1 Xcʼulmataj cʼu riʼ chi ri aj Nefitas xebel bic cucʼ ri ajchʼoʼjab pa ri jun ulew u biʼ Tzʼinowil. Xebel cʼu bic chuyaquic jun chʼoʼj chquij ri aj Lamanitas. Xbantaj ronojel waʼ pa ri junab trescientos sesenta y tres.

2 Y xcʼulmataj cʼut chi xetzelexic wi ri aj Nefitas cʼä pa ri jun ulew u biʼ Tzʼinowil. Y sibalaj e cosinak chic. Cʼäte cʼu riʼ, xepe cʼacʼalaj ajchʼoʼjab re ri aj Lamanitas, xepe chquij jumul chi na. Xbantaj cʼu riʼ jun cʼäxalaj chʼoʼj rumal rech chi ri aj Lamanitas xquichʼeco ri jun tinimit u biʼ Tzʼinowil. Y xequicämisaj qʼui aj Nefitas, y e qʼui xequicoj pa cheʼ.

3 Are cʼu riʼ xebel bic ri nicʼaj chic chquiwäch, y xeboc cucʼ ri winak ri e cʼo pa ri jun tinimit Teancum u biʼ. Cʼu ri tinimit u biʼ Teancum are cʼo pa ri takʼaj chuchiʼ ri nimalaj jaʼ, pa tak ri u cʼulbat ri ulew. Y cʼo chunakaj ri jun tinimit Tzʼinowil u biʼ.

4 Y ri ajchʼoʼjab re ri aj Nefitas xepetic pa chʼoʼj cʼä cucʼ ri aj Lamanitas. Y rumal cʼu laʼ xchap u sachic qui wäch. We tä ma tä qui banom tä jewaʼ, ma tä xechʼectajic tä cumal tak ri aj Lamanitas.

5 Chiwilampeʼ cʼut, ri kʼatow tak u tzij ri Dios quebuchʼec na ri itzel winak. Are cʼu riʼ cäcʼäjisaxic qui wäch ri itzel winak cumal ri itzel winak. Are riʼ ri itzel winak ri cäquitakchij ri acʼualab que ri winak pa canimaʼ, che u turuwisaxic ri quiqʼuel.

6 Xcʼulmataj chi ri aj Lamanitas xquisucʼumaj quib chubanic chʼoʼj chquij ri e cʼo pa ri tinimit Teancum u biʼ.

7 Xopan cʼu ri junab trescientos sesenta y cuatro, xcʼulmataj cʼut pa ri junab riʼ chi ri aj Lamanitas kas xquiban chʼoʼj chquij ri e cʼo pa ri tinimit Teancum. Xquiban waʼ che u chʼequic ri tinimit xukujeʼ.

8 Y xcʼulmataj cʼut chi ri aj Nefitas xebuchʼikimij bic apan y xebutak apanok. Ri aj Nefitas cʼut xequil ri aj Lamanitas e takom apanok, cʼäte riʼ xquinimarisaj quib che ri qui chukʼab. Y xebe cʼu apan, y xaʼ qui chukʼab cʼo u patan chque, y xechʼequic chic ri tinimit u biʼ Tzʼinowil.

9 Bantajinak chi ronojel waʼ, e cäminak qʼui mil winak chque ri quieb juchʼob riʼ, ri aj Nefitas y ri aj Lamanitas.

10 Xcʼulmataj cʼu riʼ, ocʼowinak chi ri junab trescientos sesenta y seis. Cʼäte riʼ xepe chic ri aj Lamanitas chquij ri aj Nefitas y xquiban chʼoʼj cucʼ. Tzare man xquiqʼuex tä qui cʼux che ri etzelal qui banom. Are cʼut xak xquitakej u banic ri itzel tak qui chac.

11 Y man cʼo tä u beyal chi cäkʼalajisax na rumal ri akʼaj o chi cätzʼibax na rumal jun achi jas ri u banic ri cʼäx rilic, ri quiqʼuel, y ri tiojil socotajinak chquixol ri winak, ri aj Nefitas y ri aj Lamanitas. Sibalaj xequicotic chuturuwisaxic quiqʼuel, laʼ rumal chi cowirinak conojel ri canimaʼ.

12 Y mawi jumul ojer canok bantajinak jun nimalaj etzelal je jas waʼ, chquixol conojel ri acʼalab re ri Lehi, mawi xukujeʼ chquixol conojel e aj uwo rachoch Israel. Waʼ je jas ri cubij ri u tzij ri Ajawaxel ri cʼo chquixol we winak riʼ.

13 Xcʼulmataj cʼu riʼ chi ri aj Lamanitas xquichʼeco ri tinimit Tzʼinowil. Xquiban waʼ rumal quech ri ajchʼoʼjab are qʼui na chquiwäch ri aj Nefitas.

14 Y xebec apan xukujeʼ y xquiban chʼoʼj chquij ri e aj ri tinimit Teancum, y kas xequiqʼuiak bic chilaʼ pa ri tinimit, conojel ri e cʼo chupam. Y xequichap y xequicʼam bic sibalaj winak, ri ixokib y ri acʼalab. Y xequicämisaj che tabal qui tokʼob ri alaʼs tak qui tiox.

15 Xopan cʼut ri junab trescientos sesenta y siete. Y pa ri junab riʼ, xcʼulmataj chi yacom coyowal ri aj Nefitas rumal ri qui cämisaxic ri quixokib y calcʼualab cumal ri aj Lamanitas. Rumal cʼu laʼ xebec apan chquij ri aj Lamanitas, y cʼo jun nimalaj oyowal pa canimaʼ. Y jewaʼ cʼut xequichʼec ri aj Lamanitas jumul chic y xequitak apan pa tak culew.

16 Cʼu ri aj Lamanitas xqueyej cʼä pa ri junab trescientos setenta cinco, rech xebec chic jumul chquij ri aj Nefitas.

17 Y pa ri jun junab riʼ xepe kajok chquij ri aj Nefitas. Xechʼoʼjin rucʼ ronojel qui chukʼab. Man xebajilataj tä cʼut rumal e qʼui winak riʼ.

18 Cʼäte cʼu banom chi waʼ, ri aj Nefitas man xequichʼec tä chic ri aj Lamanitas. Xchaplex cʼu riʼ u sachic qui wäch cumal, je ri cäjaric ri sak tew chuwäch ri kʼij.

19 Xcʼulmataj cʼu riʼ xepe kajok ri aj Lamanitas chrij ri tinimit u biʼ Tzʼinowil. Xbantaj cʼu riʼ jun nim cʼäxalaj chʼoʼj pa ri jun ulew u biʼ Tzʼinowil, y xequichʼec ri aj Nefitas pa ri chʼoʼj riʼ.

20 Y xebanimajic bic chic jumul chquiwäch, y xebopan cʼut pa ri jun tinimit u biʼ Boaz. Chilaʼ cʼut, utz xetaqʼuiʼc chquiwäch ri aj Lamanitas, rucʼ jun mayalaj cowil. Y jewaʼ cʼut ri aj Lamanitas man xequichʼec taj cʼä pa ri u camul qui kajibal chquij.

21 Kajinak ri e areʼ chquij, pa ri u camul, xequijach apan ri aj Nefitas, y xequicämisaj. Are sibalaj nim ri cämisabal xquiban chque. Y xecämisax chi jumul ri quixokib y calcʼual che tabal qui tokʼob ri alaʼs tak qui tiox.

22 Y xcʼulmataj chi ri aj Nefitas xebanimajic jumul chic chquiwäch, xequicʼam juntir ri qui winakil, ri e cʼo pa ri nim tinimit, y ri chʼutin tinimit.

23 In cʼu ri Mormón xinchʼobo chi ri aj Lamanitas chanim queboc na takanelab paquiwiʼ ri e cʼo pa ri ulew riʼ. Rumal cʼu laʼ xinbe pa ri jun juyub u biʼ Shim, xincʼam ronojel tak ri tzʼib ri u cʼuʼm canok ri Ammarón che ri tak u beyal ri Ajawaxel.