1 Ut anajwan kik’ulman naq q’axal kiniman li rahob’tesink kik’ehe’ sa’ xb’een li iglees xb’aaneb’ li ink’a’ neke’paab’an, jo’kan naq sa’ li iglees ke’ok chixwech’b’al rix, ut chixyeeb’al resil li na’leb’ a’an reheb’ lix jolominel; ut eb’ a’an ke’xye resil re laj Alma. Ut laj Alma kixch’olob’ li na’leb’ a’an chiru laj Mosiah, lix reyeb’. Ut laj Mosiah kixk’uub’ xna’leb’ rik’ineb’ laj tij chiru.

2 Ut kik’ulman naq li rey aj Mosiah kixtaqla xjek’inkil jun li aatin chiru chixjunil li ch’och’ sa’ xsutam, naq maajun taawanq li ink’a’ napaab’an, li taarahob’tesinq re anihaq reheb’ li wankeb’ sa’ lix iglees li Dios.

3 Ut kiwan jun li taqlahom q’axal kaw sa’eb’ chixjunil li iglees naq maajun rahob’tesink taawanq sa’ xyanqeb’, naq taawanq juntaq’eetalil sa’ xyanqeb’ chixjunil li winq;

4 Naq maajun q’etq’etil chi moko nimank-ib’ che’xkanab’ chixpo’b’al li tuqtuukilal wankeb’ wi’; naq li junjunq chi winq chixk’oxla li ras riitz’in jo’ naxk’oxla rib’ a’an, ut che’k’anjelaq rik’in tz’aqal li ruq’ re xk’ulb’al li taak’anjelaq reheb’.

5 Relik chi yaal, ut chixjunileb’ laj tij ut laj tzolonel reheb’ tento te’k’anjelaq rik’in tz’aqaleb’ li ruq’ re xk’ulb’al li tak’anjelaq reheb’, chi yalaq chan ru, ka’ajwi’ sa’ li yajel malaj sa’ li nimla neb’a’il ink’a’; ut rik’in xb’aanunkil chixjunil li k’a’aq re ru a’in, kinumta li rusilal li Dios rik’ineb’.

6 Ut ki’ok wi’chik chi wank nimla tuqtuukilal sa’ li ch’och’; ut eb’ li tenamit k’a’jo’ naq ke’ok chi k’ihank, ut ke’ok chixjek’inkil rib’ chiru lix b’een li ch’och’, relik chi yaal, sa’ xnim li saq’e ut sa’ xtz’e, sa’ releb’ saq’e ut sa’ rokeb’, ut ke’xkab’la li ninqi tenamit ut k’aleb’aal sa’ chixjunil li jar raqal chi ch’och’.

7 Ut li Qaawa’ kirula’aniheb’ ut kixk’eheb’ chi usaak, ut ke’ok choq’ jun tenamit nim ut b’ihom.

8 Anajwan eb’ li ralal laj Mosiah k’eeb’ileb’ sa’ ajl sa’ xyanqeb’ li ink’a’ neke’paab’an; ut jo’kan ajwi’ jun reheb’ li ralal laj Alma kik’ehe’ sa’ ajl sa’ xyanqeb’, a’an aj Alma xk’ab’a’, jo’ chanru xyuwa’; a’b’an a’an ki’ok choq’ jun winq q’axal aj maak ut aj loq’onihom pak’b’il dios. Ut a’an jun winq k’iila aatin nayehok, ut k’a’jo’ li sahil aatin kixye re li tenamit; jo’kan naq kixk’ameb’ xb’e naab’al li tenamit chixb’aanunkil jo’ chanru xmaa’usilal a’an.

9 Ut k’a’jo’ naq ki’ok chixramb’al ru li chaab’ilo’k sa’ lix iglees li Dios; rik’in xmaq’b’aleb’ xch’ool li tenamit; rik’in xk’eeb’al chi uxmank naab’al li jachok-ib’ sa’ xyanq li tenamit; rik’in xtenq’ankil laj xik’ ilonel re li Dios, re naq tixk’anjela lix wankilal sa’ xb’eeneb’.

10 Ut anajwan kik’ulman, naq yoo chi xik yalaq b’ar chixsachb’al lix iglees li Dios, xb’aan naq sa’ muqmu naxik yalaq b’ar rochb’eeneb’ li ralal laj Mosiah ut naxsik’ xsachb’al li iglees, ut xsachb’al xb’eheb’ lix tenamit li Qaawa’, jo’ yeeb’il naq ink’a’ taa’uxmanq sa’ lix taqlahom li Dios, malaj ut jo’kan ajwi’ sa’ xtaqlahom li rey—

11 Ut jo’ kinye eere, naq yookeb’ chi xik yalaq b’ar sa’ xpo’jikeb’ xch’ool rik’in li Dios, k’ehomaq reetal, lix anjel li Qaawa’ kixk’ut rib’ chiruheb’; ut kikub’e chaq chanchan sa’ jun choql; ut ki’aatinak chanchan rik’in xyaab’ li kaaq, ut xb’aan a’an kichiiq’an li ch’och’ li xaqxookeb’ wi’;

12 Ut k’a’jo’ xsachikeb’ xch’ool, jo’kan naq ke’t’ane’ chi ch’och’, ut moko ke’xtaw ta ru li aatin li kixye reheb’.

13 A’b’anan a’an kixjap wi’chik re, ut kixye: At Alma, waklin ut xaqlin chaq, xb’aan naq k’a’ut naq nakarahob’tesi lix iglees li Dios? Xb’aan naq li Qaawa’ kixye: A’in lin iglees, ut laa’in tinxaqab’, ut maak’a’ taat’anoq re, ka’ajwi’ li q’etok aatin re lin tenamit.

14 Ut jo’kan wi’chik, li anjel kixye: K’e reetal, li Qaawa’ xrab’i lix tijeb’ lix tenamit, ut jo’kan ajwi’ lix tij laj Alma lix moos, a’an laa yuwa’; xb’aan naq a’an xtijok rik’in nimla paab’aal chawix re tatk’ame’q chixnawb’al chirix li yaal; jo’kan ut, a’in li ajom kinchal wi’, re xq’unb’esinkil aach’ool chirix lix wankil li Dios ut li wankilal k’eeb’il xb’aan a’an, re naq taasumeeq ru lix tijeb’ lix moos jo’ chanru xpaab’aaleb’.

15 Ut anajwan k’e reetal, ma naru tab’i’ teeye naq maak’a’ xwankil li Dios? Xb’aan naq k’ehomaq reetal, ma ink’a’ nachiiq’an li ch’och’ rik’in xyaab’ inkux? Ut ma ink’a’ ajwi’ nekexru chiwilb’al cheru? Ut laa’in taqlanb’ilin xb’aan li Dios.

16 Anajwan ninye aawe: Ayu, ut chijultiko’q aawe lix preexileb’ laa yuwa’ sa’ li ch’och’ Helam, ut sa’ li ch’och’ Nefi; ut chijultiko’q aawe chanru xnimal ru li k’a’aq re ru kixb’aanu choq’ reheb’; xb’aan naq ke’wan chi moosil, ut a’an kixkoleb’. Ut anajwan ninye aawe, at Alma, chap laa b’e, ut maasik’ chik xsachb’al li iglees, re naq sumenb’ilaq lix tijeb’, ut a’in us ta aajunes taawaj tz’eqmank.

17 Ut anajwan kik’ulman naq a’in roso’jik li aatin kixye li anjel re laj Alma, ut xko’o.

18 Ut anajwan laj Alma ut eb’ li wankeb’ rik’in ke’t’ane’ wi’chik chi ch’och’, xb’aan naq nim xsachikeb’ xch’ool; xb’aan naq rik’in tz’aqal xnaq’eb’ ru ke’ril chaq jun lix anjel li Qaawa’; ut lix yaab’ xkux chanchan li kaaq, ut kixchiq’ li ch’och’; ut ke’xnaw naq maak’a’ chik wan li maawa’ ta xwankil li Dios li naru chixchiq’b’al li ch’och’ ut xk’eeb’al chi siksotk chanchan naq ok re chixjachb’al rib’ sa’ xyi.

19 Ut anajwan q’axal nim xsachik xch’ool laj Alma jo’kan naq kimemo’ re, ut ink’a’ kiru chixteeb’al re; relik chi yaal, ut kiq’uno’ xmetz’ew, toj reetal ink’a’ naru chireek’asinkil li ruq’; jo’kan naq kixoke’ xb’aaneb’ li wankeb’ rik’in, ut kik’ame’ chi maak’a’ xkawilal, toj reetal naq kiyokob’aak chiru lix yuwa’.

20 Ut ke’xnumsi resil chiru lix yuwa’ chixjunil li k’a’ru ke’xk’ul chaq; ut lix yuwa’ kisaho’ sa’ xch’ool, xb’aan naq kixnaw naq a’an lix wankil li Dios.

21 Ut kixtaqla xch’utub’ankil li k’iila tenamit re te’xk’e reetal k’a’ru kixb’aanu li Qaawa’ choq’ re li ralal, ut jo’kan ajwi’ choq’ reheb’ li ke’wan rochb’een.

22 Ut kixtaqla naq te’xch’utub’ rib’ laj tij, ut ke’ok chi kuyuk sa’, ut chi tijok chiru li Qaawa’ lix Dios naq a’an tixte xtz’uumal re laj Alma, re naq taaruuq chi aatinak, ut jo’kan ajwi’ naq tixk’ul xmetz’ew li roq ruq’—re naq te’tehe’q rilob’aaleb’ li tenamit re rilb’al ut xnawb’al lix chaab’ilal ut lix loq’al li Dios.

23 Ut kik’ulman naq chirix naq ke’kuyuk sa’ ut ke’tijok chiru xnumik wiib’ kutan ut wiib’ q’ojyin, li roq ruq’ laj Alma kixk’ul xmetz’ew, ut kixaqli ut ki’ok chiraatinankileb’, ut kixye reheb’ naq chik’ojob’aaq xch’ooleb’ chi chaab’il.

24 Xb’aan naq, chan a’an, laa’in xinjal ink’a’uxl chirixeb’ lin maak, ut tojb’il wix xb’aan li Qaawa’; k’ehomaq reetal naq yo’lajenaqin rik’in li Musiq’ej.

25 Ut li Qaawa’ kixye we: Misach aach’ool naq chixjunileb’ li winq; relik chi yaal, eb’ li winq ut eb’ li ixq, chixjunil li tenamit, junkab’al, aatinob’aal, ut teepal, tento te’yo’laaq wi’chik, relik chi yaal, tento te’yo’laaq rik’in li Dios, ut te’jalaaq chaq sa’ lix tz’ejwalejil ut t’anenaqil wanjikeb’, re te’wanq sa’ tiikilal, chi tojb’ileb’ rix xb’aan li Dios, chi okenaqeb’ choq’ ralal ut xrab’in;

26 Ut chi jo’kan neke’ok choq’ ak’il yo’ob’tesihom; ut wi ink’a’ neke’xb’aanu a’in, maamin te’ruuq chireechaninkil lix awa’b’ejihom li Dios.

27 Ninye eere, wi moko wan ta chi jo’kan, tento te’tz’eqmanq; ut a’in ninnaw, xb’aan naq kinwan choq’ re li tz’eqmank.

28 A’b’anan, chirix b’eek chiru naab’al li rahilal; chirix xyot’b’al inch’ool chi ka’ch’in chik ma ninkam, li Qaawa’ rik’in uxtaan kixk’oxla naq us inxokb’al chaq sa’ li k’ate’k li maajo’q’e na’oso’, ut yo’lajenaqin rik’in li Dios.

29 Li waam tojb’il rix chiru lix k’ahil li yot’e’k ut lix b’ak’leb’ li maa’usilal. Kinwan chaq sa’ li jul q’axal q’ojyin xsa’, a’b’an anajwan nawil lix sachb’a-ch’oolejil saqen li Dios. Kiyot’e’ li waam rik’in li rahilal chi junelik; a’b’an xokb’ilin, ut moko ra ta chik li waam.

30 Laa’in kintz’eqtaana laj Tojol wix, ut kintz’eqtaana xyaalal li k’a’ru yeeb’il xb’aaneb’ li qayuwa’; a’b’an anajwan, re te’ril chi xb’eenilaj naq a’an taachalq, ut naq jultik re li junjunq chi yo’ob’tesihom li b’arwan kixyo’ob’tesi, a’an tixk’utb’esi rib’ chiruheb’ chixjunil.

31 Relik chi yaal, li junjunq chi xb’een aqej taab’ase’q, ut li junjunq chi ru’uj aq’ej taach’olob’anq chiru a’an. Relik chi yaal, sa’ ajwi’ li roso’jik kutan, naq chixjunileb’ li winq te’xaqliiq re taaraqe’q aatin chirixeb’ xb’aan a’an, toja’ naq te’xch’olob’ xyaalal naq a’an li Dios; toja’ naq te’xch’olob’ xyaalal, eb’ li ani neke’wan chi maak’a’eb’ xDios sa’ li ruchich’och’, naq li aatin raqb’il, chirix jun li tojb’a-maak li junelik taakanaaq, tiik ru sa’ xb’eeneb’; toja’ ut naq te’siksotq ut te’chenchotq, ut te’xka’ch’inob’resi rib’ naq ilb’ileb’ xb’aan lix naq’ ru a’an, li na’ilok re chixjunil.

32 Ut anajwan kik’ulman naq laj Alma chalen sa’ li kutan a’an ki’ok chixtzolb’aleb’ li tenamit, ut eb’ li ke’wan rik’in laj Alma sa’ li hoonal naq li anjel kixk’ut rib’ chiruheb’, ut yalaq b’ar neke’xik chiru chixjunil li ch’och’, chixpuktesinkil re chixjunil li tenamit resil li k’a’aq re ru ke’rab’i ut ke’ril chaq, ut chixjultikankil li raatin li Dios sa’ xyi naab’al li rahilal numsinb’il, ut rahob’tesinb’ileb’ chi naab’al xb’aaneb’ li ink’a’ neke’paab’an, ut sak’b’ileb’ xb’aaneb’ naab’al reheb’.

33 A’b’anan us ta ke’xk’ul chixjunil a’in, maak’a’jo’ naq ke’xk’e xk’ojob’ankil xch’ool li iglees, ut ke’xk’ojob’eb’ xpaab’aal, ut ke’xtz’aama chiruheb’ rik’in najtil oyb’enink ut naab’al lix tawasinkil rib’ naq che’xpaab’ lix taqlahom li Dios.

34 Ut kaahib’ reheb’ a’aneb’ ralal laj Mosiah; ut a’aneb’ laj Ammon, laj Aaron, laj Omner, ut laj Himni xk’ab’a’eb’; a’in xk’ab’a’eb’ li ralal laj Mosiah.

35 Ut eb’ a’an ke’b’eek chiru chixjunil li ch’och’ Tzarahemla, ut sa’ xyanqeb’ chixjunil li tenamit li wankeb’ rub’el rawa’b’ejil li rey aj Mosiah, ut q’axal k’eek’ookeb’ xch’ool chixtuqub’ankil chixjunil li ra ke’xb’aanu chaq re li iglees, rik’in xch’olob’ankil chixjunil lix maak, ut xpuktesinkil resil chixjunil li k’a’aq re ru ke’ril chaq, ut xch’olob’ankil xyaalal li profeetil aatin ut eb’ li loq’laj hu chiru chixjunil li ke’ajok re rab’inkileb’.

36 Ut chi jo’kan ke’wan choq’ k’anjeleb’aal sa’ ruq’ li Dios sa’ xk’amb’al naab’al chixnawb’al li yaal, relik chi yaal, chixnawb’al chirix laj Tojol rixeb’.

37 Ut q’axal osob’tesinb’ileb’ a’an! Xb’aan naq ke’xpuktesi resil li tuqtuukilal; ke’xpuktesi li chaab’il esil chirix li chaab’il; ut ke’xch’olob’ chiruheb’ li tenamit naq li Qaawa’ na’awa’b’ejin.