iVolanikalou
Mosaia 9


Na iTukutuku kei Senifi—E dua na kedra itukutuku na nona tamata, mai na gauna era a biuta mai kina na vanua ko Saraemala me yacova na gauna era sa sereki kina mai na ligadra na Leimanaiti.

Okati ena wase e 9 ki na wase e 22.

Wase 9

Sa liutaka ko Senifi e dua na ilawalawa mai Saraemala me laki taukena na vanua ko Liai-Nifai—Sa vakatara na nodra tui na Leimanaiti mera taukena na vanua—Sa tubu na ivalu ena kedra maliwa na Leimanaiti kei ira na tamata i Senifi. Rauta na 200–187 B.K.

1 Koi au, ko Senifi, au a vakavulici ena vosa kece vaka Nifaiti, ka’u sa kila tu na avanua ko Nifai, se na vanua ka nodra ivotavota vakawa taumada na neimami qase, ka’u a talai me’u dua na yamata vuni ena kedra maliwa na Leimanaiti me’u raica mai na nodra mataivalu, me ra na qai kabai ira yani na neimami mataivalu ka vakarusai ira—ia ni’u sa raica na veika vinaka sa tu vei ira au sa gadreva me ra kakua ni vakarusai.

2 O koya, au sa cikevi ira kina na wekaqu ena lekutu, ni’u gadreva me cakava e dua na veidinadinati kei ira ko koya na neimami iliuliu; ia me vaka ni sa tamata yalo kaukauwa ka dau taleitaka na vakadave dra ko koya, sa vakarota kina me’u vakamatei; ia a qai vakabulai au ga ena vakadave dra levu, ni ra sa veivala na tama kei na tama, kei ira na veitacini, ka ra mate kina ena lekutu na iwase levu cake ni neimami mataivalu; ka keimami a lesu tale, koi keimami ka sega ni mate, ki na vanua ko Saraemala, me la’ki tukuna na itukutuku vei ira na watidra kei na luvedra.

3 Ia, me vaka ni’u sa gadreva vakalevu sara me’u taukena na nodra vanua na neimami qase, au sa vakasokumuni ira vata kina ko ira kece era vinakata me keimami lako cake vata ka la’ki taukena na vanua, ka keimami sa tekivutaka tale na neimami ilakolako ena lekutu me lako cake ki na vanua; ia keimami a yaviti ena dausiga kei na veivakararawataki ca sara; ni keimami a berabera ni nanuma na Turaga na neimami Kalou.

4 Ia, ni sa oti e vuqa na siga na neimami veilakoyaki voli ena lekutu keimami sa qai birika na neimami valelaca ena vanua ka ra a bale mate kina na wekai keimami, ka volekata sara na nodra vanua na neimami qase.

5 Ka sa yaco ni’u a lako tale kei na lewe va na noqu tamata ki na koro, ki vua na tui, me’u kila kina na lomana, ka me’u kila talega kina se rawa me’u lako yani kei ira na noqu tamata me keimami taukena na vanua ena yalo ni veisaututaki.

6 Ka’u a lako vua na tui, ka keirau veiyalayalatitaka me’u taukena na vanua ko Liai-Nifai, kei na vanua ko Sailomi.

7 A sa vakaroti ira talega na nona tamata me ra toki tani mai na vanua, ka’u sa lako yani kei ira na noqu tamata me keimami taukena.

8 Sa tekivu me keimami tara vale, ka vakavinakataka na bai ni koro, io, na bai ni koro ko Liai-Nifai, kei na koro ko Sailomi.

9 Ka keimami sa tekivu me teivaka na qele, io, ena veimataqali sore ni kau kecega, na sore ni sila, kei na witi, kei na bali, kei na niasi, kei na seumi, kei na sore ni veimataqali vuanikau kecega; ka keimami sa tekivu me tubu ka lewe levu ka tiko sautu ena vanua.

10 Ia sa ilawaki ka ivadi qaseqase i Leimani na tui, me akauti ira kina na noqu tamata ki na tiko vakabobula, ka a solia kina na vanua me keimami taukena.

11 O koya sa yaco kina ni keimami a tawana tiko na vanua ena loma ni tinikarua na yabaki sa tekivu me nuiqawaqawa mai ko Leimani na tui, de ra na tubu me ra kaukauwa vakalevu sara na noqu tamata ena vanua, ka ra na sega ni vakamalumalumutaki ira rawa ka vakabobulataki ira.

12 Ia, era a sa tamata vucesa ka dau aqaravi kalou matakau; o koya era sa vinakata kina me ra vakabobulataki keimami, me ra na kana tiko kina mai na cakacaka ni ligai keimami; io, me ra kana magiti mai na qele ni manumanu ni neimami lomanibai.

13 O koya sa yaco kina ni sa tekivu me vakayavalati ira na nona tamata ko Leimani na tui me ra veileti kei ira na noqu tamata; a sa tekivu kina na ivalu kei na veicacati e loma ni vanua.

14 Ia, ena ikatini katolu ni yabaki ni noqu veiliutaki ena vanua ko Nifai, ni ra sa vagunu ka vakana manumanu ka teitei tiko ko ira na noqu tamata mai na ceva ni vanua ko Sailomi, era a lako yani kina e lewevuqa na Leimanaiti ka tekivu me vakamatei ira, ka ra kauta na nodra manumanu, kei na sila mai na nodra veiwere.

15 Io, ka sa yaco ni ra a dro, ko ira kece era a sega ni toboki, ki na koro ko Nifai, ka ra mai kerei au me’u taqomaki ira.

16 Ka sa yaco ni’u a vakaiyaragitaki ira ena dakai titi, kei na gasau, kei na iseleiwau, kei na isele takelo, kei na i wau, kei na irabo, kei na veimataqali yaragi kecega keimami bulia rawa, ka keimami a lako yani, koi au kei ira na noqu tamata, me keimami vala kei ira na Leimanaiti.

17 Io, keimami sa lako yani ena kaukauwa ni Turaga me veivala kei ira na Leimanaiti; ni keimami a tagi vagumatua vua na Turaga, koi au kei ira na noqu tamata, me sereki keimami mai na ligadra na neimami meca, ni keimami sa qai vakayadrati me keimami nanuma na nodra a veisereki na neimami qase.

18 A sa arogoca na neimami tagi na Kalou ka sauma na neimami masu; ka keimami sa lako yani ena nona kaukauwa; io, keimami sa lako yani vei ira na Leimanaiti, ia ena dua na siga ka dua na bogi keimami vakamatea kina e tolu na udolu ka vasagavulu katolu; keimami sa vakamatei ira sara me yacova ni keimami sa vakasavi ira tani mai na neimami vanua.

19 Ia koi au, au a veivuke ena ligaqu ena nodra buluti na nodra mate. Ka raica, keimami sa rarawataka ka tagicaka vakalevu na nodra mate e lewe rua na drau vitusagavulu ka ciwa na wekai keimami.