1 Chiwilampeʼ cʼu riʼ, cʼo nu rayibal quintzijon na jubikʼ chque ri nicʼaj chi we winak ri xyaʼ chque chi man xecäm taj. We tä ri Ajawaxel cuyaʼ ri nu tzij chque rech cʼu jewaʼ cäquetamaj na jas ri cʼulmam can chquixol ri qui tataʼib. Kas jeʼ quintzijon chiwe ix, ix ri nicʼaj winak ri cʼä e cʼaslic, elinak bic pa rachoch ri Israel. Are cʼu waʼ nu tzij ri quinbij chiwe:

2 Chichʼoboʼ chi ri ix elinak bic pa rachoch ri Israel.

3 Chichʼoboʼ chi rajwaxic chi quiban ri qʼuexbal i cʼux, o man quixcolotaj tä na.

4 Chichʼoboʼ chi rajwaxic quiyaʼ canok ronojel tak i banbal chʼoʼj. Y rajwaxic chi man quixquicot tä chic chrij ri u turuwisaxic quiqʼuel. Y rajwaxic chi man quichap tä chic ri i banbal chʼoʼj, xaʼ quixcuinic we cutak ri Dios chiwe che u chapic.

5 Chichʼoboʼ chi rajwaxic ri retamaxic jas u beyal qui banom ri i tataʼib. Rajwaxic quiqʼuex i cʼux. Rajwaxic quixcojon che ri Jesucristo, chi ri areʼ kas ri u Cʼojol ri Dios, y chi kas xcämisax cumal ri aj Judeyib. Y areʼ walajinak chic jumul rumal ri u cuinem ri Tataxel. Jewaʼ cʼut ri areʼ u chʼecom ri mukubal. Xumuchʼu ri cʼäxcʼolil re ri cämical.

6 Y cucʼulmatajisaj ri qui cʼastajisaxic ri cäminakib. Rumal riʼ, quecʼastaj na ri winak rech quebec y quetaqʼuiʼc chuwäch ri cʼolibal re ri kʼatbal u tzij.

7 Ri areʼ cʼut u cʼulmatajisam ri esabal macaj re ri winak ri e cʼo cho ri uwächulew. Apachin cʼut ri cäkʼalajisax chi man cʼo tä u mac, chilaʼ pa ri lokʼalaj kʼij re ri kʼatbal tzij, ri areʼ cʼut yatal na che u cʼolibal rucʼ ri Dios pa ri rajawibal. Chilaʼ cubixoj na junalic tak nimarisabal kʼijal chquixol ri mulaj tak bixonelab chilaʼ chicaj. Cubixoj na tak nimarisabal qui kʼij ri Tataxel, y ri Cʼojolaxel y ri Uxlabixel, e xaʼ jun Dios. Cʼo na pa jun quicotemal ri man cʼo tä u qʼuisic.

8 Rumal cʼu waʼ, chiqʼuexaʼ i cʼux, chibanaʼ ri kasabal xeʼ jaʼ pa ri u biʼ ri Jesús. Y chichapaʼ ri lokʼalaj u tzijobal ri Cristo, ri cäyataj na chiwäch. Man xak tä pa we tzʼib riʼ, xane xukujeʼ cäyataj na chiwäch ri jun tzʼib ri cäjach na chque ri qui kʼab ri aj Gentilib cumal ri aj Judeyib. Y cäpe na pa i kʼab ix cumal ri aj Gentilib.

9 Chiwilampeʼ cʼut, xtzʼibax waʼ rumal rech quixcojon che riʼ. Y we tä quixcojon che cʼu riʼ, quixcojon cʼu na che waʼ xukujeʼ. Y we tä quixcojon che cʼu waʼ quiwetamaj cʼu na ri qui cʼulmam ri i tataʼib. Y quiwetamaj na xukujeʼ ri mayalaj tak jastak banom can chquixol rumal ri u cuinem ri Dios.

10 Y quiwetamaj na xukujeʼ chi ri ix jun nicʼajil re ri rijaʼlil ri Jacob. Rumal cʼu waʼ, ix quixajilax cucʼ ri winak re ri nabe yabal tzij re ri Dios. Y quirik na utzilal pa ri kʼij re ri kʼatbal tzij. Waʼ we tä kas quixcojon che ri Cristo, y we tä quiban ri kasabal, nabe ri kasabal xeʼ jaʼ, cʼäte riʼ ri kasabal re kʼakʼ y re ri Uxlabixel. Waʼ chubanic je jas ri u banom ri Colonel, jas ri u beyal ri u takom ulok chke. Amen.