Ri Wuj Rech Ri Moroni
U tas 1
Ri Moroni cʼo u tuqʼuiel; cätzʼibanic rumal rech chi cäraj chi cʼo na rutzil qui wäch ri aj Lamanitas.
1 Are cʼu ri in, Moroni, xinqʼuis u chʼutinirisaxic u cholaj che ri u tzʼibaxic ri tzijol que ri aj Jareditas, man xinchomaj taj chi quintzʼiban chic na. Tzare majaʼ in cäminak. Y man quincʼut tä wib chquiwäch ri aj Lamanitas, cäraj ne cäquisäch na nu wäch.
2 Kas jeʼ cäquiban cʼanalaj tak chʼoʼj chquixol. Rumal ri itzel qui rayibal, cäquicämisaj ronojel aj Nefita ri man cuxutuj taj ri Cristo.
3 Are cʼu ri in, Moroni, man quinxutuj tä na ri Cristo. Rumal waʼ, quinbinic apawije cuyaʼ wi chuchajixic ri nu cʼaslemal.
4 Jeʼ baʼ, nabe canok xinbij pa nu cʼux chi man quintzʼibaj tä na. Wachanim cʼut quintzʼibaj jujun tak tzij chque ri wachalal, are ri aj Lamanitas. Quinban waʼ rech chi we ne cʼo qui patan chquiwäch pa jun kʼij ri cäpe na, je jas u beyal ri u rayibal ri Ajawaxel.