1 Ut anajwan kik’ulman naq laj Tzeniff kixq’axtesi li awa’b’ejihom sa’ xb’een laj Noe, jun reheb’ li ralal; jo’kan naq laj Noe ki’ok chi awa’b’ejink sa’ xna’aj; ut a’an ink’a’ kib’eek chiru lix b’e lix yuwa’.

2 Xb’aan naq k’ehomaq reetal, a’an ink’a’ kixpaab’ lix taqlahom li Dios, kib’eek b’an jo’ chanru li ratawom lix ch’ool. Ut ke’wan naab’al li rixaqil ut ^axmoosil ixaqil. Ut ^bkixk’eheb’ lix tenamit chi maakob’k, ut chixb’aanunkil li k’a’ru yib’ob’aal ru sa’ rilob’aal li Qaawa’. Relik chi yaal, ut ke’xb’aanu li ^cyumb’eetak ko’b’eetak ut li k’iila paay chi maa’usilal.

3 Ut kixteneb’ choq’ tojleb’ li ro’ raqal chixjunil li k’a’ re ru reheb’, li ro’ raqal lix oor ut lix plaat, ut li ro’ raqal lix ^atziff ut lix kaqi ch’iich’, ut lix ch’iich’ bronce ut lix saq ch’iich’; ut li ro’ raqal lix ketomq nimob’resinb’il xtib’eleb’, ut jo’kan ajwi’ li ro’ raqal chixjunil li riyajeb’ nak’uxman.

4 Ut chixjunil a’in kixmaq’ re xtenq’ankil rib’, ut eb’ li rixaqil ut lix moosil ixaqil; ut jo’kaneb’ ajwi’ li wankeb’ choq’ aj tij chiru, ut li rixaqileb’ ut lix moosil ixaqileb’ a’an; chi jo’kan kixjal li k’a’ru na’uxman sa’ li awa’b’ejihom.

5 Xb’aan naq kirisi chixjunileb’ laj tij li xaqab’anb’ileb’ chaq xb’aan lix yuwa’, ut kixxaqab’eb’ li ak’ sa’ xna’ajeb’, a’eb’ xkomoneb’ li taqsinb’ileb’ sa’ xq’etq’etileb’ xch’ool.

6 Relik chi yaal, ut chi jo’kan ke’tenq’aak sa’ lix q’emaleb’, ut sa’ xloq’oninkil lix pak’b’il dioseb’, ut sa’ li yumb’eetak ko’b’eetak neke’xb’aanu, rik’in li tojleb’ kixteneb’ li rey aj Noe sa’ xb’een lix tenamit; chi jo’kan q’axal ke’k’anjelak li tenamit chixtenq’ankil li maa’usilal.

7 Relik chi yaal, ut ke’ok ajwi’ choq’ aj loq’onihom pak’b’il dios, xb’aan naq b’alaq’inb’ileb’ xb’aan lix jo’maajo’il ut sahil aatin li rey ut eb’ laj tij; xb’aan naq ke’xye reheb’ k’a’aq re ru nasahob’resink ch’oolej.

8 Ut kik’ulman naq li rey aj Noe kixyiib’ k’iila kab’l li chaq’aleb’ ru ut paapookeb’ xsa’; ut kixk’e rutz’u’ujinkileb’ rik’in chaq’al ru k’anjel re che’, ut re k’iila paay li k’a’aq re ru terto xtz’aq, re oor, ut re plaat, ut re saq ch’iich’, ut re ch’iich’ bronce, ut re tziff, ut re kaqi ch’iich’;

9 Ut kixyiib’ ajwi’ choq’ re jun rochoch rey paapo xsa’, ut jun li k’ojarib’aal sa’ xyi, chaab’il che’ okenaq chixjunil, ut k’eeb’il rutz’u’ujinkil rik’in oor ut plaat ut k’a’ru terto xtz’aq.

10 Ut kixtaqla ajwi’ naq eb’ lix k’anjenel te’xk’anjela li k’iila paay chi chaq’al ru k’anjel sa’ xyanqeb’ lix tz’akil li santil ochoch, re chaab’il che’, ut re kaqi ch’iich’, ut re q’an ch’iich’ bronce.

11 Ut eb’ li k’ojleb’aal li jachb’ileb’ ru choq’ reheb’ li taqenaqil aj tij, li taqenaqeb’ chixb’eeneb’ chixjunil chik li k’ojleb’aal, kixk’e rutz’u’ujinkileb’ rik’in tz’aqal ch’iich’ oor; ut kixtaqla xyiib’ankil jun li helhookil che’ chiruheb’, re naq taaruuq te’ranab’ lix tib’eleb’ ut lix tel sa’ xb’een naq te’xye li b’alaq’il ut jo’maajo’il aatin chiru lix tenamit.

12 Ut kik’ulman naq kixyiib’ jun li ^anajt xteramil kab’l nach’ rik’in li santil ochoch; relik chi yaal, jun li kab’l q’axal najt xteram, jo’kan naq kiru chi xaqliik chixb’een ut chirilb’al li ch’och’ Xilom, ut jo’kan ajwi’ li ch’och’ Xemlon, li eechaninb’il xb’aaneb’ laj Lamanita; ut kiru ajwi’ chirilb’al chixjunil li ch’och’ li wan chixsutam.

13 Ut kik’ulman naq kixtaqla xkab’lankil k’iila kab’l sa’ li ch’och’ Xilom; ut kixtaqla xyiib’ankil jun li najt xteramil kab’l sa’ li tzuul chirix li ch’och’ Xilom sa’ xnim li saq’e, a’an li ke’xmuq wi’ rib’ li ralal xk’ajol laj Nefi sa’ xq’ehil naq ke’eelelik chaq sa’ li ch’och’; ut a’in kixb’aanu rik’in li b’ihomal kixk’ul rik’in xteneb’ankil li tojleb’ sa’ xb’een lix tenamit.

14 Ut kik’ulman naq kixk’e lix ch’ool chirix lix b’ihomal, ut kixnumsi lix kutan sa’ li xulil wank, rochb’eeneb’ li rixaqil ut lix moosil ixaqil; ut jo’ka’in ajwi’ naq eb’ laj tij chiru ke’xnumsi lix kutan rik’ineb’ li ixq aj yumb’eet.

15 Ut kik’ulman naq kiraw li awimq uva b’araq sa’ li ch’och’, ut kixyiib’eb’ li yatz’leb’aal uva, ut kixyiib’ li viin chi naab’al; ut chi jo’kan ki’ok choq’ aj ^auk’unel viin, ut jo’kan ajwi’ lix tenamit.

16 Ut kik’ulman naq ke’ok laj Lamanita chi chalk sa’ xb’een lix tenamit, sa’ xb’eeneb’ li moko k’iheb’ ta rajlankil, ut chixkamsinkileb’ sa’eb’ lix ch’och’, ut naq yookeb’ chixk’aak’alenkil lix ketomq.

17 Ut li rey aj Noe kixtaqlaheb’ laj k’aak’alenel chixsutam li ch’och’ re xramb’aleb’ ru; a’b’anan moko tz’aqal ta rajlankileb’ li kixtaqla, ut eb’ laj Lamanita ke’chal sa’ xb’eeneb’ ut ke’xkamsiheb’, ut ke’ralinasi chaq sa’ li ch’och’ naab’al lix ketomqeb’; chi jo’kan ke’ok laj Lamanita chixsachb’aleb’ ut chixk’anjelankil lix kaqaleb’ xch’ool sa’ xb’eeneb’.

18 Ut kik’ulman naq li rey aj Noe kixtaqlaheb’ lix teep aj pleet chixpleetinkileb’, ut ke’tiikisiik chirix, malaj ut ke’xtiikisiheb’ chiru jarub’aq kutan; jo’kan naq ke’sutq’i chi saheb’ sa’ xch’ool rik’in lix maq’omeb’.

19 Ut anajwan, sa’ xk’ab’a’ li nimla q’axok-u a’in, ke’taqsiik sa’ xq’etq’etileb’ lix ch’ool, ut ^ake’xnima rib’ rik’in xmetz’eweb’, ke’xye naq lajeeb’ roxk’aal reheb’ te’ruuq chi xaqliik chiru li jar milatq chi aj Lamanita; ut chi jo’kan ke’xnima rib’, ut ke’saho’ sa’ xch’ool rik’in li kik’, ut xhoyb’al xkik’eleb’ li ras riitz’in, ut a’in xb’aan lix maa’usilal lix rey ut eb’ laj tij reheb’.

20 Ut kik’ulman naq wan jun li winq sa’ xyanqeb’, laj ^aAbinadi xk’ab’a’, ut a’an xko’o sa’ xyanqeb’, ut ki’ok chi aatinak jo’ profeet, ut kixye: K’ehomaq reetal, jo’ka’in naxye li Qaawa’, ut jo’ka’in kinixtaqla, kixye, Ayu, ye re li tenamit a’in, jo’ka’in naxye li Qaawa’—Rahilal sa’ xb’een li tenamit a’in, xb’aan naq wilom lix tz’eqb’eetalileb’, ut lix maa’usilaleb’, ut li yumb’eetak ko’b’eetak reheb’; ut wi ink’a’ neke’xjal xk’a’uxl laa’in tinwula’aniheb’ sa’ injosq’il.

21 Ut wi ink’a’ neke’xjal xk’a’uxl ut neke’sutq’i rik’in li Qaawa’ lix Dios, k’e reetal, laa’in tinq’axtesiheb’ sa’ ruq’eb’ li xik’ neke’ilok reheb’; relik chi yaal, ut te’k’ame’q chi ^amoosil, ut te’tawasiiq xb’aan ruq’eb’ li xik’ neke’ilok reheb’.

22 Ut taak’ulmanq naq te’xnaw naq laa’in li Qaawa’ lix Dios, ut laa’in jun Dios aj ^asowen, ut ninwula’ani lix maa’usilaleb’ lin tenamit.

23 Ut taak’ulmanq naq wi ink’a’ neke’xjal xk’a’uxl li tenamit a’in ut neke’sutq’i rik’in li Qaawa’ lix Dios, te’k’ame’q chi moosil; ut maajun taakoloq reheb’, ka’aj b’an wi’ li Qaawa’ li Nimajwal Dios.

24 Relik chi yaal, ut naq te’elajinq chiwu, taak’ulmanq naq ^atimilaqin chirab’inkil li relajihomeb’; relik chi yaal, ut tinkanab’eb’ re naq te’sak’e’q xb’aaneb’ li xik’ neke’ilok reheb’.

25 Ut wi ink’a’ neke’xjal xk’a’uxl chi tiqto rik’in q’es ruhil t’ikr ut cha, ut ink’a’ neke’elajin chi anchaleb’ xmetz’ew chiru li Qaawa’ lix Dios, laa’in moko ^atinwab’i ta lix tijeb’, chi moko teb’inkol chiru lix ch’a’ajkilaleb’; ut jo’ka’in naxye li Qaawa’, ut jo’ka’in naq kinixtaqla.

26 Anajwan kik’ulman naq chirix naq laj Abinadi kixye li aatin a’in chiruheb’, ke’chal xjosq’il rik’in, ut ke’xsik’ risinkil lix yu’am; a’b’anan li Qaawa’ kixkol chaq sa’ ruq’eb’.

27 Anajwan ut naq li rey aj Noe kirab’i li aatin kixye chaq laj Abinadi reheb’ li tenamit, kichal ajwi’ xjosq’il; ut kixye: Ani tab’i’ laj Abinadi, naq laa’in ut eb’ lin tenamit taaraqe’q aatin chiqix xb’aan, malaj ut ^aani tab’i’ li Qaawa’, li taak’amoq sa’ xb’een lin tenamit a’ xninqal ch’a’ajkilal a’in?

28 Nekexintaqla chixk’amb’al chaq laj Abinadi arin, re taaruuq tinkamsi, xb’aan naq kixye li k’a’aq re ru a’in re taaruuq taareek’asiheb’ lin tenamit chi josq’o’k li jun rik’in li jun chik, ut re xwaklesinkil li wech’ok-ib’ sa’ xyanq lin tenamit; jo’kan naq tinkamsi.

29 Anajwan eb’ li tenamit ^amutz’ob’resinb’ileb’ li ru; jo’kan naq ^bke’xkawob’resi li raameb’ chirix li raatin laj Abinadi, ut chalen sa’ li kutan a’an ke’xsik’ xchapb’al. Ut li rey aj Noe kixkawob’resi li raam chirix li raatin li Qaawa’, ut ink’a’ kixjal xk’a’uxl chirix lix maa’us aj b’aanuhom.