1 Wachanim quintzijon chque ri man quecojon tä che ri Cristo.

2 Chiwilampeʼ ¿la quixcojon na pa ri jun kʼij ri cäpe ri Ajawaxel che rilic i wäch? Kas jeʼ, ¿la quixcojon na pa ri jun kʼij cäbotot na ri u wächulew je ri jun bolobic wuj, y cäjaʼric na ronojel rumal jun nimalaj kʼakʼ? ¿La quixcojon na pa ri jun nimalaj kʼij ri quixtacʼabax na chuwäch ri alaj u Chij ri Dios? Cʼäte riʼ, ¿la quibij na chi man cʼo tä jun Dios?

3 ¿La quibij na chi man cʼo tä ri Cristo, are quixcuinic na chucaʼyexic ri alaj u Chij ri Dios? ¿La quichomaj chi quixcʼojiʼ na rucʼ ri areʼ we tä quichʼobo ri man utz taj i banom? ¿La quichomaj chi cäpe tä ne jun quicotemal pa iwanimaʼ we tä quixcʼojiʼ rucʼ ri jun Lokʼalaxel, we quichʼob ri man utz tä i banom, chi junalic i xalkʼatim ri u takbal?

4 Chiwilampeʼ, quinbij chiwe chi ri itzel quirik na we quixbec chuwäch ri chʼajchʼojalaj tzʼakat Dios rucʼ iwetamabal chi ix tzʼil chuwäch. Waʼ cubij chi mas utz chiwe we quixbec cucʼ ri nicʼaj cʼokoninak winak pa xibalba.

5 Chiwilampeʼ, cäban na chiwe rech quiwil chi ix chʼanalic chuwäch ri Dios. Y cäban na chiwe rech quiwil na ri u juluwem ri Dios, y ri u chʼajchʼojil ri Jesucristo. Cʼäte riʼ, cäcʼatisax na jun u rep kʼakʼ pa iwanimaʼ ri man cächup taj.

6 O ri ix ri man ix cojonelab chitzolkʼomij iwib che ri Ajawaxel. Chicojoʼ i chukʼab che u siqʼuixic ri Tataxel pa ri u biʼ ri Jesús, rech cʼu jewaʼ we ne quixilataj na chʼajchʼoj, sucʼ, jeʼlic, y sak, pa ri nimalaj qʼuisbal kʼij. Y ix chʼajchʼojarisam rumal ri u quiqʼuel ri Alaj Chij, pa ri nimalaj qʼuisbal kʼij.

7 Y jumul chic quintzijon chiwe ix, ri quibij chi man cʼo taj u kʼalajisanem ri Dios, ri quibij chi qʼuisinak chic, y chi man cʼo tä chic kʼalajisanem, ix ri quibij chi man cʼo tä kʼalajisabal che ri cäpe na, y chi man cʼo tä ri u sipanic ri Dios, mawi tak ri cunanem, mawi ri qui tzijobal tak chʼabal, mawi ri qui kʼaxabal tak chʼabal;

8 Kastzij quinbij chiwe, apachin ri cäxutuj waʼ, are man cuchʼob tä ri lokʼalaj u tzijobal ri Cristo. Y xukujeʼ man u siqʼuim tä qui wäch ri lokʼalaj tak wuj. Y we tä kas u siqʼuim qui wäch, man cuchʼob tä ri tzij cʼo chquipam.

9 Y ketaʼm chi ri Dios are xaʼ junam iwir, camic, y cäbe kʼij sak. ¿La ma tä cäkil waʼ chquipam ri lokʼalaj tak wuj? ¿La ma tä cäkachʼob tä chi ri areʼ man quieb tä u wäch, mawi xaʼ jun mujal re u qʼuexic?

10 Are cʼu riʼ, we i chomam pa i cʼux jun Dios quieb u wäch ri cʼo pa ranimaʼ, jun ri mawi jubikʼ cäqʼuexowic, are cʼu ri we i chomam jeriʼ pa i cʼux, quichomaj chi Dios man cuban tä mayibal;

11 Chiwilampeʼ, cʼut, quincʼut na chiwe jun Dios banal tak mayibal. Are riʼ ri Dios re Abraham, areʼ ri Dios re Isaac, areʼ ri Dios re Jacob. Are riʼ kas ri jun Dios ri xuban ri caj y ri ulew, y ronojel jas ri e cʼo chquiwäch.

12 Kastzij xuwinakirisaj ri Adán. Rumal ri Adán, xpe ri u kajic ri achi. Y rumal ri qui kajic ri winak, xpe ulok cʼu ri Jesucristo, are riʼ ri Tataxel y ri Cʼojolaxel. Y rumal ri Jesucristo, bantajinak ulok ri esabal macaj que ri winak.

13 Y rumal rech ri esabal macaj, ri banom rumal ri Jesucristo, quetzeletaj ulok ri winak chuwäch ri Ajawaxel. Kas jewaʼ u banic ri esabal macaj que conojel ri winak, rumal ri cʼastijabal bantajinak rumal ri u cämical ri Cristo. Rumal cʼu ri cʼastajibal chquixol ri cäminakib, bantajinak ri qui colotajic ri winak chupam jun junalic qui waram. Conojel winak quecʼastaj na chupam we waram riʼ rumal ri u cuinem ri Dios, are cʼut cokʼesaxic ri suʼ y quel na ulok, chi e chʼutik chi e nimak, y conojel riʼ quetaqʼuiʼ na chuwäch ri lokʼalaj kʼatbal u tzij. E colotajinak, e tzokopital chrij ri junalic u ximabal ri cämical. Ri cämical riʼ, are cʼut ri jun cämical man naj tä riʼ.

14 Cäte cʼu riʼ, cäpe ri kʼatbal tzij re ri jun Lokʼalaxel paquiwiʼ. Cʼäte ri, cäpe ri jun kʼijal ri tzʼilalaj winak are cutakej u banic ri tzʼilol, y ri sucʼumalaj winak cutakej u banic sucʼumalaj winak. Ri quequicotic pa ri kʼij riʼ, cʼä quequicot na. Ri quebisonic pa ri kʼij riʼ, cʼä quebison na.

15 Wachanim cʼut, ix i chomam pa i cʼux iwachbil tak iwib jun i Dios ri man cäcuin tä chubanic tak mayibal, quintaʼ chiwe: ¿La ocʼowinak ronojel tak waʼ ri nu bim? ¿La petinak wi ri qʼuisbal kʼij? Kastzij quinbij chiwe: Man are taj. Ri Dios cʼut man qʼuextajinak u banic. Areʼ cʼä jun Dios banal tak mayibal.

16 Chiwilampeʼ, ri jastak ri u banom ri Dios, ¿la ma tä mayibal ri jastak ri u banom ri Dios chkawäch? Kas jeʼ, ¿jachin cäcuinic cuchʼobic ri mayalaj jastak re ri Dios?

17 Rumal ri tzij, xecʼojiʼ ri u pa caj y ri uwächulew. Y rumal ri u cuinem u tzij, xuwinakirisaj ri achi che ri cʼajcʼaj ulew. Y rumal ri u cuinem ri u tzij, e bantajinak tak mayibal. ¿Jachin cubij na chi man mayibal tä laʼ?

18 ¿Jachin cʼut cubij na chi ri Jesucristo man xuban tä nimalaj tak mayibal? Xukujeʼ e cʼo qʼui nimalaj tak mayibal ri xebantaj che ri qui kʼab ri apostolib.

19 Xebantaj cʼu ri tak mayibal pa tak ri kʼij riʼ. Are cʼu riʼ, ¿jasche ri Dios man cuban tä chi jun Dios ri cäbanow tak mayibal? Are cʼut, we man cuban tä chic tak mayibal, ¿jas u banic cäbix chi ri areʼ man cʼo tä u qʼuexic? Chiwilampeʼ cʼut, quinbij chiwe chi ri areʼ kas man cuqʼuex tä rib. Y we tä cuqʼuex rib, are cʼut man areʼ tä ri Dios. Are baʼ cʼä cuban Dios, y ri areʼ jun Dios ri cuban tak mayibal.

20 ¿Y jasche man cuban tä qʼui tak ri u mayibal chquixol ri calcʼual que ri winak? Are cʼu riʼ rumal ri qui kajic pa ri man cojonic taj. Cäquijechʼbaʼ quib pa ri sucʼumalaj beyal. Rajwaxic quecojon na che ri Dios, y man cäquichʼob tä ri u wäch.

21 Kastzij quinbij chiwe chi we quixcojon che ri Cristo, y we man quiban tä quieb i cʼux, cʼäte cʼu riʼ, apasach ri quitaʼ che ri Tataxel pa ri u biʼ ri Cristo, are riʼ cäyataj na chiwe. Y xbantaj we yabal tzij chque conojel cʼä pa tak ri cʼulbat re ri uwächulew.

22 Chiwilampeʼ, xel ri u tzij ri Jesucristo, ri u Cʼojol ri Dios chque ri u tijoxelab, y xukujeʼ xubij ri u tzij chque conojel ri u tijoxelab ri quecʼojiʼ na. Y cʼo sibalaj winak qui mulim quib. Areʼ xukujeʼ xquitaʼ ri u tzij ri Jesucristo, y xubij: Jix cho ronojel ri uwächulew. Chitzijoj ri lokʼalaj tzijobal chque conojel ri winak.

23 Apachin ri cäcojonic y cuban u kasabal xeʼ jaʼ cäcolotaj na, tzare apachin cʼu ri man cäcojon taj, are cäcʼajisaj na u wäch.

24 Ri areʼ ri quecojonic, cäquiban na we etal riʼ: Pa ri nu biʼ, quequesaj na itzel tak uxlabal, y quetzijon na pa cʼacʼ tak chʼabal. Quequichap na cumätz, y we cäquitij jastak ri quecämisanic, man cuban tä na cʼäx chque. Cäquiyaʼ na ri qui kʼab paquiwiʼ ri yawabib, y quebutzir cʼu na.

25 Apachin cʼu ri cäcojon na che ri nu biʼ, ri man cuban tä quie u cʼux, quintzʼakatisaj na ronojel ri nu tzij che, cʼä pa tak ri u cʼulbat ri uwächulew.

26 Chiwilampeʼ, ¿jachin cucʼululaj na ri u chac ri Ajawaxel? ¿Jachin cäcuinic chuxutuxic ri u tzij? ¿Jachin cäwalij na chrij ri mayalaj u cuinem ri Ajawaxel? ¿Jachin cäril na u chac ri Ajawaxel chi itzel? Chiwilampeʼ, iwonojel ix ri quixutuj ri u chac ri Ajawaxel, ix quixmayin na, y quixcämic.

27 Rumal cʼu riʼ, man itzel tä quiwilo. Mixmayinic. Chitatabej cʼu ri u tzij ri Ajawaxel. Chitzʼonoj che ri Tataxel pa ri u biʼ ri Jesús che apasach ri rajwaxic chiwe. Miban quieb i cʼux, xane chixcojonok cʼut, y chichaplej chi ronojel je jas najtir canok. Chixkebok che ri Ajawaxel rucʼ ronojel iwanimaʼ. Chisucʼumaj ri i colotajibal rucʼ i xen ib y i birbitem chuwäch.

28 Chichomaj jas ri quibano pa ri kʼij ri quiltajic jas ri quiban na. Chichʼajabaʼ iwib che ronojel ri tzʼilol ri cʼo chiwij. Mitzʼonoj jun tabal chuyaʼic jas curayij ri i tiojil. Tzare chitzʼonoj rucʼ jun utzalaj iwanimaʼ ri man salabam taj, rech cʼu jewaʼ man cʼo tä jun takchibal che mac ri quijach iwib chrij. Jewaʼ cʼut, quipatanij ri cʼaslic Dios ri cʼo ronojel ri kastzij rucʼ.

29 Chiwilaʼ baʼ iwib chi man cäban tä i kasabal xeʼ jaʼ we ix man xucʼ taj. Chiwilaʼ baʼ chi man quitij tä ri lokʼalaj jaʼ y ri lokʼalaj cäxlan wa we ix tzʼil. Chisucʼumaj iwib rech quiban ronojel rucʼ jun suqʼuilal. Chibanaʼ pa ri u biʼ ri Jesucristo, ri u Cʼojol ri cʼaslic Dios. Y we tä quiban jewaʼ riʼ, y we tä quikʼiʼo cʼä pa ri qʼuisbal, ix cʼu man cʼo tä u beyal quixqʼuiak taj apanok.

30 Chiwilampeʼ, quinbij chiwe je jas u beyal jun ri cätzijon chquixol ri cäminakib. Ri in cʼu wetaʼm chi quita na ri nu tzij.

31 Mikʼat itzel tzij panuwiʼ rumal rech ri man sucʼ taj quinbano. Mikʼat itzel tzij puwiʼ ri in tat rumal rech ri man sucʼ taj ri cuban ri areʼ. Xukujeʼ mikʼat tzij paquiwiʼ ri e tzʼibaninak nabe chuwäch ri in tat. Xane chimaltioxij che ri Dios rumal u cʼutunic chiwe chi man sucʼ taj ka banom. Jewaʼ quixcuinic quitijoj iwib rech quixux nim na i noʼj chkawäch uj.

32 Chiwilampeʼ cʼu riʼ, ka tzʼibam we tzijobal je jas u beyal ri ketamabal. Ka cojom chʼutin tak retal chutzʼibaxic. Chkaxol uj cäcojtajic u biʼ ri qʼuexatal chʼabal ri aj Egipto che we retal tzʼib riʼ. Jachatal can pa ka kʼab u banic we tak retal tzʼib riʼ. Ka jalom u banic che ri u beyal ri ka chʼabal uj.

33 Xkaj xkatzʼibaj che ri chʼabal aj Hebreo, tzare man kas tä nim qui wäch ri xaxalaj tak chʼichʼ chucojic ronojel ri tzij chuwäch. Je cʼu riʼ, ka jalom xukujeʼ u tzʼibaxic ri chʼabal aj Hebreo. Y we tä xujcuinic chutzʼibaxic che ri chʼabal aj Hebreo, cʼäte cʼu riʼ, man xriktaj tä mawi jun tzʼib ri man sucʼ tä u banic.

34 Tzare ri Ajawaxel cʼu retaʼm jas ri ka tzʼibam. Xukujeʼ retaʼm chi man cʼo tä jun winak chic ri cächʼoban ri ka chʼabal. Rumal cʼu riʼ, areʼ u sucʼumam jun beyal che ri u chʼobic.

35 Y xtzʼibatajic we tak tzij riʼ rech cächʼajtajic ri katzʼiak che ri quiqʼuel que ri kachalal, ri e kajinak pa ri man cojonic taj.

36 Chiwilampeʼ cʼut, cʼojinak jun rayibal pa ka cʼux chi cäbantaj na waʼ chque ri kachalal. Kas jeʼ, ka rayim chi quetzeletaj na pa ri etamabal re ri Cristo. Are waʼ ri ka rayim, are junam cucʼ ri tak qui chʼawem rucʼ ri Dios ri chʼajchʼojoxelab ri e cʼojinak waral cho waʼ ulew.

37 Cäkatzʼonoj chi ri Ajawaxel Jesucristo cutzelej na ulok u yaʼic jas ri qui tzʼonom che ri u beyal ri qui cojobal, y chi ri Tataxel cunatajisaj ri yabal u tzij ri xuban cucʼ ri e aj uwo rachoch ri Israel. Chi junalic quebutewichij, rumal ri qui cojobal che ri u biʼ ri Jesucristo. Amen.