1 Ut kik’ulman naq koo’ok wi’chik chixxaqab’ankil li awa’b’ejihom ut koo’ok wi’chik chireechaninkil li ch’och’ sa’ tuqtuukilal. Ut kintaqla xyiib’ankil li k’anjeleb’aal re pleet, li jar paay wan, re naq chi jo’kan te’wanq wik’in k’anjeleb’aal re pleetik choq’ re lin tenamit, royb’eninkil li kutan naq te’taqe’q wi’chik laj Lamanita chixpleetinkil lin tenamit.

2 Ut kink’ojob’eb’ laj k’aak’alenel chixsutam li ch’och’, re naq ink’a’ te’chalq wi’chik laj Lamanita sa’ qab’een chi maak’a’ sa’ qach’ool ut toohe’xsach; ut chi jo’kan kink’aak’aleheb’ lin tenamit ut lin ketomq, ut kink’e naq ink’a’ te’t’ane’q sa’ ruq’eb’ li xik’ neke’ilok qe.

3 Ut kik’ulman naq kiqeechani lix ch’och’eb’ li qayuwa’ chiru k’iila chihab’, relik chi yaal, chiru xnumik wiib’ xka’k’aal chihab’.

4 Ut laa’in kintaqla naq eb’ li winq te’xk’anjela li ch’och’, ut te’raw li k’iila paay chi ^aiyaj nak’uxman ut k’iila paay li ru che’, li junjunq raqal wan.

5 Ut kintaqla naq eb’ li ixq te’b’aqoq k’aam, ut te’xyal xq’e, ut te’k’anjelaq, ut te’xk’anjela li k’iila paay chi chaab’il q’unal t’ikr, relik chi yaal, ut li junjunq paay wan chi ^at’ikr, re naq taqatz’ap li qat’ust’uukilal; ut chi jo’kan koo’usa sa’ li ch’och’—jo’kan naq ink’a’ kixkanab’ wank qatuqtuukilal chiru xnumik wiib’ xka’k’aal chihab’.

6 Ut kik’ulman naq kikam li rey aj ^aLaman, ut li ralal ki’ok chi awa’b’ejink sa’ xna’aj. Ut a’an ki’ok chireek’asinkileb’ lix tenamit re te’xpo’resi xch’ool rik’in lin tenamit; jo’kan naq ke’ok chixkawresinkil rib’ choq’ re li pleet, re tole’taqe’q chixpleetinkil lin tenamit.

7 A’b’anan laa’in kintaqlaheb’ chaq laj muqmuukil k’ehol eetal chixsutam li ch’och’ ^aXemlon, re tink’e reetal lix kawresihomeb’ wi’ rib’, re naq tink’uub’ xkolb’al qib’ chiruheb’, re naq ink’a’ te’chalq sa’ xb’een lin tenamit ut te’xsacheb’.

8 Ut kik’ulman naq kole’taqe’q sa’ xb’een li ch’och’ Xilom sa’ xnim li saq’e, rik’in lix teepeb’ li k’i rajlankileb’, a’eb’ li winq ^akawresinb’ileb’ rik’in ^broq tzimaj, ut rik’in tzimaj, ut rik’in yok’leb’ ch’iich’, ut rik’in k’onk’ookil ch’iich’, ut rik’in pek, ut rik’in jok’; ut ke’wan xjolom chi joob’ileb’ jo’kan naq t’ust’uukeb’; ut tiqtookeb’ rik’in jun li tz’um lanb’il chixyiitoqeb’.

9 Ut kik’ulman naq kintaqla naq eb’ li ixq ut li kok’al re lin tenamit te’wanq chi muqmu sa’ li yamyookil ch’och’; ut kintaqla ajwi’ naq chixjunileb’ lin tiixil winq li te’ruuq chixk’amb’al li k’anjeleb’aal re pleet, ut jo’kaneb’ ajwi’ lin saaj winq li te’ruuq chixk’amb’al li k’anjeleb’aal re pleet, te’xch’utub’ rib’ re te’xik chixpleetinkileb’ laj Lamanita; ut kinxaqab’eb’ chi tzoltzol, li junjunq chi winq a’ yaal jo’ xchihab’.

10 Ut kik’ulman naq koxootaqe’q chixpleetinkileb’ laj Lamanita, ut laa’in ajwi’ injunes, sa’ lin tiixilal, koxintaqe’q ajwi’ chixpleetinkileb’ laj Lamanita. Ut kik’ulman naq koxootaqe’q rik’in lix ^ametz’ew li Qaawa’ chi pleetik.

11 Anajwan, eb’ laj Lamanita maak’a’ neke’xnaw chirix li Qaawa’, chi moko chirix xmetz’ew li Qaawa’, jo’kan naq a’ tz’aqal lix kawileb’ li chapchookeb’ wi’. A’ut a’aneb’ jun tenamit kaweb’ rib’, jo’ chanru xkawileb’ li winq.

12 A’aneb’ jun tenamit ^axulo’jenaq, ut josq’, ut aj rahom kik’, neke’xpaab’ li ^bna’leb’ kanab’anb’il chaq xb’aaneb’ lix yuwa’, a’an a’in—Neke’xpaab’ naq alinasinb’ileb’ chaq sa’ li ch’och’ Jerusalen xmaak lix maa’usilaleb’ lix yuwa’eb’, ut naq maa’usilanb’ileb’ chaq sa’ li yamyookil ch’och’ xb’aaneb’ li riitz’in, ut naq maa’usilanb’ileb’ ajwi’ chaq naq yookeb’ chixq’axb’al li palaw;

13 Ut jo’kan wi’chik, naq ke’maa’usilaak sa’ xch’och’il li ^axb’een reechanihomeb’, chirix naq ke’xq’ax li palaw, ut chixjunil a’in sa’ xk’ab’a’ naq laj Nefi q’axal tiik wi’chik chixpaab’ankil lix taqlahom li Qaawa’—jo’kan naq a’an ^busilanb’il xb’aan li Qaawa’, xb’aan naq li Qaawa’ kirab’iheb’ lix tij ut kixsumeheb’ ru, ut kixb’eresi lix xb’eenikeb’ sa’ li yamyookil ch’och’.

14 Ut eb’ li ras ke’chal xjosq’il rik’in sa’ xk’ab’a’ naq ink’a’ ^aneke’xtaw ru lix k’anjelahom li Qaawa’; ke’chal ajwi’ ^bxjosq’il rik’in a’an chiru li ha’ xb’aan naq ke’xkawob’resi li raameb’ chirix li Qaawa’.

15 Ut jo’kan wi’chik, ke’chal xjosq’il rik’in, chirix naq wulajenaqeb’ chaq sa’ li yeechi’inb’il ch’och’, xb’aan naq ke’xye naq kixmaq’ chaq sa’ ruq’eb’ li ^ataqlank sa’ xb’een li tenamit; ut ke’xsik’ xkamsinkil.

16 Ut jo’kan wi’chik, ke’chal xjosq’il rik’in sa’ xk’ab’a’ naq ki’el chaq chiru yamyookil ch’och’ jo’ kixtaqla wi’ li Qaawa’, ut kixk’am li ^atz’iib’anb’il esil li wan chi tz’iib’anb’il chiruheb’ li perel ch’iich’ bronce, xb’aan naq ke’xye naq a’an ^bki’elq’ak chiruheb’.

17 Ut chi jo’kan ke’xtzoleb’ li ralal xk’ajol re naq xik’ te’ril, ut re naq te’xkamsiheb’, ut re naq te’elq’aq chiruheb’ ut te’xpoqleheb’; ut te’xb’aanu chixjunil li naru chiruheb’ re xsachb’aleb’; jo’kan naq chi junajwa xik’ neke’rileb’ li ralal xk’ajol laj Nefi.

18 Xb’aan ajwi’ a’in naq li rey aj Laman, rik’in xseeb’al lix ch’ool, ut lix k’oxlanb’il t’ikt’i, ut lix chaq’al ru yeechi’ihom, kinixb’alaq’i, re kink’am lin tenamit taqe’q sa’ li ch’och’ a’in, re naq taaruuq te’xsacheb’; relik chi yaal, ut chiru li k’iila chihab’ a’in kiqak’ul rahilal sa’ li ch’och’.

19 Ut anajwan laa’in, aj Tzeniff, chirix xyeeb’al chixjunil li k’a’aq re ru a’in chiru lin tenamit chirixeb’ laj Lamanita, kinwaklesiheb’ xch’ool re te’xik chi pleetik rik’in xnimaleb’ xmetz’ew, chi xkanab’ahomeb’ rib’ chiru li Qaawa’; jo’kan naq kiqayal qu rik’ineb’ chi xaqxo chiruheb’.

20 Ut kik’ulman naq kiqalinasiheb’ chaq wi’chik sa’ li qach’och’; ut kiqakamsiheb’ rik’in jun li nimla kamsink, chi q’axal k’iheb’ jo’kan naq ink’a’ kiqak’eheb’ sa’ ajl.

21 Ut kik’ulman naq koosutq’i wi’chik sa’ qach’och’ laa’o, ut eb’ lin tenamit ke’ok wi’chik chirilb’aleb’ lix ketomq, ut chixk’anjelankil lix ch’och’eb’.

22 Ut anajwan laa’in, rik’in naq ak tiixin, kinq’axtesi li awa’b’ejihom sa’ xb’een jun reheb’ li walal; jo’kan ut, maak’a’ chik ninye. Ut li Qaawa’ chi’osob’tesinq taxaq re lin tenamit. Amen.