1 Ut anajwan, li rey aj Benjamin kixk’oxla naq aajel ru, chirix naq kixchoy raatinankil li tenamit, naq ^atixk’ul lix k’ab’a’eb’ chixjunileb’ li ke’ok chaq sa’ jun li sumwank rik’in li Dios naq te’xpaab’ lix taqlahom.

2 Ut kik’ulman naq maajun aamej kiwan, ka’ajeb’ wi’ li kok’al, li ink’a’ ke’ok sa’ li sumwank ut ke’xk’ul sa’ xb’eeneb’ lix k’ab’a’ li Kristo.

3 Ut jo’kan wi’chik, kik’ulman naq chirix naq li rey aj Benjamin kixk’e xraqik chixjunil li k’a’aq re ru a’in, ut kixk’ojob’ laj ^aMosiah li ralal re taawanq choq’ aj taqlanel ut choq’ rey sa’ xb’een lix tenamit, ut kixk’e re chixjunil li chaq’rab’ink chirix li awa’b’ejihom, ut ^bkixxaqab’eb’ ajwi’ laj tij re ^cxtzolb’aleb’ li tenamit, re naq chi jo’kan te’ruuq chirab’inkil ut chixnawb’al lix taqlahom li Dios, ut re reek’asinkileb’ xch’ool sa’ xjultikankil li ^dxaqab’anb’il aatin li ke’ok wi’ chaq, kixkanab’eb’ chi xik li ch’utch’uukil tenamit, ut ke’sutq’i chixjunqaleb’, jo’ chanru lix junkab’aleb’, sa’eb’ li rochoch.

4 Ut laj ^aMosiah ki’ok chi awa’b’ejink sa’ xna’aj lix yuwa’. Ut ki’ok chi awa’b’ejink sa’ lix laje xka’k’aal chihab’ lix yu’am, jo’kan naq chi ajlanb’il, wan na kaahib’ cient rik’in waqlaju xkaak’al chihab’ ^brelik chaq laj Lehi Jerusalen.

5 Ut li rey aj Benjamin oxib’ chihab’ kikana chi yo’yo, ut kikam.

6 Ut kik’ulman naq li rey aj Mosiah kib’eek sa’eb’ lix b’e li Qaawa’, ut ki’ab’in chiru lix raqb’a-aatin ut lix k’uub’anb’il aatin, ut kixpaab’ lix taqlahom sa’ chixjunil li k’a’aq re ru li b’arwan kixtaqla wi’.

7 Ut li rey aj Mosiah kixk’e naq eb’ lix tenamit te’xk’anjela li ch’och’. Ut a’an ajwi’ xjunes kixk’anjela li ch’och’, re naq chi jo’kan ^amoko taawanq ta choq’ iiq chiru lix tenamit, re naq tixb’aanu jo’ chanru li k’a’ru kixb’aanu chaq lix yuwa’ sa’ chixjunil li k’a’aq re ru. Ut maajun wech’ok-ib’ kiwan sa’ xyanq lix tenamit chiru xnumik oxib’ chihab’.