြူရောင်ဖြစ်၏။ မြေကြီးအရာတစ်စုံတစ်ခုကိုမျှ ထိုကဲ့သို့ အလွန်ဖြူပြီး တောက်ပလာစေခြင်းငှာ ပြုနိုင်မည်မဟုတ်သည်ကိုလည်း ကျွန်ုပ်ယုံကြည်ပါ၏။ သူ၏လက်နှင့် လက်ဖျံတို့သည်လည်း လက်ကောက်ဝတ်အပေါ်အထိ ဗလာကျင်းလျက်ရှိ၏။ သူ၏ခြေတို့သည်လည်း ခြေထောက်များကဲ့သို့ပင် ခြေချင်းဝတ်အထက်အနည်းငယ်အထိ ဗလာကျင်းလျက်ရှိ၏။ သူ၏ဦးခေါင်းနှင့် လည်ပင်းတို့သည်လည်း၊ ဖုံးအုပ်မထားဘဲရှိ၏။ သူ့တွင် ဤဝတ်ရုံမှတစ်ပါး အခြားအဝတ်မရှိသည်ကို ကျွန်ုပ်တွေ့ရ၏။ ထိုဝတ်ရုံမှာ ပွင့်လျက်ရှိသဖြင့် ကျွန်ုပ်သည် သူ၏ရင်အုပ်ကို မြင်နိုင်၏။

သူ၏ဝတ်ရုံသည်သာလျှင် အလွန်ဖြူသည်မဟုတ်ဘဲ သူ၏တစ်ကိုယ်လုံးသည်လည်း မဖော်ပြနိုင်လောက်အောင် အသရေထင်ရှားပြီး၊ သူ၏မျက်နှာထားမှာ လျှပ်စီးလက်ခြင်းနှင့် အမှန်ပင်တူပေ၏။ အခန်းသည် အလွန်လင်းသော်လည်း သူ့ကိုယ်ခန္ဓာတစ်ဝိုက်တွင်မျှလောက် အလွန်မတောက်ပပေ။ ကျွန်ုပ်သည် သူ့ကို ကြည့်မြင်စက ကြောက်လန့်သော်လည်း၊ မကြာမြင့်မီတွင် ကြောက်ခြင်းသည် ကျွန်ုပ်ကို စွန့်ခွာသွား၏။

ကျွန်ုပ်၏နာမည်ကိုခေါ်၍ ပြောကြားသည်မှာ သူသည် ဘုရားသခင်၏မျက်မှောက်တော်မှ ကျွန်ုပ်ထံသို့ စေလွှတ်တော်မူသည့် တမန်တော်တစ်ပါးဖြစ်ကြောင်း၊ သူ၏အမည်မှာ မော်ရော်နိုင်းဖြစ်ကြောင်း၊ ကျွန်ုပ်လုပ်ဆောင်စေဖို့ရာ အလုပ်တစ်ခု ဘုရားသခင်၌ ရှိတော်မူကြောင်း၊ ကျွန်ုပ်၏အမည်ကို ခပ်သိမ်းသောပြည်သား၊ ဆွေမျိုးစုနှင့် အသီးသီးဘာသာစကားကိုပြောသူတို့၌ အကောင်းအားဖြင့်လည်းကောင်း၊ အဆိုးအားဖြင့်လည်းကောင်း တွေးထင်ကြလိမ့်မည်ဖြစ်ကြောင်း၊ သို့မဟုတ်၊ ထိုအမည်ကို ခပ်သိမ်းသောလူမျိုးတို့၌ အကောင်းနှင့်အဆိုးနှစ်မျိုးစလုံး ပြောဆိုကြလိမ့်မည်ဖြစ်ကြောင်းပေတည်း။

ရွှေပုရပိုက်ပြားများပေါ်တွင် ရေးထားပြီး၊ ဤတိုက်၌ ယခင်ကနေထိုင်ကြသောသူများနှင့် သူတို့ပေါက်ဖွားခဲ့ရာအရပ်တို့အကြောင်း မှတ်တမ်းပါဝင်လျက်ရှိသည့် မြှုပ်ထားသော ကျမ်းတစ်ကျမ်းရှိလေကြောင်း သူဆို၏။ ထို့အတူ သူဆိုလေသည်ကား၊ ကယ်တင်ရှင်မှ ရှေးကနေထိုင်သောသူများထံသို့ ပေးအပ်တော်မူသည့် ထာဝရတည်မြဲသော ဧဝံဂေလိတရားတော်အပြည့်အစုံ ထိုကျမ်း၌ပါဝင်ကြောင်းဖြစ်၏။

ထို့အတူ၊ သူဆိုသည်ကား၊ ငွေကိုင်းများထဲ၌ ကျောက်နှစ်လုံး ရှိလေကြောင်း—ဤကျောက်တို့ကို ရင်အုပ်တန်ဆာ၌ချည်နှောင်ထားပြီး၊ ဥရိမ်နှင့် သုမိမ်ဟုခေါ်၍—ရွှေပုရပိုက်ပြားများနှင့်အတူ မြှုပ်ထားကြောင်း၊ ဤကျောက်များကို ပိုင်ဆိုင်၍ အသုံးပြုသောသူများကို ‘မြင်သောသူများ’ဟု ရှေးသို့မဟုတ် ယခင်အချိန်က ခေါ်ကြကြောင်း၊ ထိုကျမ်းကို ဘာသာပြန်ခြင်းတည်းဟူသော ရည်ရွယ်ချက်အတွက် ဤကျောက်တို့ကို ဘုရားသခင်ပြင်ဆင်ပေးထားတော်မူကြောင်းတို့ဖြစ်၏။ …

ထိုမှတစ်ဖန်၊ ကျွန်ုပ်ကို သူပြောပြသည်မှာ ကျွန်ုပ်သည် သူပြောလေသည့် ထိုပုရပိုက်ပြားများကို ရလျှင်—ထိုအရာတို့ကို ရယူရမည့်အချိန်သည် ပြီးပြည့်စုံခြင်းသို့ မရောက်သေး၍—ထိုအရာတို့ကို ပြရဖို့ ကျွန်ုပ်ကို ကိုယ်တော်ရှင်မိန့်မှာတော်မူမည့်သူတို့မှတစ်ပါး အဘယ်သူ့ကိုမျှ မပြရမည့်အကြောင်း၊ ဥရိမ်နှင့် သုမိမ်တို့နှင့်အတူ၊ ရင်အုပ်တန်ဆာတို့ကိုလည်း မပြရမည့်အကြောင်း၊ ကျွန်ုပ်သည် ပြလျှင် ဖျက်ဆီးခံရမည့်အကြောင်းဖြစ်၏။ သူနှင့် ကျွန်ုပ် ထိုပုရပိုက်ပြားများအကြောင်းကို ပြောဆိုလျက်ရှိစဉ်တွင်၊ ရူပါရုံကို ကျွန်ုပ်၏စိတ်၌ဖွင့်ပေးသဖြင့်၊ ကျွန်ုပ်သည် ပုရပိုက်ပြားများ မြှုပ်ထားသောနေရာကို မြင်နိုင်ပြီး၊ ထိုသို့မြင်ရခြင်းမှာ အလွန်ရှင်းလင်းပြတ်သားသဖြင့်၊ ကျွန်ုပ်သည် သွားရောက်သောအခါ ထိုနေရာကို တစ်ဖန်သိရ၏။

ဤသို့စကားပြောဆိုပြီးနောက်တွင် အခန်းအတွင်းရှိအလင်းသည် ကျွန်ုပ်ကိုစကားပြောနေသောသူ၏ကိုယ်ခန္ဓာတစ်ဝိုက်တွင် စုဝေးစပြု၍၊ သူ၏ဘေးပတ်လည်၌မှတစ်ပါး အခန်းကို တစ်ဖန်မှောင်၍ကျန်ခဲ့သည့်တိုင်အောင် ဆက်၍စုဝေးသည်ကို ကျွန်ုပ်မြင်၏။ ထို့နောက်တွင်၊ ကျွန်ုပ်မြင်သောခဏ၌ ထိုအလင်းသည် ကောင်းကင်ဘုံတည့်တည့်သို့သွယ်တန်းသည့် ပြွန်ကဲ့သို့ဖြစ်၏၊ သူသည်လည်း လုံးဝကွယ်ပျောက်သွားသည့်တိုင်အောင် တက်သွား၏၊ အခန်းသည်လည်း ဤကောင်းကင်ဘုံရှင်အလင်း မရောက်မီကရှိလေသကဲ့သို့ပင် ကျန်ရစ်လေ၏။

ကျွန်ုပ်သည် လဲလျောင်း၍ ထိုမြင်ကွင်း၏ထူးခြားဆန်းကြယ်မှုကို တွေးတောနေမိပြီး၊ ကျွန်ုပ်အား သာမန်ထက်သာလွန်သော ဤတမန်တော်ပြောပြသည့် အရာကို ကြီးစွာအံ့ဩလျက်ရှိ၏။ ထို့နောက်တွင်၊ ကျွန်ုပ်ဆင်ခြင်အောက်မေ့လျက်ရှိစဉ်တွင်၊ ကျွန်ုပ်၏အခန်းမှာ တစ်ဖန်ထွန်းလင်းစပြုလျက်ရှိသည်ကို ကျွန်ုပ်ရုတ်တရက် တွေ့ရှိရပြီး၊ ချက်ချင်းပင်၊ ကျွန်ုပ်၏အိပ်ရာဘေး၌ ထိုကောင်းကင်ဘုံရှင်တမန်တော် တစ်ဖန်ရောက်လာပြန်၏။

သူသည် စတင်၍ဟောပြောလျက်၊ ပထမအကြိမ်အကြည့်အရှုကြွရောက်စဉ်က သူပြုခဲ့သည့် အလွန်ထပ်တူထပ်မျှဖြစ်သောအရာတို့ကို အနည်းငယ်မျှပင် အပြောင်းအလဲမရှိဘဲ တစ်ဖန်ပြန်လည်၍ပြောပြ၏။ သူသည် ထိုသို့ပြုပြီးလျှင်၊ ငတ်မွတ်ခေါင်းပါးခြင်းဘေး၊ ဓားဘေးနှင့် ကာလနာဘေးတို့အားဖြင့် ကြီးစွာသော လူဆိတ်ညံခြင်းတို့နှင့်အတူ မြေကြီးပေါ်သို့ ကျရောက်လာမည့် ကြီးစွာသောတရားစီရင်တော်မူခြင်းများအကြောင်း၊ ထို့အတူ ဤပြင်းထန်သောတရားစီရင်တော်မူခြင်းများသည် ယခုမျိုးဆက်၌ မြေကြီးပေါ်သို့ ကျရောက်မည်ဖြစ်ကြောင်း ကျွန်ုပ်ကို ပြောပြ၏။ သူသည် ဤအရာတို့ကို ပြန်လည်၍ ပြောပြလေပြီးနောက် ယခင်ပြုလေသကဲ့သို့ပင် တစ်ဖန်တက်သွားပြန်၏။

ဤအချိန်တွင်၊ ကျွန်ုပ်၏စိတ်၌ ဖြစ်ပေါ်သည့် ထင်မြင်ချက်တို့မှာ အလွန်လေးနက်သဖြင့်၊ အိပ်ခြင်းသည် ကျွန်ုပ်၏မျက်စိတို့မှ ထွက်ပြေး၍၊ ကျွန်ုပ်သည် မြင်ရ၊ ကြားရလေသောအရာတို့၌ အံ့ဩမှုဖြင့်မွန်း၍၊ လဲလျောင်း၏။ သို့ရာတွင်၊ ကျွန်ုပ်သည် ထိုတစ်ပါးတည်းသောတမန်တော်ကို ကျွန်ုပ်အိပ်ရာဘေး၌ တစ်ဖန်မြင်တွေ့ရသောအခါ ကြီးစွာအံ့ဩ၏။ ကျွန်ုပ်အား ယခင်ကအတိုင်း ထိုတူသောအရာတို့ကိုပင် အကြိမ်ကြိမ်ထပ်ပြီး၊ ပြန်၍ပြောပြသည်ကိုလည်း ကြားနားရ၏။ (ကျွန်ုပ်အဘမိသားစု၏ ဆင်းရဲနွမ်းပါးသောအခြေအနေတို့၏ အကျိုးဆက်အဖြစ်) ကြွယ်ဝခြင်းငှာဟူသောရည်ရွယ်ချက်ဖြင့် ပုရပိုက်ပြားများကို ရယူစေဖို့၊ စာတန်က ကျွန်ုပ်ကို သွေးဆောင်ဖြားယောင်းဖို့ ကြိုးစားလိမ့်မည့်အကြောင်း သူက ကျွန်ုပ်ကိုပြောပြလျက် ထပ်၍သတိပေး၏။ ဤသို့ပြုခြင်းမှ ကျွန်ုပ်ကို သူတားမြစ်ပြီး၊ ဆိုလေသည်မှာ၊ ကျွန်ုပ်သည် ပုရပိုက်ပြားများကို ရယူရာ၌ ဘုရားသခင်ကို ချီးမွမ်းဖို့မှတစ်ပါး၊ အခြားအဘယ်ရည်ရွယ်ချက်မျှ မရှိရမည့်အကြောင်းနှင့် သူ၏နိုင်ငံတော်ကို တည်ဆောက်ခြင်းထက် အခြားသောအဘယ်အကြောင်းရင်း၏လွှမ်းမိုးမှုကိုမျှမခံရမည့်အကြောင်း၊ သို့မဟုတ်လျှင်၊ ကျွန်ုပ်သည် ထိုအရာတို့ကို မရယူနိုင်မည့်အကြောင်းပေတည်း။

ဤတတိယအကြိမ် အကြည့်အရှုကြွေရောက်ပြီးနောက်တွင်၊ သူသည် ယခင်ကကဲ့သို့ပင် ကောင်းကင်ဘုံသို့ တစ်ဖန်တက်သွားသဖြင့်၊ ကျွန်ုပ်သည်လည်းတွေ့ကြုံရသည့် ထူးဆန်းခြင်းကို တစ်ဖန်မှတ်ကျုံး၍၊ စဉ်းစားဆင်ခြင်လျက် ကျန်ရစ်၏။ ထို့နောက်တွင်၊ ကျွန်ုပ်ထံမှ ကောင်းကင်ဘုံရှင်တမန်တော် တတိယအကြိမ်တက်သွားပြီးလျှင်ပြီးချင်းပင် ကြက်တွန်၍၊ နေ့အချိန်နီးကပ်လာလေပြီဖြစ်ကြောင်းကို ကျွန်ုပ်တွေ့ရှိရ၏။ ထို့ကြောင့်၊ ကျွန်ုပ်တို့၏တွေ့ဆုံပြောဆိုခြင်းမှာ ထိုတစ်ညလုံးကြာမြင့်လေ၏။

အချိန်အနည်းငယ်ကြာပြီးနောက်၊ ကျွန်ုပ်သည် အိပ်ရာမှထ၍ ပြုနေကျအတိုင်းပင် တစ်နေ့တာလုပ်ရမည့်အလုပ်များကို လုပ်ခြင်းငှာသွား၏။ သို့ရာတွင်၊ အခြားသောအချိန်များမှာကဲ့သို့ အလုပ်လုပ်ခြင်းငှာကြိုးစားရာ၌၊ ကျွန်ုပ်သည် ခွန်အားအလွန်ကုန်ခန်းသည်ကို တွေ့ရှိ၍ လုံးဝအလုပ်မလုပ်နိုင်ဘဲရှိလေ၏။ ကျွန်ုပ်နှင့်အတူတကွ အလုပ်လုပ်လျက်ရှိသည့် ကျွန်ုပ်၏အဘသည် ကျွန်ုပ်၌တစ်စုံတစ်ခု မှားယွင်းနေသည်ကို သတိထားမိပြီး၊ နေအိမ်သို့ပြန်ဖို့ ကျွန်ုပ်ကိုပြော၏။ ကျွန်ုပ်သည်လည်း အိမ်သို့ပြန်မည်ဟူသောရည်ရွယ်ချက်ဖြင့် ထွက်ခဲ့၏။ သို့ရာတွင်၊ ကျွန်ုပ်တို့ရှိနေသောလယ်ကွင်း၏ ခြံစည်းရိုးကို ဖြတ်ကျော်ဖို့ကြိုးစားရာ၌ ကျွန်ုပ်၏ခွန်အားများလုံးဝကုန်ခန်းသွား၍၊ ဘာမျှမလုပ်နိုင်ဘဲမြေကြီးပေါ်သို့လဲကျသွားပြီး၊ အဘယ်အရာကိုမျှမသိဘဲ အချိန်အနည်းငယ် သတိလစ်သွား၏။

ကျွန်ုပ်ပြန်လည်၍သတိရသည့် ပထမဆုံးသောအရာမှာ ကျွန်ုပ်၏နာမည်ကိုခေါ်လျက် ကျွန်ုပ်ကို စကားပြောနေသောအသံတစ်သံဖြစ်၏။ ကျွန်ုပ်မော့ကြည့်လျှင်၊ ယခင်ကကဲ့သို့ပင် အလင်း ဝန်းရံလျက်ရှိသည့် ထိုတစ်ပါးတည်းသောတမန်တော်ကို ကျွန်ုပ်ဦးခေါင်းအထက်၌ ရပ်လျက်ရှိသည်ကို မြင်ရ၏။ ထို့နောက်တွင်၊ သူသည် မနေ့ညကပြန်လည်၍ ပြောပြသောအရာအားလုံးတို့ကို ကျွန်ုပ်အား တစ်ဖန်ပြန်လည်၍ ပြောပြပြီး၊ ကျွန်ုပ်လက်ခံရရှိသည့် ရူပါရုံနှင့် မိန့်မှာချက်များအကြောင်းကို ကျွန်ုပ်၏အဘထံသို့သွား၍ပြောပြဖို့ မိန့်မှာ၏။

ကျွန်ုပ်သည် နာခံ၍ လယ်ကွင်းထဲရှိ ကျွန်ုပ်အဘဆီသို့ ပြန်သွားပြီး၊ ထိုအမှုတစ်ခုလုံးကို ပြောပြ၏။ သူကလည်း ထိုအမှုသည် ဘုရားသခင်ထံမှဖြစ်ကြောင်း ကျွန်ုပ်ကို ပြန်ပြောလျက်၊ တမန်တော်မိန့်မှာသည့်အတိုင်း သွား၍ပြုဖို့ ကျွန်ုပ်ကို ပြော၏။ ကျွန်ုပ်သည် လယ်ကွင်းမှထွက်ခွာ၍၊ ပုရပိုက်ပြားများကို မြှုပ်ထားသည့်နေရာတည်းဟူသော၊ ကျွန်ုပ်ကို တမန်တော်ပြောပြလေသည့်နေရာသို့ သွား၏။ ထိုနေရာနှင့်စပ်လျဉ်း၍ ကျွန်ုပ်ရရှိသည့် ရူပါရုံ၏ပြတ်သားခြင်းကြောင့်၊ ကျွန်ုပ်သည် ထိုအရပ်သို့ရောက်သောအချိန်တွင် ထိုနေရာကို ချက်ချင်းသိ၏။

နယူးယောက်ပြည်နယ်၊ အွန်တာရီရိုခရိုင်၊ မန်ချက်စတာရွာနှင့်အနီးတွင် အတော်ကြီးသည့် တောင်ကုန်းတစ်ခုရှိပြီး၊ ထိုအနီးအနားပတ်ဝန်းကျင်ရှိအရာအားလုံးတို့ထက် အမြင့်ဆုံးနေရာဖြစ်၏။ ထိုတောင်ကုန်း၏အနောက်ဘက်ပိုင်း၊ တောင်ထိပ်မှ မဝေးသည့်နေရာရှိ အတော်ကြီးသည့် ကျောက်တုံး၏အောက်တွင်၊ ပုရပိုက်ပြားများတည်ရှိပြီး၊ ကျောက်သေတ္တာထဲတွင်ထည့်၍၊ မြှုပ်ထား၏။ ဤကျောက်တုံးသည် အပေါ်ပိုင်းတွင် အလယ်၌ ထူ၍လုံးဝန်းလျက်၊ အစွန်းပိုင်းများဆီသို့ ပါး၍သွား၏။ ထိုကြောင့်၊ ကျောက်တုံး၏အလယ်ပိုင်းကို မြေကြီးပေါ်တွင် မြင်ရသော်လည်း၊ ပတ်လည်ရှိအစွန်းပိုင်းတို့ကို မြေကြီးဖြင့်ဖုံးကွယ်ထား၏။

ကျွန်ုပ်သည် မြေကြီးကိုဖယ်ရှားပြီးသောအခါ၊ ကုတ်တံတစ်ချောင်းကိုရှာ၍၊ ကျောက်တုံး၏အစွန်းအောက်သို့ ထိုးလျက် အနည်းငယ်အားစိုက်ပြီး မ၏။ အတွင်းသို့ ကျွန်ုပ်ကြည့်ရာ တမန်တော်ပြောသည့်အတိုင်းပင်၊ ပုရပိုက်ပြားများ၊ ဥရိမ်နှင့် သုမိမ်၊ ရင်အုပ်တန်ဆာတို့ကို အသေအချာမြင်ရ၏။ ထိုအရာတို့တည်ရှိနေသည့် သေတ္တာမှာ ကျောက်များကို အင်္ဂတေတစ်မျိုးနှင့်အတူစပ်၍ပြုလုပ်ထားခြင်းဖြစ်၏။ သေတ္တာ၏အောက်ခြေတွင်၊ ကျောက်တုံးနှစ်တုံးကို သေတ္တာ၏အလျားနှင့် ကန့်လန့်ဖြတ်ချထားပြီး၊ ဤကျောက်တုံးများပေါ်တွင် ပုရပိုက်ပြားများကို အခြားပစ္စည်းများနှင့်အတူ ချထား၏။

ကျွန်ုပ်သည် ထိုပုရပိုက်ပြားတို့ကို ထုတ်ယူခြင်းငှာ ကြိုးစားသော်လည်း၊ တမန်တော်၏တားမြစ်ခြင်းကိုခံရပြီး၊ ထိုအရာတို့ကို ထုတ်ယူဖို့အချိန်သည် မကျရောက်သေးကြောင်းနှင့် ထိုအချိန်မှစ၍ လေးနှစ်ကြာသည်အထိ ကျရောက်လိမ့်မည်မဟုတ်ကြောင်းတစ်ဖန်မိန့်ကြားခြင်းကို ခံရ၏။ သို့ရာတွင်၊ ကျွန်ုပ်ကို သူပြောပြသည်မှာ၊ ထိုအချိန်မှစ၍ တစ်နှစ်တိတိကြာလျှင်၊ ထိုနေရာသို့ ကျွန်ုပ်လာရမည့်အကြောင်း၊ သူသည်လည်း ထိုနေရာ၌ ကျွန်ုပ်နှင့်တွေ့ဆုံမည့်အကြောင်း၊ ပုရပိုက်ပြားများကို ရယူခြင်းအတွက် အချိန်ကျရောက်လာသည်အထိ ကျွန်ုပ်ထိုကဲ့သို့ ဆက်၍ပြုရမည့်အကြောင်းတို့ပေတည်း။

ထို့ကြောင့်၊ မိန့်မှာထားသည်နှင့်အညီ၊ တစ်နှစ်ပြည့်သည့်အခါတိုင်းတွင် ကျွန်ုပ်သွား၍၊ သွားသည့်အခါတိုင်း ထိုတစ်ပါးတည်းသောတမန်တော်ကို ထိုနေရာ၌ တွေ့ရပြီး၊ ကိုယ်တော်ရှင်ပြုတော်မူမည့်အရာနှင့်စပ်လျဉ်း၍လည်းကောင်း၊ နောက်ဆုံးသောကာလ၌ သူ၏နိုင်ငံတော်ကို အဘယ်ပုံ အဘယ်နည်းဖြင့် စီမံဆောင်ရွက်ရမည်တို့နှင့်စပ်လျဉ်း၍လည်းကောင်း ကျွန်ုပ်တို့တွေ့ဆုံပြောဆိုသည့်အကြိမ်တိုင်းတွင် သူ့ထံမှ သွန်သင်ချက်နှင့် အသိဉာဏ်တို့ကို လက်ခံရရှိ၏။ …

နှစ်များစွာကြာပြီးနောက်တွင်၊ ပုရပိုက်ပြားများ၊ ဥရိမ်နှင့် သုမိမ်၊ ရင်အုပ်တန်ဆာတို့ကို ရယူရမည့်အချိန်သည် ရောက်လာ၏။ နောက်ထပ်တစ်နှစ်ပြည့်သည့် တစ်ထောင့်ရှစ်ရာ နှစ်ဆယ့်ခုနစ်ခု၊ စက်တင်ဘာလနှစ်ဆယ့်နှစ်ရက်နေ့၌၊ ထိုပစ္စည်းများ မြှုပ်ထားသည့်နေရာသို့ သွားနေကျအတိုင်း သွားပြီးနောက်တွင်၊ ထိုတစ်ပါးတည်းသောကောင်းကင်ဘုံရှင်တမန်တော်သည် ကျွန်ုပ်အား ထိုပစ္စည်းများကို အမိန့်နှင့်အတူ ပေးအပ်၏။ သူမိန့်ကြားသည်မှာ၊ ထိုပစ္စည်းများအတွက် ကျွန်ုပ်မှာတာဝန်ရှိကြောင်း၊ ထိုပစ္စည်းတို့ကို ကျွန်ုပ်ဂရုမစိုက်ဘဲ သို့မဟုတ် ကျွန်ုပ်၏လျစ်လျူရှုခြင်းတစ်စုံတစ်ခုအားဖြင့် ပျောက်ရှသွားစေခြင်းရှိသော် ပယ်ရှင်းခြင်းကို ကျွန်ုပ်ခံရမည်ဖြစ်ကြောင်းပေတည်း။ သို့ရာတွင်၊ ကျွန်ုပ်သည် ထိုပစ္စည်းတို့ကို ထိုတမန်တော် ပြန်လည်တောင်းခံသည့်အချိန်အထိ ထိန်းသိမ်းစောင့်ရှောက်ဖို့ အစွမ်းရှိသမျှကြိုးစားအားထုတ်မည်ဆိုလျှင်၊ ထိုပစ္စည်းတို့ကို ကာကွယ်ပေးလိမ့်မည်ဖြစ်ကြောင်းကိုလည်း သူမိန့်ကြား၏။

ထိုပစ္စည်းများကို ဘေးကင်းစွာထိန်းသိမ်းစေဖို့ ထိုမျှတင်းကျပ်သောအမိန့်များကို ကျွန်ုပ်လက်ခံရရှိခြင်းနှင့် ကျွန်ုပ်လက်ထဲ၌ ဆောင်ရွက်ဖို့လိုအပ်သောအရာကို ကျွန်ုပ်ပြုပြီးနောက်၊ ယင်းပစ္စည်းတို့ကို ပြန်လည်တောင်းခံမည့်အကြောင်း၊ တမန်တော်မိန့်ကြားခြင်းတို့၏ အကြောင်းရင်းကို မကြာမြင့်မီ ကျွန်ုပ်တွေ့ရ၏။ အကြောင်းမူကား၊ ထိုပစ္စည်းတို့ကို ကျွန်ုပ်ရရှိကြောင်း သိလျှင်သိချင်း ကျွန်ုပ်ထံမှ ယူခြင်းငှာ အစွမ်းကုန်ကြိုးစားအားထုတ်ကြ၏။ ကြံစည်၍ရနိုင်သမျှသော ဥပါယ်တံမျဉ်တို့ကို ထိုရည်ရွယ်ချက်အတွက် အသုံးပြုကြ၏။ ညှဉ်းဆဲခြင်းသည် ယခင်ကထက်ပို၍ ခါးသည်းပြီး ပြင်းထန်လာလျက်၊ လူအစုအဝေးတို့သည် ထိုပစ္စည်းများကို ဖြစ်နိုင်လျှင် ကျွန်ုပ်ထံမှရယူခြင်းငှာ အစဉ်မပြတ်စောင့်ကြည့်လျက်ရှိကြ၏။ သို့ရာတွင်၊ ဘုရားသခင်၏ဉာဏ်ပညာတော်အားဖြင့် ထိုပစ္စည်းတို့သည် ကျွန်ုပ်လက်ထဲ၌ လုံခြုံစွာဆက်၍ရှိနေသည်ကား၊ ကျွန်ုပ်လက်ထဲ၌ ဆောင်ရွက်ဖို့လိုအပ်သောအရာကို ကျွန်ုပ်ပြီးမြောက်သည့်အချိန်အထိပင်ဖြစ်၏။ အစီအစဉ်များအတိုင်း၊ တမန်တော်က ထိုပစ္စည်းတို့ကို တောင်းခံသောအခါ၊ ကျွန်ုပ်သည် သူ့ထံသို့ ပေးအပ်၏။ သူသည် ထိုပစ္စည်းများကို ယနေ့ တစ်ထော့င်ရှစ်ရာသုံးဆယ့်ရှစ်ခုနှစ်၊ မေလနှစ်ရက်နေ့ တိုင်အောင် သူ၏ထိန်းသိမ်းစောင့်ရှောက်မှုအောက်၌ ထားရှိပေ၏။

ပို၍ပြည့်စုံသောမှတ်တမ်းကို မြတ်ပုလဲကျမ်းရှိ ဂျိုးဇက်စမစ်—သမိုင်းတွင်ကြည့်ပါ။

မြင့်မြတ်သောအတည်ပြုချက်အားဖြင့် သက်သေခံသည့်အတိုင်း မြေမှုန့်ထဲမှစကားပြောသည့် လူမျိုး၏အသံကဲ့သို့သော ရှေးမှတ်တမ်းကို မြေကြီးထဲမှထုတ်၍ ဘုရားသခင်၏ဆုကျေးဇူးနှင့် တန်ခိုးတော်တို့အားဖြင့် ယခုခေတ်စကားသို့ ဘာသာပြန်ပြီး ၁၈၃၀ ခုနှစ်တွင် အင်္ဂလိပ်ဘာသာဖြင့် The Book of Mormon (မော်မုန်ကျမ်း) အဖြစ် လောကသို့ ပထမအကြိမ် ပုံနှိပ်ထုတ်ဝေခဲ့ပါသည်။