Mosaia 19
    Footnotes

    Wase 19

    Sa segata me vakamatei Noa na Tui ko Kitioni—Era sa valuta na vanua na Leimanaiti—Sa vakamatei ena bukawaqa ko Noa na Tui—Sa veiliutaki ko Limiai me ivukevuke vua na tui levu. Rauta na 145–121 B.K.

    1 Ka sa yaco ni ra sa lesu wale mai na mataivalu ni tui, ni sa tawayaga na nodra vakasaqarai ira na tamata ni Turaga.

    2 Ia raica oqo, era sa lewelailai sara na mataivalu ni tui, ni ra sa vakalailaitaki, ka sa tekivu me ra veisei na vo ni tamata.

    3 Ia e vica vei ira era sa vosa vakacacataka na tui, ka sa tubu kina na veileti levu ena kedra maliwa.

    4 A sa dua vei ira na yacana ko Kitioni, a turaga kaukauwa ka sa veimecaki kei na tui; a sa ucuna ko koya na nona iseleiwau ka bubului ena nona cudru ni na vakamatea na tui.

    5 Ka sa yaco ni sa vala kei koya na tui; ia ni sa raica na tui ni sa voleka me rawai koya, sa dro ka la’ki toka ki na avale cecere ka tu volekata na valetabu.

    6 A sa cemuri koya ko Kitioni ka sa vakarau me cabeta sara na vale cecere me vakamatea na tui, ia sa veiraiyaki na tui ka rai vaka ki na vanua ko Semiloni, ka raica, e ra sa curuma mai na iyalayala ni vanua ko ira na mataivalu ni Leimanaiti.

    7 A sa vakamamasu ena yaluma ni yalona, na tui, ka kaya: Mo vakabulai au Kitioni, raica era sa kabai keda mai ko ira na Leimanaiti, ka ra na vakarusai keda; io, era na vakarusai ira na noqu tamata.

    8 Ia oqo sa sega ni kauwaitaki ira dina na nona tamata na tui, sa kauwaitaka vakalevu ga na nona bula; ia sa vakabulai koya ko Kitioni.

    9 A sa vakarota na tui me ra drotaki ira na Leimanaiti, ka sa liutaki ira ko koya, ka ra sa dro ki na lekutu, na nodra yalewa kei na luvedra.

    10 Ka sa yaco ni ra sa cici muri ira ko ira na Leimanaiti, era sa toboki ira, ka tekivu me vakamatei ira.

    11 Ka sa yaco ni sa qai vakarota na tui vei ira na tagane me ra biuta tu mai na watidra kei na luvedra ka drotaki ira na Leimanaiti.

    12 Sa lewe levu era sega ni via biuti ira tu mai, sa vinaka cake vei ira me ra mate vata ga. Ia ko ira na kena vo era sa biuta tu mai na watidra kei na luvedra ka ra dro yani.

    13 Ka sa yaco ni ko ira ka a tiko vata mai kei ira na watidra kei na luvedra, era sa talai ira yani na luvedra yalewa totoka me ra vakamasuti ira na Leimanaiti me ra kakua ni vakamatei ira.

    14 Ka sa yaco mera lomani ira ko ira na Leimanaiti, ni ra sa domona na kedra totoka na nodra goneyalewa.

    15 A ra sa vakabulai ira kina ko ira na Leimanaiti, ka kauti ira lesu vakavesu ki na vanua ko Nifai, ka vakadonuya me ra taukena tale na vanua, ia me ra na qai soli Noa na tui vei ira na Leimanaiti, ka me ra dausolia na nodra iyau, io na veimama ni ka era taukena, na veimama ni nodra koula, kei na nodra siliva, kei na nodra iyau talei kecega; ia me ra dausauma na ivakacavacava oqo vua na nodra tui na Leimanaiti e na veiyabaki.

    16 Ia oqo a sa tiko maliwai ira na vesu e dua vei ira na luvena tagane na tui ka yacana ko aLimiai.

    17 Ia oqo sa gadreva ko Limiai me kakua ni vakarusai ko tamana; e dina ga ni kila ko Limiai na caka ca nei tamana, ka ni sa tamata dodonu ko koya.

    18 Ka sa yaco ni sa tala lo yani e so na tamata ko Kitioni ki na lekutu, me ra vakasaqara na tui kei ira ka lako vata kaya. Ka sa yaco ni ra sa sota ena lekutu, ko ira kece ka vakavo ga na tui kei ira na nona bete.

    19 Ko ira oqo era sa bubului e lomadra me ra lesu tale ki na vanua ko Nifai; ia kevaka era sa vakamatei na watidra kei na luvedra kei ira kece ka tu laivi mai, era na segata me ra na sauma lesu ka mate talega vata kei ira.

    20 Ia sa vakarota na tui me ra kua ni lesu tale; era sa cudruva na tui ka vakararawataki koya, me yacova sara ni sa avakamatei ena bukawaqa.

    21 Ia era sa via vesuki ira talega na bete me ra vakamatei ira, ia era qai dro tani yani.

    22 Ka sa yaco ni ra sa vakarau lesu tale ki na vanua ko Nifai, era sa sota kei ira na tamata i Kitioni. Era sa qai tukuna na tamata i Kitioni na ka sa yacovi ira na watidra kei na luvedra, kei na nodra sa solia na Leimanaiti me ra taukena tale na vanua; ia me ra dau solia e dua na ivakacavacava vei ira Leimanaiti oya na veimama ni ka era taukena.

    23 Era sa qai tukuna vei ira na tamata i Kitioni ni ra sa vakamatea na tui; ia ko ira na nona bete era sa dro vakayawa yani mai vei ira ki na loma ni lekutu.

    24 Ka sa yaco ni ra sa tinia na nodra soqo ni veitukutukuni, era sa lesu tale ena marau ki na vanua ko Nifai ni ra sa sega ni vakamatei na watidra kei na luvedra; a ra sa tukuna vei Kitioni na ka era sa kitaka vua na tui.

    25 Ka sa yaco ni sa abubului na nodra tui na Leimanaiti ni ra na sega ni vakamatei ira ko ira na nona tamata.

    26 Ia ko Limiai talega, me vaka ni luvena na tui, ka ra sa asolia vua na tamata na matanitu vakatui, a sa bubuluitaka vua na nodra tui na Leimani ni ra na dausolia vua na nodra ivakacavacava me veimama ni ka era taukena.

    27 A sa yaco ni sa vakadeitaka tale ko Limiai na matanitu vakatui kei na nodra bula sautu na nona tamata.

    28 Ia sa talai ira na nona sotia na nodra tui na Leimanaiti me ra yadrava vakavolivolita na vanua, ka me ra tiko ga na tamata i Limiai ka kakua ni lesu ki na lekutu; a sa saumi ira na nona sotia e na ivakacavacava ka a taura mai vei ira na Nifaiti.

    29 A sa tiko vakacegu ko Limiai na tui ena nona matanitu vakatui me rua na yabaki; era sa sega ni vakacacani ira se segata me ra vakarusai ira ko ira na Leimanaiti.