1 Oqo me vaka ni sa vakasalataki Alama na Turaga ni na mai valuti ira na mataivalu i Noa na tui; a sa tukuna na ka oqo vei ira na nona tamata, o koya era sa soqona kina na nodra qele ni manumanu kei na kedra sila, ka cavutu ki na lekutu ni ra sa bera mai na mataivalu i Noa na tui.

2 Ia sa vakaukauwataki ira na Turaga, ka ra sega kina ni toboki ira ko ira na tamata i Noa na tui me ra vakamatei ira.

3 Ka ra sa dro tiko ena lekutu me siga walu.

4 Ka ra sa qai yaco ki na dua na vanua, io, na vanua totoka ka bulabula sa tu kina na wai makare sara.

5 Era sa birika kina na nodra vale laca; ka tekivu me teivaka na qele ka tara vale; io era sa gumatua ka daucakacaka sara vakalevu.

6 Era sa gadreva na tamata me nodra tui ko Alama, ni ra sa taleitaki koya ko ira na nona tamata.

7 Ia sa kaya vei ira ko koya: Raica, sa sega ni ganita me dua na noda tui; ni sa kaya vakaoqo na Turaga: Dou ^akakua ni nanuma ni sa uasivi cake e dua mai vua tale e dua, se me dua na tamata e nanuma ni sa uasivi cake ko koya mai vua e dua tale na tamata; o koya oqo au sa kaya kina vei kemudou ni sa sega ni ganita me dua na nomudou tui.

8 Ia, kevaka e rawa me ra na tui tiko ga ko ira na tamata yalododonu, sa qai ganita me dua na nomudou tui.

9 Ia dou nanuma mada na ^acaka ca i Noa na tui kei ira na nona bete; ia au a ^bcoko talega ena dai ko ya, ka kitaka e vuqa na ka sa vakasisila ena mata ni Turaga, ia au sa rarawa kina vakalevu ena noqu veivutuni;

10 Ia ena levu ni ^aveivakararawataki, sa rogoca na noqu tagi na Turaga, ka sauma na noqu masu, a sa lesi au me’u iyaya ni cakacaka e ligana ka me’u kauti ^bkemuni mai mo ni kila na nona dina.

11 Ia au sa sega ni dokai au ena ka oqo, ni sa sega ni kilikili me’u dokai au kina.

12 Ia oqo au sa kaya vei kemudou, ni a vakasaurarataki kemudou ko Noa na tui, ka dou sa bobula vua kei ira na nona bete, ka sa vakavuna mo dou caka ca; o koya dou sa ^avesuki kina ki na ivesu ni caka ca.

13 Ia oqo ni ko ni sa vakabulai mai na ivesu oqo ena kaukauwa ni Kalou; io, mai na ligai Noa na tui kei ira na nona tamata, kei na ivau ni caka ca, ia oqo au sa gadreva mo dou ^atudei ena ^bbula galala dou sa vakagalalataki kina, ka ^ckakua ni vakararavi vua e dua na tamata me nomudou tui.

14 Mo dou kakua talega ni vakararavi vua e dua me nomudou ^aivakavuvuli se nomudou italatala, ka vakavo ko koya ga sa tamata ni Kalou ka sa lako ena nona sala ka muria tiko na nona ivakaro.

15 Ia sa vakavulici ira na nona tamata ko Alama me ra ^alomani ira na wekadra me vaka era sa lomani ira, ka me ^bkakua na veileti ena kedra maliwa.

16 Ia oqo, sa nodra ^abete levu ko Alama, o koya ka tauyavutaka na nodra lotu.

17 Ia sa yaco me sega e dua e tu vua na ^adodonu ni veiliutaki me vunau se veivakavulici vakavo ga kevaka sa lesi ena kaukauwa ni Kalou. Ia sai koya ga sa lesi ira kece na nodra bete kei na nodra ivakavuvuli; ia sa sega ni lesi e dua vakavo ga ke tamata dodonu.

18 O koya era sa qaravi ira kina na nodra tamata, ka ^avakani ira ena veika ni buladodonu.

19 Ka sa yaco mera sautu vakalevu sara ena vanua; era sa vakatoka me yaca ni vanua ko ya ko Ilami.

20 Ka sa yaco mera tubu ka sautu vakalevu sara ena vanua ko Ilami; era a tara e dua na koro, ka vakatoka me koro o Ilami.

21 Ia sa raica na Turaga ni sa dodonu me ^atotogitaki ira na nona tamata; io, a vakatovolea na nodra ^bdauvosota kei na nodra vakabauta.

22 Ia ko koya yadua sa ^avakararavi vua, ena ^blaveti cake ena siga mai muri. Io, sa yaco vakakina vei ira na tamata oqo.

23 Ia raica, au na vakaraitaka vei kemuni ni ra a vakabobulataki tu; ia ena sega ni dua me na sereki ira rawa, na Turaga na nodra Kalou duadua ga; io, na Kalou i Eparaama, kei Aisake, kei na Kalou i Jekope.

24 Ia sa yaco ni sa sereki ira ka vakaraitaka vei ira na nona kaukauwa levu, ka ra sa marau vakalevu sara.

25 Ia raica, sa yaco ni ra a tiko mai na vanua ko Ilami, io, ena koro ko Ilami, ka teitei tiko ena vanua vakavolivolita, raica a tiko mai na iyalayala ni vanua e dua na nodra mataivalu na Leimanaiti.

26 Oqo sa yaco mera dro mai na nodra veiwere ko ira na tamata i Alama, ka soqoni vata ki na koro ko Ilami; ka ra sa rere vakalevu ena nodra basika na Leimanaiti.

27 Ia sa lako ko Alama ka laki tu ena kedra maliwa, ka kaya me ra kakua ni rere, ia me ra nanuma ga na Turaga na nodra Kalou, ka na qai vueti ira ko Koya.

28 Ia era sa vosota na nodra rere ka tagi vua na Turaga me vakamalumalumutaka na lomadra na Leimanaiti, me ra kakua ni kitaka e dua na ka vei ira, kei ira na watidra kei na luvedra.

29 Ia sa yaco ni sa vakamalumalumutaka na Turaga na lomadra na Leimanaiti. A qai lako ko Alama kei ira na nona tamata me ra soli ira yani ki na ligadra; a ra sa taura na Leimanaiti me nodra na vanua ko Ilami.

30 Ia na nodra mataivalu na Leimanaiti, ka muri ira na tamata i Limiai na tui, era a sese voli ena lekutu ka vuqa na siga.

31 Ia raica, era a kunei ira na bete i Noa na tui; ena vanua ka ra vakatoka ko Emuloni; era sa taukena na vanua ko Emuloni ka teitei tiko ena vanua.

32 A yaca ni nodra iliuliu na bete ko ya ko Emuloni.

33 Ia sa yaco me vakamasuti ira na Leimanaiti ko Emuloni; a sa talai ira talega yani na watidra, ko ira na ^aluvedra goneyalewa na Leimanaiti, me ra la’ki vakamasuti ira na wekadra me ra kakua ni vakamatei ira na watidra.

34 Ia era sa ^alomani Emuloni kei ira na nona itokani ko ira na Leimanaiti, ka sega ni vakarusai ira ena vukudra na watidra.

35 Ia sa tovata kei ira na Leimanaiti ko Emuloni kei ira na nona itokani, ka ra sa lako tiko ena lekutu ka vakasaqara na vanua ko Nifai ena gauna era kunea kina na vanua ko Ilami, ka a taukena tiko ko Alama kei ira na wekana.

36 Ka sa yaco me ra yalataka na Leimanaiti vei Alama kei ira na nona itokani, ni kevaka me ra na vakaraitaka na sala kina vanua o Nifai, era na vakabulai ira ka solia talega vei ira na bula galala.

37 Ia ni sa vakatakila oti ko Alama na sala ki na vanua ko Nifai, era sa sega ni vakayacora na nodra yalayala ko ira na Leimanaiti; a ra sa lesia e so na sotia me ra ^ayadrava wavolita na vanua ko Ilami vata kei Alama kei ira na wekana.

38 Ia era sa lako na kena vo ki na vanua ko Nifai; era qai lesu tale mai ki na vanua ko Ilami e so vei ira, ka ra kauti ira mai na watidra kei na luvedra na sotia era a lesi me ra yadrava tiko na vanua ko ya.

39 Ia na nodra tui na Leimanaiti sa lesi Emuloni me tui ka lewai ira na nona tamata ka ra tiko ena vanua ko Ilami; ia me kakua sara ni vakayacora e dua na lewa ka sega ni tautauvata kei na nona lewa na nodra tui na Leimanaiti.