1 Ut kik’ulman naq laj Amulon kixtaw usilal sa’ rilob’aal lix reyeb’ laj Lamanita; jo’kan ut, lix reyeb’ laj Lamanita kixk’e re a’an ut re lix tenamit naq te’xaqab’aaq choq’ aj tzolonel sa’ xb’een lix tenamit; relik chi yaal, sa’ xb’een chixjunil li tenamit li wankeb’ sa’ li ch’och’ Xemlon, ut sa’ li ch’och’ Xilom, ut sa’ li ch’och’ Amulon.

2 Xb’aan naq eb’ laj Lamanita ak ke’reechani chixjunileb’ li ch’och’ a’in, jo’kan naq lix reyeb’ laj Lamanita kixxaqab’eb’ li rey sa’ xb’eeneb’ chixjunil li ch’och’ a’in.

3 Ut anajwan lix reyeb’ laj Lamanita aj Laman xk’ab’a’, naxk’am lix k’ab’a’ lix yuwa’, jo’kan naq li rey aj Laman nayeeman re. Ut wan choq’ rey sa’ xb’een jun tenamit nim xk’ihaleb’.

4 Ut a’an kixxaqab’eb’ laj tzolonel xkomoneb’ li ras riitz’in laj Amulon sa’ li junjunq chi ch’och’ li eechaninb’il xb’aan lix tenamit; ut chi jo’kan kitikla xk’utb’al li raatinob’aal laj Nefi sa’ xyanqeb’ chixjunil lix tenamiteb’ laj Lamanita.

5 Ut a’aneb’ jun tenamit chaab’ileb’ chirib’ileb’ rib’; a’ut ink’a’ neke’xnaw ru li Dios; chi moko ke’xk’ut lix komoneb’ laj Amulon k’a’ruhaq chiruheb’ chirix li Qaawa’ lix Dios, chi moko lix chaq’rab’ laj Moises; chi moko ke’xk’ut chiruheb’ li raatin laj Abinadi;

6 A’ut ke’xk’ut chiruheb’ naq te’xtz’iib’a li resileb’, ut naq te’tz’iib’aq chirib’ileb’ rib’.

7 Ut chi jo’kan eb’ laj Lamanita ke’ok chi nimank xb’ihomaleb’, ut ke’ok chi yakok chirib’ileb’ rib’ ut chi nimank xwankileb’, ut ke’ok chi wank choq’ jun tenamit seeb’ ut chaab’il xna’leb’eb’, jo’ chanru xna’leb’ li ruchich’och’; relik chi yaal, jun li tenamit q’axal seeb’eb’ xna’leb’, ut neke’saho’ xch’ool rik’in li jar paay chi maa’usilal ut poqlenk, ka’ajwi’ sa’ xyanqeb’ lix komoneb’ a’an ink’a’.

8 Ut anajwan kik’ulman naq laj Amulon ki’ok chixk’anjelankil li ^awankilal sa’ xb’een laj Alma ut eb’ lix komon, ut ki’ok chixrahob’tesinkil, ut chixk’eeb’al naq eb’ li ralal xk’ajol te’xrahob’tesi li ralal xk’ajoleb’ a’an.

9 Xb’aan naq laj Amulon naxnaw ru laj Alma, naq wanjenaq chaq choq’ ^ajun reheb’ laj tij chiru li rey, ut naq a’an li kipaab’an chaq re li raatin laj Abinadi ut ki’alinasiik chaq chiru li rey, ut chi jo’kan kiwan xjosq’il rik’in; xb’aan naq a’an wan rub’el xwankil li rey aj Laman, a’ut kixk’anjela li wankilal sa’ xb’eeneb’, ut kixteneb’ li ^bk’anjel sa’ xb’eeneb’, ut kixk’eheb’ laj taqlanel moos sa’ xb’eeneb’.

10 Ut kik’ulman naq q’axal nim lix ch’a’ajkilaleb’, jo’kan naq ke’ok chi elajink chi anchaleb’ xmetz’ew chiru li Dios.

11 Ut laj Amulon kixtaqlaheb’ naq te’xkanab’ li elajink; ut kixk’eheb’ aj k’aak’alenel re te’xk’aak’aleheb’, re naq ani taatawe’q chixpatz’b’al xk’ab’a’ li Dios, a’an taak’ehe’q chi kamk.

12 Ut laj Alma ut eb’ lix tenamit ink’a’ ke’xtaqsi xyaab’eb’ xkux chiru li Qaawa’ lix Dios, a’b’anan ^ake’xhoy li raameb’ chiru, ut a’an kixnaw lix k’oxlahomeb’ xch’ool.

13 Ut kik’ulman naq lix yaab’ xkux li Qaawa’ kichal rik’ineb’ sa’ lix ch’a’ajkilaleb’, ut kixye: Taqsihomaq lee jolom ut k’ojk’ooq chi chaab’il eech’ool, xb’aan naq ninnaw li sumwank li xek’uub’ chiwu; ut laa’in tin’ok sa’ sumwank rik’in lin tenamit, ut teb’inkol chiru li moosil.

14 Ut jo’kan ajwi’ tinkotz li iiq li k’eeb’il sa’ xb’een lee tel, re naq ink’a’ ajwi’ texruuq chireek’ankil cherix, naq toj wankex chi moosil; ut a’in tinb’aanu re naq texruuq chi xaqliik moqon choq’ aj ^ayehol nawom chiwix, ut re naq teenaw chi ch’olch’o naq laa’in, li Qaawa’ Dios, nawula’aniheb’ lin tenamit sa’ lix ^bch’a’ajkilaleb’.

15 Ut anajwan kik’ulman naq li iiq li ke’k’ehe’ sa’ xb’een laj Alma ut eb’ lix komon ke’seeb’ob’resiik; relik chi yaal, li Qaawa’ ^akixk’eheb’ xmetz’ew re naq moko ch’a’aj ta chiruheb’ xk’amb’al li ^briiqeb’, ut ke’xq’axtesi rib’ chi saheb’ sa’ xch’ool ut rik’in ^ckuyuk chiru chixjunil li rajom li Qaawa’.

16 Ut kik’ulman naq q’axal nim lix paab’aaleb’ ut lix kuyumeb’, jo’kan naq lix yaab’ xkux li Qaawa’ kichal wi’chik rik’ineb’, ut kixye: K’ojk’ooq chi chaab’il eech’ool, xb’aan naq sa’ li kutan wulaj texinkol chiru li moosil.

17 Ut a’an kixye re laj Alma: Tatb’eeq chiru li tenamit a’in, ut laa’in tinxik aawochb’een ut tinkol li tenamit a’in chiru li ^amoosil.

18 Anajwan kik’ulman naq laj Alma ut eb’ lix tenamit chi q’ojyin ke’xch’utub’eb’ lix ketomq, ut jo’kan ajwi’ xkomon li riyajeb’ li nak’uxman; relik chi yaal, chiru chixjunil li q’ojyin yookeb’ chixch’utub’ankileb’ lix ketomq.

19 Ut chiru eq’la li Qaawa’ kixk’e chi chalk jun ^animla wara sa’ xb’eeneb’ laj Lamanita, relik chi yaal, ut chixjunileb’ laj taqlanel moos reheb’ warenaqeb’ chi tz’aqal.

20 Ut laj Alma ut eb’ lix tenamit xkoheb’ chiru li yamyookil ch’och’; ut chirix naq ke’b’eek chiru chixjunil li kutan ke’xyiib’eb’ lix muheb’aal t’ikr sa’ jun li ru taq’a, ut Alma ke’xk’e choq’ xk’ab’a’ li ru taq’a, xb’aan naq a’an kixk’ameb’ xb’e sa’ li yamyookil ch’och’.

21 Relik chi yaal, ut sa’ li ru taq’a Alma ke’xhoy ^axb’antioxihomeb’ chiru li Dios, xb’aan naq a’an kiruxtaanaheb’ chaq ru, ut kixkotz chaq li riiqeb’, ut kixkoleb’ chaq sa’ li moosil; xb’aan naq ke’wan chaq chi moosil, ut maajun kiru chi kolok reheb’, ka’ajwi’ li Qaawa’ lix Dios.

22 Ut ke’b’antioxin chiru li Dios, relik chi yaal, chixjunileb’ li winq ut li ixq reheb’, ut chixjunileb’ lix kok’al li neke’ru chi aatinak ke’xtaqsi xyaab’eb’ xkux re xnimankil ru lix Dios.

23 Ut anajwan li Qaawa’ kixye re laj Alma: Seeb’a aawib’, elen laa’at ut li tenamit a’in sa’ li ch’och’ a’in, xb’aan naq xe’aj ru laj Lamanita ut wankeb’ chetaaqenkil; jo’kan ut, elen sa’ li ch’och’ a’in, ut laa’in tinrameb’ ru laj Lamanita sa’ li ru taq’a a’in, re naq ink’a’ chik te’xik chixtaaqenkil li tenamit a’in.

24 Ut kik’ulman naq ke’el chaq sa’ li ru taq’a, ut ke’xchap xb’e sa’ li yamyookil ch’och’.

25 Ut chirix naq wanjenaqeb’ kab’laju kutan sa’ li yamyookil ch’och’ ke’wulak sa’ li ch’och’ Tzarahemla; ut li rey aj Mosiah kixk’uleb’ ajwi’ rik’in sahil ch’oolejil.