1 Are cʼu wachanim quinqʼuis u banic waʼ nu tzʼib, ri cätzijon che ri sachibal qui wäch nu winak ri aj Nefitas. Xcʼulmataj cʼut chi xujtzelejic apan cʼä chquiwäch ri aj Lamanitas.

2 Ri in, ri Mormón, in xintzʼibaj jun wuj che ri ajawinel ri cʼo paquiwiʼ ri aj Lamanitas. Y xintaʼ che ri areʼ chi cuyaʼ chke rech quekamulij ka winak cʼä pa ri ulew u biʼ Cumorah, chilaʼ chuxcut jun juyub u biʼ Cumorah. Jelaʼ cʼut rech cäkaban chʼoʼj cucʼ.

3 Xcʼulmataj cʼu riʼ chi ri ajawanel ri cʼo paquiwiʼ ri aj Lamanitas are xuyaʼ cʼolibal chwe chubanic jas ri xintaʼ che.

4 Xcʼulmataj cʼu riʼ chi xujbec apan cʼä pa ri ulew u biʼ Cumorah, y xkacoj ri ka panibal pa ri ulew. Y xkasutij chrij ri jun juyub u biʼ Cumorah. Y pa we ulew riʼ e cʼo qʼui tak chʼutin jaʼ, tak nimaʼ, tak u cʼux jaʼ. Y chilaʼ xkeyej chi we ne cäkachʼec na ri aj Lamanitas.

5 Y ocʼowinak chic trescientos ochenta y cuatro junab, cʼäte riʼ e ka mulim chic conojel ri nicʼaj chi ka winak chilaʼ pa ri ulew u biʼ Cumorah.

6 Y xcʼulmataj cʼu riʼ chi xekamulij conojel ka winak cʼä chi uj tzʼakat pa ri jun ulew u biʼ Cumorah. Chiwilampeʼ cʼut, in ri Mormón, xinriʼjobic y in wetaʼm chi are riʼ ri qʼuisbal chʼoʼj ri cäban cumal nu winak. Y ri Ajawaxel u takom chwe chi man quinyaʼ tä can ri tzʼib che kʼaxtaj pa qui kʼab ri aj Lamanitas. Ri tzʼib riʼ are sibalaj lokʼ qui banic, ri kʼaxem pa qui kʼab ri ka tataʼib. Rumal cʼu laʼ, xinban we jun tzʼib riʼ rumal u camulixic ri u tzʼibaxic ri tzij ri cʼo chuwäch ri xaxalaj tak u xak chʼichʼ re ri Nefi. Conojel tak ri tzʼib ri jachatal can pa nu kʼab rumal ri Ajawaxel xebinmuku pa ri juyub u biʼ Cumorah. Y xak cʼo jujun xaxalaj tak u xak chʼichʼ ri man xebinmuk taj, y waʼ xebinjach pa u kʼab ri nu cʼojol, Moroni.

7 Xcʼulmataj cʼut chi ri nu winak xequicaʼyej ri aj Lamanitas, cätajin quepetic cʼä chquiwäch. Are cʼo pa canimaʼ, ri jun cʼäxalaj xen ib ri cänojisan ri canimaʼ conojel ri itzel winak. Areʼ cʼut xqueyej cʼä xebopanic.

8 Xcʼulmataj cʼu riʼ, xquichap u banic qui chʼoʼj chkij. Y ronojel winak chke uj xnoj ranimaʼ che jun xen ib, rumal chi e qʼui winak quecʼulen chkij.

9 Xcʼulmataj cʼu riʼ xepe kajok chquij ri nu winak. Xquiban chʼoʼj chque rumal ri machet, y ri chʼab, y ri icʼaj, y che ronojel u wäch tak chacubal re chʼoʼj.

10 Xcʼulmataj cʼu riʼ xekasax riʼ ri wachijab. Kas jeʼ, xekasax riʼ ri lajuj mil achijab ri xecʼojiʼ wucʼ. Y xinsocotajic, xinkaj ulok chquixol. Xekʼax cʼu riʼ ri aj Lamanitas cʼä jawi kajinak wi in. Y man xinquil taj y man xinquichʼob taj, je cʼu riʼ, man xquiqʼuis tä nu wäch.

11 E kʼaxinak chic chkaxol. Y xequikasaj conojel nu winak pa ri ulew. Xak xuwi juwinak cajib chke uj ri man xekasax taj. Ri nu cʼojol, ri Moroni, are jun chke uj ri cʼä cʼaslic y man xsach tä ka cʼaslemal, man je tä jas ri nicʼaj chic ri xecämic. Y pa nim akʼab, xebel bic ri aj Lamanitas pa ri juyub Cumorah, y are tzelejinak pa ri qui cʼolibal, xekacaʼyej ri lajuj mil nu winak ri xekajic. In nu cʼamom qui be chquiwäch ri nicʼaj chic.

12 Y xekacaʼyej xukujeʼ ri lajuj mil nu winak ri cʼamom qui be ri nu cʼojol, ri Moroni.

13 Y xukujeʼ, e kajinak ri lajuj mil winak re ri Gidgiddona, y ri areʼ xukujeʼ xkaj wi chquixol.

14 E kajinak wi xukujeʼ ri Lámah cucʼ ri lajuj mil u winak. Y ri Gilgal are xkaj cucʼ ri lajuj mil u winak. Y ri Limhah xkaj cucʼ ri lajuj mil u winak. Ri Joneam xkaj cucʼ ri lajuj mil u winak. Junam riʼ e kajinak ri Camenihah y ri Moronihah y ri Antonium y ri Shiblom y ri Shem y ri Josh. Chiquijujun ri areʼ e kajinak cucʼ ri lajuj mil qui winak.

15 Xcʼulmataj baʼ riʼ, e cʼo na lajuj achijab chic ri xekajic che ri machet, chquijujun cʼo lajuj mil qui winak ri xekaj cucʼ. Kas jeʼ, xekaj conojel nu winak. Xak xuwi cʼo jujun ri xecʼasiʼc. Ri nicʼaj juwinak cajib ri xecʼojiʼ wucʼ, uj cʼaslic. Xukujeʼ cʼo jujun ri xebel bic cʼä pa tak ri tinimit ri e cʼo pa ri u wiquikʼab ri relbal kʼij. Xukujeʼ cʼo jujun ri xekʼax cucʼ ri aj Lamanitas. Y ri qui tiojil y qui bakil y qui quiqʼuel, ronojel riʼ e popoj cho ri u wäch ri ulew. Xyaʼ can riʼ rumal ri qui kʼab ri winak ri xequicämisaj. Y xyaʼ canok chi cächuwiric cho ri ulew, y cäkʼayic cʼut chi cätzelej can riʼ cho ri uwächulew.

16 Y xpax ri nu cʼux che ri nu bis, chquij ri nu winak ri xecämisaxic. Xinrak nu chiʼ, y xinbij:

17 ¡Ix ri jeʼlalaj tak winak, ma tä xijechʼebaʼ iwib pa tak u beyal ri Ajawaxel! ¡O Ix ri jeʼlalaj winak, ma tä xixutuj ri Jesús, ri xtaqʼuiʼc rech xixcʼamic rucʼ ri u kʼab licʼanic!

18 Kastzij, we tä ma tä i banom jewaʼ, man xixtzak tä cʼut. Chiwilampeʼ cʼut, ix, ix tzakinak, y quinbisonic chi ix sachinak.

19 ¡O ix ri jeʼlalaj tak cʼojolaxel y mialaxel, ix ri tataʼib y ri nanaʼib, ix ri jeʼlalaj, jasche xixtzakic!

20 Kastzij cʼu riʼ, ix benak chic, y man quixtzeletajic rumal tak nu bis.

21 Chanim cʼu cäpe chi ri kʼij, are ri i tiojil ri cäcämic cäqʼuex na rech man cäcäm tä chic. Wachanim cäkʼayiʼ ri i tiojil pa ri etzelal. Chanim cʼut cux na jun tiojil ri man cätzelex taj. Cʼäte cʼu riʼ, quixtaqʼuiʼ na chuwäch ri kʼatbal u tzij ri Cristo rech cäkʼat na tzij piwiʼ che tak u beyal ri i banom. Y we tä sucʼ ri i banom, cʼäte riʼ, quixtewichix na cucʼ ri i tataʼib, ri e petinak can chiwäch ix.

22 ¡O we tä i qʼuexom i cʼux nabe chuwäch ri u petic we nimalaj sachibal i wäch! Chiwilampeʼ cʼut, ix benak chic, y ri Tataxel, kas jeʼ ri Junalic Tataxel aj upa caj, areʼ retaʼm jas u beyal ri i suqʼuilal, y cuban na chiwe je ri u tokʼobisam wächaj y ri u kʼatbal tzij.