Mosaia 21
    Footnotes

    Wase 21

    Era sa yaviti ka vakadrukai na tamata i Limiai mai vei ira na Leimanaiti—Era sa sota vata kei Amoni ko ira na tamata i Limiai ka ra sa saumaki—Era sa tukuna vei Amoni me baleta na ruasagavulu ka va na nodra peleti na Jeretaiti. Rauta na 122–121 B.K.

    1 Ia sa yaco ni ra sa lesu tale ki na koro ko Nifai ko Limiai kei ira na nona tamata, ka yaco me ra tiko sautu tale ena vanua ko ya.

    2 Ia sa yaco ni sa oti mada e vuqa na siga sa qai tekivu me ra vakayavalati cake tale na Leimani me ra cudruvi ira na Nifaiti; a ra sa tekivu curuma mai na iyalayala ka vakavolivolita na vanua.

    3 Ia era sa sega ni yaviti ira ena vuku ni bubului ka a cakava na nodra tui vei Limiai; ia era sa dau sabica ga na abaludra, ka taurivaka vei ira na lewa kaukauwa; era sa vakataqara e dakudra na bicolacola bibi, ka vakasaurarataki ira me vaka na asa sa galu—

    4 Io, sa yaco na ka kece oqo me vakayacori kina na vosa ni Turaga.

    5 Ia oqo sa ka levu na nodra vakararawataki na Nifaiti, ka sa sega ni tiko e dua na sala me ra sereki ira mai kina, ni ra sa vakavolivoliti ira ena yasana kecega ko ira na Leimanaiti.

    6 Ka sa yaco mera vosakudrukudrutaka tiko vua na tui na nodra rarawa; kei na nodra gadreva me ra la’ki valuti ira. Era a vakasosataka na tui ena nodra kudru ka vakadonuya kina ko koya me ra kitaka na ka era sa gadreva.

    7 Era sa soqoni vata tale, ka tokara na nodra iyaragi, ka lako yani me ra vakasavi ira tani na Leimanaiti mai na nodra vanua.

    8 Ka sa yaco mera mokuti ira mai ko ira na Leimanaiti, ka vakasavi ira lesu, ka vakamatea e vuqa vei ira.

    9 Ia oqo sa yaco na qoqolou kei na asomate levu vei ira na tamata i Limiai; sa tagicaki watina ko koya na yada, na luvedra tagane kei na yalewa era sa tagicaki ira na tamadra kei ira na tagane me baleti ira na tacidra.

    10 Ia era sa lewe levu na yada ena vanua, ka ra sa dautagi vakalevu e veisiga ni ra sa rui rerevaki ira vakalevu na Leimanaiti.

    11 Ia sa yaco na nodra dautagi tiko me vakayavalati ira na vo ni tamata i Limiai me ra cudruvaki ira na Leimanaiti; era sa la’ki vala tale, ia era a vakasavi lesu mai ka vuqa tale e mate kina.

    12 Io, era a baci lesu tale ena ikatolu ni gauna; ka ra vakararawataki ga mai me vaka e liu; ia ko ira era bula mai era sa lesu tale ki na koro ko Nifai.

    13 Era sa vakayalomalumalumutaki ira sara me vaka na kuvu ni soso; era sa vosota na ivua ni vakabobulataki, ka laiva me ra yaviti, me ra veikauyaki vaka ka vaka ka vakacolati ena icolacola bibi me vaka na nodra gagadre na nodra meca.

    14 Ia era sa avakayalomalumalumutaki ira io ena yalomalumalumu titobu sara; ka tagi vagumatua sara vua na Kalou; io, era sa tagi vua na nodra Kalou ena siga taucoko me sereki ira mai na nodra vakararawataki.

    15 A sa aberabera ni rogoca na Turaga na nodra tagi ena vuku ni nodra caka ca; ia sa qai rogoca na Turaga na nodra tagi ka vakamalumalumutaka na lomadra na Leimanaiti, ka sa tekivu me ra vakamamadataka na nodra icolacola; ia e sega ga ni vakadonuya na Turaga me sa tei vueti ira mada mai na nodra vakabobulataki.

    16 Ka sa yaco ni sa tekivu me ra sautu tale tiko mai vakamalua ena vanua; a sa levu cake na nodra sila kei na nodra qele ni manumanu lalai kei na qele ni manumanu lelevu, ka ra sega ni leqa ena kakana.

    17 Ia era sa lewelevu cake na yalewa mai vei ira na tagane; a sa vakarota kina ko Limiai na tui kivei ira na tagane me ra adau vukei ira na byada kei ira na luvedra me kakua ni dua e mate ena viakana; era sa kitaka oqo ni sa lewelevu na tagane era sa vakamatei.

    18 Oqo era sa dautiko vata voli ga na tamata i Limiai ka vakatawa na nodra sila kei na nodra qele ni manumanu;

    19 Ia sa sega talega ni doudou na tui me lako ki na taudaku ni koro kevaka e sega ni lako vata kei ira na nona sotia, ni sa rerevaka de dua na ka e yaco, ka ra qai vesuki koya na Leimanaiti.

    20 A sa vakaroti ira na nona tamata me ra vakaraica wavoki tiko na vanua, de rawa ni ra vesuki ira na bete era a dro ki na lekutu, ka ra a drotaki ira na aluvedra goneyalewa na Leimanaiti, o koya sa yaco kina vei ira na veivakarusai levu oqo.

    21 Era sa gadreva sara me ra vesuki ira me rawa ni ra mai totogitaki; ka ni ra sa daulako mai ena bogi ki na vanua ko Nifai ka butakoca na kedra sila kei na vuqa na nodra iyau talei; a ka oqo era sa dauwaraki ira toka kina.

    22 Ka sa yaco ni sa mudu na tiko yavavala ena kedra maliwa na Leimanaiti kei na tamata i Limiai, me yacova sara ni sa tadu yani kina vanua ko aAmoni kei ira na nona itokani.

    23 Ia ni baci tiko voli na tui kei ira na nona sotia ena taudaku ni koro, a kunei Amoni kina kei ira na nona itokani; a nanuma ni ra bete i Noa ka lewa me ra vesu mai ka biu ki na avale ni veivesu. Ia ke ra a bete dina i Noa, ke sa vakamatei ira.

    24 Ia ni sa qai kila ni sega, ka sai ira na wekana era lako mai na vanua ko Saraemala, sa vuabale na nona marau.

    25 Ia ko Limiai na tui a sa tala oti, ni bera ni tadu yani ko Amoni, e aso na tamata me ra bvakasaqara na vanua ko Saraemala; ia era a lako sese voli ena lekutu ka sega ni kunea.

    26 Ia era a kunea ga e dua na vanua ka ra sa tawana oti e dua na mata tamata; io, a vanua sa sinai tu kina na asui mamaca; io, a vanua ka sa tawani oti ka sa vakarusai; ia ni ra sa nanuma ni vanua ko Saraemala, era sa lesu tale mai ki na vanua ko Nifai; era a yaco mai kina ni vo ga e vica na siga me tadu yani ko Amoni.

    27 Ia era a kauta mai na ivolatukutuku, io na kedra itukutuku na tamata era a kunea na suidra; ka ceuti ena peleti ka buli mai na oa.

    28 Ia a sa vuabale na marau i Limiai ni sa tukuna ko Amoni ni tu vei Mosaia na tui e dua na aisolisoli ni Kalou, ka rawa kina me vakadewataka na iceuceu vakaoqo; io, a sa marau talega ko Amoni.

    29 Ia sa rarawa vakalevu ko Amoni kei iratou na nona itokani ni ra sa vakamatei e vuqa na wekadra;

    30 Ia ko Noa talega na tui kei ira na nona bete era a vakavuna me ra vakayacora e vuqa na ivalavala ca kei na caka ca ko ira na tamata vua na Kalou; era rarawataka talega na mate i aApinatai, kei na nona btoki tani ko Alama kei ira ka lako vata kaya ka’ra a vakaduria na lotu ni Kalou ena igu kei na kaukauwa ni Kalou kei na nodra a vakabauta na vosa ka a vosataka ko Apinatai.

    31 Io era rarawataka na nodra lako ni ra sega ni kila na vanua era dro kina. Oqo era na marau vakaidina me ra la’ki duavata, ka ni ko ira oqo era sa veiyalayalati kei na Kalou me ra qaravi Koya ka muria na nona ivakaro.

    32 Ia mai na gauna ka lako mai kina ko Amoni, sa veiyalayalati talega kei na Kalou na tui ko Limiai, kei na vuqa talega na nona tamata me ra qarava ka muria na nona ivakaro.

    33 Ka sa yaco ni sa gadreva sara ko Limiai na tui kei na vuqa na nona tamata me ra papitaiso; ia sa sega e dua mai kea sa tu vua na akaukauwa mai vua na Kalou me veipapitaisotaki. E sega ni via vakayacora na cakacaka oqo ko Amoni, ni sa kila tu ni sega ni kilikili kaya.

    34 O koya era a sega kina ni vakaduria ena gauna ko ya e dua na lotu, era sa waraka ga na Yalo ni Turaga. Oqo era sa gadreva sara me ra vakataki Alama kei ira na wekana ka ra sa dro ki na lekutu.

    35 Era sa gadreva me ra papitaiso me ivakadinadina ka ivakatakilakila ni sa lomadra me ra qarava na Kalou ena yalodra taucoko; ia era sa yaraka ga na kena gauna; ia ena qai atukuni na itukutuku ni nodra papitaiso ena dua na gauna mai muri.

    36 Ia oqo a sa vakasamataka ko Amoni kei ira na nona tamata, vata kei Limiai na tui kei ira na nona tamata, na ka me ra kitaka me ra sereki kina mai na ligadra na Leimanaiti kei na veivakabobulataki.